Santiago Ma̧ȩ 2
2
Cja̧rȩmȩ ba chia maeara̧ dapea̧de chjö̧na̧i̧rȩ
1Danȩrȩ ca̧ oti̧, Ano̧mȩ Jechu Quiricho pio ju̧i̧ quëna̧ji̧ri̧pea̧renȩro̧jo̧ȩ a̧dë chjäte tatari̧ cjiamȩ Ano̧mȩ pio ju̧i̧. Ado pio ju̧i̧iä dibëa̧ pumȩ ji̧ri̧ badë dadë matäreji̧ri̧renȩro̧jȩrȩ, jabo jabechji̧ cja̧rȩmȩ ba chia maeara̧ datäreji̧ri̧renȩro̧jȩrȩ ütëbodärä oa. 2Jabo danȩrȩ, ¿yö̧ta dari̧ japanȩrȩ mȩnȩro̧? Pumȩ judiro̧, mȩnȩro̧ a̧dopamȩräpȩ go̧düdärärä, pio dibë nö̧ta ëba a̧dopapea̧ oa go̧düdärärä, ado o judiro̧ chjacjiamȩri̧ ina̧ oa cjiaji̧ri̧rȩ go̧düdärärä, chjibo ba chia oa ina̧ oa cjiaji̧ri̧rȩ go̧düdärärä, ado ichi chaärea̧ ji̧ra̧ oa, ba chia oa, orora̧ japea̧ oa cjiamȩ ichi chaärea̧ oa chaäa̧ oa cjiaji̧ri̧rȩ go̧düdärärä, ¿yö̧ta dari̧ jo̧rȩtaji̧ri̧rȩ darenȩro̧jȩrȩ? Ado o judiro̧ peaja̧di go̧düdärärä, chjö̧na̧i̧ti̧ oa cjäri̧ ja̧boji̧ri̧rȩ go̧düdärärä, chjibo cjari̧da oa ina̧ oa cjiaji̧ri̧rȩ go̧düdärärä, ¿yö̧ta dari̧ japanȩrȩ? 3¿Yö̧ta dari̧ japarenȩro̧jo̧ȩ chjibo chjiacjiamȩ tjamo̧ oa ina̧mȩ pio ju̧i̧? ¿Chjaodëri̧ järinȩrȩ pio ju̧i̧ chjadëri̧ a̧dopea̧ oa? “Aja̧, pio yi chavä charea̧ chjadëräpȩ” ¿yo̧renȩro̧nȩro̧jo̧ȩ? Ado chjö̧na̧i̧ti̧ oa cjäri̧ ja̧bomȩ pio ju̧i̧ ¿yö̧ta dari̧ yo̧renȩro̧jo̧ȩ? “Jabechji̧ pio ju̧ri̧pȩ cjiavä” ¿yo̧nȩrȩ? “Ado pio ju̧ri̧ cjiadëri̧ cjiarä judi, jabechji̧ pio yi chavä daburo ca̧ taräpȩ” ¿yo̧nȩrȩ? ¿Yö̧ta dari̧ yo̧renȩro̧jo̧ȩ? ¿Yö̧ta dari̧ ba chia darenȩro̧jo̧ȩ? 4Jabo cjäri̧ manȩrȩ ca̧ oti̧, o ji̧ri̧iäpȩmo̧ badë dadëpea̧de. Cja̧rȩmȩ ba chia maeara̧ dapea̧de pumȩ chjö̧na̧i̧rȩ. ‘O judiro̧ ji̧dë u̧i̧ ba chiadiro̧da’ quëna̧mȩ judi, oëra̧ ütarë jo̧rȩtade, chjai̧dëri̧ jo̧rȩtamȩrȩ. Ja̧di dari̧ quëna̧rea̧mi̧dëde. 5Danȩrȩ ca̧ oti̧, cüdë dibë ea tjamo̧ tara, chjadëri̧ ta̧rëtä earequededibe. Danȩrȩ, chjö̧na̧i̧ti̧ oa cjäri̧ ja̧boji̧ri̧ pio ji̧ri̧ mitërëremȩdejȩrȩ Ütë tjamo̧ judi. O judiro̧, dai chirirä cjo̧ro̧ji̧ri̧ pio judiro̧, dëdë, badë dadiro̧jȩrȩ, jabo ja̧di dari̧ jo̧rȩtamȩrȩ dadëdejȩrȩ Ütë tjamo̧ judi. Ba chia dadejȩrȩ. Ado pio ju̧i̧iä mitërëremȩdejȩrȩ jënȩro̧ quëna̧ji̧ri̧rȩ cjo̧ro̧pea̧ oa. Tjamo̧ davä. Mitërëremȩdejȩrȩ jënȩro̧ Ütërë yo̧ë cji̧därërea̧ pio ju̧i̧ mitërea̧ dapea̧ oa, Ütërë yo̧a̧ chja̧oerä cjo̧ro̧pea̧ oa. Aja̧, ja̧di dari̧ cjo̧ro̧rea̧ yürüpadejȩrȩ Ütë tjamo̧ judi pio jȩaiäpȩmo̧ eaji̧ri̧ pio ji̧ri̧. 6Jabo cjäri̧ manȩrȩ, chjö̧na̧i̧ti̧ oa cjäri̧ ja̧bomȩ pio ju̧i̧ badë dae chjaorenȩro̧jo̧ȩ. ¿Tjana̧pea̧ ji̧ pio ju̧i̧ badë dae chjaorenȩro̧jo̧ȩ jabo ji̧ra̧ri̧ goamȩ ju̧i̧ ba chia dae chjaorenȩro̧jo̧ȩ? Danȩrȩ, ¿ji̧ra̧ri̧ goaji̧ri̧ pio judiro̧dëdirȩ dibë chjai̧dëri̧ cjo̧ro̧ tänȩji̧ri̧ judiro̧? ¿Pio judiro̧dëdirȩ dibë aechide yo̧ji̧ri̧ judiro̧? ¿Tjamo̧ cjo̧ro̧ji̧ri̧ ja̧ dëbëräpȩ ju̧ri̧ dibë aechide yo̧ji̧ri̧ pio judiro̧dëdirȩ? Dëdëdirȩ, pio judiro̧dirȩ. 7Ado danȩrȩ, pio judiro̧dirȩ Quiricho pio ju̧i̧ chiari chjai̧dëri̧ ni̧bäji̧ri̧ judiro̧. Pio judiro̧dirȩ quȩ ba chiamȩ pio ju̧i̧ chjiari chjai̧dëri̧ ni̧bäji̧ri̧ judiro̧. Tjamo̧ davä. Mȩnȩro̧ quëna̧ji̧ri̧pea̧ Ano̧mȩ pio ju̧i̧ badë jo̧rȩtadiro̧jo̧ȩ, chjai̧dëri̧ ni̧bäji̧ri̧rȩ.
8Ütë tjamo̧ judi jibëa̧ ma̧ȩ oa no̧mȩ yürürërea̧ ji̧, tüdüa̧mi̧ darä cjo̧ro̧pea̧ ma̧ȩ ji̧ra̧ oa yürürëremȩde. Jabo cja̧rȩmȩ üdë o ji̧ri̧ u̧i̧ ba chiade. Ado pio jiro ma̧ȩ ba chia tjamo̧mȩ üdë ja̧di ta̧rëri̧ yo̧de: “Dibëa̧ i pio ju̧i̧ eami̧ eachji̧jȩrȩ pumȩ ji̧ri̧ ütëbodärä oa.” Aja̧ ca̧ oti̧, ja̧di ta̧rëri̧ go̧ȩpea̧ oa cjiade. Ado ja̧di dari̧ cjo̧ro̧ji̧ri̧ judiro̧, chjadëri̧ cjo̧ro̧dirȩ. 9Jabo mȩnȩro̧ o ji̧ri̧iäpȩmo̧ badë darä judi, pumȩ ji̧ri̧ ütëbodärä oa cja̧rȩmȩ ba chia maeara̧ dadërä judi, jabechji̧ chjai̧dëri̧ japanȩrȩ tüdüa̧mi̧ darä cjo̧ro̧pea̧ ma̧ȩ oa jiadaji̧ri̧rȩ, nȩmo̧diäji̧ri̧mi̧ dari̧ japaji̧ri̧rȩ.
10Eami̧ pumȩrȩ tüdüa̧mi̧ darä cjo̧ro̧pea̧ ma̧ȩ chjö̧na̧i̧ oa nö̧tadäräri̧ ta̧rëdiärä judi, jabomo̧ cja̧rȩmȩ ma̧ȩ maea oa ta̧rëdiädërä judi, jabechji̧ ma̧ȩ chjö̧na̧i̧ oa jiadamȩmi̧ dari̧ cjiadiäpade. 11Jabechji̧ tüdüa̧mi̧ darä cjo̧ro̧pea̧ ma̧ȩ üdë ichi chjö̧na̧i̧de, jabo cja̧rȩmȩ codëde. Cja̧rȩmȩ go̧a̧ti̧de. Ado pio ju̧i̧iä yo̧requededibe. Eami̧ pumȩ üdë cja̧rȩmȩ ma̧ȩ oa ta̧rëdiädërä judi, jabechji̧ ichi chjö̧na̧i̧ ma̧ȩ chjö̧na̧i̧ oa ta̧rëdiädëmȩmi̧ dari̧ cjiadiäpade. Jabechji̧ ma̧ȩ Ano̧mȩ judi cja̧rȩmȩde. Ado pio yoa ma̧ȩ oa yo̧rëremȩ üdë, “Aja̧, ado cja̧rȩmo̧ ja̧ jadü oa baë ëba mo̧a̧dëpea̧de” yo̧rëremȩ üdë, peaja̧di “Ado cja̧rȩmo̧ pumȩ oa ja̧bo tänȩdëpea̧de” yo̧rëremȩde. Ado pio ju̧i̧iä yo̧requededibe. Pumȩ üdë ado cja̧rȩmo̧ ja̧ jadü oa baë ëba mo̧a̧dërä judi, jabo ado cja̧rȩmo̧ pumȩ oa ja̧bo tänȩa̧rä judi, jabechji̧ ma̧ȩ chjö̧na̧i̧ oa jiadamȩmi̧ dari̧ cjiadiäpade, ado cja̧rȩmo̧ ja̧ jadü oa baë ëba mo̧a̧dëmȩborë. Jabechji̧ ma̧ȩ chjö̧na̧i̧ oa jiadamȩmi̧ dari̧ cjiadiäpade jënȩ nö̧tadäräri̧ ta̧rëdiädëa̧ oaiä. Cja̧rȩmȩ ma̧ȩ oa jiada̧ oaiä ma̧ȩ chjö̧na̧i̧ oa jiadarea̧mi̧ dade. Jabechji̧ ma̧ȩ chjö̧na̧i̧ oa yürürëremȩ judi cja̧rȩmȩde. 12Ado pio ju̧i̧iä yo̧requededibe ca̧ oti̧. Mȩnȩro̧ ni̧bärä, coëma cjiari̧ ni̧bätäreji̧ri̧nȩrȩ. Ado mȩnȩro̧ eami̧ oa japarä, jabechji̧ coëma cjiari̧ japariä cjo̧ro̧täreji̧ri̧nȩrȩ. Jabechji̧ ütara̧ oa cjiapanȩrȩ. Dibë go̧dü tänȩmȩ ma̧ȩra̧ pio ju̧ri̧ra̧ ütara̧ oa cjiapanȩrȩ. 13Ado o ji̧ri̧iäpȩmo̧ cjäri̧ri̧ cjia dadëmȩ pio ju̧i̧, jabechji̧ cjäri̧ri̧ cjia dadëmȩrȩ ütarë ta̧rëpadejȩ Ütë tjamo̧ judi. Jabo o ji̧ri̧iäpȩmo̧ cjäri̧ri̧ cjia damȩ pio ju̧i̧, jabechji̧ cjäri̧ri̧ cjia damȩrȩ ütarë ta̧rëpadejȩ.
Quëna̧ji̧ri̧ judiro̧ na̧rȩji̧ri̧rȩ cjo̧ro̧täreji̧ri̧dirȩ
14Danȩrȩ ca̧ oti̧, a̧ro̧rȩ o ji̧ri̧iäpȩmo̧ na̧rȩji̧ri̧rȩ cjo̧ro̧dërä judi, a̧ro̧rȩ eami̧ti̧ chjadë oa japadë marä judi, jabechji̧ a̧ro̧rȩ quëna̧ üdë badëde. Jabechji̧ a̧ro̧rȩ, “quëna̧mȩrequede” yo̧ji̧ri̧borë, jabechji̧ teracabari̧ quëna̧rea̧rȩ a̧ro̧rȩ na̧rȩji̧ri̧rȩ cjo̧ro̧dërä judi. Ado ja̧di dari̧ quëna̧pea̧ üdë a̧dodë madiibe. 15Ado danȩrȩ ca̧ oti̧, a̧ro̧rȩ ibëa̧ oti̧ ji̧ri̧ darä judi, ta̧mȩcho̧ ja̧bo tjamo̧ pio ji̧ri̧ darä judi, ibëa̧ omȩ oa jabo ibëa̧ oyi̧ i̧a darä judi, ¿tjana̧ japarea̧rȩ? Chjibo goadëji̧ri̧ oa darä judi, ¿tjana̧ japarea̧rȩ? 16¿Yö̧ta yo̧rea̧ro̧jȩrȩ? “Aja̧, chjadëri̧ baächji̧vä. Bücjüri̧ cjiadëji̧ri̧rȩ baächji̧vä” ¿yo̧dërea̧ro̧jȩrȩ? “Aja̧, chjadëri̧ a̧dotädidibe Ütë tjamo̧ judi mȩnȩro̧ mairi̧ jurapea̧ oa, mȩnȩro̧ chjadëri̧ ina̧ oa cjiapea̧ oa, mȩnȩro̧ chjöchja ja̧bochea oa” ¿yo̧dërea̧rȩ? Ado ja̧dëa ji̧ ja̧di ta̧rëri̧ yo̧ ëte, ¿eami̧ oa yürüdërea̧ro̧jȩrȩ? ¿Jurarea̧ oa yürüdërea̧ro̧jȩrȩ? ¿Chjibo oa yürüdërea̧ro̧jȩrȩ? Cjäri̧ ma ca̧ oti̧, a̧ro̧rȩ eami̧ oa yürüdërä judi, tjamo̧ri̧ a̧dodërea̧ro̧jȩrȩ. 17Ado peaja̧dimi̧ dade a̧ro̧rȩ quëna̧ pio ju̧i̧iä. Jabomo̧ quëna̧ üdë a̧dodëdiibe. A̧ro̧rȩ quëna̧ üdë na̧rȩrea̧ chiadërä judi, badëde. A̧ro̧rȩ quëna̧ üdë Ütë tjamo̧ pio ju̧i̧ ta̧rëdiärea̧ chiadërä judi, a̧ro̧rȩ quëna̧ üdë o ji̧ri̧ a̧dorea̧ chiadërä judi, jabechji̧ teracabade.
18Jabo o judiro̧ dëbë yo̧pai̧ dadiro̧ibe: “Danȩrȩ, pumȩ judiro̧ nö̧tami̧ dari̧ jo̧rȩtaji̧ri̧rȩ cjo̧ro̧dëdirȩ” yo̧pai̧ dadirȩ. “O judiro̧ quëna̧rea̧ maea oa chiadirȩ. Ado o judiro̧ chjadëri̧ japarea̧ maea oa chiadirȩ. Ado a̧ro̧rȩ chjadëri̧ japarea̧ chiadëji̧ri̧borë jabechji̧ quëna̧rea̧rȩ” yo̧pai̧ dadiro̧ibe. Jabo ja̧di ta̧rëri̧ dëbë yo̧täremȩrequedejȩrȩ. “Danȩrȩ, mȩnȩro̧ quëna̧ pio ju̧i̧ chjiari dabarea̧mi̧dëde. Jabechji̧ na̧rȩdë marenȩro̧jȩrȩ pumȩ ji̧ri̧. Chjadëri̧ japadë marenȩro̧jȩrȩ. Ado pio ju̧i̧iä mȩnȩro̧ quëna̧ pio ju̧i̧ na̧rȩdë marenȩro̧jȩrȩ. Jabo danȩrȩ, cüdë quëna̧ pio ju̧i̧ ji̧dë ma na̧rȩmȩrȩ cjo̧ro̧requede, cüdë chjadëri̧ jape chjaoa̧ pio ju̧i̧iä. Jabechji̧ quëna̧mȩ ja̧ jadü üdë chjadëri̧ na̧rȩrea̧ pio judide. Quëna̧mȩ ja̧ jadü üdë, chjadëri̧ japarea̧ pio judide. Ji̧mo̧ baädirȩ. 19Danȩrȩ, ‘Ütë tjamo̧ judi cjiadida, cja̧rȩmȩdida’ quëna̧ jo̧rȩtarenȩro̧jo̧ȩ. Ado jabechji̧ chjadëde ja̧di dari̧ quëna̧pea̧ üdë, jabo nö̧tadëde jabo. Peaja̧di dari̧ quëna̧diro̧jo̧ȩ yaröca judiro̧. Ütë tjamo̧ pio ju̧i̧ i ma̧na̧gura jämi̧ dari̧ uapaji̧ri̧rȩ quëna̧diro̧jo̧ȩ bape chjaopea̧ pio ju̧i̧iä, jënȩro̧ jibëa̧ ma̧ȩ oa jiada̧ pio ju̧i̧iä. Dëdë, quëna̧diro̧jo̧ȩ, jabo a̧dodë madejȩrȩ. Jabechji̧ quëna̧ji̧ri̧borë chjätärea̧ dadëpadirȩ. 20Ado mȩnȩro̧ quëna̧ üdë peaja̧di a̧dodë madidibe mȩnȩro̧ chjadëri̧ japarea̧ chiadërä judi. Ado mȩnȩro̧ chjadëri̧ dabadë tara, mȩnȩro̧ jabomo̧ uëmo̧ uëmo̧ jo̧rȩtaji̧ri̧ tara, jabechji̧ chjadëri̧ jo̧rȩta tänȩparequededibe yaba̧. 21Danȩrȩ, ibëa̧ ama̧i̧ taru pio ju̧i̧, Abaraa̧ quȩmȩrea̧ pio ju̧i̧ dabanȩrȩ. Ado ¿tjana̧ oa japarëremȩde? Tjana̧ oadë, jabechji̧ jibëa̧ ja oa gu̧na̧rea̧ mechjarä yürürëremȩdejȩ Ütë tjamo̧ ju̧i̧. Ado judi ja̧di dari̧ japea̧ oaiä, judi Ütërë yo̧a̧mi̧ japea̧ pio ju̧i̧iä, jabechji̧ Ütë tjamo̧ judi jabechji̧parȩrëremȩdejȩ. 22Jabechji̧ Ütë tjamo̧ pio ju̧i̧ quëna̧mȩrȩ japarëremȩde Abaraa̧rea̧ judi. Ado judi Ütërë pio jȩaiäpȩmo̧ yo̧a̧mi̧ japea̧ oaiä, jabechji̧ nö̧tadärämi̧ dari̧ cjiadiäa̧de jënȩ quëna̧ üdë. Tjamo̧ davä. Judi quëna̧ üdë, jabechji̧ pënȩmi̧ dadë maearë cjiadiädëa̧de, jabo codëmi̧ darë cjiadiärëremȩde jënȩ ta̧rëdiäa̧ oaiä. 23Ado pio ju̧i̧iä jabechji̧, Ütë tjamo̧ judi jabechji̧parȩrëremȩdejȩ. Aja̧, ja̧di ta̧rëri̧ go̧ȩpea̧ oa cjiade ma̧ȩ üdë. Judi quëna̧rërea̧ oaiä jabechji̧parȩrëremȩdejȩ. Ado pio ju̧i̧ uëri ja̧di ta̧rëri̧ yo̧rëremȩde Ütë tjamo̧ judi Abaraa̧rea̧ pio ju̧i̧ chjiari: “Aja̧, Abaraa̧ judi ca̧ jadüde” yo̧rëremȩde. 24Ado Abaraa̧ pio ju̧i̧ chjiari ta̧rëa̧ oaiä, jabechji̧ dabarea̧ danȩrȩ ca̧ oti̧. Jabechji̧ ‘Abaraa̧ judi quëna̧ pio ju̧i̧iä jabechji̧parȩa̧ oa cjiarëremȩdida, chjadëri̧ japariämȩrȩ quëna̧ oaiä jabechji̧parȩa̧ oa cjiarëremȩdida’ quëna̧ dabarea̧ danȩrȩ. 25Ado mȩnȩro̧ ji̧dë u̧i̧ chjadëri̧ dabapea̧ oa, Dajaba quȩyi̧ iei̧ pio ji̧ chjiaribo ni̧bätämi̧ cjiarequededibe, no̧mȩ tjamo̧ri ja̧ cjo̧ro̧rëreyi̧ pio ji̧ chjiaribo. Danȩrȩ, pearä judi chjai̧dëri̧ japayi̧rȩ cjo̧ro̧rëreyi̧nȩ. Jabechji̧ chëre yürüa̧ ba oa ëba mo̧a̧ chjaorëreyi̧nȩjȩrȩ oari pio ji̧ri̧. Jabo danȩrȩ, pio jini̧borë jabechji̧parȩa̧ oa cjiarëreyi̧nȩ jënȩ chjadëri̧ japea̧ oaiä. Jabechji̧ Jochuerë chjadürërea̧ pumȩ pio ji̧ri̧ chjadëri̧ a̧dorëreyi̧nȩjȩrȩ. Tjamo̧ davä. Jochuerë chjadüa̧ pio ji̧ri̧, Canaa̧ quȩmȩ chiri oa ütarapea̧ oa goadi tai̧rëreji̧ri̧ pio ji̧ri̧ chjadëri̧ a̧dorëreyi̧nȩjȩrȩ. Jabechji̧ pio ji̧ri̧ jibëa̧ bërä chjadëri̧ goadirea̧ yürürëreyi̧nȩjȩrȩ. Ado ja̧dëa ji̧ ji̧dë duri oa, ado cja̧rȩmo̧ no̧ oa mitëtä yo̧rëreyi̧nȩjȩrȩ, jënȩro̧ chjadëri̧ baädärärea̧ dapea̧ oa. Aja̧ ca̧ oti̧, Dajaba jini̧ ja̧di dari̧ japea̧ pio ju̧i̧iä na̧rȩrëreyi̧nȩ davä, jënȩ quëna̧ pio ju̧i̧ chjiari. Jabechji̧ jini̧ ja̧di dari̧ japea̧ oaiä, nö̧tadärämi̧ dari̧ cjiadiärëremȩde jënȩ quëna̧ üdë. Codëmi̧ darë cjiadiäa̧de jënȩ japea̧ oaiä. Ado pio ju̧i̧iä Ütë tjamo̧ judi jabechji̧parȩrëremȩdejȩ.
26Danȩrȩ ca̧ pumȩ, a̧ro̧rȩ ibëa̧ tjo chiadërä judi cjo̧ro̧rea̧mi̧dëde. Chjaodëri̧ ja̧botäreji̧ri̧rea̧rȩ. Jabechji̧ ja̧boa̧mȩ ja̧ icjara üdë pumȩ tjoborë a̧rȩdëde. Tjo chiadëde. Pumȩdëde. Ado peaja̧dide quëna̧rea̧ pio ju̧i̧ chjiari. Quëna̧rea̧ üdë chjadëri̧ japarea̧ra̧ pio ju̧ri̧ra̧ na̧rȩdërä judi, peaja̧di ja̧boa̧mi̧ dade. Badëde.
©2021 Global Partners, All Rights Reserved