DOMAANO 14

Cöjimmotoncomo chiiñeme’jai’cha cöweichöcoomo

1Aashicha ajaadäiñe tödöötäcä ñäädä ecamjödö jäcä jäduujemjönö; ñeecamjödö jäcä chääjadä mätäccujä’täi’che. 2Anejja tameedä tönänque töweiye nai; anejja ’quene jäduuje’daiche töneecamjödö jäcä töweijäcä natö mma näu’cwa. 3Ñäädä tameedä tänäänei chiiñeme’jai’cha na ñäädä änämjönö; ñäädä änämjönö ’quene cone’da a’deujai’cha na dea tänäänei jäcä, Wanaadide tönnedööje tödööeetö’da. 4¿Änääcö amäädä anejja sotoi chiiñemeecödö wetä? Chäädhajääne mädä encano’täjai ña, chäänönge yeichö jeiñe mma, chäänönge’da yeichö jeiñe mma. Chäänöngeene na’de, Cajiichaana Jesuuquidiito jäduuje yeijäcä mädä tödöödö jäcä.

5Anejja soto anooto ooto’jodhe nödööa; anejja wwä ’quene äänönge dea anooto na. Töwaadäiñe nisha’dumincha’ña’to tötö’tajäätödööcomo. 6Ñäädä anooto ooto’jodhe tödöönei, Wanaadi wwonooje yääje nödööa. Ñäädä ooto’jodhe anooto ännöjöönö, Wanaadi wwonooje mmaja yääje nödööa dea. Ñäädä tameedä tänäänei, Wanaadi wwonooje yääje nödööa, aashicha Wanaadi wwä töwa’deuwancädä. Ñäädä tameedä änämjönö, Wanaadi wwonooje mmaja yääje nödööa dea, Wanaadi wwä aashicha töwa’deuwancädä mmaja.

7Cönwanno cöqueiñe mma’da cöweichöcoomo na, cöqueiñe mma’da mmaja cöwäämadööcomo na dea. 8Nudä cöweichöcoomo Cajiichaana wwonooje caato; cöwääma’comjäcä Cajiichaana wwonooje dea caato. Mädääje na; nudä cöweichöcoomo jeiñe mma, töwääma cöweichöcoomo jeiñe mma, Cajiichaana wwonooje dea caato. 9Quidiito cönäämai, cönaadoncai chea yää ’jeje, tameedä Cädhaajotoncomooje töweichö wetä, nudo’como Edhaajotoncomooje, yä’ja’a’como Edhaajotoncomooje mmaja.

10¿Ane’cotoojo aweichacoono memmencaanä amäädä? ¿Ane’cotoojo michiiñeme’canä? Tameedä dajaane cä’mencajaato’de Quidiito wwä. 11Edääje Wanaadi a’deddu imennaajä nä’döa:

Chäänönge yääje wä’döa, öwö je’taca tameedä soto tä’mudhe nä’döaato’de;

tameedä aashicha na’deuwaato’de Wanaadi jäcä; quee Cajiichaana nä’döa; quee imennaajä nä’döa.

12Yääje yeijäcä cöwaadäiñe cöweichöcoomo jäcä cätääcamma’jajaato’de Wanaadi wwä.

Cöjimmotoncomo shaadijannä’caneije eijai’cha cöweichöcoomo

13Yääje yeijäcä cöjimmotoncomo chimmajä’jai’cha caato. Edääjeene eijai maato: Aweichacoono sadiijannä’caneije mma mei’che, conemjönö aca mma manaadimai’chede. 14Quedeiyenteje weijäcä edääje wä’döa, Jesuuquidiito owaadäädä: Yoowanääcä na ane’cä’cä amoije’da yeichö. Yaawääne’ anejja wwä amoije ane’cä’cä chö’ta’jäcä, chäwwä amoije na. 15Adheewanshiñö jäcäinchädä aweichacoono cone’da tödööja’jäcä äwwä, wä’jummanä woije’da ma yaawä. Adheewanshiñö que mmädä aweichacoono mänsadiijannä’cai, ñäädä Quidiito chääjäcäinchädä cönäämaichö. 16Yää äwwä aashicha naadö mma conemjönööje aweecataatojooje männöjoi. 17Wanaadi sotoije weiñä töweiye nai äwanshi jäcäinchädä’da, wocö jäcäinchädä’da mmaja, chäänönge weiñä jäcäinchädääne, täncanoode’da weichojo mmaja, ta’cwaiñe weiñä mmaja, yää Epíiditu Santo nutuudu. 18Ñäädä mädä tödööancädä Quidiito wwä tödöönei, Wanaadi na’cwaima, soto wacö’jeiñe mmaja.

19Yääje yeijäcä yääne quencano’täto’ñojo, täncanoode’da cöweichöcoomoone, cöwe’wa’tädööcomo mmaja. 20Äwanshi jäcäinchädä mma Wanaadi tadaawaajui moncone’matäi’che. Amoije’da äwanshi yeichaame mma’ne, yaawääne’ aweichacoono sadiijannä’cajoodöje äwääwashinchädö yeiya’jäcä, yää cone’da na. 21Aashicha mmaja tänäämö änäänä’da aweichö, chääjedöödö eccudu aneenö’da aweichö mmaja, ane’cä’cä ännö’da aweichö mmaja, aweichacoono sadiijannä’cajai yää yeiya’jäcä, conemjönö aca adiimajai yeiya’jäcä mmaja, ñeecamjödö ijääducaajai yeiya’jäcä jeiñe mma. 22Äwwä mma tödööcä mädä aneecamjödö, Wanaadi owaadäädä. Ta’cwaiñe ñäädä tötö’tajäätödö tönsa’duminchadö jäcä cone’da ä’döjoojönö. 23Ñäädä amoije yeichö chö’tamme’cancädä tänäänei mmaane, conemjönö nödööa, ecamjödö woije’da tänä’jödö weijäcä. Tameedä ecamjödö woijemjönö tödöödö conemjönööje na.

Currently Selected:

DOMAANO 14: MCH

Highlight

Copy