Cori̧tio Ma̧ȩ 1 9

Pablo judi tjamo̧ yo̧rea̧ chiamȩborë, Jechurë chjadüa̧ oa cjiamȩborë jibëa̧ pio ju̧i̧mo̧i̧ jo̧rȩtadëa̧de, jabo ji̧dë ma jo̧rȩtarëremȩde o ji̧ri̧iäpȩmo̧ a̧dopea̧ ji̧.

1Danȩrȩ ca̧ oti̧, cüdë Jechurë chjadüa̧ oa cjiamȩ tara, pio judi coa tjamo̧ yo̧rea̧ yürüa̧ tara, jabechji̧ cüdë jo̧rȩtami̧ eami̧ti̧ chjadë oa japapai̧ darequede, tabüa̧ oa cjiadëmȩmi̧ darë. Jabechji̧ Jechurë chjadüa̧ oacji̧ quëna̧ japadëmȩrequede, jabo judi tjamo̧ri̧ chjadüa̧ oa ja̧beparequede. Jabechji̧ ibëa̧ Ano̧mȩ Jechu pio ju̧i̧ irä darëreremȩreconȩ. Ado pio judi coa ja̧beparea̧ oa yürüa̧ oaiä, jabechji̧ ja̧bepamȩpea̧requede. Ado cüdë pio ju̧i̧ ja̧ oa ja̧bepamȩpea̧ oaiä, jabechji̧ pio mȩnȩro̧ Ütë tjamo̧ ja̧ pumȩpea̧nȩrȩ pio coaiä ta̧rëa̧ oaiä. 2Jabo o judiro̧, ‘Pablo judi, cjäri̧ madida, Ano̧mȩ Jechurë chjadüa̧ oa ja̧bepadëmȩdida’ quëna̧ jo̧rȩtadirȩ. Jabo judiro̧ oëra̧ jo̧rȩtaräbo jabechji̧ pio mȩnȩro̧ tjamo̧ri̧ dabanȩrȩ pio coa chjiari. Jabechji̧ pio coaiä quëna̧ji̧ri̧pea̧nȩrȩ. Ado mȩnȩro̧ Jechu pio ju̧i̧ quëna̧ji̧ri̧pea̧ oaiä, jabechji̧ ana̧ri̧ na̧rȩnȩrȩ davä cüdë dibëa̧ chjarerä ja̧beparërea̧ pio ju̧i̧ chjiari. Tjamo̧ davä. Ana̧ri̧ na̧rȩnȩrȩ Jechurë coa chjadüa̧ pio ju̧i̧ chjiari.

3Jabo pio coa chjiari ji̧dë ma oëra̧ jo̧rȩtaji̧ri̧ pio ji̧ri̧ ja̧di ta̧rëri̧ dëbë yo̧tämi̧ cjiarequedejȩrȩ. Tjamo̧ davä. Judiro̧ ji̧dë ma yo̧a̧ oaiä, ‘Cjäri̧ madida, Pablo judi tjamo̧ri̧ chjadüa̧ oa cjiadëdida, Jechurë chjadüa̧ oa tjamo̧ri̧ ja̧bepadëmȩdida’ quëna̧ jo̧rȩtaji̧ri̧rȩ yo̧a̧ oaiä, jabechji̧ ja̧di ta̧rëri̧ yo̧mȩrȩ dëbë yo̧tämi̧ cjiarequedejȩrȩ: 4Danȩrȩ, ütarë jo̧rȩtachji̧vä a̧ro̧rȩ ja̧beparërea̧ pio ju̧i̧ chjiari, a̧ro̧rȩ tjamo̧ yo̧rea̧ chiaji̧ri̧rȩ ja̧beparërea̧ pio ju̧i̧ chjiari. Jabechji̧ a̧ro̧rȩ pumȩ pio ji̧ri̧ a̧ra̧ano̧riä cjo̧ro̧a̧ oaiä, dëdë, a̧ro̧rȩ a̧ra̧ano̧a̧ pumȩ pio ji̧ri̧iä cjo̧dërea̧ chiarea̧rȩ. Jabechji̧ china̧chjadëde jabo jabechji̧, a̧ro̧rȩ a̧ra̧ano̧a̧ pumȩ pio ji̧ri̧iä jurarea̧ oa cjo̧dërea̧ chiarea̧rȩ. Jararea̧ oa cjo̧dërea̧ chiarea̧rȩ. China̧chjadë maeade. 5Ado danȩrȩ, a̧ro̧rȩ ibëa̧ iei̧ pio ji̧ ëbarä judi, jabechji̧ pio ji̧ nö̧ta a̧ra̧ano̧riä tai̧täreji̧ri̧rea̧rȩ peaja̧di. Jabechji̧ ibëa̧ iei̧ pio ji̧ nö̧ta a̧ra̧ano̧riä tai̧rea̧ chiarea̧rȩ. Tjamo̧ davä. A̧ra̧ano̧mȩ ja̧ iei̧ pio jini̧ quëna̧yi̧rä judi, dëdë chjadëde ëba jäpea̧ ji̧. China̧chjadëde. Jabechji̧ peaja̧di dari̧ japade Pedro judi. Jibëa̧ iei̧bo a̧ra̧ano̧riä tai̧de. Ado judimo̧rȩdë jabo Ano̧mȩ Jechurë chjadüa̧ pio judiro̧borë, ju̧i̧di ja̧ji̧ri̧ pio judiro̧borë japadirȩ. Jibëa̧ iei̧ pio ji̧ nö̧ta a̧ra̧ano̧riä tai̧dirȩ peaja̧di. 6Ado danȩrȩ, pio a̧ro̧rȩborë cjo̧dërea̧ chiarea̧rȩ ca̧ oti̧. Tjamo̧ davä. A̧ro̧rȩ a̧ra̧ano̧a̧ pumȩ pio ji̧ri̧iä cjo̧dërea̧ chiarea̧rȩ. Jabo cjo̧dërea̧ chiaji̧ri̧borë, cjo̧dëdë marea̧rȩ jabo ibëa̧ ichira̧ pio ju̧ri̧ra̧ ja̧beparea̧rȩ ji̧dëri̧, ibëa̧ jurarea̧ pio ju̧i̧ gatëpea̧ oa. Tjamo̧ davä ca̧ oti̧. Cüdë, ado Bernabe pio judiborë a̧ra̧ano̧a̧ ba oa jurarea̧ oa cjo̧dërea̧ chiaji̧ri̧borë cjo̧dëdë marea̧rȩ. 7Danȩrȩ, guadia üdë jibëa̧ chërera̧ pio ju̧ri̧ra̧ ja̧bepadë made jabo jabechji̧, jënȩ ja̧bepea̧ ba oa boarea̧ dade. Ado tjado ana̧mȩ pio judi uva pio ju̧i̧ ponȩ ëte, jabechji̧ jurade davä, jënȩ järätärä ja̧ oa, jënȩ ja̧bepea̧ pio ju̧i̧. Ado oveja jidamȩ pio judi, jabechji̧ oveja yö̧cö oa jaramȩrȩ ja̧bepade. Aja̧ ca̧ oti̧, pumȩ judiro̧ ja̧bepea̧ oaiä boarea̧ da maeadirȩ chjadëri̧. Ado peaja̧ditäremȩde pio ibëiä, Jechurë chjadüa̧ pio ji̧ri̧iä. Jabechji̧ a̧ro̧rȩ pumȩ ji̧ri̧ a̧ra̧ano̧a̧ ba oa yürütäreji̧ri̧diro̧ibe.

8Danȩrȩ, dai chirirä ja̧ jo̧rȩtaji̧ri̧ pio judiro̧ peaja̧di dari̧ japa maeadirȩ. Jabo danȩrȩ, dai chirirä ja̧ ma̧ȩ oa jo̧rȩtamȩrȩ yo̧dë marequededibe, jabo no̧mȩ tjamo̧ri ja̧ go̧ȩpea̧ oa cjiarërea̧ ma̧ȩ pio ju̧i̧ jo̧rȩtamȩrȩ yo̧requededibe. Peaja̧di ta̧rëri̧ go̧ȩpea̧ oa cjiarëremȩde tüdüa̧mi̧ darä cjo̧ro̧pea̧ ma̧ȩ üdë. 9Aja̧, ta̧rëchji̧vä Moicherë go̧ȩparërea̧ ma̧ȩ pio ju̧i̧:

"Baca pio ju̧i̧ dabu chjua tjamo̧räpȩ ju̧ri̧ ja̧bepa tänȩdiro̧jo̧ȩ chjai chomi̧ da oa pape boa boa cjaeäpea̧ oa. Jabechji̧ cho oa joëri pio judiri go̧dü tänȩpea̧ oa pape boa boa cjaeä tänȩdiro̧jo̧ȩ. Jabechji̧ baca üdë to oaiä yura̧ oa cjiamȩrȩ paero paero boa boa cjaeäriä jäde. Ado jura tänȩdë ma ja̧didë, jabo jabechji̧ jura tänȩdiro̧jo̧ȩ. Jurariä ja̧bepa tänȩdiro̧jo̧ȩ. Jabechji̧ jurariä boa boa cjaeädejȩ cho joë oa. Ado judi chjadëri̧ jurariä ja̧bepapea̧ oa, jabechji̧ tabüdëpea̧de yu̧ra̧ to üdë, jabo jabechji̧ jurariä ja̧bepa tänȩpea̧de."

Aja̧ ca̧ oti̧, ja̧di ta̧rëri̧ go̧ȩpea̧ oa cjiarëremȩde. Jabo danȩrȩ, ¿yö̧ta dari̧ jo̧rȩtarëremȩde Ütë tjamo̧ judi? Baca pio ju̧i̧ chjiari bücjüri̧ cjia tjamo̧ oaiä pio yoa ma̧ȩ oa ¿go̧ȩpa tänȩrëremȩdejȩ? 10Cjäri̧ made, baca pio ju̧i̧ chjiari bücjüri̧ cjia tjamo̧mȩrȩ go̧ȩpa tänȩdërëremȩde, jabo jabechji̧ pio ibë chjiari bücjüri̧ cjiamȩrȩ go̧ȩpa tänȩrëremȩdejȩ, pumȩ pio ji̧ri̧ tjamo̧ri̧ jo̧rȩtamȩrȩ, pio ju̧i̧ ja̧ oa ja̧bepaji̧ri̧ pio ji̧ri̧ tjamo̧ri̧ jo̧rȩtamȩrȩ. Jabechji̧ tjado oa cabëpamȩ pio judiborë jurarea̧ datäremȩde mitërea̧ japamitërä. Tjamo̧ davä. Pio judi, ado jurarea̧ oa a̧dopamȩ pio judiborë, ‘jabechji̧ a̧ro̧rȩ ja̧bepea̧ oaiä jurarea̧ daeji̧ri̧a̧ro̧da' quëna̧ jo̧rȩta maeadirȩ. Jabechji̧ ja̧bepea̧ ba oa mitëpea̧ maeade ma̧diä cjia tänȩrea̧ decjiari̧. 11Ado danȩrȩ, a̧ro̧rȩ dibëa̧ chjarerä cjo̧ro̧rërea̧ ji̧, jabechji̧ tjado ana̧mi̧ darä ja̧bepaji̧ri̧rȩ cho ba chia tjamo̧mi̧ da oa ponȩmi̧ dari̧ a̧ra̧ano̧rëreji̧ri̧rea̧ro̧dibe dibëa̧ tjo ja̧ chomi̧ da oa. ¿Ado pio ju̧i̧iä jabechji̧dëde a̧ro̧rȩ a̧ra̧ano̧a̧ ba oa pio dibëiä eami̧ oa mitëpea̧ üdë? A̧ro̧rȩ pio dibëiä ana̧ri̧ ponȩmi̧ dari̧ a̧ra̧ano̧a̧ oaiä, ¿jabechji̧dëde a̧ro̧rȩ ja̧bepea̧ ba oa peaja̧di pio dibëiä boapea̧ üdë? Dëdë, jabechji̧de. Jabechji̧ Ano̧mȩ pio judi ibë tjamo̧ yo̧rea̧ yürüa̧ oaiä, jabechji̧ pio dibëiä cjo̧dërea̧ chiarea̧rȩ. 12Danȩrȩ, mȩnȩro̧ o ji̧ri̧iäpȩmo̧ a̧dorä judi, judiro̧ pio dibëiäpȩmo̧ a̧ra̧ano̧a̧ ba oa yürürä judi, jabechji̧ chjadëtäremȩde. Jabo danȩrȩ ca̧ oti̧, ji̧dë u̧i̧ chjadëtäremȩde mȩnȩro̧ pio ibëiäpȩmo̧ a̧dorä judi. Jabechji̧ mȩnȩro̧ ma̧ȩ chjadëi̧ pio ju̧i̧ jabë dabadërërea̧ ji̧, pio ibëiä ta̧rërëreji̧ri̧nȩrȩ mȩnȩro̧ pearä ta̧rërërea̧ ji̧. Ado pio ibëiä taruparëremȩde a̧doparea̧ üdë pio dibëiäpȩ. Ado pio ju̧i̧iä dëdë, ji̧dë u̧i̧ chjadëtäremȩde mȩnȩro̧ pio ibë a̧dorä judi.

Jabo danȩrȩ ca̧ oti̧, a̧ro̧rȩ pio dibëiä cjo̧dërea̧ chiaräbo, a̧ro̧rȩ pio dibëiäpȩmo̧ a̧ra̧ano̧a̧ ba oa cjo̧dërea̧ chiaräbo, jabechji̧ cjo̧dëdë marea̧ro̧dibe. Jabechji̧ ma̧ȩ chjadëi̧ üdë ade cjiami̧ tarari̧ cjiachea oa, a̧ro̧rȩ cjo̧dëa̧ oaiä ma̧ȩ chjadëi̧ üdë poëdiämi̧ tarari̧ cjiadiächea oa, jabechji̧ chjaori̧ ja̧beparëreji̧ri̧rea̧rȩ a̧ro̧rȩ ja̧bepea̧ oaiä chëre boapea̧ oa, pio dibëiä eami̧ oa cjo̧dëchea oa. 13Danȩrȩ, ¿dabadënȩrȩ Ütë tjamo̧ ja̧ bëräpȩ ju̧ri̧ ja̧bepaji̧ri̧ pio ji̧ri̧ chjiari? Jabechji̧ pio ju̧ri̧pȩ ja̧bepaji̧ri̧ pio judiro̧, jënȩro̧ ja̧bepea̧ ba oaiä jibëa̧ jurarea̧ oa dadirȩ. Tjamo̧ davä. O ji̧ri̧ chjiari goë tuti ja̧bepaji̧ri̧ pio judiro̧, yürürea̧ mechjaräpȩ ju̧ri̧ goe gu̧rori̧ yürüji̧ri̧ pio judiro̧, jabechji̧ jibëa̧ oa mitërea̧ dadirȩ jënȩro̧ ja̧bo tänȩa̧ pio ju̧i̧iä. 14Ado peaja̧dimi̧ dari̧ cjo̧ro̧tä eamȩrȩ yo̧rëremȩde ibëa̧ Ano̧mȩ judi ma̧ȩ chjadëi̧ oa a̧ra̧ano̧ji̧ri̧ pio ji̧ri̧ chjiari. Tjamo̧ davä. Judiro̧ ma̧ȩ chjadëi̧ oa a̧ra̧ano̧a̧ oaiä, judiro̧ Ütë tjamo̧ ja̧ ma̧ȩ oa a̧ra̧ano̧a̧ oaiä, jabechji̧ chjadëri̧ cjo̧ro̧rea̧mi̧ dari̧ a̧doa̧ oa cjiatäreji̧ri̧dirȩ ta̧rë chaji̧ri̧ pio ji̧ri̧iä. Tjamo̧ davä. Judiro̧ ja̧bepea̧ ba oa a̧doa̧ oa cjiatäreji̧ri̧dirȩ ta̧rë chaji̧ri̧ pio ji̧ri̧iä.

15Jabo cüdë cjo̧dërea̧ chiamȩborë cjo̧dëdë marequede. Tjamo̧ davä. Ano̧mȩ pio judi coa tjamo̧ yo̧rea̧ yürüa̧ oaiä cjo̧dërea̧ chiamȩborë, jabechji̧ cüdë pumȩ pio ji̧ri̧iäpȩmo̧ a̧ra̧ano̧a̧ ba oa cjo̧dëdë marequedejȩrȩ, ado peaja̧di dari̧ cjo̧dëpea̧ ji̧ tarupadëri̧ cjiarequede. Tjamo̧ davä. Pio yoa ma̧ȩ oa go̧ȩpe chjadüräbo, a̧ro̧rȩ cjo̧dërea̧ chia̧ pio ju̧i̧ chjiari ma̧ȩ oa dibëiäpȩmo̧ go̧ȩpe chjadüräbo, jabechji̧ ba cjo̧dëpea̧ ji̧ taruparea̧ jo̧rȩtamȩrȩ go̧ȩpe chjadüdërequededibe. Tjamo̧ri̧ yo̧requededibe ca̧ oti̧. Cüdë cjo̧dërea̧ chiamȩborë pio dibëiä cjo̧dëdëri̧ cjiarequede. Ado cüdë ja̧borä judi, cüdë pio dibëiä eami̧ oa cjo̧dëdë oaiä ta̧mȩcho̧ ja̧bomȩrȩ ja̧borä judi, jabechji̧täremȩde pio coaiä. Aja̧ ca̧ oti̧, chjadëtäremȩde. Jabechji̧ ja̧bopai̧ dari̧ cjiaräbo eami̧ oa cjo̧dëdëri̧ cjiarequededibe cüdë ja̧bepea̧ ba oa. Ado pio ju̧i̧iä ji̧dë ma goaeri̧ yo̧parequede eami̧ pumȩ üdë pio coa tja̧reparȩrea̧ decjiari̧. 16Tjamo̧ davä. Cüdë a̧ra̧ano̧a̧ ba oa eami̧ oa cjo̧dëdë oaiä, dëdë, pio ju̧i̧ chjiari goaeri̧ yo̧pai̧ darequede. Jabo Quiricho pio ju̧i̧ chjiari a̧ra̧ano̧a̧ oaiä, cjäri̧ marequede, pio ju̧i̧ chjiari goaeri̧ yo̧rea̧mi̧dëde. Tjamo̧ davä. Quiricho pio ju̧i̧ chjiari ma̧ȩ chjadëi̧ pio ju̧i̧ a̧ra̧ano̧pea̧ pio ju̧i̧ chjiari goaeri̧ yo̧rea̧mi̧dëde ca̧ ja̧beparea̧ tjamo̧ tara. Jabechji̧ Ütë tjamo̧ pio judi tänȩa̧ oa pio jiro ma̧ȩ oa a̧ra̧ano̧pea̧ chiarequede cjiadiärea̧mi̧dëri̧. Jabechji̧ tabüa̧ oa cjiami̧ dari̧ cjiarequede davä pio jiro ma̧ȩ oa a̧ra̧ano̧pea̧ ji̧. Ado cüdë pio jiro ma̧ȩ oa a̧ra̧ano̧dërä judi, cjäri̧ marequede ca̧ oti̧, a̧dë chjäte gitoi̧ dari̧ jo̧rȩtamȩrȩ cjiadiätäremȩrequede. 17Jabechji̧ cüdë ca̧ea̧ ma̧na̧ri̧ jo̧rȩtamȩrȩ japarä judi, cüdë Quiricho pio ju̧i̧ chjiari ma̧ȩ chjadëi̧ pio ju̧i̧ a̧ra̧ano̧pea̧ ji̧ ca̧ea̧ ma̧na̧ri̧ jo̧rȩtamȩrȩ japarä judi, dëdë, a̧ra̧ano̧a̧ ba oa cjo̧dëtäremȩrequede. Jabo cjäri̧ marequede ca̧ oti̧. Pio yoa ja̧beparea̧ oa ja̧bepapea̧ oa chjadüa̧ oa cjiarequede. Ado chjadüa̧ oa ja̧bepa tara, jabechji̧ tabüa̧ oa cjiami̧ dari̧ ja̧bepapea̧ chiarequede cjiadiärea̧mi̧dëri̧. 18Jabo danȩrȩ ca̧ oti̧, cüdë ja̧di dari̧ ja̧beparä judi, ¿tjana̧ra̧ ba ano̧a̧ oa cjiaparequede? Cüdë pumȩ pio ji̧ri̧iä a̧ra̧ano̧a̧ ba oa cjo̧dëdë marä judi, ¿tjana̧ra̧ ba ano̧a̧ oa cjiaparequede cüdë? Tjana̧ra̧dë, jabechji̧ a̧dë chjäte goae tjamo̧dique ma̧ȩ chjadëi̧ oa a̧ra̧ano̧a̧ üdë. Ma̧ chiadëri̧ cjia tjamo̧mȩrȩ a̧ra̧ano̧reconȩ pio jiro ma̧ȩ oa. Tjamo̧ davä. Cüdë a̧ra̧ano̧a̧ oaiä, pumȩ judiro̧ quëna̧rea̧ daea̧ oaiä, judiro̧ tjaoëpai̧ dari̧ cjo̧ro̧ji̧ri̧pe bagarea̧ daea̧ oaiä, jabechji̧ judiro̧ quëna̧ji̧ri̧pea̧ra̧ pio ju̧ri̧ra̧ chjadëri̧ ba ano̧a̧ oa cjiami̧ dari̧ cjiarequede, pumȩ pio ji̧ri̧iä eami̧ ba ano̧rea̧ oa cjo̧dëdëmȩborë.

19Danȩrȩ ca̧ oti̧, cüdë Jechu ja̧ mu̧i̧tjoi̧mi̧ dari̧ cjo̧ro̧ tara, jabechji̧ cüdë jo̧rȩtami̧ eami̧ti̧ chjadë oa japapai̧ darequede cüdë tabüa̧ oa cjiami̧ dari̧ cjiadë tara. Ado pio ju̧i̧iä jabechji̧, cüdë ado cja̧rȩmo̧ ja̧ mu̧i̧tjoi̧dëmȩborë, jabechji̧ pumȩ ütëbo ja̧ mu̧i̧tjoi̧mi̧ dari̧ cjo̧ro̧requede cüdë. ¿Jabo tjana̧ ju̧i̧iä ji̧ri̧ ja̧ mu̧i̧tjoi̧mi̧ dari̧ cjo̧ro̧requede? Tjana̧ ju̧i̧iädë, jabechji̧ pio ji̧ri̧ chjadëri̧ a̧dopea̧ chia tara, pio ji̧ri̧ chjadëri̧ a̧ra̧ano̧pea̧ chia tara, jabechji̧ pio ji̧ri̧ ja̧ mu̧i̧tjoi̧mi̧ dari̧ cjo̧ro̧requede quëna̧paji̧ri̧ pio judiro̧ ji̧dë u̧i̧ ji̧ra̧ tjamo̧pe bagapea̧ oa. 20Ja̧di tara cüdë judio pio ji̧ri̧ ja̧ chjarerä cjo̧ro̧rä, jabechji̧ pio ji̧ri̧ ja̧ chja̧oerä cjo̧ro̧mȩmi̧ dari̧ cjo̧ro̧requede. Jabechji̧ pio ji̧ri̧ chjadëri̧ a̧dorea̧ dapea̧ oa, pio judiro̧ Quiricho pio ju̧i̧iäpȩmo̧ quëna̧rea̧ dapea̧ oa, jabechji̧ pio ji̧ri̧ ja̧ chja̧oerä cjo̧ro̧mȩmi̧ dari̧ cjo̧ro̧requede. Jabechji̧ cüdë Moicherë go̧ȩparërea̧ ma̧ȩrä cjo̧ro̧dëräbo, jabechji̧ pio jiro ma̧ȩrä cjo̧ro̧mȩmi̧ dari̧ cjo̧ro̧requede pio ji̧ri̧ chjadëri̧ a̧dopea̧ oa, judiro̧ Quiricho pio ju̧i̧iäpȩmo̧ quëna̧pea̧ oa. 21Ado peaja̧dimi̧ dari̧ japarequede judiodë pio ji̧ri̧ nö̧ta. Jabechji̧ cüdë pio ji̧ri̧ ja̧ chjarerä cjo̧ro̧rä, Moicherë go̧ȩparërea̧ ma̧ȩ oa dabadëji̧ri̧ pio ji̧ri̧ ja̧ chjarerä cjo̧ro̧rä, jabechji̧ Moicherë go̧ȩparërea̧ ma̧ȩ pio ju̧i̧ dabadëmȩmi̧ dari̧ cjo̧ro̧requede. Tjamo̧ davä. Pio jiro ma̧ȩ oa dabadëmȩmi̧ dari̧ cjo̧ro̧requede pio ji̧ri̧ chjadëri̧ a̧dopea̧ oa, pio judiro̧ Quiricho pio ju̧i̧iäpȩmo̧ quëna̧pea̧ oa. Jabo oëra̧ jo̧rȩtadëtäreji̧ri̧nȩrȩ jabo. Jabechji̧ cüdë Moicherë go̧ȩparërea̧ ma̧ȩ oa dabadëmȩmi̧ dari̧ cjo̧ro̧räbo, jabechji̧ pio jiro ma̧ȩ oa jiada ma ja̧didë, jabo jabechji̧ Quiricho pio ju̧i̧ ja̧ ma̧ȩrä chjadëri̧ cjo̧ro̧requede. 22Ado danȩrȩ, cüdë ju chiadëmi̧ dari̧ quëna̧ji̧ri̧ pio ji̧ri̧ nö̧ta cjo̧ro̧rä judi, peaja̧di ju chiadëmȩmi̧ dari̧ quëna̧mȩ pio judimi̧ dari̧ cjo̧ro̧requede. Jabechji̧ cüdë ju chiadëmi̧ dari̧ quëna̧ji̧ri̧ pio ji̧ri̧ nö̧ta cjo̧ro̧rä, pumȩrȩ jëdano̧a̧ oa cjiamȩ ütë pio ju̧i̧iäpȩmo̧ yürüa̧ go̧a̧ pio ju̧i̧ juradërequede. Tjamo̧ davä. Ado pio ji̧ri̧ nö̧ta cjo̧ro̧rä judi, ‘Ütë pio ju̧i̧iäpȩmo̧ yürüa̧ go̧a̧ pio ju̧i̧ jurapea̧ üdë china̧chjadida’ quëna̧ji̧ri̧ pio ji̧ri̧ nö̧ta cjo̧ro̧rä judi, jabechji̧ ju chiadëmȩmi̧ dari̧ quëna̧mȩ pio judimi̧ dari̧ cjo̧ro̧requede pio jiro go̧a̧ oa juradëmȩrȩ. Jabechji̧ cüdë pio jiro go̧a̧ oa jurapai̧ daräbo, pio jiro go̧a̧ üdë pio coaiä china̧chjadëräbo, jabechji̧ ju chiadëmȩmi̧ dari̧ quëna̧mȩ pio judimi̧ dari̧ cjo̧ro̧requede, cüdë pio ji̧ri̧ ana̧ri̧ jo̧rȩta tänȩchea oa, cüdë pio ji̧ri̧iäpȩmo̧ chjadëri̧ a̧ra̧ano̧rea̧ dapea̧ oa. Tjamo̧ davä. Pio coaiä china̧chjadë pio ju̧i̧ china̧chjarämi̧ cjiaji̧ri̧ pio ji̧ri̧ nö̧ta ëba cjo̧ro̧rä judi, jabechji̧ ju chiadëmȩmi̧ dari̧ cjo̧ro̧requede cüdë. Jabechji̧ pio ji̧ri̧ chjadëri̧ a̧dorea̧ dapea̧ oa ja̧di dari̧ cjo̧ro̧requede, pio ji̧ri̧ chjadëri̧ ju chiaparȩpea̧ oa. Jabechji̧ cüdë eami̧räpȩ järä, cüdë eami̧ pumȩ pio ji̧ri̧ ja̧ chjarerä cjo̧ro̧rä, pio judiro̧mi̧ dari̧ cjo̧ro̧requede cüdë pio ji̧ri̧iäpȩmo̧ chjadëri̧ a̧dopea̧ oa, quëna̧dëji̧ri̧ pio judiro̧ Quiricho pio ju̧i̧iä chjätärea̧ dapea̧ oa, quëna̧ji̧ri̧ pio judiro̧ ji̧dë u̧i̧ ju chiarea̧ dapea̧ oa. 23Jabechji̧ ca̧ oti̧, ja̧di dari̧ japamȩrȩ cjo̧ro̧requede. Tjamo̧ davä. Jechu Quiricho pio ju̧i̧ chjiari ma̧ȩ chjadëi̧ üdë oëra̧ti̧ oa chjadëri̧ a̧ra̧ano̧a̧ oa cjiapea̧ oa, pumȩ no̧i̧dërë pio jiro ma̧ȩ oaiä chjadëri̧ a̧doa̧ oa cjiapea̧ oa, jabechji̧ pumȩ ütëbo ja̧ mu̧i̧tjoi̧mi̧ dari̧ cjo̧ro̧requede, pio ji̧ri̧ ja̧ chja̧oerä cjo̧ro̧mȩmi̧ dari̧. Aja̧ ca̧ oti̧, ja̧di dari̧ cjo̧ro̧requede pio ji̧ri̧iäpȩmo̧ chjadëri̧ a̧ra̧ano̧rea̧ dapea̧ oa, judiro̧ quëna̧rea̧ dapea̧ oa, a̧ro̧rȩ ma̧ȩ chjadëi̧ pio ju̧i̧iä ji̧mo̧ ma̧ chiadëri̧ cjiaji̧ri̧rȩ cjo̧ro̧rea̧ dapea̧ oa.

24Danȩrȩ ca̧ oti̧, daba jironȩrȩ baguraji̧ri̧ pio ji̧ri̧ chjiari, ba chia oa boarea̧ pio ju̧i̧mo̧i̧ jo̧rȩtaji̧ri̧rȩ tara̧ baguraji̧ri̧ pio ji̧ri̧ chjiari. Jabechji̧ jënȩro̧ nö̧tarä yuro goae tarari̧ tjätjäpë baguradirȩ ja̧bojü tjamo̧pe baguraji̧ri̧rȩ. Ado eami̧ baguramȩ judi, jabechji̧ pio jȩa nö̧ta ëba baguraji̧ri̧ pio ji̧ri̧ boadäräpea̧ oa, jabechji̧ a̧dë chjäte goae tarari̧ bagurade boarea̧ pio ju̧i̧ boapea̧ oa. Jabo cja̧rȩmȩ pio judimo̧rȩ boapade boarea̧ pio ju̧i̧, yo̧a̧ri̧dë. Tjamo̧ davä. Cja̧rȩmȩ pio judimo̧rȩ boapade, jabo duriräpȩ cjiadiäa̧ji̧ri̧ pio judiro̧ cjäri̧ madirȩ, boarea̧ dadëpadirȩ. Aja̧ ca̧ oti̧, ja̧di dari̧ japadirȩ goae tarari̧ baguraji̧ri̧ pio judiro̧. Ado pio ju̧i̧iä yo̧requededibe. Jabechji̧ mȩnȩro̧ nö̧tarä yuro goae tarari̧ baguraji̧ri̧mi̧ dari̧ cjo̧ro̧chji̧vä ibëa̧ Ano̧mȩ ja̧ ma̧ȩrä, goae tarari̧ tjätjäpë baguraji̧ri̧mi̧ dari̧. Jabechji̧ Ano̧mȩ pio ju̧i̧iä boarea̧ pio ju̧i̧ mitërea̧ dapea̧ oa ja̧dimi̧ dari̧ cjo̧ro̧chji̧vä. 25Jabo danȩrȩ ca̧ pumȩ, jabërä chjadëri̧ jëdano̧pea̧de. Tjamo̧ davä. Eami̧ pumȩ üdë o ji̧ri̧ nö̧ta goae tarari̧ baguratämi̧ cjiarä judi, baguraji̧ri̧ pio ji̧ri̧ ja̧ yaboi̧ ütara̧räpȩ ju̧ri̧ go̧düdärätämi̧ cjiarä judi, jabechji̧ jabërä chjadëri̧ jëdano̧mi̧ dari̧ japatäremȩdejȩ jibëa̧ icjara oa. Tjamo̧ davä. Jachi tjamo̧ oa bagurarea̧mi̧ dari̧ chjadëri̧ jëdano̧mi̧ dari̧ japatäremȩde jabërä, judi ja̧bojüdëmȩrȩ baguradäräpea̧ oa, judi no̧ yuroro chjaodëri̧ a̧rȩdärächea oa, jibëa̧ icjara üdë chjaodëri̧ ju chiadëpe bagachea oa. Aja̧ ca̧ oti̧, ja̧di dari̧ jabërä jëdano̧ jëdano̧ cjiami̧ dari̧ japaji̧ri̧rȩ cjo̧ro̧täreji̧ri̧dirȩ jibëa̧ icjara oa goae tarari̧ bagurapea̧ oa, jënȩro̧ dai chirirä ja̧ boarea̧ pio ju̧i̧ boapea̧ oa, yuropapamȩ pio ju̧i̧ boapea̧ oa. Jabo danȩrȩ ca̧ oti̧, a̧ro̧rȩ, quëna̧ji̧ri̧ pio judiro̧, yuropapamȩ pio ju̧i̧ boapea̧ oa baguraji̧ri̧mi̧ dari̧ japadë marea̧rȩ, jabo bucho ana̧ cjiapamȩ ba pio ju̧i̧mo̧i̧ boadäräpea̧ oa japarea̧rȩ. Ado pio ju̧i̧iä chjaocjiarea̧ decjiari̧ ja̧bepatäreji̧ri̧rea̧rȩ ibëa̧ Ano̧mȩ ja̧ oa, a̧ro̧rȩ nö̧tarä yuro ta̧rëdiärea̧mi̧ dari̧. 26Aja̧ ca̧ oti̧, ja̧dimi̧ dari̧ japatäreji̧ri̧rea̧rȩ. Ado pio ju̧i̧iä cüdë nö̧tarä yuro goae tarari̧ baguramȩmi̧ dari̧ cjo̧ro̧requede, tjätjäpë baguramȩmi̧ dari̧. Jabo ca̧ duriräpȩmo̧ baguramȩmi̧ dari̧ cjo̧ro̧dërequede, jabo ütara̧ tjamo̧ pio ju̧ri̧pȩ go̧düdäräpea̧ oa järi tjamo̧mȩrȩ baguramȩmi̧ dari̧ cjo̧ro̧requede. Tjamo̧ davä. Oëra̧ti̧ oa a̧dë dadëmȩmi̧ darë, chjara chia jo̧rȩtadëmȩmi̧ darë goae tarari̧ baguramȩmi̧ dari̧ cjo̧ro̧requede, ütara̧ tjamo̧i̧ baguramȩmi̧ dari̧ cjo̧ro̧pea̧ oa.

Ado danȩrȩ, ado cja̧rȩmo̧ na̧rȩrea̧ ma̧ȩmi̧ da oa peaja̧di ni̧bä chjaotämi̧ cjiarequededibe. Danȩrȩ, cjae cjae guamȩmi̧ dari̧ cjo̧ro̧requede peaja̧di. Danȩrȩ, o judiro̧ yo̧a̧ri̧rȩ, chjaocjiaji̧ri̧rȩ jibëa̧ dëbëti̧ra̧ chia cjae cjae guadirȩ cja̧rȩmȩ pumȩ üdë cjatäa̧rä yuro, cja̧rȩmȩ pumȩ üdë ado cja̧rȩmo̧ oa boadäräa̧rä yuro, ma̧i̧ dari̧ cjae cjae gua̧ oaiä daburäpȩ a̧rȩdäräa̧rä yuro. Ado tjamo̧ri̧ boadärätämi̧ cjiamȩ pio judi, jabechji̧ järi tjamo̧mȩrȩ tjamo̧ri̧ boadärätämi̧ cjiamȩrȩ bape chjaodejȩ jënȩ nö̧tarä yuro. Jabo danȩrȩ, cjarari̧ cjiamȩ pio judimi̧ dari̧ japadë made. Oëra̧ti̧ oa cjae cjae guadë made, jabo jȩa dëbë japatäamȩ pio ju̧i̧mo̧ japapea̧ oa ütarë jo̧rȩtamȩrȩ japamȩde cja̧rȩmȩ pumȩ oa cjae guë cjatä tänȩpea̧ oa. Jabechji̧ pio ju̧i̧ tjamo̧ri̧ a̧rȩdärä tänȩpea̧ oa, pio ju̧i̧ tjamo̧ri̧ boadäräpea̧ oa japamȩde tjätjäpë cjiamȩrȩ. Ado danȩrȩ, peaja̧di dami̧ dari̧ cjo̧ro̧requede cüdë. Jabechji̧ chjaocjiami̧ dari̧ japamȩrȩ cjo̧ro̧dërequede. Oëra̧ti̧ maea oa cjae cjae guamȩmi̧ dari̧ cjo̧ro̧dërequede jabo järi tjamo̧mȩrȩ cjo̧ro̧requede, ütara̧mi̧ cjae cjae guamȩmi̧ darë. Ado pio ju̧i̧iä jabechji̧ chjadëri̧ ja̧bepapea̧ oa, chjadëri̧ ütarë jo̧rȩta ëte ja̧bepapea̧ oa, goae tarari̧ cjae cjae guamȩmi̧ dari̧ ja̧beparequede coa japatamȩmi̧ da pio ju̧i̧ goae tarari̧ dëbëpe chjaomȩmi̧ dari̧ japapea̧ oa, pio ju̧i̧ cjae guë cjatä tänȩmȩmi̧ dari̧ japapea̧ oa. 27Jabechji̧ ca̧ icjara üdë chi̧dëea̧ chja̧oerä cjo̧ro̧dërequede jabo boadäräa̧ oa goareconȩ, ca̧ icjarari pio judiri cjitëmȩ pio ju̧i̧ chjuari̧ jiadamȩrȩ. Jabechji̧ cüdë o ji̧ri̧iäpȩmo̧ a̧ra̧ano̧a̧ duri oa ana̧ri̧ oëra̧diächea oa, järi tjamo̧mȩrȩ boadäräa̧ oa goarequede ca̧ icjara oa. Tjamo̧ davä. Cüdë cjiadiäa̧ japamitërä badëri̧ cjiadiächea oa, cüdë chjadëri̧ ba ano̧a̧ oa cjiatärea̧ ji̧ ba ano̧a̧ oa cjiadëchea oa, jabechji̧ boadäräa̧ oa goarequede ca̧ icjara oa.

Currently Selected:

Cori̧tio Ma̧ȩ 1 9: Pume

Highlight

Copy

Compare