DOSECHO 20

Maasedooniya ña Paudo wötä’jödö, Quedeesiya ña mmaja

1Yääje mma yaawä yeewodoichadööcomo wä’ca’jäcä Paudo cöni’jummaicho tameedä quedeiyentecoomo, yäätuujadööcomo wetä. Yaawä ajoojancädäiñe töwö cönääcammaacä chäwwäiñe; cöntäma yaawä Maasedooniya ña. 2Töwö cönäämannäjöi tameedä yeichö wa’cä töneecammajäätödö que quedeiyentecoomo yäätuujancädäiñe. Yaawä Quedeesiya ña cönä’döi. 3Yäätä cönä’jaacä aaduwaawä nuunä. Yaawä jidaawa awä Siidiya ña iichotoojo cönä’ja’dö’je, töwäädä judhío täma’se yeichöcoomo cöneetaiñe’. Yääje yeijäcä macääcä mma cönennacai; Maasedooniya chäcä mmaja cöntännea. 4Chääjadä cöntonto Soopateedo, ñäädä Wedeea ñano; Aaditaaducu mmaja cönä’ja’dea; Secuntu mmaja, Teesadoonica ñancomo; Caayo mmaja, Deedewe ñano; Tiimoteo mmaja; Tíiquico mmaja; Todóojimo mmaja, ñanno Aasiya ñancomo. 5Ñanno cöntonto awa’de; ñaa womo’caquento yaawä Todoowa ña. 6Yää ’jeje yaawä uu ummannä’cajootojo ’jemjönö taut’ojo comjedensiyai’chädö ija’dä’ja’jäcä ñaa cöneeja’cai Jidiipo ñanno jidaawa awä. Ijaatoodea anoototo ai Todoowa ña ñaa cönoojodöi yaawä ñanno jadäiñe, ñaa owaajo cöntontodö jadäiñe. Yäätä ñaa cönä’jaacä aacä amoojato anooto.

Todoowa ña Paudo wei’jödö

7Yaawä semaana waajäntädö anootoi’chädö awä quedeiyentecoomo cöne’jummaicho Santa Seena tödöödö wetä. Paudo cöneecammajä’acä chäwwäiñe. Yää jenamma naadöje töwö iichotoojo cönä’jaacä; yääje yeijäcä yo’taca tödööene cöneecammajä’acä. 8Tönwanno ye’jumma’como cönä’ja’to maa taca, cawä; jooje adhaawa emjannajä’ajä cönä’jaacä yäätä. 9Dhantawäiñe cönä’jaacä ääjömaanö, Eutiico täätö; shuucu cönä’jaacä mentaana a’täi ye’wä. Yaawä numa Paudo wwä ecammajäätödö weijäcä töwö Eutiico wetuuje cönä’döi. Yaawä tönnö’ca’jäcä mentaana a’täi ye’wonno cöne’duccai cawonno, aaduwaawoto ä’sa jonno. Yaatacoichaajä cönannäjöicho yaawä. 10Yaawä Paudo cönä’täi cawonno. Töwö cöneemo’täi yäämaajä de’wä; cönaajäi yaawä. Töwö cönä’döaacä soto wwäiñe:

—Ääcatonca’da eichäcä; nudä dea na; quee.

11Yää ’jeje Paudo cönäncui chea cawä, maa taca. Santa Seena cönnöicho yaawä. Yää ’jeje töwääwashinchädö’jo jooje’cä Paudo cöneecammajäätöi chäwwäiñe, yaawaanadö jonaane. Yää ’jeje cöntäma yäätonno. 12Ñäädä ääjömaanö mmaane nudä cönaadoicho; ta’cwaiñe cönä’ja’to jooje.

Todoowa ñanno Mideeto ña iicho’jocoomo

13Yaawä macääcä töötä’se Paudo wei’jödö weijäcä dhowaajo ñaa cöntämä Asón ña, jidaawa awä, iiña chääjadä töwoojodööemööje. 14Yaawä Asón ña chääjada ñaa woojodööa’jäcä töwö cönä’täi jidaawa aca; tujuumä ñaa cöntämä yaawä Miitedeene ña. 15Yäätonno ñaa wöta’jäcä yää jenamma naadöje ñaa cömja’dätäi Quío antadö. Yaawä tooni anooto yää ’jeje ñaa cönaajäi Saamo ña. Todoojiidiyo ña ñaa cönäädeetai yaawä; yää jenamma naadöje ñaa cönä’döi yaawä Mideeto ña. 16Mädääje ñaa cöntämä, Eujeeso ñano Paudo ija’dätä’se yeijäcä, numa Aasiya ña töweichö queiñe. Töwö Jeduusadén ña töwä’dö’se cönä’jaacä, iiña Pentecoté anootoi’chädö ija’do’jodö wetä.

Eujeeso ñancomo ansiyaano wwäiñe Paudo necammajäätö’jödö

17Yaawä Paudo Mideeto ñanno soto cönaanontäi Eujeeso ña, ansiyaano a’dejjaiñe. 18Ñanno wä’döa’comjäcä Paudo cönä’döaacä chäwwäiñe:

—Änwanno odhoowanääcäiñe aashicha öwö weichö Aasiya ña wääwaaca’jödö jonnoto’jödöödä. 19Ajaadäiñe weichö Cajiichaana Jesuuquidiito woije töweiye wä’jaaquene, anejja e’jodhe tö’tajä’ancädä’da. Jooje waamodö que Cajiichaana tadaawaajui tönnöe wä’jaaquene, jooje wäntunamjödö que mmaja, yää judhíocoomo maaminchatä yei’jocoomo. 20Yääje yeichaame ane’nomja’da töweiye wä’jaaquene äwäätuujadööcomo. We’jummanaawä odhoowanoomatäiñe töweiye wä’jaaquene, adhe’sacaiñe mmaja. 21Öwö töneecammajä’e wä’jaaquene judhío wwäiñe, judhíojöncomo wwäiñe mmaja Wanaadi owaadäädä tötö’tajäätödööcomo sha’duminchajai yeichöcoomo, Cajiichaana Jesuuquidiito ecaanö’jai yeichöcoomo mmaja. 22Eduuwa wöta Jeduusadén ña, Epíiditu Santo nenno’jadö woije, yoowanääcä’da yeichaame iiña jääcä yeeja’do’tojo. 23Edä mma yoowanääcä na, tameedä jataaca öötädö waadäi Epíiditu Santo töneecamma weneene öwwä jedeesoje wääwaacajootojo, wäntunaanö’tojo mmaja. 24Cone’da yöödö’da na mädääje yeichö; oowontä’da mmaja wa dea. Ta’cwaiñe wä’ca’se mmaane wa öwwä tödööemö jäcä, yää Cajiichaana Jesuuquidiito taadawaajuije cuntuichö, aashichaato wätunnä ecammajäätödö aashicha Wanaadi weichö jäcä.

25“Yoowanääcä na eduuwa naadö jonno yeene’da aweicho’como, änwanno Wanaadi töcaajichaanaije tödöödö jäcä neecammajäätö’jödö etannamo’jödö. 26Yääje yeichaame edääje wä’dö’se wa äwwäiñe: Owö woijatooje’da na anejja aneecamjö’da yääma’jäcä. 27Öwö yä’jödöödä äwwäiñe wecammajä’ne Wanaadi a’deddu, dhantai etoone’tancädä’da. 28Äädai’chätääcä’de eduuwa. Ajimmotoncomo mmaja edai’chätääcä’dede. Epíiditu Santo ayöödötääne Cajiichaana sotoi edai’chännamooje, ñanno taquiiyö que cöneewanaacaichodö. 29Yää ’jeje öncäcäädä adhantawäiñe naato’de quedeiyentecoomo acoicha’sa’como, mado tääde’cwada’como oweeja tönaacoichaiñe töweiye naichodööje. 30Änwanno adhantawäiñe dea naato’de anejjacoomo chäänöngemjöncomo ecammajä’nnamo, chäänöngatoojönööne, tösootoichomooje quedeiyentecoomo tödöödöcoomo wetä. 31Yääje yeijäcä äädai’chätääcä. Odhoowanääcäiñe aaduwaawä wedu ajaadäiñe weichö wadaadäädä waamodö que äwäätuujatäiñe wei’jödö ano, coijai mmaja.

32“Eduuwa jimmä, Wanaadi wwä maneedai’chajaato. Töwö dha’deddu aashichaato adheedai’chaato’de, äjäädu’taato’dede. Töwö dha’deddu tödöödö que änwanno ejoodöjai maato ñanno shooma’como jadäiñe aweicho’como. 33Anejja jödaatai ani’ñeimma’da wä’jaaquene, yoomö jeiñe mma. 34Odhoowanääcäiñe öwö dea töweetadaawa’cajo wei’jödö umjummadö ejeematoojoje, jaadoncomo nijummadö ejeematoojoje mmaja. 35Weiñäje odhoowanoomatäiñe töweiye wä’jaaquene wentumja’como i’wa’tädö jäcä ataadawaajuichomo eje’jödö que. Weiñäje ätö’tamme’jotäiñe töweiye wä’jaaquennea Cajiichaana Jesuuquidiito wa’deuwö’jödö jäcä: “Ta’cwaiñe’cä jeene ñäädä u’nei, eiñei e’jodhe’cä jeene;” quee cönä’döa’dö jäcä; quee cönä’döaacä Paudo ñanno Eujeeso ñancomo ansiyaano wwäiñe.

36Yääje töwa’deuwödö’jo Paudo tä’mudhe cönä’döi yaawä; Wanaadi wwä cöna’deuwöi chääjäcäiñe. 37Tameedä ñanno cönaamoa’to jooje. Tönwanno Paudo ajoojancädä cunsuumaicho yaawä. 38Wentumje cönä’ja’to jooje yääje Paudo wä’dö’jödö weijäcä: “Eduuwa naadö jonno yeene’da maato’de;” quee yä’dö’jödö weijäcä. Chääjadä cöntonto yaawä wä’taca.

Currently Selected:

DOSECHO 20: MCH

Highlight

Copy