Santiago Ma̧ȩ 4
4
Dibëa̧ icjararä chjai̧dë üdë ta̧rëdiädëpea̧de, jabo Ütë tjamo̧ pio judimo̧rȩ ta̧rëdiäpea̧de
1Danȩrȩ ca̧ oti̧, dibëa̧ dëbëti̧ra̧ chia ërecjiape jänȩrȩ o judiro̧. Ma̧ȩ goaedëra̧ dëbë ni̧bätanȩrȩ, o ji̧ri̧iäpȩmo̧ goëdëri̧ cjiaji̧ri̧rȩ. ¿Jabo tjana̧ ju̧i̧iä ja̧di dari̧ japanȩrȩ? Yudiri cjitëde mȩnȩro̧ ërecjiarea̧ üdë? Yudiridë, jabechji̧ dibëa̧ chji̧ri pio judiri cjitëde. Chjai̧dë maea oa japatämi̧ cjiamȩ chji̧ri pio judiri cjitëde. 2Danȩrȩ, dibëa̧dë pio ju̧i̧ ea tjamo̧ji̧ri̧rȩ dae ja̧bo dae ja̧bo dae chjaonȩrȩ, jabo cjäri̧ manȩrȩ, mitërea̧ dadënȩrȩ. Ado pio ju̧i̧iä ana̧mȩ pio ju̧i̧ ja̧bo tänȩrea̧ jo̧rȩtanȩrȩ, jibëa̧remȩ pio ju̧i̧ mitërea̧ dapea̧ oa. Aja̧, dae ja̧bo dae ja̧bo dae chjaonȩrȩ, jabo mitërea̧ dadënȩrȩ. Ado pio ju̧i̧iä ërecjiape jänȩrȩ, ma̧ȩ goaedëra̧ dëbë ni̧bätaji̧ri̧rȩ. Ado mȩnȩro̧ Ütë tjamo̧ pio ju̧i̧iä chjadëri̧ cjo̧dëtärea̧ ji̧, cjo̧dëdë marenȩro̧jo̧ȩ, ado pio ju̧i̧iä mitërea̧ dadënȩrȩ. 3Ado mȩnȩro̧ orë, dëdë, Ütë tjamo̧ pio ju̧i̧iä cjo̧dënȩrȩ. Jabo cjäri̧ manȩrȩ, peaja̧di mitërea̧ dadënȩrȩ. Jabechji̧ mȩnȩro̧ chjadëri̧ jo̧rȩtadëji̧ri̧rȩ cjo̧dë oaiä, mitërea̧ dadënȩrȩ. Jabechji̧ mȩnȩro̧ chjadëri̧ cjo̧dëtärea̧ ji̧, dibëa̧ ma̧na̧ri̧ jo̧rȩtaji̧ri̧ maearë cjo̧dënȩrȩ, mȩnȩro̧ ea̧ pio ju̧i̧mo̧i̧ japapea̧ oa. 4Jabo cjäri̧ ma ca̧ oti̧, a̧dë chjäte oëra̧diäa̧nȩrȩ. A̧dë oëadëri̧ cjiayi̧ iei̧mi̧ danȩrȩ. Aja̧, iei̧ jini̧ jibëa̧ üi̧ oa eadëyi̧rȩ a̧dë oëadëri̧ cjiayi̧mi̧ dari̧ japea̧renȩro̧jo̧ȩ Ütë tjamo̧ ju̧i̧. Danȩrȩ, dai chirirä ja̧ jo̧rȩtarea̧ pio ju̧i̧ chjiari ¿dabadënȩrȩ? Dëdënȩrȩ, dabanȩrȩ. Pio jiro jo̧rȩtarea̧ pio ju̧i̧ chjiari tjamo̧ri̧ dabanȩrȩ. Jabo cjäri̧ manȩrȩ, mȩnȩro̧ dai chirirä ja̧ jo̧rȩtarea̧ oa eaji̧ri̧rȩ cjo̧ro̧rä judi, dai chiriräji̧ri̧ pio judiro̧ cjo̧ro̧mi̧ dari̧ cjo̧ro̧tämi̧ cjiarä judi, jabechji̧ tjamo̧ri̧ eadërenȩro̧jo̧ȩ Ütë tjamo̧ ju̧i̧, jabo dëbëpe chjaorenȩro̧jo̧ȩ ji̧dëri̧. Ado pio ju̧i̧iä yo̧requededibe ado. Eami̧ pumȩ üdë, dai chirirä ja̧ jo̧rȩtarea̧ maeara̧ jo̧rȩtatämi̧ cjiamȩ pio judi, dai chiriräpȩ cjo̧ro̧ji̧ri̧ pio ji̧ri̧ cho̧rëdiätämi̧ cjiamȩ judi, jabechji̧ Ütë tjamo̧ pio ju̧i̧ ërecjiamȩmi̧ dari̧ dëbëpe chjaodejȩ. 5Aja̧, ado pio ju̧i̧iä yo̧requededibe, 'ja̧di dari̧ cjo̧ro̧mȩ pio ju̧i̧ chjiari ma̧ȩ üdë badëri̧ go̧ȩpea̧ oa cjia jirodida' quëna̧ jo̧rȩtadëtäreji̧ri̧nȩrȩ. Jabechji̧ ba chia maeari̧ go̧ȩpea̧ oa cjiade Ütërë go̧ȩpa tänȩrërea̧ ma̧ȩ pio judi. Ta̧rëchji̧vä Tjo tjamo̧ pio ju̧i̧ chjiari ma̧ȩ oa:
“Aja̧, a̧ro̧rȩ Ütë tjamo̧ pio ju̧i̧iäpȩmo̧ ma jo̧rȩtadëji̧ri̧rȩ cjo̧ro̧rä judi, a̧ro̧rȩ teracaba oa gari̧pe gari̧pe jo̧rȩtaji̧ri̧mi̧ dari̧ jo̧rȩtarä judi, quëbamȩmi̧ dari̧ dadiibe Tjo tjamo̧ judi. Tjamo̧ davä. Ütë tjamo̧ judi ibëa̧ icjararä bëpapea̧ oa yürürërea̧ Tjo tjamo̧ pio judi quëbamȩmi̧ dari̧ jo̧rȩtadiibe a̧ro̧rȩ ja̧di dari̧ cjo̧ro̧a̧ oaiä.”
Aja̧, ja̧di ta̧rëri̧ go̧ȩpea̧ oa cjiade ma̧ȩ üdë. 6Ado a̧ro̧rȩ ja̧di dari̧ cjo̧ro̧chea oa, ji̧dë ma a̧dodiibe Ütë tjamo̧ judi. Jabechji̧ ibë cjäri̧ri̧ cjia jo̧rȩtamȩrȩ ji̧dë ma ju chiarea̧ yürüdiibe. Jabo jibëa̧ chji̧rämo̧ jo̧rȩtaji̧ri̧ pio ji̧ri̧, cjäri̧ madejȩrȩ, dëbëpe chjaomi̧ dari̧ japadejȩrȩ. Ado pio ju̧i̧iä ja̧di ta̧rëri̧ yo̧diibe ma̧ȩ üdë.
“Jibëa̧ chji̧rämo̧ jo̧rȩtaji̧ri̧ pio ji̧ri̧, ‘o ji̧ri̧ u̧i̧ ba chiaquëda’ quëna̧ji̧ri̧ pio ji̧ri̧, jabechji̧ dëbëpe chjaomi̧ dari̧ japadejȩrȩ Ütë tjamo̧ judi. Jabo pio ju̧i̧ ja̧ ma̧ȩrä cjo̧ro̧tämi̧ cjiaji̧ri̧ pio ji̧ri̧, ‘o judiro̧ coa u̧i̧ ba chiadiro̧da’ quëna̧ji̧ri̧ pio ji̧ri̧, jabechji̧ cjäri̧ri̧ cjia jo̧rȩtamȩrȩ a̧dodejȩrȩ, ju chiarea̧ yürümȩrȩ.”
Aja̧ ca̧ oti̧, ja̧di ta̧rëri̧ yo̧diibe ma̧ȩ üdë a̧ro̧rȩ ba chiadëmi̧ dari̧ cjo̧ro̧pea̧ pio ju̧i̧ chjiari.
7Ado pio ju̧i̧iä ta̧rëdiächji̧jo̧ȩ Ütë tjamo̧ pio ju̧i̧, pio ju̧i̧ ja̧ ma̧ȩrämo̧ cjo̧ro̧ji̧ri̧rȩ. Aja̧, ta̧rëdiächji̧jo̧ȩ, jabo chjuari̧ jiadachji̧jo̧ȩ Ichiae pio ju̧i̧. Jabechji̧ mȩnȩro̧ ja̧di dari̧ cjo̧ro̧rä judi, a̧dë baäpadidibe Ichiae judi. 8Ado pio ju̧i̧iä yo̧requededibe. Queri̧ cjiaparȩmi̧ dari̧ jo̧rȩtachji̧jo̧ȩ Ütë tjamo̧ ju̧i̧. Ado ano̧ mire jo̧rȩtachji̧vä mȩnȩro̧ chjai̧dëri̧ japea̧ pio ju̧i̧ chjiari. Jabechji̧ mȩnȩro̧ dai chirirä ja̧ jo̧rȩtarea̧ra̧ pio ju̧ri̧ra̧ jo̧rȩtatämi̧ cjia̧ pio ju̧i̧ chjiari ano̧ mire jo̧rȩtachji̧vä. Danȩrȩ, yo̧a̧ri̧ chji̧mi̧ dari̧ jo̧rȩtanȩrȩ. Jabo ja̧di dari̧ jo̧rȩtarërea̧ ji̧, cja̧rȩmȩ coëma maea oa jo̧rȩtachji̧vä Ütë tjamo̧ pio ju̧i̧, dai chirirä ja̧bo jo̧rȩtarërea̧ ji̧. Ado mȩnȩro̧ ja̧di dari̧ jo̧rȩta̧ oaiä, jabechji̧ queri̧räpȩ cjiami̧ dari̧ japapadidibe Ütë tjamo̧ judi. Ado pio ju̧i̧iä yo̧requededibe. Ano̧ mire jo̧rȩtachji̧vä mȩnȩro̧ chjadëri̧ joa̧ oa cjiami̧ dari̧ cjiapea̧ oa. 9Aja̧, gitori̧ jo̧rȩtachji̧vä mȩnȩro̧ chjai̧dëri̧ japea̧ pio ju̧i̧ chjiari. Jabechji̧ ejaro cjiami̧ tarari̧ jo̧rȩtachji̧vä. Mȩnȩro̧ airi̧ cjiari̧ jo̧rȩtarërea̧ ji̧, da ui gu̧rori̧ jo̧rȩtachji̧vä. Aja̧ ca̧ oti̧, mȩnȩro̧ ma̧ chiadëri̧ cjiari̧ jo̧rȩtarërea̧ ji̧, ana̧ri̧ jo̧rȩtachji̧vä mȩnȩro̧ oëra̧diäa̧ oaiä. 10'Jabechji̧ ba chiadëquëda, Ano̧mȩ pio judimo̧rȩ ba chiadida, pio ju̧i̧ ja̧ ma̧ȩrämo̧ cjo̧ro̧pea̧dida' quëna̧ jo̧rȩtariä cjo̧ro̧chji̧vä. Ado ja̧di dari̧ jo̧rȩtariä cjo̧ro̧a̧ oaiä, jabechji̧ ba chia maeaparȩpadidibe Ütë tjamo̧ judi.
Ibëa̧ oti̧ pio ji̧ri̧ ütarë da ëte aechide yo̧dë matäreji̧ri̧rea̧ro̧jȩrȩ
11Dibëa̧ dëbëti̧ra̧ chia ji̧dë ma goadi ya̧dëchji̧vä ca̧ oti̧. ‘Jabechji̧ pio jiro pumȩ üdë chjadëdëdida’ quëna̧ jo̧rȩtaji̧ri̧rȩ ütarë da ëte, aechide yo̧dëchji̧vä. Jabechji̧ jibëa̧ pumȩ ji̧ri̧ ütarë da ëte aechide yo̧mȩ judi ba chiadëparȩmi̧ dari̧ japadejȩ tüdüa̧mi̧ darä cjo̧ro̧pea̧ ma̧ȩ pio ju̧i̧. Aja̧, “Dibëa̧ i pio ju̧i̧ eami̧ eachji̧jȩrȩ pumȩ ji̧ri̧ ütëbodärä oa” yo̧mȩ ma̧ȩ pio ju̧i̧ ba chiadëparȩmi̧ dari̧ japadejȩ, o ji̧ri̧iäpȩmo̧ ütarë da ëte aechide yo̧a̧ pio ju̧i̧iä. Jabechji̧ pumȩ judi tüdüa̧mi̧ darä cjo̧ro̧pea̧ ma̧ȩ pio ju̧i̧ chjadëri̧ jo̧rȩtatärea̧ ji̧, ‘Aja̧, Ütë tjamo̧ ja̧ ma̧ȩ üdë chjadëdida, ta̧rëdiäpea̧ maeadida’ quëna̧tärea̧ ji̧, cjäri̧ madejȩ, ba chiadëparȩmi̧ dari̧ japadejȩ jënȩ ta̧rëdiädëa̧ oaiä. Ado ja̧di dari̧ japea̧ oaiä, jabechji̧ pio jiro ma̧ȩ oa ütarami̧ dari̧ japadejȩ, ‘ba chiadëdida, tjamo̧ri̧ ta̧rëdiädëpea̧dida’ quëna̧rea̧mi̧ dari̧. 12Jabo cjäri̧ manȩrȩ ca̧ oti̧, Ütë tjamo̧ pio judimo̧rȩ yürürëremȩde ma̧ȩ oa, tüdüa̧mi̧ darä cjo̧ro̧pea̧ ma̧ȩ oa. Ado pio ju̧i̧iä pio judimo̧rȩ ütarë yo̧pai̧ dadejȩrȩ pumȩ ji̧ri̧. Jabechji̧ tjamo̧ ütarë yo̧mȩ pio judimo̧de, a̧ro̧rȩdë. Ado tjamo̧ ütarë yo̧mȩ pio judi peaja̧di chjätärea̧ yürümȩ pio judide. Ado pumȩ pio ji̧ri̧ aeno̧mȩde peaja̧di. Jabo a̧ro̧rȩ, cjäri̧ marea̧rȩ, jabomo̧ pumȩrea̧rȩ. Ja̧di dari̧ japarea̧ chiadë marea̧rȩ. Ado pio ju̧i̧iä iëno̧ë ta̧rërequededibe. ¿Tjana̧ ju̧i̧iä ütarë da ëte, aechide yo̧renȩro̧jȩrȩ dibëa̧ pumȩ ji̧ri̧? Ütë tjamo̧ pio judimo̧de tjamo̧ ütarë yo̧mȩ judi. Jabechji̧ Ütë tjamo̧ pio judicji̧vanȩrȩ.
‘Jaco ja̧di dari̧ japajaa̧ro̧da’ quëna̧rea̧mi̧dëde
13Danȩrȩ, mȩnȩro̧ orë ja̧di ta̧rëri̧ yo̧nȩrȩ: ‘Aja̧, jaco pio ju̧ri̧pȩ baäpaquëda, pio jiro bë ma̧ri̧räpȩ baäpaquëda, cja̧rȩmȩ ui codë oa ja̧bepapea̧ oa baäpaquëda, chëre ji̧ra̧ tjamo̧ oa boapea̧ oa baäpaquëda’ quëna̧ jo̧rȩtaji̧ri̧rȩ yo̧nȩrȩ. 14Jabo cjäri̧ manȩrȩ ca̧ oti̧, tjamo̧ri̧ dabadënȩrȩ. Mȩnȩro̧ jaco tjamo̧ri̧ japapea̧ ji̧ dabadënȩrȩ. Chjaodëri̧ ja̧bopai̧ danȩrȩ. Danȩrȩ, gȩnȩ tjomo̧ro chjaodëri̧ cjatäpai̧ dadiibe jurucjü üdë, jabo japamitë boi̧chji̧ chjätä ëte, chjaodëri̧ goarijäpai̧dade. Ado peaja̧dimi̧ danȩrȩ mȩnȩro̧. Chjaodëri̧ ja̧bopai̧ danȩrȩ. Chjaodëri̧ goarijäpai̧ dade a̧ro̧rȩ cjo̧ro̧pea̧ japamitë üdë. 15Ado pio ju̧i̧iä yo̧requededibe. Mȩnȩro̧ eami̧ oa japarea̧ jo̧rȩtarä judi, jabechji̧ ja̧di dari̧ yo̧täreji̧ri̧nȩrȩ: Aja̧, ca̧ Ano̧mȩ judi japarea̧ yürürä judi, ‘ja̧di dari̧ japajaquëda, ca̧ Ano̧mȩ judi järea̧ yürürä judi, ju̧ri̧pȩ jäpaquëda’ quëna̧ jo̧rȩtaji̧ri̧rȩ yo̧täreji̧ri̧nȩrȩ. 16Jabo ja̧di dari̧ ni̧bädë manȩrȩ mȩnȩro̧. Jabechji̧ chjadëri̧ ni̧bätärea̧ ji̧, dibëa̧ chji̧rämo̧ jo̧rȩtataji̧ri̧rȩ ni̧bänȩrȩ. Dibëa̧ chja̧oerä cjiaji̧ri̧rȩ goaeri̧ yo̧nȩrȩ, mȩnȩro̧ japapea̧ pio ju̧i̧ chjiari. Jabo cjäri̧ ma ca̧ oti̧, ja̧di dari̧ ni̧bäpea̧ üdë chjai̧dëde. 17Jabechji̧ coëma cjiari̧ japapea̧ ji̧ dabamȩ pio judi coëma cjiari̧ japatäremȩde. Ado chjadëri̧ japapea̧ ji̧ dabamȩ judi, peaja̧di chjadëri̧ japatäremȩde. Jabechji̧ pumȩ judiro̧ Ütë tjamo̧ ja̧ ma̧ȩ oa dabapea̧mi̧ japadërä judi, chjai̧dëri̧ japadirȩ.
©2021 Global Partners, All Rights Reserved