Cori̧tio Ma̧ȩ 1 8

Pablo judi ni̧bärëremȩde teracaba ütë pio ju̧i̧iäpȩmo̧ yürüa̧ go̧a̧ pio ju̧i̧ jurapea̧ pio ju̧i̧ chjiari.

1Danȩrȩ, go̧ȩpe chjadüa̧renȩro̧coe go̧a̧ pio ju̧i̧ jurapea̧ pio ju̧i̧ chjiari, pumȩrȩ jëdano̧a̧ ütë pio ju̧i̧iäpȩmo̧ yürüa̧ go̧a̧ pio ju̧i̧ chjiari. Aja̧, quëna̧ji̧ri̧ pio judiro̧ pio jiro go̧a̧ oa jurapea̧ üdë, ¿jabechji̧dëde Ütë tjamo̧ pio ju̧i̧iä? Aja̧, ja̧di ta̧rëri̧ iëno̧ë ta̧rëji̧ri̧rȩ go̧ȩpe chjadüa̧renȩro̧coe, ado pio ju̧i̧iä bapë go̧ȩpe chjadütämi̧ cjiarequededibe ca̧ oti̧. Jabo cüdë dibë pio ju̧i̧ chjiari go̧ȩpabea yaboi̧, jabechji̧ jabëtari̧mi̧ jo̧rȩta tänȩtämi̧ cjiarequededibe ba chia tjamo̧mȩ pio ju̧i̧ chjiari. Danȩrȩ, a̧ro̧rȩ ütëborë chji̧ chia tara, jabechji̧ jo̧rȩtarea̧ chiarea̧rȩ pio jiro go̧a̧ pio ju̧i̧ chjiari. Aja̧ pumȩ judiro̧ ütëbodärärë, ‘Aja̧, tjamo̧ri̧ dabaa̧ro̧da’ quëna̧ jo̧rȩta maearea̧rȩ. Ado a̧ro̧rȩ orë, ‘A̧ja̧, pio jiro go̧a̧ oa jura̧ üdë jabechji̧dida’ quëna̧ jo̧rȩtarea̧rȩ. Jabo o judiro̧, ‘Cjäri̧ madida, pio jiro go̧a̧ oa jurapea̧ üdë china̧chjadida, juradëpea̧dida’ quëna̧ jo̧rȩtadirȩ. Jabo ¿yö̧ta dari̧ jo̧rȩtarea̧rȩ o pio ji̧ri̧ chjiari? ‘Aja̧, o judiro̧ tjamo̧ri̧ dabadëdiro̧da, jabo pio a̧ro̧rȩmo̧rȩ tjamo̧ri̧ dabaa̧ro̧da’ ¿quëna̧ jo̧rȩtarea̧rȩ? ¿Yö̧ta dari̧ jo̧rȩtaji̧ri̧rȩ darea̧ro̧jȩrȩ ibëa̧ oti̧ ji̧ri̧? Pio a̧ro̧rȩ jo̧rȩtami̧ dari̧ jo̧rȩtadëji̧ri̧ pio ji̧ri̧ ¿badë darea̧ro̧jȩrȩ? Jabo cjäri̧ marea̧rȩ ca̧ oti̧, ja̧di dari̧ jo̧rȩtaji̧ri̧rȩ dadë matäreji̧ri̧rea̧ro̧jȩrȩ. Jabechji̧ a̧ro̧rȩ o ji̧ri̧iäpȩmo̧ badë darä judi, ¿tjana̧ na̧rȩrea̧de? Tjana̧ na̧rȩrea̧dë, jabechji̧ a̧ro̧rȩ ibëa̧ pumȩ pio ji̧ri̧ tjamo̧ri̧ eadë pio ju̧i̧ chjiari na̧rȩrea̧de. Cjäri̧ marea̧rȩ ca̧ oti̧, ja̧di dari̧ cjo̧ro̧rea̧mi̧dëde, jabo tjamo̧ri̧ eatäreji̧ri̧rea̧ro̧jȩrȩ. Jabechji̧ o ji̧ri̧iäpȩmo̧ tjamo̧ri̧ ea̧ üdë ji̧dë u̧i̧ ba chiade. Tjamo̧ davä. A̧ro̧rȩ daba̧ pio ju̧i̧iä ji̧dë u̧i̧ ba chiade o ji̧ri̧iäpȩmo̧ ea̧ üdë. Jabechji̧ o ji̧ri̧iäpȩmo̧ tjamo̧ri̧ ea̧ üdë chjadëri̧ a̧dodejȩrȩ. Tjamo̧ davä. O ji̧ri̧iäpȩmo̧ ea̧ üdë chjadëri̧ ju chiaparȩdejȩrȩ. Järiparȩdejȩrȩ. A̧dodejȩrȩ davä, judiro̧ ji̧dë u̧i̧ chjuari̧ quëna̧pea̧ ji̧. 2Jabo eami̧ pumȩ üdë, jënȩ dabapea̧ pio ju̧i̧ chjiari goaeri̧ yo̧rä judi, ‘aja̧ nö̧tadäräri̧ dabamȩpea̧quëda yaba̧, ado pio ju̧i̧iä o ji̧ri̧ u̧i̧ ba chiaquëda’ quëna̧rä judi, cjäri̧ made, judi ja̧di ta̧rëri̧ yo̧a̧ oaiä, jabechji̧ tjamo̧ri̧ dabarea̧rȩ pio ju̧i̧ chjiari. Jabechji̧ ‘jabë tjamo̧ri̧ dabapadëa̧dida, jabë pjärämȩ tjamo̧dida, jabechji̧ jibëa̧ pumȩ pio ji̧ri̧ jabë tjamo̧ri̧ eadëdiji̧ri̧da’ quëna̧ daparea̧ro̧jo̧ȩ. 3Jabo eami̧ pumȩ üdë jënȩ dabapea̧ra̧ pio ju̧ri̧ra̧ Ütë tjamo̧ pio ju̧i̧iäpȩmo̧ tjamo̧ri̧ earä judi, jibëa̧ pumȩ pio ji̧ri̧iäpȩmo̧ tjamo̧ri̧ earä judi, ‘jabechji̧ ca̧ea̧ tjamo̧dica̧da, urëdi tjamo̧ oa jo̧rȩtarea̧ chiadida’ quëna̧ jo̧rȩtamȩrȩ dapadejȩ Ütë tjamo̧ pio judi. Ado pio ju̧i̧iä yo̧requededibe ca̧ oti̧. Jabechji̧ a̧ro̧rȩ o ji̧ri̧iäpȩmo̧ tjamo̧ri̧ ea̧ üdë a̧dë chjäte ba chiade. Jabechji̧ a̧ro̧rȩ go̧a̧ pio ju̧i̧ chjiari jo̧rȩta̧ pio ju̧i̧iä ji̧dë u̧i̧ ba chiade. A̧ro̧rȩ dabapea̧ pio ju̧i̧iä ji̧dë u̧i̧ ba chiade. Tjamo̧ davä ca̧ oti̧. Ba chia tjamo̧mȩ üdë o ji̧ri̧iäpȩmo̧ ea̧ pio judide. 4Ja̧di tara, ¿yö̧ta dari̧ jo̧rȩtatäreji̧ri̧rea̧rȩ ca̧ oti̧ go̧a̧ oa jurapea̧ pio ju̧i̧ chjiari, pumȩrȩ jëdano̧a̧ ütë pio ju̧i̧iäpȩmo̧ yürüa̧ go̧a̧ pio ju̧i̧ chjiari? Danȩrȩ, pio jiro ütë pio ju̧i̧ chjiari tjamo̧ri̧ dabarea̧rȩ. ‘Jabechji̧ teracaba ütëdida, ütëdë madida’ quëna̧ dabarea̧rȩ, tjamo̧ri̧ dabaji̧ri̧rȩ. Jabechji̧ Ütë tjamo̧ pio judimo̧de. Cja̧rȩmȩ maeade, ado judiri decjiade. 5Jabo pumȩ judiro̧ orë, dëdë jibëa̧ ütë teracaba ji̧ra̧ tjamo̧ oa goadirȩ. Jabo judiro̧ jibëa̧ ütëmi̧ da oa, a̧dëräpȩ ju̧ri̧ cjiamȩmi̧ da oa jo̧rȩtaräbo, jibëa̧ ano̧ji̧ri̧mi̧ da oa, pio yoa chirirä cjiaji̧ri̧mi̧ da oa goaräbo, ado jibëa̧ ütëmi̧ da oa jëdano̧a̧ oa goaräbo, 6‘jabechji̧ cja̧rȩmȩ Ama̧i̧ Ütë pio judimo̧dida’ quëna̧ dabarea̧rȩ ca̧ oti̧. Ado danȩrȩ, pio jiro Ütë pio ju̧i̧iä chjö̧na̧i̧rȩ taruparëremȩde. Ado pio ju̧i̧iämo̧i̧ cjo̧ro̧rea̧ darea̧rȩ. Pio ju̧i̧ ja̧ maea oa cjo̧ro̧rea̧rȩ, pio ju̧i̧iäpȩmo̧ ma chjacjiamȩri̧ jo̧rȩtapea̧ oa. Aja̧ ca̧ oti̧, o judiro̧ jibëa̧ ütë ji̧ra̧ oa quëna̧räbo, ‘jabechji̧ Ama̧i̧ Ütë pio judimo̧dida’ quëna̧ dabarea̧rȩ, tjamo̧ri̧ dabaji̧ri̧rȩ. Ado Ano̧mȩ cja̧rȩmȩ maea oa quëna̧rea̧ro̧jo̧ȩ peaja̧di. Jabechji̧ o judiro̧ jibëa̧ ano̧ji̧ri̧mi̧ da oa goaräbo, 'jabechji̧ Ano̧mȩ Jechu Quiricho pio judimo̧dida' quëna̧ dabarea̧ro̧jo̧ȩ, tjamo̧ri̧ dabaji̧ri̧rȩ. Jabechji̧ Ütë tjamo̧ pio judi tänȩa̧ oa chjö̧na̧i̧rȩ pareapea̧ oa cjiarëremȩde pio ju̧i̧iä. Ado pio ju̧i̧iä cjo̧ro̧rea̧ peaja̧ oa daea̧rea̧rȩ. Tjamo̧ davä. Pio ju̧i̧iä taruparëremȩ üdë ma̧na̧diibe yaba̧ a̧ro̧rȩ peaja̧ri̧ cjo̧ro̧rea̧mi̧ dari̧.

7Jabo danȩrȩ, quëna̧ji̧ri̧ pio judiro̧ orë jabë na̧ȩ chiadëdirȩ pumȩrȩ jëdano̧a̧ ütë pio ju̧i̧ chjiari. Jabë oëra̧ jo̧rȩtaji̧ri̧rȩ cjo̧ro̧dirȩ. Ado pio ju̧i̧iä judiro̧ quëna̧ji̧ri̧pea̧räbo, Jechu pio ju̧i̧ chjiari quëna̧ji̧ri̧pea̧räbo, ‘jabechji̧ jauëchjadida, pumȩrȩ jëdano̧a̧ ütë üdë jauëchjadida’ quëna̧ jo̧rȩta jirodiro̧jo̧ȩ. Jabechji̧ judiro̧ pearä jo̧rȩtarërea̧ üdë orë jibëa̧ chji̧rä jabë cha̧ oaiä, jabechji̧ chjaodëri̧ aechide yo̧mi̧ tarari̧ jape chjaodejȩrȩ jibëa̧ chji̧ üdë jënȩro̧ pio jiro go̧a̧ pio ju̧i̧ jura̧ oaiä. ‘Jabechji̧ cüdë pio jiro go̧a̧ oa jura̧ oaiä, pio jiro ütë pio ju̧i̧iäpȩmo̧ chjacjiamȩri̧ jo̧rȩtamȩmi̧ dari̧ japa jiroquëda’ quëna̧ jo̧rȩta̧ pio oaiä, jabechji̧ ana̧ri̧ aechide yo̧mi̧ tarari̧ jape chjaodejȩrȩ jibëa̧ chji̧ üdë, judiro̧ chji̧ goae tjamo̧dëra̧ jo̧rȩtaji̧ri̧pe bagarea̧mi̧ dari̧. Aja̧, judiro̧ jabë na̧e chiadë tara, ‘jabechji̧ cüdë pio jiro go̧a̧ oa jura̧ oaiä, Ütë tjamo̧ pio ju̧i̧iäpȩmo̧ chjai̧dëri̧ japea̧cuni̧da’ quëna̧ oaiä, jabechji̧ jibëa̧ chji̧ üdë cjo̧dërë tüe baämi̧ dari̧ jo̧rȩta tänȩdejȩrȩ. 8Jabo danȩrȩ ca̧ oti̧, a̧ro̧rȩ jurarea̧ pio ju̧i̧ chjiari peadë tjamo̧ri̧ dabarea̧rȩ. Jabechi̧ jurarea̧ üdë a̧dodëdiibe ibëa̧ tjo oa. A̧ro̧rȩ eami̧ jurarea̧ oa jurarä, ‘Aja̧, cüdë pio jiro jurarea̧ oa jura̧ oaiä Ütë tjamo̧ ja̧ ma̧ȩrä cjo̧ro̧pea̧ oa ji̧dë u̧i̧ chjadëri̧ a̧doa̧ oa cjiadiäpa jiroquëda, Ütë tjamo̧ pio ju̧i̧iä ji̧dë ui̧ chjadëpaqueda,’ quëna̧rea̧mi̧dëde. Ado a̧ro̧rȩ eami̧ jurarea̧ oa juradëa̧ oaiä, ‘Chia chia, cüdë pio jiro jurarea̧ oa juradëa̧ oaiä chjadëri̧ a̧doa̧ oa cjiadiädaemȩ jiroquëda, ado Ütë tjamo̧ pio ju̧i̧iä jabëdiäpa jiroquëda’ quëna̧rea̧mi̧dëde. Jabechji̧ jurarea̧ üdë ibëa̧ tjo pio ju̧i̧ chjiari yo̧dëde. Pio ju̧i̧iä ana̧ri̧ jo̧rȩtadëtäreji̧ri̧rea̧rȩ a̧ro̧rȩ jurapea̧ pio ju̧i̧ chjiari.

9Jabo danȩrȩ ca̧ oti̧, mȩnȩro̧ tjamo̧ri̧ jare chjadüa̧ oa cjiami̧ dari̧ cjiaji̧ri̧rȩ juraräbo, mȩnȩro̧ dami̧ti̧ jurarea̧ oa chji̧ goaera̧ jo̧rȩtaji̧ri̧rȩ jurapai̧ daräbo, ju chiadëmi̧ dari̧ quëna̧mȩ pio ju̧i̧ chjiari na̧e chia tjamo̧pea̧ chianȩrȩ. Tjamo̧ davä ca̧ oti̧, dibëa̧ omȩ pio judi pio dibëiä ta ano̧eno̧mi̧ dari̧ cjiadiächea oa, ta̧dë oaiä ano̧eno̧mi̧ dari̧ cjiadiächea oa na̧ȩ chia tjamo̧pea̧ chianȩrȩ. 10Jabechji̧ ju chiadëmi̧ dari̧ quëna̧mȩ pio judi dibë jura chaji̧ri̧ oa darä judi, pio jiro go̧a̧ pio ju̧i̧ chjiari coëma cjiari̧ jo̧rȩtaji̧ri̧ pio ji̧ri̧ darä judi, pumȩrȩ jëdano̧a̧ ütërë cjiamȩ bëräpȩ ju̧ri̧ jura chaji̧ri̧ oa darä judi, teracaba ütë pio ju̧i̧iäpȩmo̧ yürüa̧ go̧a̧ oa jura chaji̧ri̧ oa darä judi, jabechji̧ chjaodëri̧ cho̧rëdiämȩrȩ jurapai̧ dade peaja̧di. Jabechji̧ judi na̧e chiadëräbo, jibëa̧ chji̧ üdë pio jȩaiäpȩmo̧ chjaodëri̧ aechide yo̧mi̧ tarari̧ japapai̧ daräbo, jabechji̧ cho̧rëdiämȩrȩ jurapai̧ dade ‘jabechji̧ jirodida’ quëna̧ jo̧rȩtamȩrȩ. 11Jabo cjäri̧ manȩrȩ ca̧ oti̧, mȩnȩro̧ pio jiro go̧a̧ oa jura̧ oaiä, mȩnȩro̧ na̧e chiadëji̧ri̧ pio ji̧ri̧iä ji̧dë u̧i̧ dabarea̧ chiaji̧ri̧rȩ jura̧ oaiä, jabechji̧ chjai̧dëri̧ japarenȩro̧jo̧ȩ dibëa̧ omȩ pio ju̧i̧, Quiricho judi ano̧ mire ja̧boa̧ oa cjiarëremȩ pumȩ pio ju̧i̧. Tjamo̧ davä. Mȩnȩro̧ ja̧di dari̧ japea̧ oaiä, ju chiadëmi̧ dari̧ quëna̧mȩ pio ju̧i̧iäpȩmo̧ chjai̧dëri̧ japarenȩro̧jo̧ȩ pio judi jabë tjamo̧ri̧ na̧e chiape bagadëa̧ oaiä. Tjamo̧ davä. Mȩnȩro̧ pio ju̧i̧ a̧dotärea̧ ji̧, judi ji̧dë u̧i̧ chjuari̧ quëna̧pea̧ oa a̧dotärea̧ ji̧, cjäri̧ marenȩro̧jo̧ȩ, ji̧dë u̧i̧ jaejaeami̧ dari̧ cjia tänȩrenȩro̧jo̧ȩ. 12Ado mȩnȩro̧ ibëa̧ omȩ pio ju̧i̧iäpȩmo̧ chjai̧dëri̧ japea̧ oaiä, pio ju̧i̧ ta ano̧eno̧mi̧ dari̧ japa tänȩa̧ oaiä, ju̧i̧ ja̧ chji̧ üdë pio jȩaiäpȩmo̧ aechide yo̧mi̧ tarari̧ japa tänȩa̧ oaiä, cjäri̧ marenȩro̧jo̧ȩ ca̧ oti̧, Quiricho pio ju̧i̧iäpȩmo̧ chjai̧dëri̧ japarenȩro̧jo̧ȩ. Tjamo̧ davä. Ibëa̧ omȩ pio ju̧i̧iäpȩmo̧ chjai̧dëri̧ japea̧ oaiä, ju chiadëmi̧ dari̧ quëna̧mȩ pio ju̧i̧iäpȩmo̧ chjai̧dëri̧ japea̧ oaiä, jabechji̧ Quiricho pio ju̧i̧iäpȩmo̧bo chjai̧dëri̧ japarea̧ro̧jo̧ȩ. 13Ja̧di tara, cüdë eami̧ jurarea̧ oa jura̧ pio oaiä ca̧ omȩ pio ju̧i̧iäpȩmo̧ chjai̧dëri̧ japarä judi, ca̧ omȩ pio ju̧i̧ oëra̧diä tänȩrä judi, jabechji̧ pio jiro jurarea̧ oa juradëpareconȩ. Jabechji̧ cüdë jura̧ oaiä ca̧ omȩ pio ju̧i̧ oëra̧diä tänȩchea oa, jabechji̧ juradëpareconȩ pio coaiä china̧chjadëräbo. Ado mȩnȩro̧ ja̧di dari̧ cjo̧ro̧a̧ oaiä, jabechji̧ tjamo̧ri̧ earea̧ro̧jȩrȩ dibëa̧ pumȩ pio ji̧ri̧.

Currently Selected:

Cori̧tio Ma̧ȩ 1 8: Pume

Highlight

Copy

Compare