Santiago Ma̧ȩ 1
1
Taruparea̧ Ma̧ȩ
1Santiago pio judirequede. Ütë tjamo̧ ja̧ mu̧i̧tjoi̧mȩrȩ go̧ȩpe chjadürequededibe, Ano̧mȩ Jechu Quiricho pio ju̧i̧ ja̧ mu̧i̧tjoi̧mȩrȩ. Aja̧, Icharai pio ju̧i̧rea̧ ja̧ u̧ri̧ pio judiri ja̧ji̧ri̧ pio ji̧ri̧iäpȩmo̧ go̧ȩpe chjadürequededibe 12 buba oa, oëra̧ti̧ oa chjuchjupechäa̧ oa cjoroji̧ri̧ oa, Quiricho pio ju̧i̧iäpȩmo̧ quëna̧ji̧ri̧pea̧ji̧ri̧ oa. Aja̧, pio dibëiäpȩmo̧ go̧ȩpe chjadürequededibe, jearea̧ chjadümȩrȩ.
Chjai̧dë oa chjätäräbo, chjuari̧ quëna̧pea̧de Ütë tjamo̧ judi
2Danȩrȩ ca̧ oti̧, mȩnȩro̧ eami̧ doro eami̧ chjai̧dë oa chjätärä judi, jabechji̧ goëdëri̧ cjiape bagadëtäreji̧ri̧nȩrȩ, jabo jabechji̧ ma̧ chiadëri̧ cjiari̧ jo̧rȩtachji̧vä. 3Jabechji̧ mȩnȩro̧ chjai̧dë oa chjätäa̧ oaiä ütarë dadidibe Ütë tjamo̧ judi mȩnȩro̧ quëna̧ pio ju̧i̧. ‘Aja̧, ja̧di dari̧ quëna̧dicoada, yirä yuro chjuari̧ quëna̧padicoada’ quëna̧ jo̧rȩtamȩrȩ ütaradidibe. Ado mȩnȩro̧ quëna̧ üdë ütara̧ oa cjia̧ oaiä ji̧dë u̧i̧ chjuari̧ quëna̧pe jänȩrȩ. Ado ja̧di dari̧ quëna̧pe jäa̧ oaiä ji̧dë u̧i̧ ma̧ chjua cjo̧ro̧rea̧ dape jänȩrȩ, jaepepami̧ dari̧ japarea̧ decjiari̧. Aja̧ ca̧ oti̧, pio ju̧i̧ tjamo̧ri̧ dabanȩrȩ. 4Ado pio ju̧i̧iä yo̧requededibe. Chjai̧dë oa chjätäräbo ji̧dë ma chjuari̧ quëna̧chji̧vä, Ütë tjamo̧ pio ju̧i̧ quëna̧dëpe bagarea̧ decjiari̧. Jabechji̧ mȩnȩro̧ ja̧di dari̧ quëna̧ oaiä, joechjapadäräa̧ oa cjiami̧ dari̧ cjiapade mȩnȩro̧ ma̧ chjua cjo̧ro̧a̧ üdë. Ado ja̧di dari̧ cjo̧ro̧rä judi, üi̧padäräa̧ oa cjiami̧ dari̧ cjiapanȩrȩ, coëma cjiari̧ cjo̧ro̧rea̧mi̧ dari̧, jabëdiärea̧ decjiari̧.
A̧ro̧rȩ urëdi oa jo̧rȩtarea̧ chiadërä judi, cjo̧dëtäreji̧ri̧rea̧rȩ Ütë tjamo̧ pio ju̧i̧iä
5Jabo mȩnȩro̧ cja̧rȩmȩrȩ eami̧ chjai̧dë oa chjätärä urëdi oa jo̧rȩtarea̧ chiadërä judi, üi̧padäräa̧ oa cjiami̧ dari̧ cjo̧ro̧pea̧ ji̧ tjamo̧ri̧ dabadërä judi, mȩnȩro̧ chjadë pio ju̧i̧ mitëriä cjo̧ro̧pea̧ ji̧ tjamo̧ri̧ dabadërä judi, jabechji̧ Ütë tjamo̧ pio ju̧i̧iä cjo̧dëtäremȩdejȩ, judi pio jȩaiäpȩmo̧ dabarea̧ yürütä. Ado pio jȩaiä cjo̧dëmȩ pio ju̧i̧iäpȩmo̧ chjadëri̧ yürüpadejȩ ya̧mi̧ dari̧ japarea̧ decjiari̧. Aja̧, yürütämi̧ cjiamȩrȩ yürüpadejȩrȩ nȩmȩpadëmȩrȩ. 6Jabo Ütë tjamo̧ pio ju̧i̧iä cjo̧dëmȩ judi, jabechji̧ chjuari̧ quëna̧mȩrȩ cjo̧dëtäremȩdejȩ, ‘tjamo̧ri̧ yürüdëpa jirodicoada’ quëna̧rea̧ decjiari̧. 'Jabechji̧ tjamo̧ri̧ yürüdëpa jirodicoada’ quëna̧mȩ judi, ui ana̧ri ma̧na̧mȩ gö̧ma̧mi̧ dari̧ jo̧rȩtade. Jabechji̧ chjuari̧ quëna̧dë oaiä, oëra̧ti̧ oa aechja̧de aechja̧de cjiami̧ dari̧ cjiade. Jabechji̧ chjuari̧ cjiami̧ dari̧ cjiadëde. 7-8Ado ja̧di dari̧ cjo̧dëmȩ judi mitërea̧ dadëpade. Jabechji̧ judi cjo̧dëa̧mi̧ yürüdëpadejȩ Ano̧mȩ judi. Judi cja̧rȩmȩ coëma oa cja̧rȩmȩ chji̧ maeara̧ jo̧rȩtamȩrȩ cjo̧dëtärea̧ ji̧, jabechji̧ yo̧a̧ri̧ chji̧ chiami̧ dari̧ cjo̧dëde, ‘chjadëri̧ yürüdëpadicoada’ quëna̧ jo̧rȩtamȩrȩ. Ado pio ju̧i̧iä mitërea̧ dadëpade.
Chjö̧na̧i̧ti̧ oa cjäri̧ ja̧boji̧ri̧ pio ji̧ri̧ chjiari go̧ȩpea̧ oa cjiade, a̧dë chjäte goaji̧ri̧ pio ji̧ri̧ chjiaribo
9Chjö̧na̧i̧ti̧ oa cjäri̧ ja̧boji̧ri̧ judiro̧, quëna̧ji̧ri̧ pio judiro̧, jabechji̧ ma̧ chiadëri̧ cjiari̧ jo̧rȩtatäreji̧ri̧dirȩ, Ütë tjamo̧ judi pio jibëiäpȩmo̧ ba chia jo̧rȩtamȩrȩ da tara. 10Ado a̧dë chjäte ji̧ra̧ri̧ goaji̧ri̧ judiro̧, quëna̧ji̧ri̧ pio judiro̧ peaja̧di ma̧ chiadëri̧ cjiari̧ jo̧rȩtatäreji̧ri̧dirȩ. ‘Jabechji̧ ba chiadëquëda, jabechji̧ chëre ji̧ra̧ tjamo̧ oa goaräbo ba chiadëquëda, Jechu pio judimo̧rȩ ba chiadida, ado pio ju̧i̧iämo̧i̧ chjätärea̧mi̧ dadida’ quëna̧ jo̧rȩta̧ oaiä ma̧ chiadëri̧ cjiari̧ jo̧rȩtatäreji̧ri̧dirȩ chëre ji̧ra̧ri̧ goaji̧ri̧ judiro̧. Jabechji̧ a̧dë chjäte ji̧ra̧ri̧ goaji̧ri̧ judiro̧ jabomo̧ cärä chjuchjumi̧ dari̧ cjo̧ro̧dirȩ. Ado jibëa̧ üdë chjö̧na̧i̧rȩ goarijäpade. Ado judiro̧ peaja̧di ja̧bopadirȩ cärä chjuchju üdë chjaodëri̧ goarijämi̧ dari̧. 11Jabechji̧ uë cjitëde do üdë cjüëtü tjamo̧pe jämȩrȩ. Ado gaüpe bagari̧ tüdejȩ cärä oa, chjuchju üdë chjaodëri̧ gu̧rorea̧mi̧ dari̧, chjaodëri̧ goarijärea̧mi̧ dari̧. Peaja̧dimi̧ dari̧ ja̧bopadirȩ a̧dë chjäte ji̧ra̧ri̧ goaji̧ri̧ judiro̧. Tjamo̧ davä. Ji̧dë u̧i̧ ji̧ra̧ oa boapea̧ ji̧ järitaji̧ri̧ pio judiro̧ chjaodëri̧ ja̧bopadirȩ, jënȩro̧ boatämi̧ cjia̧ pio ju̧i̧ boadärärea̧ dadëji̧ri̧rȩ. Ado pio ju̧i̧iä jabechji̧ ‘ba chia tjamo̧quëda’ quëna̧rea̧mi̧dëdirȩ.
Chjuari̧ quëna̧pea̧de goaedë oa chjätäräbo
12Chjai̧dë oa chjätäa̧räbo ma̧ chjua cjo̧ro̧rea̧ daji̧ri̧ judiro̧, chjai̧dë oa chjätäa̧räbo boadäräa̧ oa cjiadëji̧ri̧ pio judiro̧, jabechji̧ ma̧ chiadëri̧ cjiari̧ cjo̧ro̧rea̧ dapadirȩ. Jabechji̧ judiro̧ chjai̧dë pio ju̧i̧ chjätäa̧räbo chjuari̧ quëna̧ oaiä, judiro̧ chjao tjamo̧ri̧ ütara̧ oa cjia̧räbo ji̧dë ma acji mitëmi̧ dari̧ quëna̧ oaiä, jabechji̧ pio jȩa nö̧ta a̧dë chjäte goae tarari̧ cjo̧ro̧rea̧ yürüpadejȩrȩ Ütë tjamo̧ judi. Tjamo̧ davä. Jënȩ pearä yo̧ë cji̧därërea̧ pio ju̧i̧ yürüpadejȩrȩ pio jȩaiäpȩmo̧ tjamo̧ri̧ eaji̧ri̧ pio ji̧ri̧iäpȩmo̧.
A̧ro̧rȩ u̧i̧pea̧ oa cjiarä, oëra̧ jo̧rȩtadëpea̧de
13Ado oëra̧ yo̧dëtäreji̧ri̧dirȩ pumȩ judiro̧, jënȩro̧ chjai̧dëri̧ japatämi̧ cjia̧ ji̧. Jabechji̧ judiro̧ chjai̧dë oa japapea̧ ji̧ ana̧ri̧ jo̧rȩtarä, “Aja̧, Ütë tjamo̧ pio judi chjai̧dë oa japa tänȩtadique” yo̧dëtäreji̧ri̧dirȩ. Jabechji̧ Ütë tjamo̧ judi eami̧ pumȩ oa chjai̧dëri̧ japa tänȩdëmȩde. Ado chjai̧dëri̧ japatämi̧ cjiadëmȩde ji̧dëri̧. 14Jabo ja̧didëdirȩ pumȩ judiro̧. Chjai̧dë pio ju̧i̧ japatämi̧ cjiadirȩ. Jabechji̧ jibëa̧ icjararä chjai̧dëri pio judiri cjitëmȩ jo̧rȩtarea̧ üdë, jabechji̧ ana̧ri̧ jo̧rȩta tänȩdejȩrȩ. Mu̧i̧ jämi̧ dari̧ japadejȩrȩ jënȩro̧ chjai̧dëri̧ japapea̧ ji̧. ‘Aja̧, chjadëtäremȩdicoada, goae tjamo̧täremȩdicoada’ quëna̧ jo̧rȩtaji̧ri̧rȩ dae ja̧bo dami̧ dari̧ jo̧rȩtadiro̧jo̧ȩ chjai̧dë pio ju̧i̧. Ja̧di dari̧ jo̧rȩta̧ oaiä chjai̧dëri̧ japa maeadirȩ pumȩ judiro̧ ütëborë. 15Jabechji̧ jibëa̧ icjararä chjai̧dëri pio judiri cjitëmȩ jo̧rȩta̧ chja̧oerä cjo̧ro̧a̧ oaiä, chjai̧dë oa japadirȩ. Ado chjai̧dë oa japea̧ oaiä a̧dë ja̧boa̧mi̧ dari̧ cjiadirȩ Ütë tjamo̧ ju̧i̧iä. Danȩrȩ, üi̧ üdë jibëa̧ iei̧ ji̧ ëba mo̧a̧ ji̧, nö̧ chjo̧ro̧ yürümi̧ dari̧ yürüdejȩ, bomaipe järea̧mi̧ dari̧. Ado japamitë chjätä ëte, aranȩjȩ boi̧chji̧ ju̧i̧. Peaja̧dimi̧ dade chjai̧dë pio ju̧i̧iä. Danȩrȩ, ibëa̧ icjararä chjai̧dëri cjitëde chjai̧dëri̧ jo̧rȩtarea̧ üdë. Nö̧ chjo̧ro̧rȩ cjiami̧ dari̧ tarupade chjai̧dëri̧ jo̧rȩtapea̧ üdë. Ado ja̧dëa ji̧ arami̧ dari̧ japadejȩ chjai̧dë oa. Ado chjai̧dë üdë ütëchjai̧pe bagami̧ darä, ja̧borea̧ yürüdiibe. 16Danȩrȩ ca̧ oti̧, dibë ea tjamo̧mȩrȩ chi̧dëearequededibe. U̧i̧pea̧ oa cjiadëchji̧vä Ütë tjamo̧ pio ju̧i̧ chjiari. Jabechji̧ chjai̧dëri̧ japa tänȩdëmȩde. Tjamo̧ davä. Chjai̧dëri̧ japarea̧ üdë pio judiri ma̧na̧dë madiibe. 17Tjamo̧ davä. Chjai̧dëri̧ japarea̧ üdë pio judiri ma̧na̧dë madiibe jabo chjadë pio judimo̧rȩ ma̧na̧diibe pio judiri. Tjamo̧ davä. Ütë tjamo̧ pio judiri ma̧na̧diibe chjadë üdë, ibëa̧ tjo oa a̧domȩ üdë. Jabechji̧ ji̧dë ma chjadë maea oa yürüdiibe jabëdiärea̧ decjiari̧. Ibëa̧ Ama̧i̧ judi, a̧dëräpȩ cjiamȩ chjö̧na̧i̧ oa Pareapamȩ pio judi cjäri̧ri̧ cjiamȩrȩ yürüdiibe dami̧ti̧ chjadë oa. Jabechji̧ judi pareapea̧ üdë, do üdë, gupënȩ üdë, büë üdë, dëdë, tjaoëdiäpe bagapai̧ dade. Jabo Ütë tjamo̧ judi tjaoëdiä tjaoëdiäpe bagadëmȩde, jabo jabechji̧ jënȩ pearä cjiarërea̧mi̧ cjiamȩde. Ado pio ju̧i̧iä ji̧dë ma chjadë maea oa yürüdiibe. 18Ado judi pearä ütarë jo̧rȩtarërea̧mi̧ jabechji̧ ado nö̧ria̧ oa cjiape baga tänȩrëremȩdiibe. Tjamo̧ davä. Tjamo̧i̧ cjiari̧ baämȩ ma̧ȩ pio ju̧i̧iä ado nö̧ria̧ oa cjiape baga tänȩrëremȩdiibe a̧ro̧rȩ pio ju̧i̧ ja̧ u̧ri̧pe bagatä. Ado yaba̧ a̧dë chjäte ba chia maea oa dadiibe. Jabechji̧ judi ji̧ra̧ tjamo̧ oa pareapea̧mȩborë, jabechji̧ pio ibë ji̧dë u̧i̧ ba chia dadiibe, jibëa̧ u̧ri̧pea̧ji̧ri̧ pio ji̧ri̧.
Ütë tjamo̧ ja̧ ma̧ȩ üdë ta̧rëdiäpea̧de
19Aja̧ ca̧ oti̧, cüdë dibë ea tjamo̧ tara, ja̧di dari̧ cjo̧ro̧tä earequededibe. Danȩrȩ, ji̧dë ma järichji̧vä o ji̧ri̧ chjadëri̧ ta̧rëpea̧ ji̧. Jabechji̧ chjadëri̧ bapë ta̧rëchji̧jȩrȩ, ado jëreeadëchji̧vä ni̧bäpea̧ ji̧. Jabechji̧ ma̧ chjua jo̧rȩtaji̧ri̧rȩ chjadëri̧ ni̧bädärärea̧ yürüchji̧jȩrȩ o ji̧ri̧. Ado pumȩ ji̧ri̧ ta̧rërä, chjaodëri̧ ërecjiape baguradëchji̧jȩrȩ. 20Jabechji̧ mȩnȩro̧ ërecjiape baga̧ üdë a̧dodë madidibe. Ado mȩnȩro̧ ërecjiape bagarä, jabechji̧ Ütërë yo̧a̧mi̧ coëma cjiari̧ cjo̧ro̧rea̧mi̧dënȩrȩ. 21Pio ju̧i̧iä dami̧ti̧ chjai̧dë oa jo̧ȩra̧pe aeno̧chji̧vä, dami̧ti̧ idi̧ dari̧ japarea̧bo. Jabechji̧ ji̧ra̧ tjamo̧pea̧de chjai̧dë üdë, jabo ‘jabechji̧dida’ quëna̧rea̧ decjiari̧ aeno̧chji̧jo̧ȩ. Jabechji̧ Ütë tjamo̧ judi dibëa̧ chji̧rä cha tänȩa̧ ma̧ȩ pio ju̧i̧ chjadëri̧ ta̧rëdiächji̧jo̧ȩ, tjamo̧ri̧ ta̧rëdiätämi̧ cjiaji̧ri̧rȩ. Jabechji̧ pio jiro ma̧ȩ oaiämo̧i̧ chjätärea̧ daea̧de dibëa̧ tjo üdë.
22Ado pio ju̧i̧iä yo̧requededibe. Jabomo̧ ta̧rë chadëchji̧vä Ütë tjamo̧ ja̧ ma̧ȩ oa, jabo ji̧dë ma ta̧rëdiächji̧jo̧ȩ. Acji cjaeä ta̧rëchji̧jo̧ȩ dibëa̧ chji̧rä. Jabomo̧ ta̧rë chadëpea̧de, jabo ta̧rëdiäpea̧de. Mȩnȩro̧ jabomo̧ ta̧rë charä judi, tjamo̧ ta̧rëdiädëji̧ri̧rȩ ta̧rë charä judi, peadë u̧i̧pea̧ oa cjianȩrȩ. 23Danȩrȩ ca̧ pumȩ, eami̧ pumȩ üdë Ütë tjamo̧ ja̧ ma̧ȩ oa ta̧rë ëte ta̧rëdiädërä judi, jibëa̧ chamacho oa dacho darea̧rä dae cjiamȩmi̧ dade. 24Jabechji̧ jibëa̧ chamacho oa chjadëri̧ arë da ëte, jibëa̧ dacho darea̧ oa a̧dë tai̧ ëte, chjaodëri̧ a̧dë jo̧rȩtade davä jënȩ pea daea̧ pio ju̧i̧. Peaja̧dimi̧ dade Ütë tjamo̧ ja̧ ma̧ȩ oa chjaodëri̧ a̧dë jo̧rȩtamȩ judi. Jënȩ pea ta̧rëa̧ pio ju̧i̧ chjaodëri̧ a̧dë jo̧rȩtadejȩ. 25Jabo pumȩ judi, Ütë tjamo̧ ja̧ ma̧ȩ oa ji̧dë ma go̧ȩ ni̧bäriä cjo̧ro̧mȩ pio judi, jabechji̧ jibëa̧ chamacho oa chjadëri̧ jo̧rȩtamȩmi̧ dade. Jabechji̧ coëma cjiari̧ baämȩ ma̧ȩ pio ju̧i̧ a̧dë jo̧rȩtadëmȩrȩ ta̧rëdiädejȩ. Ado ja̧di dari̧ ta̧rëdiämȩ pio ju̧i̧, jabechji̧ chjadëri̧ a̧dopadejȩ Ütë tjamo̧ judi. Tjamo̧ davä. Ma̧ȩ pio ju̧i̧ chjadëri̧ ta̧rëdiämȩ pio ju̧i̧, jȩa jare chjadüa̧ oa cjiamȩmi̧ dari̧ go̧dü tänȩmȩ ma̧ȩ pio ju̧i̧ ji̧dë ma jo̧rȩtariä ta̧rëdiämȩ pio ju̧i̧, jabechji̧ chjadëri̧ a̧dopadejȩ Ütë tjamo̧ judi, ji̧dë ma chjadëri̧ a̧domȩrȩ.
26Danȩrȩ, eami̧ pumȩ üdë, ‘Aja̧, Ütë tjamo̧ ja̧ ma̧ȩrä chjadëri̧ cjo̧ro̧mȩquëda’ quëna̧mȩ judi, jabo jibëa̧ tjopono̧ oa chjadëri̧ jidadëmȩrȩ cjo̧ro̧rä judi, cjäri̧ made, u̧i̧pea̧ oa cjiade. Judi quëna̧ üdë badëde. 27Jabo danȩrȩ, Ütë tjamo̧ ja̧ ma̧ȩrä coëma cjiari̧ cjo̧ro̧a̧ üdë, jabechji̧ ba chiade. Ado goae tjamo̧de ibëa̧ Ama̧i̧ Ütë pio ju̧i̧iä. Jabechji̧ ja̧di dari̧ cjo̧ro̧a̧ üdë, ‘chjai̧dëdida’ quëna̧ dadëpadejȩ, jabo ‘goae tjamo̧dica̧da’ quëna̧ dapadejȩ. Tjamo̧ davä. A̧ro̧rȩ bori̧ pio ji̧ri̧ a̧doa̧ üdë, bori̧ maearë cjiadiäa̧ji̧ri̧ pio ji̧ri̧ a̧doa̧ üdë goae tjamo̧de ibëa̧ Ama̧i̧ Ütë pio ju̧i̧iä. Ado oari chiareji̧ri̧ pio ji̧ri̧ a̧doa̧ üdë, chjö̧na̧i̧ti̧ oa cjäri̧ ja̧boji̧ri̧ pio ji̧ri̧ a̧doa̧ üdë, peaja̧di goae tjamo̧de ibëa̧ Ama̧i̧ Ütë pio ju̧i̧iä. Ado a̧ro̧rȩ dai chirirä cjo̧ro̧ji̧ri̧ ja̧ chjai̧dëra̧ pio ju̧ri̧ra̧ mirea̧ oa cjiadëji̧ri̧mi̧ dari̧ cjo̧ro̧a̧ üdë, peaja̧di goae tjamo̧de ibëa̧ Ama̧i̧ Ütë pio ju̧i̧iä. Jabechji̧ ja̧di dari̧ cjo̧ro̧dirȩ Ütë tjamo̧ ja̧ ma̧ȩrä coëma cjiari̧ cjo̧ro̧ji̧ri̧ pio judiro̧. Ado pio ju̧i̧iä peaja̧dimi̧ dari̧ cjo̧ro̧ matäreji̧ri̧rea̧rȩ ca̧ oti̧.
©2021 Global Partners, All Rights Reserved