DOSECHO 19

Eujeeso ña Paudo wei’jödö

1Yääje mma yaawä Codinto ña Apoodo weichö Paudo cönäämannä’acä aneiñaja; töwö cönä’döi yaawä Eujeeso ña. Yäätä cöneejodöicho anejjacoomo quedeiyentecoomo. 2Paudo cönä’döaacä chäwwäiñe:

—¿Epíiditu Santo ’je mä’dötääne yaawä mecaanö’täneedawä? quee cönä’döaacä.

Ñanno cönä’döa’to yaawä chäwwä:

—Epíiditu Santo töweiye yeichö aneeta’da mmädä ñaa na; quee.

3Yaawä Paudo cöneecamma’joicho:

—¿Aaquene wautisaaje mä’döjootäne? quee cönä’döaacä.

Tönwanno cönä’döa’to:

—Juan Wautiita necammajäätö’jödö woije wautisaaje ñaa cönä’döjoi; quee cönä’döa’to.

4Yaawä Paudo cönä’döaacä chäwwäiñe:

—Juan Wautiita wautisaaje soto tönnöeiñe cönä’jaacä chö’tajäätödööcomo tösa’dumincha yeichö ene’ju’tojooje mma. Töwö töwä’döe cönä’jaacä: “Ecaanö’täcä’de ñäädä öncäcä ne’aadö;” quee töwä’döe cönä’jaacä Juan Wautiita, Jesuuquidiito ecammancädä, ñäädä Äwaanacaanei; quee cönä’döaacä Paudo chäwwäiñe.

5Yää eta’jäcä ñanno wautisaaje cönä’döjoicho yaawä Jesuuquidiito eetö joi. 6Paudo tamäädö tödööa’jäcä ye’cäcäiñe Epíiditu Santo cönä’täi yaawä chääjäcäiñe; anejja a’deucwe cöna’deuwa’to yaawä; Wanaadi nutuudu woije cöneecammajä’a’to dea. 7Ñanno cönä’ja’to amoojadooto de’wä aacä dhanwaacomo.

8Yaawä we’jummatoojo taca Paudo töötä cönä’jaacä aaduwaawä nuunä. Yäätä jäduuje töneecammajä’e cönä’jaacä. Töwö töwa’deuwe cönä’jaacä Wanaadi töcaajichaanaije tödöödö jäcä. 9Anejjacoomo eta’se’da cönä’ja’to; aneecamjö’da cöneiya’to. Tameedä soto netaadöcoomoje cone’da töwa’deuwe tönwanno cönä’ja’to quedeiyenteje weiñä jäcä. Yaawä Paudo cönsancwaicho. Töwö quedeiyentecoomo cönaadoicho Tidaano nowaanomaatojo taca; iiña anooto waadäi töneecammajä’e cönä’jaacä chäwwäiñe. 10Mädääje töwö cönä’jaacä aacä wedu; tameedä Aasiya ñancomo cöneeta’to Jesuuquidiito a’deddu, judhíocoomo mmaja, judhíojöncomo mmaja. 11Wanaadi jooje aashichaato tönnöjo cönä’jaacä Paudo wwä. 12Ñanno soto tönaadä cönä’ja’to Paudo ajoojo’jödö jaiñuweeda, camiisha mmaja. Yää que cädäija’como tönaadonca cönä’ja’to; odo’shancomo töweeja’ca cönä’ja’to dhacannoiñe.

13Yäätä cönä’ja’to anejjacoomo judhíocoomo töjaatacoonemjöncomo. Tönwanno cönä’ja’to odo’sha ija’canö’jonnamo. Jesuuquidiito eetö joi odo’sha ija’canö’jo’seiñe töweiye cönä’ja’to. Edääje töwä’döe cönä’ja’to odo’shancomo wwä:

—Jesuuquidiito eetö joi adheeja’catääcä, ñäädä Paudo töneecammajä’e weneenedö; quee.

14Mädääje cönnöa’to Eseewa nnacoomo, aacä amoojato’como. Judhío cönä’jaacä ñäädä Eseewa, Wanaadi wwä töwa’deuwaamo edhaajotoncomo. 15Yaawä yääje Eseewa nnacoomo wä’döa’comjäcä odo’sha cönä’döaacä chäwwäiñe:

—Jesuuquidiito yoowanääcä na, Paudo mmaja. Änwanno mmaane yoowanääcä’da maato; quee cönä’doaacä odo’sha Eseewa nnacoomo wwäiñe.

16Yääje töwa’deuwödö’jo ñäädä odo’sha ’jano cönaajammöi chäwwädäädäiñe. Töjäädudu que cöne’jodheinchaicho tameedä; jooje cömmaminchaicho. Yaawä ñanno Eseewa nnacoomo cönäänejeicho töwonqueiñe’da, tätuunui’chäjä’eiñe mmaja. 17Tameedä Eujeeso ñancomo yää jäcä cöneeta’to, judhíocoomo mmaja, judhíojöncomo mmaja; jooje cönääcatoncaicho yaawä. Aashicha töwa’deuwe cönä’ja’to Cajiichaana Jesuuquidiito jäcä.

18Jooje ñanno ecaanö’nnamo cöneecamma’to conemjönö tönnö’jocoomo. 19Dhantai cönä’ja’to jöwaiñamo’jödö. Ñanno cöni’jummaicho töjaajedaichomo, yää tö’waichöcoomo jajeedai’chädö’jödö. Cöiñau’cwaicho yaawä tameedä soto neneedöcoomoje. Yää jajeeda cönä’jaacä täje, aacä sotooto de’wä amoojadä miide jödaata ’cäwa’cä. 20Mädääje Cajiichaana Jesuuquidiito a’deddu cöneejangacä; jäduuje cönä’jaacä jooje.

21Yää ’jeje Paudo töötä’se cönä’jaacä Maasedooniya ña, Acaaya ña mmaja, Jeduusadén ña töötädö wetä yaawä. Edääje cöntö’tajä’acä: Jeduusadén ña ööta’jäcä Dooma ña täjai wa yaawä; quee. 22Yaawä towaajo Maasedooniya ña töwö cönaanontäi aacä tö’wa’tännamo: Tiimoteo, Edaasato mmaja. Paudo mmaane Aasiya ña cöno’somjoi numa’cäiche.

Eujeeso ñancomo wewoodoicha’jocoomo

23Yaawä soto jooje cöneewodoicha’to quedeiyenteje weiñä jäcä, 24Demeetediiyo nejoodöjoodö woije. Ñäädä Demeetediiyo cönä’jaacä jödaata döaajä chu’täjä’nei. Töwö tuncucui’chäjä’e cönä’jaacä Diyaana weichojo, ñäädä wodi töwaanadiiyöcoomoje töne’tä cönä’ja’todö. Yää tödöödö que jooje jödaata töncana’ca cönä’jaacä, chääjadoncomo wetaadawa’cajoodö mmaja. 25Yaawä ñäädä Demeetediiyo cöni’jummaicho tameedä yää dea tödönnamo, anejjacoomo yää nöngato tödönnamo mmaja. Töwö cönä’döaacä chäwwäiñe:

—Jimmä, odhoowanääcäiñe jooje jödaata töncana’ca cöweichöcoomo mädä cötaadawaajuichomo tödöödö que. 26Änwanno meneea’quene, metaatäne dea Paudo necammajäätödö. Töwö töneecammajä’e weneene wanaadije’da yeichö soto namoode’nädö. Mädääje töwö soto ni’jedaato, Eujeeso ñancomo mma’da, tameedä Aasiya weichö waadoinchomo mmajaane. 27Tönoiñe na mädääje yeichö. Mädääje emaacudääjai ña mädä cötaadawaajuichomo. Yaawä soto ämjumma’da eijai ñaato Diyaana, yeichojo amääajä cu’taajä mmaja. Tönwanno nichiiñeme’caato’de yaawä ñäädä tameedä Aasiya ñancomo, tameedä nono weichö wa’co’como wanaadiyööcomooje naadö; quee cönä’döaacä Demeetediiyo ñanno chu’täjä’nnamo wwäiñe.

28Yää eta’jäcä ñanno chu’täjä’nnamo cönäätömaicho jooje; tönwanno cöncä’tömjä’a’to yaawä:

—Adai’joto ñäädä Diyaana, Eujeeso ñancomo wanaadiyö; quee cönä’döa’to.

29Yaawä tameedä jataawoncomo cöneewodoicha’to jooje. Tönwanno cönaajoicho Caayo, Adiitaaducu mmaja, ñanno Maasedooniya ñancomo, Paudo jadoncomo. Cöni’jiichöicho yaawä töwe’jummato’como taca. 30Paudo mmaja iiña töötä’se cönä’jaacä, soto wwäiñe töwa’deuwödö wetä, töwäädä quedeiyentecoomo anaadojo’da cöneiya’tone’. 31Yäätä cönä’ja’to dea anejjacoomo Aasiya ñancomo cajiichaanacoomo; Paudo jummannamo cönä’ja’to ñanno. Tönwanno tösootoichomo cönaanontoicho Paudo döiña. Edääje ñanno cönä’doa’to Paudo wwä:

—Ye’jummato’como taca mma mötäi’che; quee cönä’döa’to.

32Yaawä ñanno ye’jumma’como dhantai cöncä’tömjä’a’to anejjeja, anejjacoomo ’quene anejjeja daja; i’jeta’jödö nönge cönä’ja’to. Tönwanno jadä’jödöödä dhowaanäcäiñe’da cönä’jaacä töwe’jumma’jocoomo. 33Yaawä judhíocoomo Aadejantudu cönaadimaicho soto do’tacannoiñe; anejjacoomo yäätoncomo cöneecamma’to yaawä chäwwä. Töwö Aadejantudu tamäädö eneejojäätödö que cöneeta’jöichajoicho, chäwwäiñe töwa’deuwö’se töweijäcä. 34Yaawä ñanno soto cöneene’jutuicho judhíoje yeichö; yääje yeijäcä tujuumä cöncä’tömjä’a’to aacäde shii wääseca’jödö:

—Adai’joto ñäädä Diyaana, Eujeeso ñancomo wanaadiyö; quee cönä’döa’to.

35Yaawä acu’shänä jajeedai imennänei soto cöneeta’jöichajoicho yeewodoichadööcomo jonno. Töwö cönä’döaacä chäwwäiñe:

—Änwanno Eujeeso ñancomo; tameedä soto dhowaanäcäiñe na Eujeeso ñancomo Diyaana weichojo edhaamoje cöweichöcoomo, Diyaana cu’taajä edhaamoje cöweichöcoomo mmaja, yää caju ñanno cöne’duccaichö. 36Anejja mädä ijoome’däjai’cha na. Yääje yeijäcä täncanoode’da eijai maato, ewoodoicha’daane. 37Canno dhanwaacomo sadä mene’toodö conemjönö ännö’da naato awaanadiiyöcoomo jäcä, chääjäcä cone’da a’deuwö’da mmaja. 38Soto jäcä cone’da Demeetediiyo weiya’jäcä, chääjadoncomo wetaadawa’cajoodö mmaja, äcamma’jonnamo wwadäädäiñeene täjai ñaato, yääje yeiya’jäcä. Ñanno cajiichaanacoomo wwäiñe choonecaajojai ñaato yää cone’da töweichöcoomo. 39Anejja jäcä awa’deuwö’seiñe aweiya’comjäcä cajiichaanacoomo jadäiñeene e’jummajai maato. 40Cätoujotantäi’cha ca’dö jääcä eduuwa mädä wewoodoicha’jä jo’tädööje. Cäcamma’ja’comjäcä cöwa’deuto’como ’je’da eijai ña, ijo’tädööje cöweewodoicha’jocoomojöönö; quee cönä’döaacä ñäädä acu’shänä jajeedai imennänei soto wwäiñe.

41Yääje töwä’döa’jäcä ñanno soto we’jumma’como cönenno’jaicho yaawä.

Currently Selected:

DOSECHO 19: MCH

Highlight

Copy