Cori̧tio Ma̧ȩ 1 12

Tjo tjamo̧ judi ja̧beparea̧ yürüa̧ pio ju̧i̧ chjiari go̧ȩparëremȩde Pablo judi.

1Ado yaba̧ ca̧ oti̧, ba dëbë go̧ȩpe chjadütämi̧ cjiarequededibe mȩnȩro̧ iëno̧ë ta̧rëa̧ pio ju̧i̧ chjiari, Tjo tjamo̧ judi yürüa̧ ja̧beparea̧ pio ju̧i̧ chjiari. Danȩrȩ ca̧ oti̧, Tjo tjamo̧ pio judi dibëiäpȩmo̧ jauëchja cjiari̧ yürüchäa̧ pio ju̧i̧ chjiari dabadëchea oa, judi ja̧beparea̧ ji̧ra̧ oa pio dibëiäpȩmo̧ yürüchäa̧ pio ju̧i̧ chjiari dabadëchea oa, jabechji̧ chjadëri̧ daba tänȩtämi̧ cjiarequededibe. 2Jabechji̧ mȩnȩro̧ jabë quëna̧dëa̧rä cjo̧ro̧rërea̧ pio ju̧i̧ chjiari tjamo̧ri̧ dabanȩrȩ ca̧ oti̧. Jabechji̧ oëra̧ baämȩ no̧mi̧ da oa tai̧ tänȩmi̧ dari̧ japarëremȩdidibe Ichiae judi, mȩnȩro̧ quȩ maea oa jo̧rȩtapea̧ oa. Tjamo̧ davä. Ni̧bärea̧ chiadë maea oa, pumȩrȩ jëdano̧a̧ ütë maea oa quëna̧pea̧ oa u̧i̧parëremȩdidibe. 3Ado mȩnȩro̧ ado chjereno̧ u̧i̧pea̧ oa cjiachea oa, mȩnȩro̧ Ichiaerë ado chjereno̧ u̧i̧pea̧ oa cjiachea oa, jabechji̧ chjadëri̧ dabatä earequededibe pio dibëiäpȩmo̧ ni̧bämȩ pio ju̧i̧ chjadëri̧ ütarë ta̧rëpea̧ ji̧. Jabechji̧ dibë a̧ra̧ano̧ji̧ri̧ judiro̧ orë, “Aja̧, Tjo tjamo̧ ja̧ chja̧oerä cjo̧ro̧mȩrȩ a̧ra̧ano̧requededibe” yo̧ji̧ri̧borë pio ju̧i̧ ja̧ chja̧oerä cjo̧ro̧dëdirȩ. Ja̧di tara pio yoa ma̧ȩ oa chjadëri̧ dabatä earequededibe. Danȩrȩ, Tjo tjamo̧ pio judiri ma̧na̧mȩ ma̧ȩ oa ni̧bämȩ pio judi, jabechji̧ Jechu pio ju̧i̧ chjiari chjai̧dëri̧ ni̧bärea̧mi̧dëde, jabo chjadë maea oa ni̧bäpade pio ju̧i̧ chjiari. Jabechji̧ “Ütë tjamo̧ ja̧ ërecjia̧ üdë Jechu pio ju̧i̧iäpȩmo̧ acji cjatätädejȩ” yo̧rea̧mi̧dëde, jabo chjadëri̧ ni̧bäpade Jechu pio ju̧i̧ chjiari. Ado danȩrȩ ca̧ oti̧, Tjo tjamo̧ pio judiri ma̧na̧mȩ ma̧ȩ oa ni̧bädëmȩ pio judi, jabechji̧ “Jechu judi Ano̧mȩ tjamo̧ pio judide” yo̧rea̧ dadëpade. Aja̧, ja̧di ta̧rëri̧ yo̧requededibe ca̧ oti̧, mȩnȩro̧ dabadëchea oa, Tjo tjamo̧ judi pio dibëiäpȩmo̧ yürüchäa̧ pio ju̧i̧ chjiari dabadëchea, dibë u̧i̧pe ni̧bätämi̧ cjiaji̧ri̧ pio ji̧ri̧ chjiari dabadëchea oa.

4Tjo tjamo̧ judi ja̧beparea̧ ji̧ra̧ oa yürüchärëremȩdiibe a̧ro̧rȩ tjaoëpai̧ dari̧ ja̧bepapea̧ oa. Jabo ja̧beparea̧ ji̧ra̧ oa yürüchäa̧räbo, jabechji̧ cja̧rȩmȩ maeade yürümȩ judi. Tjo tjamo̧ pio judide. 5Jabechji̧ tjaoëpai̧ dari̧ ja̧beparea̧rȩ jabo ibëa̧ Ano̧mȩ pio ju̧i̧ ja̧ maea oa ja̧beparea̧rȩ, cja̧rȩmȩ ja̧ maea oa. 6Tjaoëti̧ chia ja̧beparea̧ oa chiaji̧ri̧rȩ ja̧beparea̧rȩ. Jabo danȩrȩ, a̧ro̧rȩ ma ja̧didë jabo Ütë tjamo̧ pio judide. Pio judi tjamo̧de tjamo̧ ja̧bepamȩ judi. Aja̧ ca̧ oti̧, cja̧rȩmȩ Ütë pio judide pio ibëiä ja̧bepamȩ judi.

7Ado danȩrȩ, Tjo tjamo̧ pio judi quëna̧ji̧ri̧ nö̧tai̧ oa ja̧beparea̧ oa yürüchäa̧ oaiä, jabechji̧ pio judiri ma̧na̧mȩ ju chiarea̧ra̧ pio ju̧ri̧ra̧ ja̧beparea̧rȩ. Tjamo̧ davä. Pio judiri ma̧na̧mȩ ju chiarea̧ra̧ ja̧beparea̧rȩ a̧ro̧rȩ ibëa̧ dëbëti̧ra̧ chia a̧dopea̧ oa. 8Ado Tjo tjamo̧ judi cja̧rȩmȩ ja̧beparea̧ maea oa yürüdëde jabo ji̧ra̧ tjamo̧ oa yürüchäde jënȩ jo̧rȩta̧mi̧. Jabechji̧ o ji̧ri̧iäpȩmo̧ urëdi tjamo̧ oa jo̧rȩtarea̧ yürüdejȩrȩ judiro̧ chjadëri̧ chi̧dëeapea̧ oa. Ado o ji̧ri̧iäpȩmo̧ dabarea̧ yürüdejȩrȩ. Jabechji̧ Ütë tjamo̧ pio judiri ma̧na̧mȩ ma̧ȩ oa ni̧bäpea̧ oa, dabarea̧ yürüdejȩrȩ. 9Ado o ji̧ri̧iäpȩmo̧ a̧dë chjäte chjuari̧ quëna̧rea̧ pio ju̧i̧ yürüdejȩrȩ, judiro̧ Ütë tjamo̧ pio ju̧i̧iäpȩmo̧ ji̧dë u̧i̧ chjuari̧ quëna̧pea̧ oa. Ado judiro̧ Ütë tjamo̧ pio ju̧i̧iäpȩmo̧ a̧dë chjäte chjuari̧ quëna̧ oaiä, jabechji̧ jauëchja cjiari̧ tuti japapai̧ dade Ütë tjamo̧ judi. Ado o ji̧ri̧iäpȩmo̧ ado cja̧rȩmo̧ ja̧beparea̧ oa yürüdejȩrȩ. Tjamo̧ davä. Gito ja̧boji̧ri̧ pio ji̧ri̧ chjadëri̧ chjaparȩrea̧ yürüdejȩrȩ. 10Ado o ji̧ri̧iäpȩmo̧ jauëchja cjiari̧ na̧rȩrea̧ oa yürüdejȩrȩ. Ado o ji̧ri̧iäpȩmo̧ Ütërë ea jana̧ chjadüa̧ pio ju̧i̧ ni̧bärea̧ oa yürüdejȩrȩ. Ado o ji̧ri̧iäpȩmo̧, jabechji̧ ütararea̧ oa yürüdejȩrȩ. Pumȩ ji̧ri̧ chjadëri̧ ütarë dapea̧ oa, pio ji̧ri̧ chjadëri̧ ütarë ta̧rëpea̧ oa yürüdejȩrȩ. ‘Aja pio jiro pumȩ judi Tjo tjamo̧ ja̧ ju chiarea̧ra̧ na̧rȩdiibëda, jabo cjäri madiibëda, pio üdëjȩ yaröcarë daba tänȩa̧ pio ju̧i̧ ni̧bä chjaodiibëda’ quëna̧ ütararea̧mi̧ dari̧ dabarea̧ oa yürüdejȩrȩ o ji̧ri̧, quëna̧ji̧ri̧ pio ji̧ri̧ chjiari chjadëri̧ ütarapea̧ oa, teracabari̧ japaji̧ri̧ pio ji̧ri̧ chjadëri̧ ütarë dapea̧ oa. Ado danȩrȩ, Tjo tjamo̧ judi o ji̧ri̧iäpȩmo̧ yürüa̧ ji̧, tjaoë ma̧ȩ oa ni̧bärea̧ yürüdejȩrȩ. Jënȩro̧ dabapadëa̧ ma̧ȩ pio ju̧i̧ ni̧bärea̧ yürüdejȩrȩ, ado cja̧rȩmo̧ ma̧ȩ oa. Ado o ji̧ri̧iäpȩmo̧ goë ni̧bärea̧ yürüdejȩrȩ. Jabechji̧ o judiro̧ bapë ta̧rëdëchea oa, jabo tjaoë ma̧ȩ oa ni̧bäji̧ri̧ pio ji̧ri̧ chjadëri̧ bapë ta̧rëpea̧ oa, jabechji̧ o ji̧ri̧iäpȩmo̧ yürümȩrȩ yürüdejȩrȩ goë ni̧bärea̧ pio ju̧i̧. 11Aja̧ ca̧ oti̧, cja̧rȩmȩde quëna̧ji̧ri̧ nö̧ta oa ja̧beparea̧ ba chia oa yürüchämȩ judi. Tjo tjamo̧ pio judide. Ja̧beparea̧ üdë ji̧ra̧räbo, jabechji̧ pio judimo̧de yürüchämȩ judi. Ado teracabari̧ yürüchädëmȩde, jabo jabechji̧ jënȩ ütarë jo̧rȩta̧mi̧ yürüchädejȩrȩ, jauëchja cjiari̧ yürümȩrȩ.

Quiricho ja̧ icjara üdë cja̧rȩmȩ codërë ji̧ra̧ri̧ chiade

12Danȩrȩ, pumȩ ja̧ icjara üdë ji̧ra̧ri̧ chiade jabo cja̧rȩmȩde. Cja̧rȩmȩ codërë chiadejȩ ji̧ra̧ oa. Ado peaja̧di dari̧ cjiade Quiricho ja̧ icjarami̧ da üdë quëna̧ji̧ri̧ pio ji̧ri̧ nö̧ta. 13Jabechji̧ Quiricho pio ju̧i̧ nö̧ta cja̧rȩmȩpe bagari̧ go̧ȩ cjaeä chudarëremȩdiibe Tjo tjamo̧ pio judi cja̧rȩmȩrȩ. Quëna̧ji̧ri̧ chjö̧na̧i̧därä oa go̧ȩ cjaeä chuda̧diibe. Judio pio ji̧ri̧, ado judiodë pio ji̧ri̧bo go̧ȩ cjaeä chuda marëremȩdiibe quëna̧ji̧ri̧ pio ji̧ri̧, mu̧i̧tjoi̧ pio ji̧ri̧, mu̧i̧tjoi̧dë pio ji̧ri̧bo. Jabechji̧ Quiricho pio ju̧i̧ ja̧ icjarami̧ dape bagari̧ go̧e cjaeä chudarëremȩdiibe. Ado yaba̧ a̧ro̧rȩ chjö̧na̧i̧rȩ ibë go̧ȩ cjaeä chudamȩ pio ju̧i̧ chia maearea̧ro̧jo̧ȩ, Tjo tjamo̧ pio ju̧i̧.

14Ado yaba̧ na̧rȩrea̧ ma̧ȩmi̧ dara̧ pio ju̧ri̧ra̧ ni̧bä chjaotämi̧ cjiarequededibe ca̧ oti̧, pumȩ ja̧ icjara pio ju̧i̧ chjiari. Danȩrȩ, pumȩ ja̧ icjara üdë, jabechji̧ cja̧rȩmȩ maea oa chiadëde jabo ji̧ra̧ri̧ chiade. 15Ado danȩrȩ, ibëa̧ ta üdë ni̧bärea̧ chiadëde, jabo tjamo̧ri̧ ni̧bärea̧ chiarä judi, "Jabo cjäri̧ marequede, cüdë ichidë tara, jabechji̧ icjarari ja̧dëmȩrequede" yo̧rea̧mi̧dëtäremȩde. Jabechji̧ icjarari pio judiri ja̧mȩde ta üdë, ‘icjarari ja̧dëmȩquëda’ quëna̧rea̧ decjiari̧. Tjamo̧ davä ca̧ oti̧, ibëa̧ ta üdë tjamo̧ri̧ ni̧bärea̧ chiarä judi, ja̧di ta̧rëri̧ yo̧rea̧mi̧dëtäremȩde. 16Ado ibëa̧ ta̧ra̧ üdë tjamo̧ri̧ ni̧bärea̧ chiarä judi, "Jabo cjäri̧ marequede, cüdë dachodë tara, jabechji̧ icjarari ja̧dërequede" yo̧a̧rea̧mi̧dëtäremȩde. Jabechji̧ oëra̧de ja̧di ta̧rëri̧ yo̧pea̧ üdë. Jabechji̧ icjarari pio judiri ja̧mȩde ta̧ra̧ üdë icjarari ja̧dëpe järea̧ decjiari̧. 17Ado pumȩ icjara codë üdë jabomo̧ dacho boi̧dë ma chiarä judi, ta̧ra̧ chiadë marä judi, cjäri̧ made, ¿yö̧ta dari̧ ta̧rëtäremȩcjivadi? Cjäri̧ made, ta̧rërea̧ decjiatäremȩde. Ado danȩrȩ, icjara codë üdë cja̧rȩmȩ ta̧ra̧ go̧a̧ti̧ ma chiarä judi, i̧bu chiadërä judi, cjäri̧ made, ¿yö̧ta dari̧ pji̧dätäremȩcjiavadi? Pji̧därea̧ decjiatäremȩde. Ado pio jiro icjara üdë, jabechji̧ icjarami̧ dadëtäremȩdiibe, jabo teracabami̧ datäremȩde. 18Jabo danȩrȩ ca̧ oti̧, ja̧di dari̧ jëdano̧dëa̧diibe Ütë tjamo̧ judi jabo chjadëri̧ ütarë jo̧rȩta̧mi̧ jëdano̧rëremȩdejȩ ibëa̧ icjara oa ji̧ra̧ri̧ chiari̧. 19Ado pumȩ icjara codë üdë jabomo̧ dacho boi̧dë ma chiarä judi, cjäri̧ made, icjara decjiatäremȩde. Dacho chia matäremȩde. Ado pumȩ icjara codë üdë ta̧ra̧ boi̧dë ma chiarä judi, jabechji̧ icjara decjiatäremȩde. Ta̧ra̧ boi̧dë ma chiatäremȩde. 20Jabo jabechji̧ ji̧ra̧ri̧ chiamȩ icjara oa jëdano̧rëremȩdejȩ cja̧rȩmȩ codë oa. Ado peaja̧dide Quiricho ja̧ icjarami̧ da pio ju̧i̧iä. Jabechji̧ cja̧rȩmȩ ja̧beparea̧ maea oa yürüdëa̧diibe Tjo tjamo̧ judi, jabo tjaoëti̧ chia ja̧beparea̧ oa yürüchärëremȩdiibe. Ado pio ju̧i̧iä a̧ro̧rȩ ütëborë cja̧rȩmȩ dacho boi̧dërë cjiami̧ dari̧ ja̧bepadë marea̧rȩ, jabo ji̧ra̧ri̧ chiaji̧ri̧rȩ ja̧beparea̧rȩ icjara codërë cjiami̧ dari̧.

21Ja̧di tara dacho üdë ichi pio ju̧i̧iäpȩmo̧, "Cjäri̧ marequedemȩ. Pio mȩa eadëmȩrȩ jiadarequedemȩ" yo̧rea̧mi̧dëde. Ado tjübë üdë ta pio ju̧i̧iäpȩmo̧, "Jiadarequedemȩ, badë marenȩ" yo̧rea̧mi̧dëde peaja̧di. 22Jabechji̧ ibëa̧ icjarari ja̧ üdë nö̧tadärärë ba chia maeade, ado pio ju̧i̧iä oëra̧ quëna̧rea̧mi̧dëde icjarari ja̧mȩ pio ju̧i̧ chjiari, ju chiadëmȩmi̧ damȩ pio ju̧i̧ chjiari. ‘Aja̧, pio yodëje, ca̧ icjararimȩ pio yodëje ju chia tjamo̧dëdida, chjadëri̧ a̧dodëdicoada, ado pio ju̧i̧iä ba chiadë jirodida’ quëna̧rea̧mi̧dëde, jabo jabechji̧ chjadëri̧ a̧do madiibe ibëa̧ icjararimȩ pio judi chjö̧na̧i̧rȩ. 23Ado ibëa̧ icjararimȩ pio judi, na̧rȩdërea̧ üdë, jabechji̧ ‘ba chia tjamo̧dida’ quëna̧ jo̧rȩtaji̧ri̧rȩ chjadëri̧ jidarea̧ro̧jo̧ȩ. Tjamo̧ davä. Ibëa̧ icjararimȩ üdë, idëri̧ cjiarea̧ pio judi, 'chjadëri̧ a̧dodicoada’ quëna̧ jo̧rȩtaji̧ri̧rȩ chjadëri̧ ina̧rea̧ro̧jo̧ȩ idëri̧ cjiachea oa. 24Jabo na̧rȩrea̧ üdë, idëri̧ cjiadërea̧ üdë, jabechji̧ dai oa cjiade. Ado ina̧dë marea̧ro̧jo̧ȩ na̧rȩrea̧mi̧ da tara, ibë idëri̧ cjia tänȩdëmȩ tara. Dëdë, jidarea̧ro̧jo̧ȩ jabo na̧rȩdërea̧ pio ju̧i̧ jidami̧ jidadërea̧ro̧jo̧ȩ. Jabechji̧ na̧rȩdërea̧ pio ju̧i̧ ji̧dë u̧i̧ jidarea̧ro̧jo̧ȩ dai oa cjiamȩ pio ju̧i̧iä. Jabechji̧ Ütë tjamo̧ judi pumȩ ja̧ icjara oa pearä judirä pareaparërea̧rä, jabechji̧ chjadëri̧ dabamȩrȩ jüdüparëremȩdejȩ, na̧rȩdërea̧ pio ju̧i̧ ji̧dë u̧i̧ chjadëri̧ jidapea̧ oa, idëri̧ cjiarea̧ pio ju̧i̧ ji̧dë u̧i̧ chjadëri̧ ina̧pea̧ oa. 25Jabechji̧ dëbë a̧domi̧ dari̧ cjiapea̧ oa, jadü cjiami̧ dari̧ cjiapea̧ oa jüdüparëremȩdejȩ ibëa̧ icjara oa Ütë tjamo̧ judi. Tjamo̧ davä. Ibëa̧ icjarari ja̧ üdë chjö̧na̧i̧rȩ ji̧mo̧ ëba ja̧bepami̧ dari̧ cjiapea̧ oa, dëbë ba chia dami̧ dari̧ dapea̧ oa jüdüparëremȩdejȩ, ibëa̧ icjara üdë chjadëri̧ jida̧ oa cjiapea̧ oa, cja̧rȩmȩ chji̧ chiami̧ dari̧ jo̧rȩtapea̧ oa. 26Ado danȩrȩ, ibëa̧ icjarari ja̧ üdë, cja̧rȩmȩrȩ gitoi̧ dari̧ tararä judi, jabechji̧ ibëa̧ icjara codërë gitoi̧ dari̧ tarade peaja̧di. Ado ibëa̧ icjarari̧ ja̧ üdë cja̧rȩmȩrȩ chjadëri̧ a̧doa̧ oa cjiarä judi, ju chiaparȩa̧ oa cjiarä judi, chjacjiamȩri̧ ni̧bäa̧ oa cjiami̧ dari̧ cjiarä judi, cjatäcjiarea̧ darä judi, jabechji̧ ibëa̧ icjara codërë ma̧ chiadëri̧ cjiami̧ dari̧ cjiade. Jabechji̧ cja̧rȩmȩ jo̧rȩtarea̧ chia maeade ibëa̧ icjara üdë.

27Ado danȩrȩ ca̧ oti̧, pio mȩnȩro̧ ütëborë Quiricho pio ju̧i̧ ja̧ icjarami̧ danȩrȩ. Jabechji̧ mȩnȩro̧ nö̧tai̧därärë cji̧däa̧ oa cjia maeanȩrȩ pio ju̧i̧ ja̧ icjarami̧ dape bagari̧. Aja̧, quëna̧ji̧ri̧ pio judiro̧ nö̧tai̧därärë pio ju̧i̧ ja̧ icjarari ja̧ji̧ri̧mi̧ dari̧ cjia maeanȩrȩ. 28Ado pio ju̧i̧iä Ütë tjamo̧ judi ütarë jo̧rȩtarëremȩrȩ tjaoëti̧ chia ja̧beparea̧ oa yürürëremȩde Quiricho pio ju̧i̧ ja̧ a̧doparea̧ ja̧ oa, quëna̧ji̧ri̧ pio judiro̧ jibëa̧ dëbëti̧ra̧ chia chjadëri̧ ju chiaparȩpea̧ oa. Ado pio ju̧i̧iä jabechji̧ mitërëremȩdejȩrȩ Jechurë chjadüa̧ pio ji̧ri̧. Tjamo̧ davä. Pio ji̧ri̧ yabochja mitërëremȩdejȩrȩ jibëa̧ ja̧beparea̧ oa yürüpea̧ oa. Ado pio ji̧ri̧ mitë ëte, Ütërë ea jana̧ chjadüa̧ oa ni̧bäji̧ri̧ pio ji̧ri̧ a̧de mitërëremȩdejȩrȩ. Ado pio ji̧ri̧ mitë ëte, a̧de mitërëremȩdejȩrȩ a̧ra̧ano̧ji̧ri̧ pio ji̧ri̧. Ado pio ji̧ri̧ mitë ëte, a̧de mitërëremȩdejȩrȩ jauëchja cjiari̧ na̧rȩji̧ri̧ pio ji̧ri̧. Ado pio ji̧ri̧ mitë ëte, chjaparȩji̧ri̧ pio ji̧ri̧ a̧de mitërëremȩdejȩrȩ. A̧do pio ji̧ri̧ mitë ëte, o ji̧ri̧iäpȩmo̧ cjäri̧ cjia jo̧rȩtaji̧ri̧ pio ji̧ri̧ a̧de mitërëremȩdejȩrȩ o ji̧ri̧ chjadëri̧ a̧dopea̧ oa. Ado pio ji̧ri̧ mitë ëte, tjamo̧ yo̧ji̧ri̧ pio ji̧ri̧ a̧de mitërëremȩdejȩrȩ o ji̧ri̧ ja̧ yabo ëba tai̧ji̧ri̧mi̧ dari̧ ja̧bepapea̧ oa. Ado pio ji̧ri̧ mitë ëte, tjaoë ma̧ȩ oa ni̧bärea̧ chiaji̧ri̧ pio ji̧ri̧ a̧de mitërëremȩdejȩrȩ, jënȩro̧ dabapadëa̧ ma̧ȩ oa ni̧bäji̧ri̧ pio ji̧ri̧. Aja̧ ca̧ oti̧, tjaoëti̧ chia ja̧beparea̧ oa chiapea̧ maea oa Ütë tjamo̧ judi mitërëremȩdejȩrȩ quëna̧ji̧ri̧ ütëbodärä oa, jibëa̧ ja̧beparea̧ oa chjadëri̧ yürüpea̧ oa.

29Jabo danȩrȩ ca̧ oti̧, pumȩ icjara üdë dacho marä judi, ta̧ra̧ boi̧dë chia marä judi, cjäri̧ made, icjara decjiatäremȩde. Chjadë tjamo̧dëtäremȩde. Ado peaja̧dide Quiricho pio ju̧i̧ ja̧ icjarari ja̧mi̧ da pio ji̧ri̧ chjiari. Ado pio ju̧i̧iä a̧ro̧rȩ, quëna̧ji̧ri̧ pio judiro̧ ütëborë cja̧rȩmȩ ja̧beparea̧ maea oa chiadërea̧rȩ. Tjamo̧ davä. A̧ro̧rȩ ütëborë Jechurë chjadüa̧ ja̧beparea̧ maea oa chiadërea̧rȩ. A̧ro̧rȩ ütëborë Ütërë ea jana̧ chjadüa̧ oa ni̧bärea̧ maea oa chiadërea̧rȩ. A̧ro̧rȩ ütëborë a̧ra̧ano̧rea̧ maea oa chiadërea̧rȩ. A̧ro̧rȩ ütëborë jauëchja cjiari̧ na̧rȩrea̧ maea oa chiadërea̧rȩ. 30A̧ro̧rȩ ütëborë pumȩ ji̧ri̧ chjaparȩrea̧ chiadërea̧rȩ. A̧ro̧rȩ ütëborë tjaoë ma̧ȩ oa, a̧ro̧rȩ dabapadëa̧ ma̧ȩ oa ni̧bärea̧ chiadërea̧rȩ. A̧ro̧rȩ ütëborë jënȩro̧ dabapadëa̧ ma̧ȩ oa goë ni̧bärea̧ chiadërea̧rȩ. Jabechji̧ cja̧rȩmȩ ja̧beparea̧ maea oa chiadë marea̧rȩ jabo tjaoëti̧ chia ja̧beparea̧ oa chiaji̧ri̧pea̧rea̧rȩ quëna̧ji̧ri̧ pio judiro̧.

31Ado danȩrȩ ca̧ oti̧, järi tjamo̧nȩrȩ dibëa̧ ja̧beparea̧ oa chiapea̧ ji̧, Tjo tjamo̧ judi pio dibëiäpȩmo̧ yürüa̧ ja̧beparea̧ pio ju̧i̧ chiapea̧ ji̧. Ado ja̧di dari̧ järipea̧ üdë chjadëdë ma ja̧didë jabo chjadëde. Jabo danȩrȩ, yo̧a̧ri̧ ja̧beparea̧ üdë o ji̧ri̧iä ji̧dë u̧i̧ chjadëde, o ji̧ri̧iä ji̧dë u̧i̧ ba chiade. Tjamo̧ davä ca̧ oti̧. Yo̧a̧ri̧ ja̧beparea̧ üdë o ji̧ri̧iä ji̧dë u̧i̧ chjadëde quëna̧ji̧ri̧ pio ji̧ri̧ tjamo̧ri̧ a̧dopea̧ oa, pio ji̧ri̧ tjamo̧ri̧ ju chiaparȩpea̧ oa. Ado pio ju̧i̧iä järi tjamo̧täreji̧ri̧nȩrȩ ji̧dë u̧i̧ ba chiamȩ pio ju̧i̧ chiapea̧ ji̧, ca̧ oti̧. Tjamo̧ davä. Quëna̧ji̧ri̧ ütëbo oa tjamo̧ri̧ a̧domȩ ja̧beparea̧ pio ju̧i̧ chjadëri̧ chiapea̧ ji̧ järi tjamo̧täreji̧ri̧nȩrȩ.

Jabo danȩrȩ ca̧ oti̧, ado cja̧rȩmo̧ no̧mi̧ darä cjo̧ro̧pea̧ pio ju̧i̧ chjiari ano̧ mire go̧ȩpetämi̧ cjiarequededibe yaba̧. Danȩrȩ, mȩnȩro̧ dibëa̧ ja̧beparea̧ra̧ pio ju̧ri̧ra̧ ji̧dë u̧i̧ chjadëri̧ ja̧bepapea̧ oa, jabechji̧ ado cja̧rȩmo̧ no̧mi̧ darä cjo̧ro̧pea̧ pio ju̧i̧ chjiari go̧ȩpatämi̧ cjiarequededibe. Ado mȩnȩro̧ pio ju̧i̧ chjiari dabadëchea oa, jabechji̧ chjadëri̧ go̧ȩpaparequededibe. Jabechji̧ ji̧dë u̧i̧ go̧ȩ ni̧bächji̧vä.

Currently Selected:

Cori̧tio Ma̧ȩ 1 12: Pume

Highlight

Copy

Compare