DOMAANO 13

1Tameedä eijai maato acu’shänä woije. Acu’shänä ’je’da na Wanaadi woijatoojemjönö. Canno acu’shänääje naatoodö Wanaadi woije mädääje naato. 2Yääje yeijäcä ñäädä acu’shänä woijemjönö Wanaadi woijato jäcä nä’jädu’ta. Ñäädä yääjato töwoije nätä’maminchaja. 3Ñanno cajiichaanaje naatoodö aashicha’como ecaatoncannamooje’da naato, conemjönö tödönnamoone. Acu’shänä ñontä’se’da aweiya’comjäcä aashicha eichäcä, ta’cwaiñe äjääcäiñe eiye yaawä. 4Töwö na Wanaadi anoonöje, äjääcäinchädäiñe. Yaawääne’ cone’da aweiya’comjäcä ñontäjai maato; töwäädämma’da cajiichaanaje na. Töwö na Wanaadi anoonöje chäänönge töwwä imaaminchadö wetä ñäädä conemjönö tödöönei. 5Yääje yeijäcä acu’shänä woije eijai maato, wätä’maminchajoonä nontädö jäcäinchädä mma’da, aashicha ätö’tajäätödööcomo yeichö wetä mmädääne. 6Mädääje yeijäcä dea acu’shänä jödaata töneejemaajo weneene äwwäiñe, jata cone’catoojoje. Ñanno acu’shänä naato Wanaadi anoonöje; tönwanno tötaadawaajuichomo jäcä töwoowoincha weneeneto.

7Tameedä aneejeque’näjöödöcoomo ejeematääcä. Audaajä jäcä ejeeque’nä’a’jäcä äwwä, ejeemacä, acu’shänä nejeemajoodö mmaja. Ñontätääcä ñäädä tönontäämö; o’jodhe ene’matääcä ñäädä o’jodhaato. 8Töneejeque’nä’e dea meichäi’che; yää que mma soto ejeeque’nä’täcä, wä’jummanä que mma. Ñäädä wä’jummanä dönei tameedä waanontänä nödööa. 9Edääje waanontänä imennaajä nä’döa: “Aweichacoono ijummacä amäädä äwä’jummadö nönge dea;” quee. Yää tödööa’jäcä äwwäiñe tameedä anejja waanontänä mödööato yaawä, yää edääje yä’dödö naadö: “Amaasuduichai; soto maneemai; maneememmecöi; anejja mma maneementäi; anejja nödöödö mani’ñeimmai;” quee naadö. 10Ñäädä wä’jummanä ’jano conemjönö ännö’da na töweichacoono jäcä; yääje yeijäcä wä’jummanä yää waanontänä wä’dödö woije weiñä.

11Mädä tödööjai maato mädä weiñä caatoodö chö’tamme’cancädä; cöwo’joto’como cu’nädö aca yä’döaajä mädä eduuwa. Eduuwa cöwääwanaacato’como amoinche’da na, queecanö’taneedawä cönä’ja’dö o’näde. 12Coijaicho ejä’dä’jai nä’döi eduuwa, awaanajai nä’döi. Yääje yeijäcä yää tööjano’taca tödööemö e’nomjajai caato eduuwa; cöwoowontoto’como cöödötäiye, suddau tawaanato aca töweewänä’täämö töweiye naichöje. 13Chäänönge queichäiye, tawaanato acancomo eijai ñaatoodöje dea. Wä’dau’nä jäcä’da queichäiye, wänwanä jäcä’da mmaja, imaasuduicha’da mmaja, anejja conemjönö jäcä’da mmaja, ätäccujäätö’da mmaja, e’neimma’da mmaja. 14Cajiichaana Jesuuquidiito owoowontoto’comooje tödöötäcä. Ajuunucoomo nijummadö mma männötäi’che.

Currently Selected:

DOMAANO 13: MCH

Highlight

Copy