Cori̧tio Ma̧ȩ 1 10

Chjadëri̧ dabapatäreji̧ri̧rea̧rȩ Icharaita pio ji̧ri̧iä

1Danȩrȩ ca̧ oti̧, mȩnȩro̧ icharaita pio ji̧ri̧ chjiari jo̧rȩtadëpe bagachea oa, jabechji̧ ibëa̧ ütëti̧rea̧ pio ji̧ri̧ chjiari chjadëri̧ jo̧rȩta tänȩtämi̧ cjiarequededibe. Danȩrȩ, judiro̧ no̧mȩ tjamo̧ri ja̧ ejito chiriri pio judiri go̧dürërea̧ ji̧, jabechji̧ go̧a̧ra̧ ë pio ju̧i̧ ja̧ chja̧oerä cjiaji̧ri̧rȩ cho̧rë baärëreji̧ri̧diro̧jo̧ȩ jibëa̧ yaboi̧ ëba baämȩ pio ju̧i̧, jibëa̧ uë cjiamȩ pio ju̧i̧. Tjamo̧ davä. Pio ju̧i̧ ja̧ chja̧oerä cjiaji̧ri̧rȩ cho̧rë baärëreji̧ri̧diro̧jo̧ȩ ui coë coëaräpȩ yuro. Ado ja̧dëa ji̧ dabu gaürä chjätärëreji̧ri̧dirȩ ui oëräpȩ yuro. 2Ado judiro̧ go̧a̧ra̧ ë ja̧ chja̧oerä cjia̧ oaiä, judiro̧ ui coëcoëa oa chjätäa̧ oaiä, jabechji̧ go̧ȩ cjaeä chuda̧ oa cjiami̧ dari̧ cjiarëreji̧ri̧dirȩ go̧a̧ra̧ ë oaiä, ui coëcoëa oaiäbo. Pio ju̧i̧iä cja̧rȩmȩpe bagami̧ dari̧ cjiadiärëreji̧ri̧dirȩ Moiche pio ju̧i̧ nö̧ta, pio ju̧i̧ ji̧dë ma cho̧rë järërea̧ tara. 3Ado danȩrȩ, judiro̧ ütëborë ji̧mo̧ cjiaji̧ri̧rȩ jurarëreji̧ri̧diro̧jo̧ȩ jurarea̧ oa, Ütë tjamo̧ judi pio ji̧ri̧iäpȩmo̧ yürürërea̧ jurarea̧ pio ju̧i̧. 4Ado ta̧dëri pio judiri go̧düa̧mȩ ui oa peaja̧di jararëreji̧ri̧dirȩ ütëborë, Ütë tjamo̧ judi ji̧ri̧iäpȩmo̧ yürüa̧ pio ju̧i̧. Ado pio jiro ta̧dë üdë, jabechji̧ Quiricho pio ju̧i̧ chjiari na̧rȩde. Jabechji̧ pio judirëremȩde uimi̧ da oa yürürëremȩ judi, pio ji̧ri̧ ja̧ tjo ja̧ oa yürürëremȩ judi. Jabechji̧ pio ji̧ri̧ ji̧dë ma ëba järërea̧ oaiä, pio ji̧ri̧iäpȩmo̧ jibëa̧ tjo ja̧ oa dami̧ti̧ oa ji̧dë ma yürürërea̧ oaiä, jabechji̧ ta̧dëmi̧ damȩ pio judi yürürëremȩdejȩrȩ jibëa̧ tjo ja̧ uimi̧ da oa. 5Jabo cjäri̧ madejȩrȩ ca̧ oti̧. Ütë tjamo̧ judi ma̧ chiadëri̧ cjiamȩrȩ dadë marëremȩdejȩrȩ. Jabechji̧ judiro̧ ta̧rëdiädëji̧ri̧rȩ cjo̧ro̧rërea̧ oaiä, ma̧ chiadëri̧ cjiamȩrȩ dadë marëremȩdejȩrȩ. Jabo o pio ji̧ri̧mo̧i̧ oa, ji̧ra̧dë oa ma̧ chiadëri̧ cjiamȩrȩ darëremȩdejȩrȩ. Ado pio ju̧i̧iä Ütë tjamo̧ pio judi ja̧bo tänȩrëremȩdejȩrȩ ta̧rëdiädëri̧ cjiaji̧ri̧ pio ji̧ri̧. Jabechji̧ cja̧rȩmȩrämo̧ ja̧bo tänȩdëa̧dejȩrȩ jabo oëra̧ti̧ oa a̧rȩdäräe ja̧bo tänȩrëremȩdejȩrȩ chiri tjoräpȩ ju̧ri̧.

6Danȩrȩ ca̧ oti̧, icharaita judiro̧ pio jiro chjai̧dë oa chjätärëreji̧ri̧dirȩ pio a̧ro̧rȩ pio ji̧ri̧iä uapai̧ dari̧ chi̧dëea̧ oa cjo̧ro̧pea̧ oa. Tjamo̧ davä. A̧ro̧rȩ ji̧dë u̧i̧ na̧e chiape jäpea̧ oa, jabechji̧ pio jiro chjai̧dë oa chjätärëreji̧ri̧dirȩ, a̧ro̧rȩ pio ji̧ri̧ cho̧rëdiächea oa, a̧ro̧rȩ chjai̧dë oa ji̧dë ma japaji̧ri̧rȩ cjo̧ro̧chea oa. 7Jabechji̧ pio judiro̧ teracaba ütë oa chjacjiamȩri̧ jo̧rȩtarërea̧mi̧ jo̧rȩtadëchji̧vä ca̧ oti̧. Jabechji̧ icharaita judiro̧ orë pumȩrȩ jëdano̧a̧ ütë pio ju̧i̧iäpȩmo̧ chjacjiamȩri̧ jo̧rȩtarëreji̧ri̧diro̧jo̧ȩ. Ado pio judiro̧mi̧ dari̧ japadëtäreji̧ri̧nȩrȩ. Danȩrȩ, ja̧di ta̧rëri̧ go̧ȩpea̧ oa cjiarëremȩde ma̧ȩ üdë pio ji̧ri̧ chjiari, Ütë tjamo̧ judi go̧ȩpa tänȩrërea̧ ma̧ȩ üdë. Ta̧rëchji̧vä:

“Aja̧, airi̧ cjia airi̧ cjia a̧dope cjiarëreji̧ri̧dirȩ pumȩ judiro̧ jurapea̧ oa, ërü oa jarapea̧ oa. Ado jura ëte, chjai̧dëri̧ jape chjaoji̧ri̧rȩ bochegua bochegua cjiarëreji̧ri̧dirȩ jibëa̧ ütë teracaba oa chjacjiamȩri̧ jo̧rȩtaji̧ri̧rȩ.”

Aja̧ ca̧ oti̧, ja̧di ta̧rëri̧ go̧ȩpea̧ oa cjiarëremȩde icharaita judiro̧ japarërea̧ pio ju̧i̧ chjiari. 8Jabechji̧ pio judiro̧ chjadëri̧ cjo̧ro̧tärea̧ ji̧, cjäri̧ madirȩ, pio judiro̧ orë china̧chja pio ji̧ri̧ baë ëba mo̧a̧ chjaorëreji̧ri̧dirȩ. Ado pio judiro̧ japami̧ dari̧ japadë matäreji̧ri̧rea̧rȩ ca̧ oti̧. Danȩrȩ, judiro̧ ja̧di dari̧ jape chjaoa̧ oaiä Ütë tjamo̧ judi bape chjaorëremȩdejȩrȩ. Jabechji̧ cja̧rȩmȩ doromo̧ ja̧bo tänȩrëremȩdejȩrȩ pumȩ ji̧ra̧ tjamo̧ oa, 23 mil pumȩ ji̧ra̧ oa. 9Ado danȩrȩ, peaja̧di ütarami̧ dari̧ japarëreji̧ri̧diro̧jo̧ȩ Ano̧mȩ ju̧i̧. ‘Aja̧, ¿napai̧rä yuro jiadarea̧ dapaa̧ro̧da, napai̧rä yuro cjäri̧ri̧ cjiamȩrȩ jidapadiibëda, jabechji̧ bape chjaodaemȩ jirodibëda’ quëna̧ jo̧rȩtaji̧ri̧rȩ ütarami̧ dari̧ japarëreji̧ri̧diro̧jo̧ȩ, ji̧dë ma chjai̧dëri̧ jape chjaorërea̧ oaiä. Jabo bape chjaodëpamȩdërë bape chjaopamȩrȩ japarëremȩdejȩrȩ. Jabechji̧ pio judi tänȩa̧ oaiä ja̧bo ga̧re baärëreji̧ri̧dirȩ ë chiamȩ porë jurachäa̧ oaiä. Ado pio ju̧i̧iä pio judiro̧ japarërea̧mi̧ ütarami̧ dari̧ japadëtäreji̧ri̧rea̧ro̧jo̧ȩ ibëa̧ Ano̧mȩ ju̧i̧. 10Ado peaja̧di ma̧ȩ goaedëti̧ra̧ aechide ni̧bädëtäreji̧ri̧rea̧ro̧jo̧ȩ. Jabo icharaita judiro̧ orë ji̧dë ma aechide yo̧rëreji̧ri̧diro̧jo̧ȩ. Ado judiro̧ ja̧di dari̧ japea̧ oaiä, jabechji̧ ja̧bo tänȩmȩ mu̧i̧tjoi̧ pio ju̧i̧ chjadürëremȩdejȩ Ütë tjamo̧ judi pio ji̧ri̧ ja̧bo tänȩpea̧ oa. Pio ju̧i̧iä jabechji̧, Ütë tjamo̧ pio ju̧i̧iäpȩmo̧ ma̧ȩ goaedëti̧ra̧ aechide ni̧bärea̧mi̧dëde.

11Danȩrȩ ca̧ oti̧, ja̧di chjai̧dë oa chjätärëreji̧ri̧dirȩ icharaita judiro̧ pio a̧ro̧rȩ ütëbodärärë chjadëri̧ chi̧dëea̧ oa cjiapea̧ oa, pio a̧ro̧rȩ uapai̧ ta̧rëri̧ ta̧rë ja̧bopea̧ oa. Jabechji̧ a̧ro̧rȩ pio ji̧ri̧ cho̧rëdiächea oa go̧ȩpea̧ oa cjiarëremȩde ma̧ȩ üdë, pio a̧ro̧rȩ cjiadiäa̧ japamitërä cjo̧ro̧ji̧ri̧ pio judiro̧ peaja̧dimi̧ dari̧ japachea oa. 12Ado pio ju̧i̧iä yo̧requededibe. Jabechji̧ na̧e chia tjamo̧chji̧vä ca̧ oti̧. Jabechji̧ eami̧ pumȩ üdë, ‘jaeboquëda, chjuari̧ quëna̧mȩrȩ dopamȩquëda, ado tjamo̧ri̧ oëra̧diädaemȩ jiroquëda, jabechji̧ ju chiamȩrȩ dopaquëda’ quëna̧mȩ pio judi, ä, chjaodëri̧ oëra̧diäpai̧ dade. 13Jabo danȩrȩ, 'oëra̧diädaemȩ jiroquëda’ quëna̧ jo̧rȩtamȩ pio judi, ¿yö̧ta dari̧ jo̧rȩtapade judi ma̧i̧ da chjai̧dë oa chjätärä? ‘Cjäri̧ madida, ma̧i̧ dadida, tjamo̧ri̧ nö̧tadëquëda’ quëna̧ jo̧rȩtapai̧ dade chjaodëri̧. Jabo danȩrȩ, Ütë tjamo̧ judi o ji̧ri̧ a̧dorërea̧mi̧ a̧dopadidibe peaja̧di. Jabechji̧ pio mȩnȩro̧mo̧rȩ pio jiro chjai̧dë oa chjätä ma ja̧didë, jabo peaja̧dimi̧ dari̧ chjätä maeadirȩ oëra̧ti̧ oa cjo̧ro̧ji̧ri̧ pio judiro̧borë. Ado pio ju̧i̧iä chjadëri̧ jo̧rȩta tänȩtämi̧ cjiarequededibe pio ju̧i̧ chjiari. Danȩrȩ, mȩnȩro̧ eami̧ chjai̧dëra̧ pio ju̧ri̧ra̧ ütara̧ oa cjiami̧ dari̧ cjiarä, jabechji̧ mȩnȩro̧ ararea̧mi̧dë pio ju̧i̧ ara tänȩmi̧ dari̧ japadëpadidibe Ütë tjamo̧ judi, jabo chjadëri̧ japapadidibe. Jabechji̧ a̧dë chjäte chacha tjamo̧mi̧ da oa ara tänȩmi̧ dari̧ japadëpadidibe jabo mȩnȩro̧ nö̧tarä yuro ara tänȩmi̧ dari̧ japapadidibe, chjadëri̧ ütarë jo̧rȩtamȩrȩ. Jabechji̧ mȩnȩro̧ nö̧tadëa̧ chjai̧dë pio ju̧i̧ chjätächea oa, jabechji̧ chjadëri̧ tuti japapade mȩnȩro̧ chjadëri̧ go̧dürea̧ dapea̧ oa, mȩnȩro̧ cjatäcjie jo̧rȩtarea̧ dapea̧ oa.

A̧ro̧rȩ Quiricho pio ju̧i̧ ja̧ icjararä cara̧ oa cjiami̧ dari̧ cjia̧ oaiä, jabechji̧ cja̧rȩmȩmi̧ dari̧ cjiarea̧rȩ

14Ja̧di tara ca̧ oti̧, yo̧requededibe, pio dibë ea tjamo̧mȩrȩ. Danȩrȩ, ji̧dë ma a̧dë jachipadärämi̧ dari̧ jiadachji̧vä teracaba ütë chjö̧na̧i̧ oa. Jabechji̧ pumȩrȩ jëdano̧a̧ ütë pio ji̧ri̧, eami̧ ütë teracaba pio ju̧i̧, putu jura̧ a̧dë chami̧ dari̧ jiadachji̧jo̧ȩ. 15Jabechji̧ chjadëri̧ ütarë jo̧rȩtarea̧ chji̧ chiaji̧ri̧ oa ni̧bä chjaorequededibe. Ja̧di tara jabechji̧, chjadëri̧ ütarë jo̧rȩtachji̧vä cüdë dibë yo̧a̧ pio ju̧i̧. ‘Aja̧, Pablo judi ibë ni̧bä chjaoa̧ ma̧ȩ üdë coëma cjiadida, oëra̧ baädëdida’ quëna̧ ütarë jo̧rȩtachji̧vä cüdë dibë ni̧bä chjaoa̧ pio ju̧i̧.

16Danȩrȩ, a̧ro̧rȩ a̧dopea̧ oa cjiarä, a̧ro̧rȩ Ano̧mȩ pio ju̧i̧ ja̧ icjara oa jo̧rȩtarä, a̧ro̧rȩ judi pio ibë chjiari toro ano̧ mire ja̧boa̧ pio ju̧i̧ chjiari jo̧rȩtarä, jabechji̧ ja̧di dari̧ japea̧ üdë na̧rȩde davä, a̧ro̧rȩ Jechu pio ju̧i̧ nö̧ta cja̧rȩmȩpe baga̧ pio ju̧i̧ chjiari. Jabechji̧ a̧ro̧rȩ jararea̧ oa jararä, ‘Aja̧, Ütë tjamo̧ judi chjadëri̧ japea̧diibëda’ quëna̧ jo̧rȩtaji̧ri̧rȩ jararea̧ro̧jo̧ȩ. Aja̧, a̧ro̧rȩ jararä, jabechji̧ na̧rȩde a̧ro̧rȩ Jechu ja̧ goe oaiä pio ju̧i̧ nö̧ta cja̧rȩmȩpe baga̧ pio ju̧i̧ chjiari. Ado a̧ro̧rȩ chja̧pe oa jurarä, a̧ro̧rȩ mu̧i̧ quira ëte jurarä, peaja̧di na̧rȩde a̧ro̧rȩ Jechu ja̧ icjararä cara̧ oa cjiape baga̧ pio ju̧i̧ chjiari. Jabechji̧ pio judi ibë chjiari ano̧ mire ja̧borërea̧ oaiä, jabechji̧ pio ju̧i̧ ja̧ icjararä cara̧ oa cjiami̧ dari̧ cjiadiäa̧rea̧rȩ. 17Jabechji̧ a̧ro̧rȩ pumȩ ji̧ra̧rȩ jura̧räbo, jabechji̧ cja̧rȩmȩ chja̧pe oaiämo̧i̧ jurarea̧rȩ a̧ro̧rȩ ütëborë, ‘cja̧rȩmȩ icjarami̧ da maeaa̧ro̧da’ quëna̧rea̧mi̧ dari̧.

18Danȩrȩ ca̧ oti̧, mȩnȩro̧ eami̧ ütë oa chjacjiamȩri̧ jo̧rȩtaji̧ri̧rȩ japea̧ oaiä, o ji̧ri̧ nö̧ta chjacjiamȩri̧ jo̧rȩtaji̧ri̧rȩ japea̧ oaiä, jabechji̧ cja̧rȩmȩpe bagami̧ dari̧ cjiadiäpanȩrȩ pio jiro ütë pio ju̧i̧ nö̧ta, pio jiro ütë oa chjacjiamȩri̧ jo̧rȩtaji̧ri̧ pio ji̧ri̧ nö̧ta. Ado pio ju̧i̧iä chjadëri̧ ütarë jo̧rȩtatäreji̧ri̧nȩrȩ Icharai pio judiri ja̧ji̧ri̧ pio ji̧ri̧ chjiari. Danȩrȩ, judiro̧ Ütë tjamo̧ ja̧ bë dairäpȩ cäë yürüa̧ go̧a̧ pio ju̧i̧ jurarërea̧ ji̧, goë tuti ja̧bepaji̧ri̧ pio judiro̧ yürürea̧ mechjarä cäë yürüa̧ go̧a̧ pio ju̧i̧ jurarërea̧ ji̧, ¿tjana̧ oa na̧rȩrëremȩde? Tjana̧ oadë, jabechji̧ na̧rȩrëremȩde juraji̧ri̧ pio ji̧ri̧ chjiari. Jabechji̧ judiro̧ ütëborë Ütë tjamo̧ pio ju̧i̧iäpȩmo̧ chjacjiamȩri̧ jo̧rȩtarëreji̧ri̧ pio ji̧ri̧ nö̧ta tutia̧ oa cjiami̧ dari̧ cjiarëreji̧ri̧dirȩ cja̧rȩmȩpe bagarea̧mi̧ dari̧. Tjamo̧ davä. Pio ji̧ri̧di cjiadiäa̧mi̧ dari̧ cjiadiäa̧dirȩ. Pio ji̧ri̧ nö̧ta ji̧mo̧diäa̧mi̧ dari̧ cjiadiäa̧dirȩ. Pio ji̧ri̧ nö̧ta mirea̧ oa cjiami̧ dari̧ cjiadiäa̧dirȩ. Jabo danȩrȩ ca̧ oti̧, jurarëreji̧ri̧ judiro̧ Ütë tjamo̧ pio ju̧i̧iäpȩmo̧ chjacjiamȩri̧ jo̧rȩtaji̧ri̧ pio ji̧ri̧ nö̧ta ji̧mo̧diäa̧mi̧ dari̧ cjiadiäa̧rä judi, ¿yö̧ta dari̧ jo̧rȩtatäreji̧ri̧rea̧rȩ teracaba ütë pio ju̧i̧iäpȩmo̧ chjacjiamȩri̧ jo̧rȩtapea̧ oa a̧dopaji̧ri̧ pio ji̧ri̧ chjiari. ¿Yö̧ta dari̧ jo̧rȩtatäreji̧ri̧rea̧rȩ teracaba ütë pio ju̧i̧iäpȩmo̧ yürüa̧ go̧a̧remȩ pio ju̧i̧ juraji̧ri̧ pio ji̧ri̧ chjiari? Yö̧ta dari̧dë, jabechji̧ pio judiro̧ ütëborë peaja̧di tutia̧ oa cjiami̧ dari̧ cjiadirȩ pio jiro ütë oa chjacjiamȩri̧ jo̧rȩtaji̧ri̧ pio ji̧ri̧ nö̧ta, cja̧rȩmȩpe bagarea̧mi̧ dari̧. Tjamo̧ davä ca̧ oti̧, pio judiro̧borë pio jiro ütë teracaba oa jo̧rȩtaji̧ri̧ pio ji̧ri̧ nö̧ta cjiadiämi̧ dari̧ cjiadirȩ. 19Jabo danȩrȩ ca̧ oti̧, cüdë pio yoa ma̧ȩ oa ni̧bä chjaoa̧ oaiä, oëra̧ jo̧rȩtatä eadërequededibe teracaba ütë pio ji̧ri̧ chjiari. Jabechji̧ teracaba ütë üdë, ütë tjamo̧dëde jabo teracaba ütëde. Quȩ maeade. Ado pio ji̧ri̧iäpȩmo̧ yürüpea̧ go̧a̧ üdë jabechji̧ ba chiadëde. Pio ji̧ri̧iäpȩmo̧ eami̧ oa yürüa̧ üdë, go̧a̧ pio ju̧i̧ cäë yürü ëte pio ji̧ri̧iäpȩmo̧ yürüa̧ üdë, jabechji̧ ba chiadë maeade. Pio ju̧i̧ tjamo̧ri̧ yo̧tämi̧ cjiamȩrȩ yo̧requededibe ca̧ oti̧. 20Jabo danȩrȩ, pio jiro ütë teracaba judiro̧ ba chiadëräbo, quȩ maearäbo, jabechji̧ pumȩ judiro̧ orë pio ji̧ri̧iäpȩmo̧ chjuari̧ quëna̧ji̧ri̧rȩ cäë yürüdiro̧jȩrȩ. Jabo cjäri̧ madiro̧jo̧ȩ, judiro̧ jibëa̧ ütë pio ji̧ri̧iäpȩmo̧ eami̧ oa yürürä, jabechji̧ Ütë tjamo̧ pio ju̧i̧iäpȩmo̧ yürüdë madiro̧jo̧ȩ. Aja̧ ca̧ oti̧, Ütë tjamo̧ pio ju̧i̧iäpȩmo̧ yürüdë madiro̧jo̧ȩ jabo danȩrȩ, yaröca pio ji̧ri̧iäpȩmo̧ ma yürüdiro̧jȩrȩ. Tjamo̧ davä. Eami̧ ütë teracaba oa eami̧ oa yürürä, jabechji̧ yaröca pio ji̧ri̧iäpȩmo̧ ma yürüdiro̧jo̧ȩ. Ado danȩrȩ ca̧ oti̧, pio mȩnȩro̧ yaröca pio ji̧ri̧iäpȩmo̧ chjacjiamȩri̧ jo̧rȩtaji̧ri̧ pio ji̧ri̧di tutia̧ oa cjiami̧ dari̧ cjiatä ea tjamo̧dërequededibe. Pio ji̧ri̧ nö̧ta ji̧mo̧diäa̧mi̧ dari̧ cjiatä eadërequededibe. Tjamo̧ davä. Yaröca pio ji̧ri̧iäpȩmo̧ chjacjiamȩri̧ jo̧rȩtaji̧ri̧ pio ji̧ri̧ nö̧ta ji̧mo̧ cjiatä ea tjamo̧dërequededibe ca̧ oti̧. 21Danȩrȩ, yo̧a̧ri̧ no̧ oa tai̧ji̧ri̧mi̧ dari̧ cjo̧ro̧rea̧mi̧dëde. Yo̧a̧ri̧ ütë jo̧rȩtarea̧mi̧dëde. Jabechji̧ Ano̧mȩ pio ju̧i̧ ja̧ goe pio ju̧i̧ chjiari chjacjiamȩri̧ jo̧rȩtamȩrȩ jaramȩ judi, jabechji̧ pio ju̧i̧ uëri yaröca pio ji̧ri̧ chjacjiamȩri̧ jo̧rȩtamȩrȩ ade jararea̧mi̧dëde. A̧dë chjäte china̧chja tjamo̧de. Ado Ano̧mȩ pio ju̧i̧ ja̧ icjara üdë yarëa̧ oa cjiami̧ dari̧ cjiarërea̧ pio ju̧i̧ chjiari chjacjiamȩri̧ jo̧rȩtamȩrȩ juramȩ judi, peaja̧di a̧de jurarea̧mi̧dëde. Jechu pio ju̧i̧ uëri yaröca pio ji̧ri̧iäpȩmo̧ chjacjiamȩri̧ jo̧rȩtamȩrȩ a̧de jurarea̧mi̧dëde. Jabechji̧ a̧dë chjäte china̧chjade. 22Danȩrȩ, mȩnȩro̧ ja̧di dari̧ japarä judi, jabechji̧ quëbamȩrȩ jo̧rȩtamȩmi̧ dari̧ jo̧rȩtape bagapai̧ dadidibe Ütë tjamo̧ judi. Tjamo̧ davä. Mȩnȩro̧ pio ju̧i̧ ja̧ oa china̧chjari̧ tutia̧ oa cjiaji̧ri̧pea̧ oaiä, jabechji̧ bape chjaopai̧ dadidibe davä, mȩnȩro̧ pio ju̧i̧iäpȩmo̧ dëbëpe chjaorea̧mi̧dëji̧ri̧ oa. Jabechji̧ teracaba ütë pio ji̧ri̧ nö̧ta ji̧mo̧diämi̧ dari̧ cjiatä eadëdidibe, jabo pio jȩa nö̧ta ji̧mo̧ cjiami̧ dari̧ cjiatä eadidibe ca̧ oti̧. Ado pio ju̧i̧iä, dëdë quëbamȩrȩ jo̧rȩtamȩmi̧ dari̧ jo̧rȩtape bagapai̧ dadidibe.

Ibëa̧ omȩ üdë a̧ro̧rȩ japea̧ pio ju̧i̧iä oëra̧diäpe bagarä judi, jabechji̧ pio ibëiä china̧chjadëräbo japadëtäreji̧ri̧rea̧ro̧jo̧ȩ.

23Danȩrȩ ca̧ oti̧, pio yabo go̧ȩparemȩrequededibe na̧ pumȩ judiro̧ orë yo̧a̧ pio ju̧i̧ chjiari, “Aja̧, eami̧ oa japapai̧ darequede” yo̧ji̧ri̧ pio ji̧ri̧ chjiari. Aja̧, “Ütë tjamo̧ judi china̧chjaparȩdëa̧ pio ju̧i̧ japapai̧ darea̧rȩ” yo̧dirȩ. Aja̧ ca̧ oti̧, tjamo̧ri̧ yo̧dirȩ. Ütë tjamo̧ pio ju̧i̧iä china̧chjadë pio ju̧i̧, dëdë, japapai̧ dadiro̧jo̧ȩ. Jabo mȩnȩro̧ dabadëchea oa chjadëri̧ yo̧tämi̧ cjiarequededibe jabo. Danȩrȩ, a̧ro̧rȩ japapai̧ daräbo, a̧ro̧rȩ Ütë tjamo̧ pio ju̧i̧iä china̧chjadë pio ju̧i̧ japapai̧ daräbo, jabechji̧ orë tjamo̧ri̧ a̧dodëdiibe. O oa japarea̧ üdë a̧dodëdiibe ji̧dë u̧i̧ chjuari̧ quëna̧pea̧ ji̧. Ado o ji̧ri̧ peaja̧di a̧dodë madejȩrȩ. 24Ja̧di tara jabechji̧, dibëa̧ chji̧rämo̧ jo̧rȩtaji̧ri̧mi̧ dari̧ japadëtäreji̧ri̧nȩrȩ, jabo o ji̧ri̧ ja̧ chji̧räbo jo̧rȩtaji̧ri̧mi̧ dari̧ japatäreji̧ri̧nȩrȩ pio ji̧ri̧iäpȩmo̧bo chjadëri̧ a̧dorea̧mi̧ dari̧.

25Pio ju̧i̧iä mȩnȩro̧ gatë tänȩrea̧ bëräpȩ järä, go̧a̧ pio ju̧i̧ gatëpea̧ oa järä, jabechji̧ mȩnȩro̧ eami̧ oa gatëchji̧vä. Jabechji̧ china̧chjadë maeade, jabo chjö̧na̧i̧ oa chjadëri̧ yürürëremȩdiibe Ütë tjamo̧ judi chjadëri̧ jurapea̧ oa. Jabo danȩrȩ, mȩnȩro̧ gatërä, jabechji̧ cjapiri̧ gatëchji̧vä mȩnȩro̧ ana̧ri̧ jo̧rȩtachea oa. Jabechji̧ ji̧dë ma iëno̧ë iëno̧ë ta̧rëdëchji̧vä go̧a̧ pio ju̧i̧ chjiari, teracaba ütë oa cäë yürüa̧ pio ju̧i̧ chjiari. Jabechji̧ dibëa̧ chji̧ üdë pio dibëiäpȩmo̧ aechide yo̧mi̧ dari̧ japachea oa, jabechji̧ cjapiri̧ gatëchji̧vä mȩnȩro̧ chji̧ goaera̧ jo̧rȩtariä jurapea̧ oa. 26Jabechji̧ pio jiro go̧a̧ üdë china̧chjadë maeade. Peaja̧di ta̧rëri̧ go̧ȩpea̧ oa cjiarëremȩde ma̧ȩ üdë. Ta̧rëchji̧vä: “Jabechji̧ pio yoa chiri üdë pareapea̧ oa cjiarëremȩde ibëa̧ Ano̧mȩ pio ju̧i̧iä. Ado pio ju̧i̧iä jabechji̧, pio ju̧i̧ ja̧ maeade chjö̧na̧i̧rȩ.” Aja̧ ca̧ oti̧, ja̧di ta̧rëri̧ go̧ȩpea̧ oa cjiarëremȩde ma̧ȩ üdë. Ado pio ju̧i̧iä ¿yö̧ta dari̧ jo̧rȩtapea̧? Yö̧ta dari̧dë, jabechji̧ eami̧ jurarea̧ üdë teracaba ütë oa yürüa̧ oa cjiaräbo, jabechji̧ Ano̧mȩ pio ju̧i̧ ja̧ maeade. Teracaba ütë pio ju̧i̧ ja̧dëde jabo Ano̧mȩ pio ju̧i̧ ja̧ maeade. Ado pio ju̧i̧iä china̧chjadëde. Tjamo̧ davä. Jurarea̧ üdë, chiri üdë, ado chirirä ja̧ üdë, Ano̧mȩ pio ju̧i̧ ja̧ maeade. Ado pio ju̧i̧iä eami̧ jurarea̧ üdë, jabechji̧ china̧chjadë maeade jabo jurapea̧ maeade.

27Ado danȩrȩ, quëna̧dëmȩ pio judi jibëa̧ bëräpȩ jure jätä yo̧rä judi, jabechji̧ mȩnȩro̧ järea̧ darä judi, jächji̧vä. Ado judi eami̧ jurarea̧ oa dibë yürürä judi, jabechji̧ cjapiri̧ jurachji̧vä iëno̧ iëno̧ ta̧rërea̧ decjiari̧. Jabechji̧ cjapiri̧ jurachji̧vä dibëa̧ chji̧ üdë pio dibëiäpȩmo̧ aechide yo̧mi̧ tarari̧ japachea oa, mȩnȩro̧ chji̧ goaera̧ jo̧rȩtaji̧ri̧rȩ jurapea̧ oa. 28Jabo danȩrȩ, cja̧rȩmȩ pumȩ üdë mȩnȩro̧ jurabea yaboi̧ yo̧rä judi, “Aja̧, pio yoa go̧a̧ üdë teracaba ütë pio ju̧i̧iäpȩmo̧ yürüa̧ go̧a̧ jurarea̧ pio judide” yo̧rä judi, jabechji̧ juradëchji̧jo̧ȩ dibë ma̧ȩ yürümȩ pio ju̧i̧ ana̧ri̧ jo̧rȩta tänȩchea oa. Tjamo̧ davä. Pio jiro go̧a̧ oa jura̧ üdë pio jiro pumȩ pio ju̧i̧iä china̧chja tara, jabechji̧ juradëchji̧jo̧ȩ pio ju̧i̧iäpȩmo̧ ta ano̧e cjatäeno̧mi̧ dari̧ jo̧rȩta tänȩchea oa. 29Tjamo̧ davä ca̧ oti̧, ja̧di dari̧ japapea̧de ado cja̧rȩmo̧ pio ju̧i̧iäpȩmo̧ ana̧ri̧ jo̧rȩta tänȩchea oa, pio judiborë chji̧ goae maeara̧ jo̧rȩtapea̧ oa. Jabechji̧ pio jiro go̧a̧ üdë pio dibëiä china̧chjadëräbo, mȩnȩro̧ chji̧ goaera̧ jo̧rȩtaji̧ri̧rȩ jurapai̧ daräbo, jabechji̧ juradëchji̧jo̧ȩ. Jabechji̧ ado cja̧rȩmo̧ pumȩ pio judiborë chji̧ goaera̧ jo̧rȩtapea̧ oa, ‘pio jiro go̧a̧ oa jura̧ üdë china̧chjadida’ quëna̧mȩ pio judiborë ana̧ri̧ jo̧rȩtachea oa, jabechji̧ juradëchji̧jo̧ȩ.

Jabo danȩrȩ ca̧ oti̧, eami̧ pumȩ üdë jurarea̧ pio ju̧i̧ chjiari ja̧di ta̧rëri̧ yo̧pai̧ dade. “Jabo danȩrȩ, pio jiro go̧a̧ üdë pio coaiä china̧chjadërä judi, ado cüdë jurarea̧ Ano̧mȩ pio ju̧i̧iäpȩmo̧ ma̧ chiadëri̧ cjiamȩrȩ jurarä judi, ¿tjana̧ ju̧i̧iä tja̧reparȩmi̧ dari̧ japadiro̧coe cüdë chjadëri̧ juratärea̧ ji̧? 30“‘Jabechji̧ Ütë tjamo̧ judi chjadëri̧ yürüa̧dicoada’ quëna̧mȩborë jura̧ oaiä, ¿tjana̧ ju̧i̧iä chi̧dëeadiro̧coe cüdë jura̧ pio ju̧i̧ chjiari?” yo̧mȩrȩ yo̧pai̧ dade pumȩ üdë. 31Jabo danȩrȩ ca̧ oti̧, ibëa̧ chji̧rämo̧ jo̧rȩtaji̧ri̧mi̧ dari̧ cjo̧ro̧dëtäreji̧ri̧rea̧rȩ, jabo Ütë tjamo̧ pio ju̧i̧iäpȩmo̧ ma jo̧rȩtaji̧ri̧rȩ cjo̧ro̧täreji̧ri̧rea̧ro̧jo̧ȩ. Tjamo̧ davä. Ado pio ju̧i̧iä yo̧requededibe ca̧ oti̧. Jabechji̧ a̧ro̧rȩ eami̧ oa japarä, jabechji̧ Ütë tjamo̧ pio ju̧i̧iäpȩmo̧ chjacjiamȩri̧ japa matäreji̧ri̧rea̧ro̧jo̧ȩ o judiro̧ ‘a̧dë chjäte ba chia tjamo̧dida’ quëna̧ jo̧rȩtarea̧mi̧ dari̧. Tjamo̧ davä. A̧ro̧rȩ eami̧ oa japarä, a̧ro̧rȩ eami̧ jurarea̧ oa jurarä, a̧ro̧rȩ eami̧ jararea̧ oa jararä, a̧ro̧rȩ eami̧ jo̧rȩtarea̧ oa jo̧rȩtarä, jabechji̧ Ütë tjamo̧ pio ju̧i̧iäpȩmo̧ chjacjiamȩri̧ japa matäreji̧ri̧rea̧ro̧jo̧ȩ, Ütë tjamo̧ pio ju̧i̧ tjamo̧ri̧ ba chiaparȩrea̧mi̧ dari̧. 32Ado pio ju̧i̧iä eami̧ pumȩ pio ji̧ri̧iäpȩmo̧bo chjadëri̧ japa matäreji̧ri̧rea̧ro̧jȩrȩ. Jabechji̧ judio pio ji̧ri̧, ado judiodë pio ji̧ri̧bo chjadëri̧ japa matäreji̧ri̧rea̧ro̧jȩrȩ, Ütë tjamo̧ ja̧ a̧doparea̧ pio ji̧ri̧bo. Jabechji̧ eami̧ pumȩ oa ana̧ri̧ jo̧rȩta tänȩchea oa, chjadëri̧ japa matäreji̧ri̧rea̧ro̧jȩrȩ. 33Peaja̧dimi̧ dari̧ cjo̧ro̧tämi̧ cjiamȩrȩ cjo̧ro̧requede ca̧ oti̧. Jabechji̧ ca̧ chji̧rämo̧ jo̧rȩtami̧ dari̧ japadëri̧ cjiarequede, jabo o ji̧ri̧ ja̧ chji̧räbo jo̧rȩtami̧ dari̧ cjo̧ro̧tämi̧ cjiarequede. Pio ju̧i̧iä järi tjamo̧requede o ji̧ri̧iäpȩmo̧ chjadëri̧ japapea̧ ji̧. Ado eami̧ pumȩ judiro̧ jabë Quiricho pio ju̧i̧ chjiari quëna̧dërä judi, chjadëri̧ a̧dotämi̧ cjiarequedejȩrȩ pio judiro̧borë chjadëri̧ chjätärea̧ dapea̧ oa, pio judiro̧borë bape chjaoa̧ oa cjiachea oa. Ado pio ju̧i̧iä ca̧ oti̧, pio ji̧ri̧ ja̧ chji̧räbo jo̧rȩtami̧ dari̧ chjadëri̧ japatämi̧ cjiarequedejȩrȩ.

Currently Selected:

Cori̧tio Ma̧ȩ 1 10: Pume

Highlight

Copy

Compare