Atu 11
11
Pedru umbeu sesewara
1Asui kuaita apustuluita kuaita aintaimuita Kristu rese yuiri Jeruzalẽ kiti aintausendu aintausuanti Deus nyenga kuaita tiwaita judeu.
2Asui Pedru usuwaa upe Jeruzalẽ kiti kuaita sirkunsizão puraita aintaumbeu ixupe:
3—Marantaa resu aintapiri kuaita tiwaita sirkunsizão pura asui rembau aintairumu?
4Asui pedru unyee ainta supe, puranga maye usasawa uyupirunga sui, unyee:
5—Haiku rame kuera Jupi upe hapurandu Deus irumu, asui sekerupi ixe asui hamaa uwiye iwaka sui yepe fazenda uyupirari kuatru upenasawa irumu asui uri kuayentu seruaki.
6Asui hamaa puranga ixupe hamaa suu, nyãruwaita yuiri, maiwa yuiri, wirá yuiri.
7Asui hasendu yepe nyenga umbeu ixe arama:
—Pedru, repuamu, reyuká, rembau.
8Asui hasuaxara:
—Umbaa, seruixawa, nyãse tire hambau kua tenyuntuwara tiyuiri ikiawaita.
9Asui hasendu mukuĩsawa kua nyenga, umbeu:
—Teremanduari tenyuntuwaraita kua Deus uxariwaa ikiaimawaita.
10Yawe umunya musapiri viaji asui uyuiri iwaka kiti.
11Asui aramete musapiri apigawaita aintausika ukara kiti yaikuwaa upe umunduwaita Sezareya sui aintaumaa arama ixe.
12Asui kua espiritu umbeu ixe arama hasu arama aintairumu tiarama mukuĩ hamanduari, asui aintausu seirumu kuaita yuiri semuita Kristu rese asui yawike suka kiti nyã apigawa.
13Asui umbeu yande arama maye umaa yepe anju suka upe umbeu ixupe:
—Remundu Jupi kiti aintaururi arama nepiri Simão sera rakapirawaa Pedru.
14Ae kuri umbeu inde arama nyenga reyumukaturu aramawaa ipupe panye inde neruka puraita yuiri.
15Asui hayupiru irumu hapurungita ainta supe uwari aintarese kua Espiritu Santu kuaye uwariwaa yawe yanerese uyupirungawa upe.
16Asui hamanduari nyã nyenga Yaneruixawa umbeuwaa: "Supiwa Juão ubatizari ii irumu maa habatizari kuri penye Espiritu Santu irumu."
17Ape Deus uxari rame ainta supe kua uxariwaa yande arama yaxari irumu yanepia yaneruixawa Jesus rese, maataa maa ixe tiarama hamunya kua Deus uputariwaa?
18Asui aintaukiririntu aintausendu irumu kua inyenga asui aintaumee purangawaa Deus supe, aintaumbeu:
—Ape Deus uxari sasiyara aintaumanduari aintapekadu kuaita tiwaita judeu aintauriku arama mundu nunkawaa upawa.
Aintauruyari Deus nyenga Antiukia kiti
19Asui kuaita uyusaĩwaita aintauyuká resewara Estevão aintausu Fenisia kiti Xipri kiti Antiukia kiti yuiri, aintaumbeu kua nyenga ainta supenyu kuaita judewita.
20Maa yepeyepe aintasuiwara uriwaita Xipri sui Sireni sui yuiri aintausu Antiukia Kiti aintaumbeu yuiri greguita supe kua nyenga purangawaa yaneruixawa Jesus rese.
21Asui yaneruixawa uajudari ainta puranga asui siya miraita aintauruyari asui aintauyereu yaneruixawa banda kiti.
22Asui aintaresewara usika aintapiri kuaita ingreja puraita Jeruzalẽ kiti asui aintaumundu Barnabe Antiukia kiti.
23Asui usika aintapiri suuri ipia umaa irumu Deus grasa asui umbue ainta aintauiku arama santa yaneruixawa rese yawewarawate.
24Nyãse apigawa purangawaa ae, teresemu ipia Espiritu Santu irumu uruyari kirimbawa asui siya miraita aintauxari aintapia yaneruixawa rese.
25Asui Barnabe usu Tarsu kiti usikari arama Saulu.
26Asui uwasemu rire ae urasu ae Antiukia kiti. Asui aintaumbue siya miraita ingreja upe yepe akayu. Asui Antiukia upe aintauyupiru aintauseruka kristão muiri kuaita uruyariwaita.
Agabu utitika yumãsi rese
27Asui nyã tempu yepeyepe utitikawaita uri Antiukia kiti Jeruzalẽ sui.
28Asui yepe aintasuiwara serawaa Agabu upuamu utitika Espiritu irumu umbeu:
—Turusu kuri yumãsi upisika panye kua mundu upe. Asui aintaupurara yumãsi aintaruixawa pukusawa Klaudiu.
29Asui kuaita uruyariwaita aintaumuatiri aintamaa kuaye aintaupuderiwaa yawe aintaumundu arama ae ainta supe kuaita aintaimuita Kristu rese uikuwaita Judeya upe.
30Asui yawe aintaumunya, aintaumundu ae aintapiri kuaita ansiãoita Barnabe irumu Saulu irumu yuiri.
Currently Selected:
Atu 11: BBp
Highlight
Share
Copy
Want to have your highlights saved across all your devices? Sign up or sign in
© 2021 Missão Novas Tribos do Brasil
Todos os direitos são reservados à:
Missão Novas Tribos do Brasil
Rua Itália, Qd. 57 L. 5-7 - Santa Isabel
75083-310 Anápolis, GO
