Santiago Ma̧ȩ 5
5
Santiago judi uapai̧ ta̧rëri̧ chi̧dëearëremȩdejȩrȩ ji̧ra̧ri̧ goaji̧ri̧ pio ji̧ri̧
1Ado a̧dë chjäte ji̧ra̧ri̧ goaji̧ri̧ pio judiro̧ chjadëri̧ ta̧rëtädiro̧coe pio yoa ma̧ȩ oa. Danȩrȩ, a̧dë chjäte chjai̧dë üdë acji jana̧padidibe. Pio ju̧i̧iä ejaro cjiatäreji̧ri̧nȩrȩ. Aja̧, a a ma cjiari̧ ëna̧diä ëna̧diä ejaro cjiatäreji̧ri̧nȩrȩ. 2Jabechji̧ mȩnȩro̧ goa̧ pio ju̧i̧ badëpe bagapamȩ maea oa goanȩrȩ, mȩnȩro̧ boea̧ ba chia pio ju̧i̧. Goarijäpadidibe. Cuiu pio oaiä co chia mapadidibe dibëa̧ chjibo chjacjiamȩremȩ üdë. 3Dëdë, cjiadiäa̧ japamitërä ji̧ra̧ tjamo̧ oa goapea̧ oa boea̧ oa goatanȩrȩ, jabo cjäri̧ madidibe, a̧dodëpadidibe. Jabechji̧ dibëa̧ oro üdë, dibëa̧ parata üdë ë chiape järea̧mi̧dëräbo, ë chiape jä mapadidibe. Ado pio jiro ë üdë aechide yo̧mi̧ tarari̧ na̧rȩpade pio dibë chjiari. Jabechji̧ mȩnȩro̧ nȩmȩpaji̧ri̧rȩ cjo̧ro̧a̧ pio ju̧i̧ chjiari, mȩnȩro̧ chëre boarea̧ pio ju̧i̧mo̧i̧ jo̧rȩtaji̧ri̧rȩ cjo̧ro̧a̧ pio ju̧i̧ chjiari na̧rȩpade pio jiro ë üdë. Ado pio ju̧i̧iä cjo̧dë üdë jurachämi̧ tarari̧ tüpadejȩ dibëa̧ go̧a̧ pio ju̧i̧, dibëa̧ icjara pio ju̧i̧. 4Danȩrȩ, dibëa̧ tjadoräpȩ ja̧bepaji̧ri̧ pio ji̧ri̧ chjadëri̧ ba ano̧tärea̧ ji̧, joechjapea̧mȩ jurarea̧ oa mitëa̧ji̧ri̧ pio ji̧ri̧ nö̧tadäräri̧ ba ano̧tärea̧ ji̧, cjäri̧ marenȩro̧jȩrȩ, o oamo̧i̧ yürüa̧renȩro̧jȩrȩ, pio mȩnȩro̧ o oa baë mitëji̧ri̧rȩ. Jabo a̧dë chjäte jauëchjamȩ Ano̧mȩ judi pio dibë chjiari dabadë ma ja̧didë, jabo dabade. Dabade davä mȩnȩro̧ chjai̧dëri̧ japea̧ pio ju̧i̧ chjiari. Jabechji̧ pio jȩaiä ji̧dë ma goë cjo̧dëji̧ri̧ pio ji̧ri̧ cjäri̧ri̧ cjiamȩrȩ ta̧rëdejȩrȩ jibëa̧ chëre oa mitërea̧ dadëji̧ri̧ pio ji̧ri̧. 5Jabo cjäri̧ manȩrȩ, mȩnȩro̧ pio yoa chirirä cjo̧ro̧a̧ nö̧ta, dibëa̧ maea oa jo̧rȩtaji̧ri̧rȩ goae tarari̧ cjo̧ro̧nȩrȩ, jabëdiärea̧ decjiari̧. Dami̧ti̧ ba chiati̧ oa goaji̧ri̧rȩ cjo̧ro̧nȩrȩ, babui̧ra̧ airi̧ cjia airi̧ cjia a̧dopë juraji̧ri̧rȩ. Jabechji̧ ji̧dë ma juranȩrȩ na̧e chiadërë, ja̧bo tänȩpea̧ baca yo̧ tjamo̧mi̧ darë. Jabo mȩnȩro̧ daba quëna̧dërä, chjaodëri̧ acji jana̧padidibe bape chjaopea̧ do üdë. 6Jabechji̧ eami̧ oa japadëji̧ri̧ oa, chjai̧dëri̧ japadëji̧ri̧ oa, jabo coëma cjiari̧ cjo̧ro̧ji̧ri̧ oa ja̧bo tänȩa̧renȩro̧jȩrȩ. 'Aja̧, chjai̧dëdiro̧da, ja̧bopea̧ maeadiro̧da' quëna̧ jo̧rȩtaji̧ri̧rȩ ja̧bo tänȩa̧renȩro̧jȩrȩ, pio dibëiäpȩmo̧ dëbëpe chjaomi̧ dari̧ japadëji̧ri̧ oa. Aja̧, pio ju̧i̧mo̧i̧ ma̧ȩ oa ni̧bärequededibe ji̧ra̧ tjamo̧ oa goaji̧ri̧ pio ji̧ri̧iäpȩmo̧.
Ma̧ chjua cjo̧ro̧chji̧vä chjai̧dë oa chjätäräbo
7Ja̧di tara ca̧ oti̧, jabechji̧ ma̧ chjua jo̧rȩtaji̧ri̧rȩ cjo̧ro̧chji̧vä. Chëre ji̧ra̧ri̧ goaji̧ri̧ pio judiro̧ dibë conȩdaräbo, mȩnȩro̧ eami̧ti̧ chjai̧dë oa chjätäräbo, jabechji̧ jëreeadëji̧ri̧rȩ ma̧ chjua cjo̧ro̧chji̧vä ibëa̧ Ano̧mȩ judi jana̧rä yuro. Danȩrȩ, tjado ana̧mȩ judi cho oa ponȩ ëte, jabechji̧ jëreeadëmȩrȩ jidatadejȩ pearä cjüpamȩ ui pio ju̧i̧, ji̧dë duri oa cjüpamȩ uibo. Jabechji̧ jëreeadëmȩrȩ ma̧ chjua jidatadejȩ daburi pio judiri cjitëpamȩ jurarea̧ goae oa. 8Ado peaja̧dimi̧ dari̧ cjo̧ro̧täreji̧ri̧nȩrȩ ma̧ chjua cjo̧ro̧ji̧ri̧rȩ, jëreeadërea̧ decjiari̧ jidataji̧ri̧rȩ. Aja̧, järidëpe bagarea̧ decjiari̧ jo̧rȩtatäreji̧ri̧nȩrȩ dibëa̧ chji̧rä, chjai̧dë oa chjätäräbo. Jabechji̧ Ano̧mȩ judi jana̧pea̧ ji̧ querediä tjamo̧de.
9Ado danȩrȩ, dibëa̧ pumȩ pio ji̧ri̧ chjiari ma̧ȩ goaedëra̧ ni̧bädëchji̧vä. Jabechji̧ tjamo̧ ütarë yo̧mȩ pio judi jana̧pea̧ ji̧ querediä tjamo̧didibe. Ado mȩnȩro̧ chjai̧dëri̧ ni̧bäa̧ pio ju̧i̧ chjiari ütara̧ oa cjiachea oa, dibëa̧ pumȩ pio ji̧ri̧ chjiari chjadëri̧ ni̧bädëa̧ pio ju̧i̧ chjiari ütara̧ oa cjiachea oa, jabechji̧ japadëchji̧vä. 10Danȩrȩ ca̧ oti̧, jo̧rȩtatäreji̧ri̧nȩrȩ Ütërë ea jana̧ chjadüa̧ oa ni̧bärëreji̧ri̧ pio ji̧ri̧. Jabechji̧ Ano̧mȩ pio ju̧i̧ ja̧ quȩrä ni̧bärëreji̧ri̧dirȩ. Ado judiro̧ dami̧ti̧ chjai̧dë oa chjätäa̧räbo, ji̧dë ma ma̧ chjua cjo̧ro̧rëreji̧ri̧dirȩ, jaepeparea̧ decjiari̧. Aja̧, jëreeadëji̧ri̧rȩ quëna̧rëreji̧ri̧diro̧jo̧ȩ Ütë tjamo̧ ju̧i̧. Ado pio ji̧ri̧ cho̧rë jo̧rȩtatäreji̧ri̧nȩrȩ. 11Danȩrȩ, ba chia jo̧rȩtatäreji̧ri̧rea̧ro̧jȩrȩ chjuari̧ quëna̧rëreji̧ri̧ pio ji̧ri̧, chjai̧dë oa chjätäa̧räbo ma̧ chjua cjo̧ro̧rëreji̧ri̧ pio ji̧ri̧. Tjamo̧ davä. Goae tjamo̧dë oa chjätäa̧räbo jëreeadëji̧ri̧rȩ quëna̧rëreji̧ri̧ pio ji̧ri̧, ba chia tjamo̧ jo̧rȩtatäreji̧ri̧rea̧ro̧jȩrȩ. Ado pio ju̧i̧iä Jobo quȩmȩrea̧ pio ju̧i̧bo ba chia jo̧rȩtatäreji̧ri̧rea̧ro̧jo̧ȩ ca̧ pumȩ. Danȩrȩ, judi chjai̧dë oa chjätäa̧räbo, ma̧ chjua jo̧rȩtarëremȩde, Ütë tjamo̧ ju̧i̧ ji̧dë ma̧ chjuari̧ quëna̧mȩrȩ. Ado a̧ro̧rȩ Jobo pio ju̧i̧ ütarë jo̧rȩta̧ oaiä, ‘Aja̧, Ano̧mȩ judi dabamȩrȩ ütararëremȩdiji̧da, ado cjäri̧ri̧ cjiamȩrȩ a̧doa̧diji̧da, ado pio jiro chjai̧dë oa chjätäa̧ oaiä ji̧dë u̧i̧ na̧e chiape bagarëremȩdida, ji̧dë u̧i̧ chjuari̧ quëna̧mȩpea̧dida’ quëna̧ jo̧rȩtatäreji̧ri̧rea̧rȩ Ütë tjamo̧ pio ju̧i̧ chjiari, Jobo quȩmȩrea̧ pio ju̧i̧ chjiari.
12Ado ca̧ oti̧, pio yoa ma̧ȩ oa a̧de yürütämi̧ cjiarequededibe ma̧ȩ ba chia oa. Danȩrȩ, mȩnȩro̧ ni̧bärä, mȩnȩro̧ eami̧ oa yo̧ë cji̧därä, jabechji̧ tjamo̧i̧ cjiari̧ yo̧ji̧ri̧rȩ yo̧chji̧vä, quȩ ba chiara̧ a̧de yo̧rea̧ decjiari̧. Ado ‘tjana̧ yo̧cjivadi’ quëna̧chea oa, jabechji̧ chjadëri̧ yo̧parequededibe. Danȩrȩ, mȩnȩro̧ ni̧bärä, “Aja̧, a̧dëräpȩ cjiamȩ pio ju̧i̧ ja̧ quȩrä tjamo̧i̧ cjiari̧ yo̧requededibe” yo̧dëchji̧vä. “Daburäpȩ cjo̧ro̧mȩ ja̧ quȩrä tjamo̧i̧ cjiari̧ yo̧requededibe” peaja̧di yo̧dëchji̧vä. Jabechji̧ mȩnȩro̧ eami̧ oa ni̧bärä, mȩnȩro̧ eami̧ oa yo̧ë cji̧därä, jabechji̧ tjamo̧ri̧ cjiari̧ yo̧chji̧jȩrȩ, eami̧ ja̧ quȩrä a̧de yo̧rea̧ decjiari̧. Jabechji̧ mȩnȩro̧, “Aja̧, ja̧di dari̧ japaparequede” yo̧ro, tjamo̧i̧ cjiari̧ yo̧chji̧vä eami̧ ja̧ quȩbo a̧de yo̧rea̧ decjiari̧. Mȩnȩro̧ “pa” yo̧a̧ ji̧, jabechji̧ tjamo̧i̧ cjiari̧ yo̧chji̧vä. Ado mȩnȩro̧ “cjäri̧ ma” yo̧a̧ ji̧, peaja̧di tjamo̧i̧ cjiari̧ yo̧chji̧vä. Aja̧, ja̧di dari̧ cjo̧ro̧chji̧vä ca̧ oti̧, Ütë tjamo̧ judi dibë ütarë da ëte bide cjaeämi̧ dari̧ japachea oa.
Ütë tjamo̧ ju̧i̧ ji̧dë ma jo̧rȩtapea̧de
13Eami̧ pumȩ üdë chjai̧dë oa chjätämȩrȩ cjo̧ro̧rä judi, Ütë tjamo̧ pio ju̧i̧iä goë cjo̧dëtäremȩdejȩ. Ado eami̧ pumȩ üdë ma̧ chiadëri̧ cjiarä judi, jabechji̧ Ütë tjamo̧ pio ju̧i̧iäpȩmo̧ chjacjiamȩri̧ go̧a̧täremȩdejȩ. 14Ado eami̧ pumȩ üdë gito ja̧borä judi, pio jȩaiäpȩ jana̧tä yo̧ chjadütäremȩdejȩrȩ tjamo̧ jidaji̧ri̧ pio ji̧ri̧iäpȩmo̧. Ado gito ja̧bomȩ pio ju̧i̧ ja̧ tjübërä yo̧ra̧ pio ju̧ri̧ra̧ joatäreji̧ri̧diro̧jo̧ȩ Ano̧mȩ pio ju̧i̧ ja̧ quȩrä. Ado ja̧di dari̧ japa ëte, pio ju̧i̧ chjiari goë cjo̧dëtäreji̧ri̧dirȩ Ütë tjamo̧ pio ju̧i̧iä. 15Ado Ütë tjamo̧ pio ju̧i̧ quëna̧ji̧ri̧rȩ goë cjo̧dëa̧ oaiä, cjatäcjiarea̧ dapai̧ dade gito ja̧bomȩ judi. Jabechji̧ tjamo̧ jidaji̧ri̧ judiro̧, ‘Aja̧ Ütë tjamo̧ judi chjaparȩmȩdida, ado pio yodëje cjatäcjiarea̧ datä earä judi, chjaodëri̧ chjaparȩpai̧ dadiji̧da’ quëna̧ jo̧rȩtaji̧ri̧rȩ goë cjo̧dëa̧ oaiä, dëdë, chjaparȩa̧ oa cjiapai̧ dade gito ja̧bomȩ judi. Ado judi chjai̧dëri̧ japea̧rä judi, ado judi goadidëmȩrȩ chjadëri̧ jëdano̧a̧rä judi, jabechji̧ duridëparȩa̧ oa cjiapade. 16Ado pio ju̧i̧iä yo̧requededibe ca̧ oti̧. Danȩrȩ, mȩnȩro̧ chjai̧dëri̧ japea̧rä judi, jabechji̧ goadirea̧ decjiari̧ ni̧bätäreji̧ri̧nȩrȩ mȩnȩro̧ chjai̧dëri̧ japea̧ pio ju̧i̧ chjiari. Jabechji̧ ja̧di dari̧ ni̧bätäreji̧ri̧nȩrȩ dibëa̧ dëbëti̧ra̧ chia, oëra̧diäa̧mȩ pio ju̧i̧ chjiari goë cjo̧dëpea̧ oa, judi no̧räpȩmo̧diämi̧ dari̧ cjiapea̧ oa, judi chjaparȩa̧ oa cjiapea̧ oa. Jabechji̧ coëma cjiari̧ cjo̧ro̧mȩ judi Ütë tjamo̧ pio ju̧i̧iä goë cjo̧dëa̧ üdë ba chia tjamo̧de. Ju chia tjamo̧mi̧ dari̧ cjiade Ütë tjamo̧ pio ju̧i̧iä. 17Danȩrȩ, no̧mȩ cjo̧ro̧rëremȩ üdë, Ütërë ea jana̧ chjadüa̧ oa ni̧bämȩrȩ cjo̧ro̧rëremȩ üdë, Eria quȩmȩrëremȩde. Pio a̧ro̧rȩmi̧ dari̧ cjo̧ro̧rëremȩde. Ibëa̧ chji̧ pio ju̧i̧ chiami̧ dari̧ jo̧rȩtarëremȩde. Ado judi järi tjamo̧mȩrȩ ana̧ri̧ goë tuti cjo̧dërëremȩde Ütë tjamo̧ pio ju̧i̧iä cjüdëtä, japamitë ana̧ tjamo̧ri̧ cjüdëtä. Ado järidëpe bagadëmȩrȩ goë cjo̧dë chjaoa̧ oaiä, jabechji̧ tjarari̧ ui nö̧ta cjüdë marëremȩde, 6 gupënȩra̧ a̧de. Pearä cjürërea̧mi̧ cjütärea̧ ji̧, cjüdë marëremȩde. 18Ado ja̧dëa ji̧ japamitë chjätä ëte ado chjereno̧ cjütä eamȩrȩ goë cjo̧dëa̧ oaiä, jabechji̧ ado chjereno̧ cjürëremȩde. Ütë tjamo̧ pio judi tänȩa̧ oaiä, ado chjereno̧ cjürëremȩde chiri üdë jurarea̧ oa ado chjereno̧ goae tarari̧ yürürea̧mi̧ dari̧. Ado danȩrȩ, Eria judi chjuari̧ quëna̧mȩrȩ goë cjo̧dërërea̧mi̧ goë cjo̧dëpai̧ darea̧rȩ peaja̧di ca̧ oti̧. Jabechji̧ pio a̧ro̧rȩmi̧ dari̧ cjo̧ro̧rëremȩ pio ju̧i̧ cho̧rëdiätäreji̧ri̧rea̧ro̧jo̧ȩ.
Oëra̧diäa̧ji̧ri̧ pio ji̧ri̧ a̧dopea̧de
19Danȩrȩ, eami̧ pumȩ üdë, dibëa̧ chjarerä cjo̧ro̧mȩ judi oëra̧diäpai̧ dade. Tjamo̧i̧ cjiari̧ baämȩ ma̧ȩ pio ju̧i̧ putu jura̧ a̧dë chami̧ dari̧ jo̧rȩta̧ oaiä, jabechji̧ oëra̧diäpai̧ dade. Ado mȩnȩro̧ orë pio ju̧i̧ a̧dorä judi, no̧dë oa jämi̧ dari̧ japamȩ ju̧i̧ no̧räpȩmo̧diämi̧ dari̧ a̧dorä judi, jabechji̧ chjadë tjamo̧de. 20Jabechji̧ chjai̧dëri̧ japamȩrȩ oëra̧diäa̧mȩ ju̧i̧ a̧domȩ pio judi, chjätä tänȩmi̧ dari̧ a̧dodejȩ. Aja̧, oëra̧diäa̧mȩ pio judi ja̧botärea̧ ji̧, chjätä tänȩmi̧ dari̧ a̧dodejȩ. Ado pio ju̧i̧ chjadëri̧ dabatäreji̧ri̧nȩrȩ ca̧ oti̧. Jabechji̧ judi oëra̧diäa̧ oaiä ja̧botärea̧ ji̧, duridëparȩa̧ oa cjiapade a̧domȩ pio judi chjadëri̧ a̧doa̧ oaiä.
Aja̧ ca̧ oti̧, pio ju̧i̧mo̧i̧ ma̧ȩ oa go̧ȩpe chjadürequededibe. Jabechji̧ cjo̧ro̧chji̧ibe.
Dibëa̧ omȩ, Santiago.
©2021 Global Partners, All Rights Reserved