Cori̧tio Ma̧ȩ 1 11

1Ado pio ju̧i̧iä yo̧requededibe ca̧ oti̧. Jabechji̧ pio coa cho̧rëdiächji̧coe, cüdë Quiricho pio ju̧i̧ cho̧rëdiämi̧ dari̧.

Pablo judi ji̧dë u̧i̧ yo̧rëremȩde ivi pio ji̧ri̧ chjiari, oari pio ji̧ri̧ chjiaribo

2Danȩrȩ ca̧ oti̧, ma̧ chiadëri̧ cjiari̧ jo̧rȩtarequededibe mȩnȩro̧ pio coa a̧dë jo̧rȩtadë tara, mȩnȩro̧ cüdë dibë a̧ra̧ano̧rërea̧ ma̧ȩrä jabë cjo̧ro̧ tara. 3Jabo danȩrȩ, pio yoa ma̧ȩ pio ju̧i̧ chjiaribo tjamo̧ri̧ dabatä earequededibe tjübëmi̧ damȩ pio ju̧i̧ chjiari. Jabechji̧ ‘Quiricho judi quëna̧mȩ pio ju̧i̧ ja̧ tjübëmi̧ dadida’ quëna̧ jo̧rȩtatä earequededibe dibëa̧ chji̧rä chjadëri̧ chari̧. Aja̧, pumȩ üi̧ pio ju̧i̧ ja̧ tjübëmi̧ da üdë Quiricho pio judide. Ado pumȩ iei̧ pio ji̧ ja̧ tjübëmi̧ da üdë, jabechji̧ jibëa̧ üi̧ pio judide. Ado danȩrȩ, Quiricho pio ju̧i̧ ja̧ tjübëmi̧ da üdë Ütë tjamo̧ pio judide. Aja̧ ca̧ oti̧, pio ju̧i̧ tjamo̧ri̧ dabatä earequededibe.

4Ja̧di tara eami̧ quëna̧mȩ üi̧ judi quëna̧ji̧ri̧ pio ji̧ri̧ nö̧ta a̧doparä, Ütë tjamo̧ pio ju̧i̧iäpȩmo̧ ni̧bärä judi, jabechji̧ tjübë cotomȩrȩ ni̧bätäremȩdejȩ yuadëmȩrȩ. Tjamo̧ davä. Jibëa̧ tjübëmi̧ damȩ pio ju̧i̧ badëparȩmi̧ dari̧ japachea oa, Quiricho pio ju̧i̧ badëparȩmi̧ dari̧ japachea oa, jabechji̧ tjübë cotomȩrȩ ni̧bätäremȩdejȩ. Ado eami̧ quëna̧mȩ üi̧ judi Ütërë ea jana̧ chjadüa̧ oa ni̧bärä judi, peaja̧di yuadëmȩrȩ ni̧bätäremȩde jibëa̧ tjübëmi̧ damȩ pio ju̧i̧ badëparȩmi̧ dari̧ japachea oa. 5Jabo eami̧ iei̧ pio jini̧ Ütë tjamo̧ pio ju̧i̧iäpȩmo̧ ni̧bärä judi, jabechji̧ chjibo pënȩra̧ ina̧ oa cjiayi̧rȩ ni̧bätäreyi̧nȩjȩ. Tjamo̧ davä. Jini̧ ni̧bärä judi, quëna̧ji̧ri̧ pio judiro̧ a̧dopea̧rä Ütë tjamo̧ pio ju̧i̧iäpȩmo̧ ni̧bärä judi, Ütërë ea jana̧ chjadüa̧ oa ni̧bärä judi, jabechji̧ chjibo pënȩra̧ ina̧ oa cjiayi̧rȩ ni̧bätäreyi̧nȩ jibëa̧ üi̧ pio ju̧i̧ badëparȩmi̧ dari̧ japachea oa. Jabechji̧ iei̧ jini̧ a̧doparea̧räpȩ ina̧dëa̧ oa ni̧bäpea̧ üdë ji̧mo̧ baäde jibëa̧ cö̧ decjiape bagari̧ täapea̧ pio ju̧i̧ nö̧ta. Jabechji̧ chjibo pënȩra̧ ina̧dëa̧ oa ni̧bärä judi badëparȩmi̧ dari̧ japanȩjȩ jibëa̧ üi̧ pio ju̧i̧. Ado jibëa̧ cö̧ decjiape bagari̧ täarä judi, peaja̧dimi̧ dari̧ japanȩjȩ jibëa̧ üi̧ pio ju̧i̧iäpȩmo̧. Ba chiadëparȩmi̧ dari̧ japanȩjȩ. Ado pio ju̧i̧iä chjadëri̧ ina̧yi̧rȩ ni̧bätäreyi̧nȩ, chjibo pënȩra̧ pio ju̧ri̧ra̧. 6Jabo eami̧ iei̧ pio jini̧ a̧doparea̧ bëräpȩ ju̧ri̧ Ütë tjamo̧ pio ju̧i̧iäpȩmo̧ ni̧bärä jibëa̧ tjübë pio ju̧i̧ chjadëri̧ ina̧dëri̧ cjiarä judi, jabechji̧ jibëa̧ cö̧ chjö̧na̧i̧ oa täa̧ oa cjiayi̧mi̧ dari̧ cjianȩ. Tjamo̧ davä. Jibëa̧ cö̧ decjiape bagari̧ täa̧ oa cjiayi̧mi̧ dari̧ cjianȩ. Jabo cjäri̧ made jabo, jini̧ a̧dë chjäte idëri̧ cjiachea oa, jabechji̧ chjadëri̧ ina̧ oa cjiatäreyi̧nȩ chjibo pënȩra̧ jibëa̧ cö̧ decjiape bagari̧ täa̧ oa cjiami̧ dari̧ cjiachea oa. 7Jabo üi̧ üdë Ütë tjamo̧ pio ju̧i̧iäpȩmo̧ ni̧bärä judi, jabechji̧ jibëa̧ tjübë oa yua oa cjiadëmȩrȩ ni̧bätäremȩde. Jabechji̧ üi̧ judi jibëa̧ tjübë oaiä na̧rȩde Ütë tjamo̧ pio ju̧i̧ chjiari, jënȩ tjamo̧ yo̧rea̧ pio ju̧i̧ chjiari, jibëa̧ ju chiarea̧ pio ju̧i̧ chjiari. Tjamo̧ davä, üi̧ judi Ütë tjamo̧ pio judimi̧ dari̧ pareapea̧ oa cjiarërea̧ oaiä, ja̧di dari̧ na̧rȩde jibëa̧ tjübë oaiä. Pio ju̧i̧iä üi̧ judi Ütë tjamo̧ pio ju̧i̧iäpȩmo̧ yuamȩrȩ ni̧bärä judi, cjäri̧ made, chjadëri̧ na̧rȩdëde jibëa̧ tjübëmi̧ damȩ pio ju̧i̧ chjiari, jȩnȩ Ütë tjamo̧ pio judimi̧ dari̧ pareapea̧ oa cjiarërea̧ pio ju̧i̧ chjiari. Ja̧di tara yuadëmȩrȩ ni̧bätäremȩde üi̧ judi chjadëri̧ na̧rȩpea̧ oa Ütë tjamo̧ pio ju̧i̧ chjiari, jibëa̧ tjübëmi̧ damȩ tjamo̧ pio ju̧i̧ chjiari. Ado iei̧ jini̧ chjadëri̧ na̧rȩtäreyi̧nȩ jibëa̧ üi̧ pio ju̧i̧ chjiari, jibëa̧ tjamo̧ yo̧rea̧ pio ju̧i̧ chjiari, jibëa̧ ju chiarea̧ pio ju̧i̧ chjiari. Pio ju̧i̧iä jini̧ Ütë tjamo̧ pio ju̧i̧iäpȩmo̧ ni̧bärä, tjübë ina̧ oa cjiayi̧rȩ ni̧bätäreyi̧nȩ chjadëri̧ na̧rȩpea̧ oa üi̧ ja̧ tjamo̧ yo̧rea̧ pio ju̧i̧ chjiari, jibëa̧ chja̧oerä cjo̧ro̧a̧ pio ju̧i̧ chjiari. Aja̧, chjibo pënȩra̧ ina̧ oa cjiayi̧rȩ ni̧bätäreyi̧nȩ jibëa̧ üi̧ pio ju̧i̧ badëparȩmi̧ dari̧ japachea oa.

8Jabechji̧ üi̧ judi pearä judi pareapea̧ oa cjiarërea̧ ji̧, yabochjarë pareapea̧ oa cjiarëremȩde. Tjamo̧ davä. Iei̧ pio jini̧ yabochjarë pareapea̧ oa cjiadërëreyi̧nȩ, jabo üi̧ pio judi yabochjarë pareapea̧ oa cjiarëremȩde. Tjamo̧ davä, iei̧ pio judiri ja̧ra̧ pio ju̧ri̧ra̧ pareapea̧ oa cjiadërëremȩde üi̧ judi, jabo iei̧ pio jini̧ üi̧ pio judiri ja̧ra̧ pio ju̧ri̧ra̧ pareapea̧ oa cjiarëreyi̧nȩ. 9Ado üi̧ judi pearä pareapea̧ oa cjiarërea̧ ji̧, jabechji̧ iei̧ pio ju̧i̧ ja̧ oa pareapea̧ oa cjiadërëremȩde jabo iei̧ pio jini̧, dëdë, üi̧ pio ju̧i̧ ja̧ oa pareapea̧ oa cjiarëreyi̧nȩ. Jabechji̧ üi̧ pio ju̧i̧ chjadëri̧ a̧dopea̧ oa pareapea̧ oa cjiarëreyi̧nȩ iei̧ jini̧. 10Ado pio ju̧i̧iä jabechji̧, iei̧ jini̧ jibëa̧ tjübë oa chjadëri̧ ina̧ oa cjiatäreyi̧nȩ chjibo pënȩra̧ Ütë tjamo̧ pio ju̧i̧iäpȩmo̧ ni̧bärä. Jabechji̧ jibëa̧ tjübëmi̧ damȩ pio ju̧i̧ ja̧ chja̧oerä cjo̧ro̧pea̧ pio ju̧i̧ chjiari chjadëri̧ na̧rȩpea̧ oa, ado a̧dëräpȩ cjiaji̧ri̧ mu̧i̧tjoi̧ pio ji̧ri̧iäpȩmo̧ ma̧ chiadëri̧ cjiaparȩpea̧ oa ja̧di dari̧ na̧rȩtäri̧yi̧nȩ.

11Jabo ja̧di dari̧ cjiaräbo, jabechji̧ oëra̧ jo̧rȩtadëtäreji̧ri̧nȩrȩ. Tjamo̧ davä. Oari judiro̧ ado ivi jini̧ro̧borë, jabechji̧ oëra̧ jo̧rȩtadëtäreji̧ri̧rea̧rȩ. ‘Aja̧, ado cja̧rȩmo̧ pio ju̧i̧iä tjamo̧ri̧ ja̧ȩ cjiami̧ dari̧ cjo̧ro̧rea̧mi̧dëquëda’ quëna̧ jo̧rȩtadë matäreji̧ri̧rea̧rȩ. Tjamo̧ davä. Jechu Quiricho pio ju̧i̧iäpȩmo̧ quëna̧ji̧ri̧ pio judiro̧ ütëborë, ‘jabechji̧ ado cja̧rȩmo̧ pio ju̧i̧iä ja̧ȩ cjiami̧ dari̧ cjo̧ro̧rea̧mi̧dëquëda’ quëna̧ jo̧rȩtadë matäreji̧ri̧rea̧rȩ. Jabechji̧ iei̧ jini̧ jibëa̧ ma̧na̧ri̧ cjo̧ro̧rea̧mi̧dënȩ jabo üi̧ pio ju̧i̧iä ja̧ȩ cjiami̧ dari̧ cjo̧ro̧rea̧ danȩ. Üi̧ pio ju̧i̧ ja̧ ju chiarea̧ oaiä chjadëri̧ a̧doa̧ oa cjo̧ro̧nȩ. Ado üi̧ judi peaja̧di jibëa̧ ma̧na̧ri̧ cjo̧ro̧rea̧mi̧dëde jabo iei̧ pio ji̧iä ja̧ȩ cjiami̧ dari̧ cjo̧ro̧rea̧ dade. Tjamo̧ davä. Iei̧ pio ji̧ ja̧ ju chiarea̧ oaiä chjadëri̧ a̧doa̧ oa cjo̧ro̧de. Jabechji̧ ba dëbë ja̧ȩ cjiami̧ dari̧ cjo̧ro̧täreji̧ri̧dirȩ. Aja̧ ca̧ oti̧, yo̧a̧ri̧borë ba chiadirȩ. 12Jabechji̧ pearä cjo̧ro̧rëreyi̧ iei̧ pio jini̧ üi̧ pio judiri ja̧ra̧ pio ju̧ri̧ra̧ jüdüpea̧ oa cjiarërea̧räbo, jabechji̧ üi̧ pio judi ara̧ oa cjia maeade iei̧ pio ji̧iämo̧i̧. Tjamo̧ davä. Ada̧ pio ju̧i̧ ja̧ duri oa cjo̧ro̧ji̧ri̧ oari pio judiro̧ ütëborë ivi pio ji̧ri̧iämo̧i̧ ara̧ oa cjia maeadirȩ. Jabechji̧ iei̧ decjiarä judi, üi̧ decjiatäremȩde peaja̧di. Ado pio ju̧i̧iä oari judiro̧, ado ivi jini̧ro̧, jabechji̧ ba dëbë ja̧ȩ cjiami̧ dari̧ cjo̧ro̧ji̧ri̧pea̧dirȩ. Ado Ütë tjamo̧ pio ju̧i̧iä ja̧ȩ cjiami̧ dari̧ cjo̧ro̧pea̧ chiarea̧rȩ peaja̧di. Jabechji̧ chjö̧na̧i̧rȩ taruparëremȩde pio ju̧i̧iä. Tjamo̧ davä. Oari judiro̧, ivi pio jini̧ro̧ pio ju̧i̧iämo̧i̧ taruparëreji̧ri̧dirȩ.

13Ado pio mȩnȩro̧ iei̧ jini̧ japapea̧ pio ju̧i̧ chjiari chjadëri̧ ütarapea̧ chianȩrȩ. Danȩrȩ, iei̧ jini̧ a̧doparea̧räpȩ jibëa̧ tjübë oa chjibo pënȩra̧ ina̧dëyi̧rȩ Ütë tjamo̧ pio ju̧i̧iäpȩmo̧ ni̧bärä judi, ¿jabechji̧dëde? ¿Yö̧ta japapea̧ ca̧ oti̧? ¿Chjibo pënȩra̧ ina̧ oa cjiayi̧rȩ ni̧bäpea̧, jabo ina̧ oa cjiayi̧rȩ ni̧bädëpea̧? Pio ju̧i̧ chjiari chjadëri̧ ütarapea̧ chianȩrȩ. 14Aja̧ ca̧ oti̧, ivi ja̧ cö̧ pio ju̧i̧ chjiari dabarea̧rȩ jabo peaja̧di dabapea̧ chiarea̧rȩ üi̧ ja̧ cö̧ pio ju̧i̧ chjiaribo. Danȩrȩ, o judiro̧ ibë dabapa tänȩdëa̧räbo, jabechji̧ daba marea̧rȩ üi̧ ja̧ cö̧ pio ju̧i̧ chjiari a̧ro̧rȩ pio yoa chirirä cjo̧ro̧a̧ oaiä. Jabechji̧ üi̧ ja̧ cö̧ üdë go̧a̧ti̧ tjamo̧rä judi, iei̧ pio ji̧ ja̧ cö̧mi̧ dari̧ cjiarä judi, cjäri̧ made, idëri̧ cjiatäremȩde. 15Jabo iei̧ ja̧ cö̧ üdë go̧a̧ti̧ tjamo̧rä judi, jabechji̧ chjacjiamȩ tjamo̧de. Jabechji̧ Ütë tjamo̧ pio judi yürüa̧ oa goanȩjȩ jibëa̧ cö̧ go̧a̧ti̧ oa jibëa̧ tjübë oa chjadëri̧ ina̧mi̧ dari̧ japapea̧ oa. Jabechji̧ cö̧ go̧a̧ti̧ üdë ina̧rea̧mi̧ dade. Chjibo pënȩmi̧ dade. 16Jabo danȩrȩ ca̧ oti̧, cüdë dibë yo̧a̧ üdë o ji̧ri̧iä goae tjamo̧dërä judi, ado eami̧ pumȩ üdë pio ju̧i̧ chjiari goae tarari̧ dëbë ni̧bätatämi̧ cjiarä judi, jabechji̧ pio yoamo̧i̧ ma̧ȩ oa dëbë yo̧pareconȩ. Danȩ, ja̧di maeari̧ jape chjaorea̧rȩ Jechurë chjadüa̧ pio judiro̧ no̧mȩ tjamo̧ri ja̧. Ado a̧ro̧rȩmo̧rȩdë jabo oëra̧ti̧ oa a̧dopaji̧ri̧ pio judiro̧borë ja̧di maeari̧ japadirȩ Ütë tjamo̧ ja̧ a̧doparea̧ pio judiro̧. Ado pio ju̧i̧iä dëbë ni̧bätarea̧mi̧dëde.

Chjaocjiarea̧mi̧dëri̧ jo̧rȩtapea̧de Jechu ja̧ icjara üdë, Jechu ja̧ goe üdë

17Jabo cjäri̧ marequededibe ca̧ oti̧, cüdë dibë chjiari chjacjiamȩri̧ jo̧rȩtatärea̧ ji̧, ja̧di dari̧ jo̧rȩtarea̧mi̧dërequededibe mȩnȩro̧ chjadëri̧ a̧dopadë tara. Jabechji̧ mȩnȩro̧ a̧doparä, jabechji̧ chjadëri̧ a̧dopatäreji̧ri̧nȩrȩ Ütë tjamo̧ pio ju̧i̧ chjacjiamȩri̧ jo̧rȩtapea̧ oa. Jabo cjäri̧ manȩrȩ, chjai̧dëri̧ japaji̧ri̧rȩ a̧dopanȩrȩ. Ado pio ju̧i̧iä chi̧dëeapea̧ chiarequededibe. 18Jabechji̧ pio dibë chjiari goë ta̧rëa̧requede ca̧ oti̧. Jabechji̧ mȩnȩro̧ a̧dopea̧mi̧ nö̧ta, cja̧rȩmȩ chji̧ chiami̧ dari̧ jo̧rȩtaji̧ri̧rȩ a̧dopatärea̧ ji̧, jadüchiami̧ chji̧ chiaji̧ri̧mi̧ dari̧ jo̧rȩtaji̧ri̧rȩ a̧dopanȩrȩ. Aja̧, ja̧di ta̧rëri̧ yo̧a̧ oa goë ta̧rërequede, ado ‘tjamo̧ri̧ yo̧a̧ jirodiro̧coada’ quëna̧ jo̧rȩtarequede. 19Jabo ¿yö̧ta dari̧ jo̧rȩtatäremȩrequede pio dibë chjiari. ‘Aja̧, jabechji̧ jirodiro̧da, jadüchiami̧ chji̧ chiami̧ dari̧ cjo̧ro̧pea̧ üdë jabechji jirodida, chja jabechji̧ Ütë tjamo̧ ja̧ ma̧ȩrä tjamo̧ri̧ cjo̧ro̧tämi̧ cjiaji̧ri̧ pio judiro̧ chjadë maearä cjiami̧ dari̧ cjiapea̧ oa ja̧di dari̧ cjo̧ro̧ jirodiro̧da, chja jabechji̧ cjo̧ro̧tädiro̧da’ quëna̧pea̧? Jaebo chjai̧ dadë. Ja̧di quëna̧rea̧mi̧dëde. 20Danȩrȩ, mȩnȩro̧ a̧doparä, Ano̧mȩ Jechurë ja̧boa̧ pio ju̧i̧ jo̧rȩtapea̧ oa a̧doparä, pio ju̧i̧ tjamo̧ri̧ jo̧rȩtaji̧ri̧rȩ a̧dopadë manȩrȩ jabo mairi̧ jurapea̧ pio ju̧i̧mo̧i̧ jo̧rȩtaji̧ri̧rȩ a̧dopanȩrȩ.#11:20 Quëna̧ji̧ri̧ judiro̧, Jechurë pea bëdüa̧rä quëna̧rëreji̧ri̧ pio judiro̧, jabechji̧ ori̧ bagari̧ ëba cjiapea̧ oa a̧doparëreji̧ri̧dirȩ babui̧ra̧ a̧doparea̧ bëräpȩ ju̧ri̧ ji̧mo̧ jurapea̧ oa, ori̧ bagari̧ ëba ni̧bä chjao chapea̧ oa. Ado judiro̧ jura̧ duri oa, jabechji̧ Jechu ja̧ icjara oa jo̧rȩtarëreji̧ri̧dirȩ, jibëa̧ goebo. Aja̧ ca̧ oti̧, ja̧di dari̧ japarëreji̧ri̧dirȩ pearä judi, jabo o judiro̧ oëra̧ japarëreji̧ri̧dirȩ. Pio ju̧i̧ chjiari go̧ȩparëremȩde Paboro judi. 21Jabechji̧ mȩnȩro̧ jurarea̧ oa a̧de jäa̧ pio ju̧i̧ chjadëri̧ juratärea̧ ji̧, dibëa̧ oti̧ pio ji̧ri̧di ji̧mo̧ chjadëri̧ ëba juratärea̧ ji̧, cjäri̧ manȩrȩ, jabërä jëreea tjamo̧ji̧ri̧rȩ a̧dë jureno̧renȩro̧jȩrȩ, mairi̧ jurapea̧ pio ju̧i̧mo̧ jo̧rȩtaji̧ri̧rȩ. Ado dëdë, nö̧tadäräri̧ juranȩrȩ mȩnȩro̧, jabo dibëa̧ oti̧ pio judiro̧ orë, cjäri̧ madirȩ, ma̧ jürümi̧ cjiadirȩ. Ado mȩnȩro̧ orë ma̧i̧ dari̧ jara̧ oaiä, yu̧i̧ tjamo̧pe jänȩrȩ ji̧dëri̧. 22‘Tjana̧ japacjivadiro̧’ quëna̧ jo̧rȩtarequededibe ca̧ oti̧. ¿Tjana̧pea̧ ji̧ juradënȩrȩ dibëa̧ bëräpȩ ju̧ri̧ jabërä? ¿Tjana̧pea̧ ji̧ jaradënȩrȩ dibëa̧ bëräpȩ ju̧ri̧? Jabechji̧ pio ju̧ri̧pȩ juratäreji̧ri̧nȩrȩ peadë. Jabo cjäri̧ manȩrȩ, dibëa̧ jurarea̧ ji̧ra̧ oa goa jänȩrȩ a̧doparea̧ bëräpȩ. Ado mȩnȩro̧ goadëji̧ri̧ pio ji̧ri̧ chjadëri̧ ëba juratärea̧ ji̧, cjäri̧ manȩrȩ, a̧dë jurarenȩro̧jȩrȩ. Jabechji̧ pio ji̧ri̧ chjadëri̧ ëba juratärea̧ ji̧, idëri̧ cjia tänȩrenȩro̧jȩrȩ ji̧dëri̧. Cjäri̧ ma ca̧ oti̧, ¿tjana̧pea̧ ji̧ badë darenȩro̧jȩrȩ Ütë tjamo̧ ja̧ a̧doparea̧ pio ji̧ri̧, quëna̧ji̧ri̧ pio ji̧ri̧? Ma̧i̧ dari̧ jape cjianȩrȩ, ado pio ju̧i̧iä jabechji̧, pio dibë chjiari chjacjiamȩri̧ jo̧rȩtarea̧mi̧dërequededibe.

23,24Danȩrȩ ca̧ oti̧, cüdë ibëa̧ Ano̧mȩ pio ju̧i̧iä dabapea̧ ma̧ȩ pio ju̧i̧ a̧ra̧ano̧rërea̧mi̧ a̧ra̧ano̧requededibe ado chjereno̧, judi ja̧boa̧ pio ju̧i̧ chjiari ma̧ȩ oa. Jabechji̧ gȩnȩpea̧rä, Juda Iscariote judi gatë tänȩa̧ domȩ pio ju̧i̧iä, Jechu pio ju̧i̧ ja̧bo tänȩtämi̧ cjiaji̧ri̧ pio ji̧ri̧iäpȩmo̧ gatë tänȩa̧ domȩ pio ju̧i̧iä, jabechji̧ ëba a̧doparëremȩdejȩrȩ jibëa̧ jadü ji̧ri̧ Ano̧mȩ Jechu pio judi. Ado chja̧pe oa mitërëremȩdejȩ. Ado chja̧pe oa mitë ëte, chjacjiamȩri̧ ni̧bärëremȩdejȩ jibëa̧ Ama̧i̧ ju̧i̧: "Ama̧i̧, chjadëri̧ yürüa̧renȩibe jurarea̧ oa” yo̧mȩrȩ yo̧rëremȩdejȩ. Ja̧dëa ji̧ mu̧i̧ yarërëremȩdejȩ chja̧pe oa. Ado mu̧i̧ yarë ëte, chjarapë yürürëremȩdejȩrȩ jibëa̧ jadü ji̧ri̧. "Goë jaechji̧vä, jurachji̧vä" yo̧a̧dejȩrȩ. "Ca̧ icjarami̧ dade. Ado pio dibë chjiari tuti yürüpareconȩ goe gu̧rori̧ ano̧ mire ja̧bopea̧ oa. Jurachji̧vä pio coa jo̧rȩtaji̧ri̧rȩ." Aja̧, ja̧di ta̧rëri̧ yo̧mȩrȩ ni̧bärëremȩdejȩrȩ jibëa̧ jadü pio ji̧ri̧. 25Ja̧dëa ji̧ judiro̧ jura ëte, peaja̧dimi̧ dari̧ mitërëremȩdejȩ ae jararea̧ oa. Aja̧, pio ju̧i̧ mitë ëte, chjacjiamȩri̧ ni̧bärëremȩdejȩ jibëa̧ Ama̧i̧ ju̧i̧: “Aja̧ Ama̧i̧, chjadëri̧ yürüa̧renȩibe jararea̧ oa” yo̧mȩrȩ yo̧rëremȩdejȩ. Ado ja̧dëa ji̧ yo̧a̧dejȩrȩ, "Pio yoa jararea̧ üdë ca̧ goemi̧ dade. Ütërë yo̧ë cji̧därërea̧ ma̧ȩ peaja̧ pio ju̧i̧ chjiari na̧rȩdidibe. Ado ca̧ goe pio oaiä, jabechji̧ tjamo̧i̧padäräa̧ oa cjiapade Ütërë yo̧ë cji̧därërea̧ ma̧ȩ pio judi. Jabechji̧ mȩnȩro̧ jo̧rȩtami̧ jarachji̧vä pio coa jo̧rȩtaji̧ri̧rȩ" yo̧mȩrȩ ni̧bärëremȩdejȩrȩ. 26Aja̧ ca̧ oti̧, ja̧di ta̧rëri̧ yo̧mȩrȩ yo̧rëremȩdejȩrȩ Jechu judi. Ado pio ju̧i̧iä ja̧di ta̧rëri̧ yo̧requededibe ca̧ oti̧. Danȩrȩ, mȩnȩro̧ pio yoa chja̧pe oa jura̧mi̧ nö̧ta, mȩnȩro̧ pio yoa jararea̧ oa jara̧mi̧ nö̧ta, jabechji̧ Ano̧mȩ Jechu judi ja̧boa̧ pio ju̧i̧ chjiari ni̧bämi̧ dari̧ japarenȩrȩ. ‘Aja̧, Jechu judi pio coa chjiari ano̧ mire ja̧boa̧dida’ quëna̧ji̧ri̧rȩ na̧rȩnȩrȩ ca̧ oti̧, Jechu ja̧ icjara oa jo̧rȩtaji̧ri̧rȩ jura̧ oaiä. Ado ja̧di dari̧ japarea̧ üdë, jabechji̧ babui̧ra̧ japapea̧de judi ado chjereno̧ jana̧rä yuro.

27Ja̧di tara ca̧ oti̧, eami̧ pumȩ üdë pio yoa jurarea̧ oa chjaocjiami̧ dari̧ jurarä judi, eami̧ pumȩ üdë pio yoa jararea̧ oa chjaocjiami̧ dari̧ jararä judi, uapai̧ dari̧ japade. Tjamo̧ davä ca̧ oti̧. Eami̧ quëna̧mȩ judi ji̧dë ma jiadatämi̧ cjiamȩrȩ cjo̧ro̧rä judi, chjai̧dë ja̧ chja̧oeri pio judiri go̧düa̧ oa cjiamȩborë ji̧dë ma chjuari jiadamȩrȩ cjo̧ro̧rä judi, ä, uapai̧ dari̧ cjo̧ro̧de. Jabechji̧ ibëa̧ Ano̧mȩ pio ju̧i̧ chjiari na̧rȩrea̧ chja̧pe oa chjaocjiami̧ dari̧ jurarä judi, ibëa̧ Ano̧mȩ pio ju̧i̧ chjiari na̧rȩrea̧ jararea̧ oa chjaocjiami̧ dari̧ jararä judi, jabechji̧ Ütë tjamo̧ pio ju̧i̧iäpȩmo̧ chjai̧dëri̧ japamȩde. Jabechji̧ quëna̧mȩ üdë chjadëri̧ jo̧rȩtatärea̧ ji̧, Ano̧mȩ Jechu judi pio ibë chjiari goe gu̧rori̧ ano̧ mire ja̧boa̧ pio ju̧i̧ chjiari ba chia jo̧rȩtatärea̧ ji̧, pio ju̧i̧ ja̧ icjara oa, jibëa̧ goe pio ju̧i̧bo ba chia jo̧rȩtatärea̧ ji̧, cjäri̧ made, badë maea oa jo̧rȩtadejȩ. Ado pio ju̧i̧iä chjai̧dëri̧ japade. 28Ja̧di tara mȩnȩro̧ chja̧pe oa jurabea yaboi̧, jararea̧ oa jarabea yaboi̧, jabechji̧ jabërä chjadëri̧ ütarë jo̧rȩtatäreji̧ri̧nȩrȩ mȩnȩro̧ jo̧rȩta̧ pio ju̧i̧. Ado chjadëri̧ ütara ëte, jabechji̧ coëma cjiari̧ jo̧rȩtamȩ chji̧ra̧ jo̧rȩtaji̧ri̧rȩ japapea̧ maeade. 29Jabechji̧ eami̧ pumȩ üdë chjaocjiami̧ dari̧ japarä judi, Jechu ja̧ icjara oa, jibëa̧ goebo ba chia jo̧rȩtadëmȩrȩ jararä judi, Jechurë ja̧boa̧ pio ju̧i̧ chiari̧ ba chia jo̧rȩtadëmȩrȩ japarä judi, jabechji̧ Ütë tjamo̧ pio judi tänȩa̧ oa bide cjaeäa̧ oa cjiami̧ dari̧ cjiapai̧ dade. 30Ado peadëri ja̧ taruparëremȩde Ütë tjamo̧ judi pio dibë bide cjaeämi̧ dari̧ japapea̧ üdë. Tjamo̧ davä. Mȩnȩro̧ chjaocjiami̧ dari̧ japea̧ oaiä, bide cjaeämi̧ dari̧ japapea̧ ji̧ taruparëremȩdidibe peadëri ja̧. Ado pio ju̧i̧iä mȩnȩro̧ orë, jabechji̧ tjätjäpaë ja̧bepaji̧ri̧rȩ cjo̧ro̧rërea̧ ji̧, cjäri̧ manȩrȩ, ju chiadëji̧ri̧rȩ cjo̧ro̧ji̧ri̧pea̧nȩrȩ yaba̧. Ado mȩnȩro̧ orë chjari̧ doparërea̧ ji̧, jabechji̧ gito ja̧boji̧ri̧rȩ cjo̧ro̧nȩrȩ. Ado o judiro̧, jabechji̧ pumȩboji̧ri̧rȩ cjo̧ro̧rërea̧ ji̧, cjäri̧ madirȩ, ja̧boa̧mi̧ ja̧boa̧dirȩ. Jabechji̧ Jechurë ja̧boa̧ pio ju̧i̧ chjiari ba chia jo̧rȩtaji̧ri̧rȩ japadëa̧ oaiä, ja̧di dari̧ bide cjaeäa̧ oa cjiami̧ dari̧ cjiaji̧ri̧pea̧nȩrȩ. 31Jabo mȩnȩro̧ japabea yaboi̧ dibëa̧ chji̧ oa chjadëri̧ ütararä judi, jabomo̧ uëmo̧ uëmo̧ jo̧rȩtaji̧ri̧rȩ japachea oa chjadëri̧ ütararä judi, jabechji̧ bide cjaeämi̧ dari̧ japadëtäremȩdidibe Ütë tjamo̧ judi. 32Jabo mȩnȩro̧ dibëa̧ chji̧ oa chjadëri̧ ütara ëte jo̧rȩtadërä judi, jabo chjaocjiami̧ dari̧ japarä judi, jabechji̧ dibëa̧ Ano̧mȩ pio judi dibë ütarë da ëte bide cjaeämi̧ dari̧ japapai̧ dadidibe. Jabechji̧ mȩnȩro̧ ji̧dë duri oa dai chirirä cjo̧ro̧ji̧ri̧ pio ji̧ri̧ nö̧ta bape chjaoa̧ oa cjiachea oa, jabechji̧ jabërä bide cjaeämi̧ dari̧ japadidibe ibëa̧ Ano̧mȩ judi, mȩnȩro̧ coëma cjiari̧ cjo̧ro̧pea̧ oa.

33Ja̧di tara ca̧ oti̧, mȩnȩro̧ a̧doparä, Ano̧mȩ pio ju̧i̧ chjiari jurarea̧ oa jurapea̧ oa a̧doparä, jabechji̧ jëreeadëchji̧vä jabo chjadëri̧ jidachji̧jȩrȩ o ji̧ri̧, judiro̧ jana̧rä yuro, mȩnȩro̧ ütëborë ji̧mo̧ jo̧rȩtaji̧ri̧rȩ jurapea̧ oa. 34Ado eami̧ pumȩ üdë ta̧mȩcho̧ ja̧bo tjamo̧rä judi, jabechji̧ a̧doparea̧räpȩ ju̧ri̧ mairi̧ jurarea̧ jo̧rȩtadëtäremȩde, jabo jabërä juratäremȩde jibëa̧ bëräpȩ ju̧ri̧ Ütë tjamo̧ judi pio ju̧i̧iäpȩmo̧ ütarë da ëte bide cjaeämi̧ dari̧ japachea oa. Tjamo̧ davä ca̧ oti̧. Mȩnȩro̧ chjadëri̧ ütarë jo̧rȩta ëte juradërä judi, Ütë tjamo̧ judi ütarë da ëte, bape chjaopai̧ dadidibe. Aja̧ ca̧ oti̧, ja̧di ta̧rëri̧ yo̧mȩrȩ go̧ȩpe chjadürequededibe. Ado pio ju̧i̧ uëri ado cja̧rȩmo̧ a̧ra̧ano̧rea̧ ma̧ȩ oa ni̧bä chjaotämi̧ cjiarequededibe peaja̧di, jabo cüdë pio ju̧ri̧pȩ go̧düdäräa̧rä, jabechji̧ irä ni̧bä chjaoparequededibe pio ju̧i̧ chjiari.

Currently Selected:

Cori̧tio Ma̧ȩ 1 11: Pume

Highlight

Copy

Compare