Santiago Ma̧ȩ 3
3
Ibëa̧ tjopono̧ üdë uapai̧ dade
1Danȩrȩ ca̧ oti̧, a̧ra̧ano̧rea̧ oa jabë ja̧bepadëji̧ri̧ pio judiro̧ jëreea tjamo̧dëtäreji̧ri̧dirȩ Ütë tjamo̧ ja̧ ma̧ȩ oa a̧ra̧ano̧pea̧ ji̧. Jabechji̧ ji̧dë u̧i̧ järide Ütë tjamo̧ judi pio ibëiäpȩmo̧ ütarapea̧ ji̧, a̧ra̧ano̧ji̧ri̧ pio ji̧ri̧. Jabechji̧ a̧ra̧ano̧rea̧ üdë chjaocjiadërea̧de, jabo ja̧beparea̧ ba chia tjamo̧de. Ado pio ju̧i̧iä ji̧dë u̧i̧ järide pio ibë ütarapea̧ ji̧ a̧ro̧rȩ oëra̧diäa̧ oaiä. Aja̧ ca̧ pumȩ, pio ju̧i̧ tjamo̧ri̧ dabanȩrȩ. Jabo dëdë, a̧ra̧ano̧dëji̧ri̧ pio ji̧ri̧bo ütarapadejȩrȩ, jabo ji̧dë u̧i̧ järide pio ibë japapea̧ ji̧. 2Jabechi̧ a̧ro̧rȩ quëna̧ji̧ri̧ judiro̧ ütëbodärärë oëra̧diäpai̧ darea̧rȩ. A̧ro̧rȩ ütëbodärärë chjai̧dëri̧ japapai̧ darea̧rȩ. Ado ibëa̧ tjopono̧ra̧ pio ju̧ri̧ra̧ peaja̧di chjai̧dëri̧ jape chjaorea̧rȩ. Jabo eami̧ pumȩ üdë, jibëa̧ tjopono̧ oa chjadëri̧ jida̧ oa goamȩ pio judi, jibëa̧ tjopono̧ra̧ oëra̧diächea oa chjadëri̧ jida̧ oa goamȩ pio judi, jabechji̧ üi̧padäräa̧ oa cjiami̧ dari̧ cjo̧ro̧de. Jabechji̧ jibëa̧ tjopono̧ oa chjadëri̧ jida̧ oa goamȩ pio judi, peaja̧di jibëa̧ icjara codë oa chjadëri̧ jida̧ oa goapadejȩ, jibëa̧ icjarara̧ pio ju̧ri̧ra̧ oëra̧diächea oa. 3Danȩrȩ, yae buamȩ judi yarä a̧rȩmȩ cä pio ju̧i̧iä mu̧i̧ gatë baä tänȩdejȩ eami̧räpȩ, jënȩ eami̧. Jabechji̧ yarä a̧rȩmȩ cä pio ju̧i̧iä chjadëri̧ jida̧ oa goadejȩ yae oa. 4Ado danȩrȩ ca̧ oti̧, ui ana̧räpȩ baämȩ uimo̧mȩ cjo̧dë chara üdë boi̧dë tjamo̧de. Jabo pio jiro uimo̧mȩ üdë boi̧dë tjamo̧räbo, jabechji̧ tjamo̧ tai̧mȩ judi chjadë maeari̧ mu̧i̧ ja̧ȩpariä bagura tänȩdejȩ, jënȩ eami̧räpȩ baguratämi̧ cjiarä. Jabechji̧ ma̧i̧ da gö̧ma̧räbo, chjadë maeari̧ mu̧i̧ ja̧ȩpariä bagura tänȩdejȩ ëteri ja̧mȩ to pjatë boi̧chji̧ra̧ pio ju̧ri̧ra̧. 5Ado pumȩ ja̧ tjopono̧ üdë peaja̧di boi̧chji̧de. Jabo boi̧chji̧ tjamo̧räbo, ju chiami̧ dade. Uapai̧ dade. Chjai̧dëri̧ japapea̧ oa ju chia tjamo̧mi̧ dade. Aja̧, a̧dë chjäte ma̧i̧ dari̧ japarea̧ chiade. Danȩrȩ, cjo̧dë gärimȩ boi̧chji̧ oaiä jachi tjamo̧padäräpai̧ dade davä cjo̧dë üdë, gä boi̧dë tjamo̧ oa tüe yu̧a̧rea̧mi̧ dari̧. Ado peaja̧dimi̧ dade ibëa̧ tjopono̧ üdë. Jabechji̧ cja̧rȩmȩ ma̧ȩ boi̧chji̧ oa ni̧bäa̧ oaiä, jachi tjamo̧padäräri̧ baäde ma̧i̧ dari̧ tüe baämi̧ dari̧. 6Jabechji̧ cjo̧dë gärimȩmi̧ dade. Ado Ichiae pio ju̧i̧iä acjürüa̧ oa cjiami̧ dari̧ cjiade. Ado pio ju̧i̧iä tjopono̧ üdë ibëa̧ icjarari ja̧räbo, jabechji̧ a̧dë chjäte ma̧i̧ dade. Conȩdami̧ dari̧ japadiibe. Goae tjamo̧dëri̧ cjo̧ro̧ tänȩdiibe. Jabechji̧ ibëa̧ tjopono̧ pio ju̧i̧iä chjai̧dë ji̧ra̧rȩ tarupade. Jabechji̧ cja̧rȩmȩ tjopono̧ üdë ma̧ȩ ji̧ra̧ri̧ ni̧bärea̧ yürüde. Ado ibëa̧ tjopono̧ pio oaiä a̧dë chjäte chjai̧dëri̧ cjo̧ro̧pai̧ darea̧rȩ. Jabechji̧ a̧ro̧rȩ chjadëri̧ cjo̧ro̧tärea̧ ji̧, ma̧i̧ dari̧ cjo̧ro̧rea̧rȩ ibëa̧ tjopono̧ pio ju̧i̧iä. Tjamo̧ davä. Ibëa̧ tjopono̧ üdë ma̧ȩ chjádë yürüa̧ oaiä, o ji̧ri̧iäpȩmo̧ aechide yo̧a̧ oaiä, ado ibëa̧ pumȩ pio ji̧ri̧ ya̧ea̧ pio oaiä, jabechji̧ ma̧i̧ dari̧ cjo̧ro̧rea̧rȩ.
7Danȩrȩ, chirirä cjo̧ro̧ji̧ri̧ judiro̧ ji̧ra̧ tjamo̧dirȩ. Coë jäji̧ri̧ judiro̧, ado pua judiro̧, peaja̧di ji̧ra̧dirȩ. Ado uiräji̧ri̧ judiro̧ peaja̧di ji̧ra̧ tjamo̧dirȩ. Ado judiro̧ chjö̧na̧i̧rȩ chjamȩparȩrea̧mi̧ da maeadirȩ. Chjuaji̧ri̧räbo, jabechji̧ chjamȩparȩrea̧mi̧ dadirȩ. Tjamo̧ davä. Pumȩ judiro̧ mitëa̧ oaiä, irä goa̧ oaiä, dëdë, chjamȩparȩpai̧ dadiro̧jȩrȩ. Peaja̧di dari̧ japarëreji̧ri̧diro̧jȩrȩ peadëri ja̧. 8Jabo tjopono̧ oa, cjäri̧ madejȩ, eami̧ pumȩ judi chjamȩparȩrea̧mi̧dëdejȩ. Jidarea̧mi̧dëde. Boadärärea̧mi̧dëde. Jabechji̧ a̧dë chjäte chjuamȩmi̧ dade. Chjaodëri̧ ja̧bo tänȩmȩ ë ji̧ra̧ tjamo̧ oa chiami̧ dari̧ cjiade. 9Danȩrȩ, ibëa̧ tjopono̧ra̧ pio ju̧ri̧ra̧ chjacjiamȩri̧ ni̧bärea̧ro̧jo̧ȩ ibëa̧ Ano̧mȩ Ütë pio ju̧i̧, ibëa̧ Ama̧i̧ pio ju̧i̧. Jabo pio jiro tjopono̧ra̧ peaja̧di ma̧ȩ goaedë maeara̧ ya̧rea̧ro̧jȩrȩ pumȩ ji̧ri̧. Aja̧, Ütë tjamo̧ judi pareapea̧ pumȩ pio ji̧ri̧, pio jënȩmi̧ dari̧ cjiaji̧ri̧ pio ji̧ri̧ ma̧ȩ goaedë maeara̧ ya̧rea̧ro̧jȩrȩ peaja̧di. 10Ado pio ju̧i̧iä yo̧requededibe. Danȩrȩ, pumȩ yari pio judiri cjitëde chjacjiamȩri̧ ni̧bärea̧ üdë, jabo peaja̧di cjitëde ma̧ȩ goaedëti̧ ya̧rea̧ üdë. Jabo cjäri̧ marea̧rȩ ca̧ oti̧, ja̧di dari̧ ni̧bädë matäreji̧ri̧rea̧rȩ. Jabechji̧ yo̧a̧ri̧ ya chiami̧ dari̧ ni̧bädëtäreji̧ri̧rea̧rȩ. 11Danȩrȩ, ui chjadë üdë, ui bërebërea maearë tade puëri pio judiri cjitëa̧ ji̧, ui chjadëdëbo cjitëdëmȩde, jabo ui chjadë maearë cjitëde. Ado ui chjadëdë üdë dabu ëteri pio judiri cjitëa̧ ji̧, ui chjadëbo cjitëdëmȩde, jabo chjadëdë maearë cjitëde. Cja̧rȩmȩ ui maearë cjitëde puëri pio judiri. Ado peaja̧di chjadëri̧ ni̧bärea̧ maearë cjitëtäremȩde ibëa̧ yari pio judiri. 12Ado danȩrȩ ca̧ oti̧, ado cja̧rȩmo̧ na̧rȩrea̧ ma̧ȩmi̧ da oa ni̧bä chjaotämi̧ cjiarequededibe peaja̧di. Danȩrȩ, igera quȩmȩ to üdë ¿tjana̧ jurarea̧ cho oa yürüde? ¿Achetuna quȩmȩ jurarea̧ cho oa yürüdëde? Cjäri̧ made, achetuna quȩmȩ jurarea̧ cho oa yürüdëmȩde jabo igera jurarea̧ cho maea oa yürümȩde. Ado uva to ca̧i̧ üdë, ¿igera quȩmȩ jurarea̧ cho oa yürüdëde? Cjäri̧ made, igera yürüdëmȩde jabo uva jurarea̧ cho maea oa yürümȩde. Ado peaja̧ditäremȩde ibëa ya oaiä. Ma̧ȩ chjadë maearë cjitëtäremȩde cja̧rȩmȩ ni̧bärea̧ maearë. Ado pio yoa na̧rȩrea̧ ma̧ȩmi̧ dara̧ a̧de jo̧rȩta tänȩtämi̧ cjiarequededibe. Danȩrȩ, dabu ëteri pio judiri cjitëmȩ ui üdë ma̧i̧ da yagoemȩ chiarä judi, ui chjabo yürüdëpade. Tjamo̧ davä. Ado peaja̧dimi̧ dari̧ cjitëdëtäremȩde ibëa̧ ya oaiä. Chjadë maea oa cjitëtäremȩde. Chjadë maea oa ni̧bätäremȩde.
A̧dë chjäte urëdi oa jo̧rȩtarea̧ üdë, Ütë tjamo̧ pio judirimȩde, jabo dai chirirä ja̧ jo̧rȩtarea̧ üdë yaröca pio judirimȩde
13Mȩnȩro̧ cja̧rȩmȩrȩ urëdi tjamo̧ oa jo̧rȩtarea̧ chiarä judi, mȩnȩro̧ cja̧rȩmȩrȩ Ütë tjamo̧ ja̧ ma̧ȩ oa chjadëri̧ dabapea̧rä judi, jabechji̧ chjadëri̧ japarea̧ra̧ pio ju̧ri̧ra̧ ji̧dë ma na̧rȩriä cjo̧ro̧täreji̧ri̧nȩrȩ. Ado urëdi tjamo̧ oa jo̧rȩtarea̧ra̧ bücjüri̧ cjiatäreji̧ri̧nȩrȩ o ji̧ri̧ chjiari, ‘pio ji̧ri̧ u̧i̧ ba chiaquëda’ quëna̧ jo̧rȩtarea̧ decjiari̧. 14Jabo cjäri̧ manȩrȩ, mȩnȩro̧ o ji̧ri̧iäpȩmo̧ quëbaji̧ri̧rȩ ma̧ cjüëtüri̧ jo̧rȩtarä judi, dibëa̧ chji̧rämo̧ jo̧rȩtataji̧ri̧rȩ dibëa̧ maea oa jo̧rȩtarä judi, jabechji̧ urëdi tjamo̧ oa jo̧rȩtarea̧ chiaquëda' quëna̧ jo̧rȩtaji̧ri̧rȩ goaeri̧ ni̧bädëtäreji̧ri̧nȩrȩ. Jabechji̧ mȩnȩro̧ ja̧di dari̧ japea̧ oaiä, "Ütë tjamo̧ ja̧ ma̧ȩ üdë tjamo̧i̧ cjiari̧ baädëde" yo̧ji̧ri̧mi̧ dari̧ japanȩrȩ, ma̧ȩ chjádë yürüji̧ri̧rȩ. 15Jabechji̧ mȩnȩro̧ quëbaji̧ri̧rȩ ma̧ cjüëtüri̧ jo̧rȩtarea̧ üdë, dibëa̧ chji̧rämo̧ jo̧rȩtataji̧ri̧rȩ dibëa̧ maea oa jo̧rȩtarea̧ üdë, cjäri̧ made, a̧dëri pio judiri ma̧na̧dëmȩde, jabo dai chirirä ja̧ jo̧rȩtarea̧ maeade. Tjo tjamo̧ pio judiri ma̧na̧dëdiibe jabo yaröca pio judiri ma̧na̧diibe. 16Ado pumȩ judiro̧ eami̧räpȩ ja̧di dari̧ japaji̧ri̧rȩ cjo̧ro̧rä judi, quëbaji̧ri̧rȩ jo̧rȩtarä judi, jibëa̧ chji̧rämo̧ jo̧rȩtataji̧ri̧rȩ cjo̧ro̧rä judi, jabechji̧ dami̧ti̧ chjai̧dë oa jape chjaoji̧ri̧rȩ cjo̧ro̧padirȩ, jibëa̧ dëbëti̧ra̧ chia goëdëri̧ cjiaji̧ri̧rȩ.
17Jabo a̧dëri pio judiri ma̧na̧mȩ jo̧rȩtarea̧ra̧ cjo̧ro̧mȩ judi, tjaoëpai̧ dari̧ cjo̧ro̧de. Jabechji̧ coëma cjiari̧ cjo̧ro̧de, chjadë maea oa japamȩrȩ. Chjaodëri̧ ërecjiape bagadëde, jabo chjadëri̧ ëba cjo̧ro̧dejȩrȩ jibëa̧ pumȩ ji̧ri̧, ori̧ bagari̧ ëba cjo̧ro̧pea̧ ji̧ järimȩrȩ. Ado ma̧ chjua ëba cjo̧ro̧dejȩrȩ, ütëbo oa eamȩrȩ. Ado ji̧ri̧ ea tjamo̧ tara, jabechji̧ cjäri̧ri̧ cjiamȩrȩ dadejȩrȩ, pio ji̧ri̧ chjiari bücjüri̧ cjiamȩrȩ. Ado pio jȩaiäpȩmo̧ chi̧dëeamȩ pio ju̧i̧, jabechji̧ ma̧ chiadëri̧ cjiamȩrȩ ta̧rë ja̧bodejȩ, ji̧dë u̧i̧ na̧e chiape bagatämi̧ cjiamȩrȩ. Ado jurarea̧ goae tjamo̧ oa yürümi̧ dari̧ cjo̧ro̧de, chjadëri̧ na̧rȩmȩrȩ. Ado o ji̧ri̧mo̧i̧ ba chia dadëdejȩrȩ, jabo ütëbo oa cja̧rȩmȩ ba chiara̧ dadejȩrȩ. Ado coëma cjiari̧ cjo̧ro̧cji̧ quëna̧ japadëmȩde, jabo jabechji̧ coëma cjiari̧ cjo̧ro̧de, yadë maeara̧. 18Ado danȩrȩ, chi̧dëeaji̧ri̧ judiro̧, chjarapë tai̧mi̧ dari̧ cjo̧ro̧ji̧ri̧ pio ji̧ri̧ chjadëri̧ jëdano̧pea̧ oa chi̧dëeaji̧ri̧ pio judiro̧, jabechji̧ tjadoro cho ponȩmi̧ dari̧ a̧dodiro̧jȩrȩ. Ado japamitë chjätä ëte, joechjapea̧mȩ jurarea̧ oa mitëpea̧ domi̧ darä, jabechji̧ chjadë maea oa mitërea̧mi̧ dari̧ dapadirȩ ji̧ra̧ tjamo̧ oa.
©2021 Global Partners, All Rights Reserved