Atu 9
9
Saulu utrukari umanduariwaa
1Maa kua Saulu umutawa ainta kuaita yaneruixawa umbuewaita uputari uyuká ainta, asui usu ipiri kua saserdutita ruixawa.
2Asui upurandu irumu urdẽ ainta supe kuaita usaruwaita sinaguga Damasku upe, urasu arama prezu Jeruzalẽ kiti panye kuaita uwasemuwaita usuwaita yaneruixawa rapee rupi, muiri apigawaita kunyaita yuiri.
3Asui usuwaa upe uiku pee rupi kuayentu Damasku sui kutara yepe turi umuturi sese iwaka sui.
4Asui uwari iwi upe, asui usendu yepe nyenga umbeu ixupe:
—Saulu, Saulu, marantaa remuruanyana ixe?
5Asui Saulu upurandu:
—Awataa inde seruixawa? Asui umbeu ixupe:
—Ixete Jesus kua remuruanyanawaa.
6Maa repuamu resu tetama kiti, akiti kuri aintaumbeu inde arama mayetaa kuri remunya aramawaa.
7Kuaita usuwaita irumu aintaupita aintaupuamu aintaukiririntu aintausendu kua nyenga maa timaa nungara aintaumaa.
8Asui Saulu upuamu iwi sui upirari sesa maa tiupuderi umaa. Asui aintawajudari ae aintaipu irumu aintaurasu ae Damasku kiti.
9Asui musapiri ara tiumaa, asui timaa uu nẽ umbau yuiri.
Anania umaa Saulu ipiri
10Ape Damasku upe yepe aintaumbuewaa serawaa Anania. Asui yaneruixawa umbeu ixupe ikerupiwaa upe:
—Anania. Asui usuaxara ae:
—Xukuite ixe, Seruixawa.
11Asui Yaneruixawa umbeu ixupe:
—Repuamu resu pee rupi serawaa Satambikawaa Juda ruka kiti, resikari yepe apigawa serawaa Saulu Tarsu suiwara nyãse upurandu Deus irumu.
12Umaawana yepe apigawa serawaa Anania uwike uka upe uxari ipu sese umaa arama mukuĩsawa.
13Maa Anania usuaxara ae umbeu:
—Seruixawa hasenduana siya miraita irumu sese nyã apigawa, umunya turusu puxi ainta supe kuaita neyaraita Jeruzalẽ upe.
14Asui kuiri urikuana urdẽ aintauxariwaa kuaita saserdutita ruixawaita umprezu arama panye kuaita usenuiwaita nerera rese.
15Maa Yaneruixawa umbeu ixupe:
—Resuana, nyãse haparawakawaa ae urasu arama serera ainta supe kuaita tiwaita judeu aintaruixawaita supe yuiri, ainta supe yuiri kuaita Israel rimiariruita.
16Nyãse hamukame umaa arama muiritaa kuri urikute upurara serera resewara.
17Asui Anania usu uwike uka kiti uxari ipu sese umbeu:
—Semu Saulu, Yaneruixawa Jesus kua remaawaa reyuiriwaa upe pee rupi umundu ixe remaa arama mukuĩsawa, teresemu arama inde Espiritu Santu irumu.
18Asui aramete uwari sesa sui pirá pirera yawewaa, asui upuderiana umaa mukuĩsawa. Asui upuamu asui uxari ubatizari ae.
19Asui umbau rire, kirimbawana uyusaã.
Saulu umbue Damasku upe
20Asui uikure yepeyepe ara Damasku upe aintairumu kuaita aintaumbuewaita asui umbue sinaguga upe Jesus rese, umbeu:
—Deus raira ae.
21Asui aintaakayemu aintausendu panye kuaita usenduwaita ae, aintaunyee:
—Maitaa tiserá aete kua apigawa umutawawaa ainta kuaita usenuiwaita Jesus rera rese Jeruzalẽ upe? Asui tiserá ae yuiri uri kua kiti upukuari arama urasu arama ainta saserdutita ruixawaita piri?
22Maa Saulu umbue kirimbawa piri, asui umukiriri kuaita judewita uikuwaita Damasku upe umbeu resewara Kristu kua Jesus.
23Asui Saulu umbue ainta siya ara asui kuaita judewita aintauyumuatiri uyumimisawa upe aintauyuká arama ae.
24Maa Saulu usendu sesewara. Aintausaru tetama rukena upe ara rame pituna rame yuiri aintauyuká arama ae.
25Maa kuaita aintaumbuewaita aintaurasu ae pituna rame aintauxari ae sextu upe aintaumuye ae kurara kupe sui.
Saulu usu Jeruzalẽ kiti
26Asui usika irumu Jeruzalẽ kiti uputari uiku aintairumu kuaita aintaumbuewaita maa aintausikie isui nyãse tiaintauruyari sã uruyariwaa ae.
27Maa Barnabe uxari uwike irumu, asui urasu ae aintapiri kuaita apustuluita asui umbeu ainta supe maye umaa yaneruixawa pee rupi, asui umbeu ainta supe maye yaneruixawa umbeu ixupe maye yuiri umbue tiutiĩ Jesus rera rese Damasku upe.
28Asui uiku aintairumu Jeruzalẽ upe uwata uyukuawa aintapiterupi, tiutiĩ umbue yaneruixawa rera rese.
29Umbeu ainta supe:
—Kuaita greguita asui uyusuaxara aintairumu, maa aintauputari aintauyuká ae.
30Asui imuita Kristu rese aintausendu sesewara asui aintaurasu ae Sezareya kiti, asui aintaumundu ae usu Tarsu kiti.
Uyukiriari Kristu ingreja
31Asui timaarese panye kuaita ingreja puraita panye Judeya kiti Galileya kiti panye Samaria kiti yuiri, asui aintauyukiriari puranga, aintauwata puranga yaneruixawa umaa, asui kua Espiritu Santu umusuuri ainta, asui siyapiriana kuaita ingreja puraita.
Pedru umukaturu Eneia
32Asui Pedru umaa aintapiri panye, asui usu yuiri umaa aintapiri kuaita uikuwaita Lida kiti.
33Akiti uwasemu yepe apigawa serawaa Eneia imembeka ae, urikuana uitu akayu uyenu ikama upe.
34Asui Pedru umbeu ixupe:
—Eneia, Jesus Kristu umukaturu inde, repuamu remukaturu nekama. Asui aramete upuamu.
35Asui panye kuaita Lida upewaita panye yuiri Saruna upewaita aintaumaa ae, asui aintautrukari aintaumanduariwaa yaneruixawa rese.
Durka upaka manusawa sui
36Aikue yepe kunya aintaumbuewaa Jupi upe serawaa Tabita yawesawa Durka, umunya turusu purangawaa, uajudari kuaita amuita yawewarawate.
37Asui nyã ara upete mãsi upisika ae asui umanu, asui aintaumuyasuka rire ipira aintauxari ae yepe ukapi iwatewaa kiti.
38Asui Lida uiku kuayentu Jupi sui; kuaita aintaumbuewaita aintausendu Pedru resewara asui aintaumundu mukuĩ apigawaita aintaumbeu arama ixupe:
—Reyuiriana yanepiri kutara.
39Asui Pedru upuamu usu aintairumu. Asui usika irumu aintaurasu ae ukapi iwatewaa kiti. Asui panye kuaita viuvaita aintaupuamu suaki aintauyaxiu, asui aintaumukame umaa panye rupa Durka umunyawaita uiku ramere aintairumu.
40Maa Pedru umusemu ainta panye asui uyurinipia upurandu Deus, asui uyereu ipira banda kiti umbeu:
—Tabita, repuamu. Asui upirari sesa, asui umaa irumu Pedru uyusikie uwapika.
41Asui upisika ae ipu irumu usupiri ae, asui usenui panye kuaita Deus iyaraita, kuaita yuiri viuvaita, asui uxari upakare ae ainta supe.
42Asui sesewara usika aintapiri panye Jupi kiti, asui siya miraita aintauxari aintapia yaneruixawa rese.
43Asui Pedru uiku siya ara Jupi kiti yepe apigawa irumu serawaa Simão upurakiwaa suu pirera.
Currently Selected:
Atu 9: BBp
Highlight
Share
Copy
Want to have your highlights saved across all your devices? Sign up or sign in
© 2021 Missão Novas Tribos do Brasil
Todos os direitos são reservados à:
Missão Novas Tribos do Brasil
Rua Itália, Qd. 57 L. 5-7 - Santa Isabel
75083-310 Anápolis, GO
