DOSECHO 18

Codinto ña Paudo wei’jödö

1Yääje mma yaawä Paudo Ateena ñanno cöntämä Codinto ña. 2Yäätä judhío cöneedantäi, Aquiidaje chäätö, Ponto ñano; ijiiñamo eetö cönä’jaacä Pidiisiidaje. Itaadiya ñanno ä’döeenöje tönwanno cönä’ja’to; iiñanno cöneejoto cajiichaana Cadaudiyo woije, Dooma ñanno tameedä judhío enno’ja’jacoomo weijäcä chäwwä. Ñanno Aquiida eneiñe Paudo cöntämä. 3Töwö chääjadäiñe cönä’jaacä yaawä, yää dea tötaadawaajuichomo weijäcä. Tujuumä töweetadaawa’cajo cönä’ja’to yaawä doona acaajödö jäcä. 4Wäädeetatoojo anooto waadäi Paudo töötä cönä’jaacä we’jummatoojo taca. Iiña töneecammajäätödö que judhíocoomo töncana’caiñe cönä’jaacä, judhíojöncomo mmaja.

5Yaawä Maasedooniya ñanno Siida, Tiimoteo wä’döa’comjäcä Wanaadi a’deddu ecammajäätödö jäcä mma Paudo töweetadaawa’cajo cönä’jaacä. Judhío wwäiñe jooje töneecammajä’e cönä’jaacä Jesuuquidiito Äwaanacaaneije yeichö, ñäädä ñanno judhío tönwomo’que cönä’ja’todö dea. 6Ñanno judhío eta’se’da cönä’ja’to; Wanaadi a’deddu cönquiiñeme’ca’to. Yääje yeijäcä Paudo töwoomö cuntu’majäätöi, choojonnoiñe töötädö ene’ju’tojooje. Töwö cönä’döaacä chäwwäiñe:

—Owoijeiñe dea mä’ja’aato’de, öwö woijatooje’da. Eetonno wöta eduuwa judhíojöncomo wwadäädäiñe; quee cönä’döaacä Paudo chäwwäiñe.

7Yaawä töwö cöneeja’cai we’jummatoojo tacanno; cöntämä yaawä Juusutu mmai chaca. Ñäädä Juusutu cönä’jaacä Wanaadi tujunne; immai cönä’jaacä we’jummatoojo nnäcä. 8Yaawä Quidiipo, ñäädä we’jummatoojo edhaajä, tameedä töwä’jimmä’tätö jadäiñe cöneecamjöi Cajiichaana Jesuuquidiito. Jooje anejjacoomo Codinto ñancomo cöneecamjöicho dea Wanaadi a’deddu ecammajäätödö etaadö’jo. Wautisaaje cönä’döjoicho yaawä. 9Yaawä Paudo wäneetödö ai Cajiichaana cönä’döaacä chäwwä:

—Tösaade’da eichä; ecammajäätödööje dea eichä’de, mane’nomjai’che. 10Öwö ajaadä wa; anejja conemjönö tödööjai’cha na äjääcä. Jooje edä jataawä naato sootoi; quee cönä’döaacä Cajiichaana Jesuuquidiito Paudo wwä.

11Yäätä Codinto ña Paudo cönä’jaacä aacä weduuto annai soto owaanomaadöcoomoje Wanaadi a’deddu jäcä.

12Yaawä Caadiyón Acaaya ñano acu’shänääje yeichö judhíocoomo cöne’jummaicho Paudo ajäichö wetä. Tönwanno cönaadoicho yaawä ñäädä acu’shänä döiña; 13cönä’döa’to chäwwä:

—Määdhä dhanwa imennaajä wä’dödö nönge’da soto tönoowanoomaiñe weneene Wanaadi wwä tödöödö jäcä; quee cönä’döa’to Paudo jäcä.

14Yaawä Paudo wa’deutojo cönä’ja’dö’je, töwäädä Caadiyón dhowaajodä cöna’deuwöiñe’; cönä’döaacä judhío wwäiñe:

—Änwanno judhíocoomo, conemjönö iiñö’jödö yeiya’jäcä, weiñä nönge’da iiñödö töweiye yeiya’jäcä jeiñe mma, yaawääne adha’dedducoomo wetaadö; 15töwäädä äwäätunnäichomo mma mädääne’, adhaichudiiyöcoomo jäcä wätäccujä’nä mmaja. Änwanno deaane mädä choonecaatäcä. Mädä nöngato etaajätö’se’da wa öwö; quee cönä’döaacä Caadiyón.

16Yaawä töwö cömja’canö’joicho jödo’na. 17Yaawä tameedä quidiiyeecocoomo Sóotene cönaajoicho, ñäädä we’jummatoojo edhaajä. Acu’shänä neneedöje tönwanno cönaiju’jätöicho. Yää jadä’jödöödä Caadiyón cone’da ännö’da cöneiyacä.

Antiyooquía ña Paudo wennaca’jödö; aaduwaawädeeto miisiyooneedoje iichä’jödö mmaja

18Yäätä Paudo cönä’jaacä numa. Yää ’jeje quedeiyentecoomo wwä töwääcammadö’jo, jidaawa awä cöntämä Siidiya ña, Pidiisiida, Aquiida jadäiñe. Yaawä Senquedea ña tuju’jä töde’caiche cöncajoi, töwääcamma’jödö nönge tödöödö wetä. 19Eujeeso ña töwä’döa’comjäcä Paudo cönsancwaicho yaawä Pidiisiida, Aquiida mmaja. Töwö cöntämä yaawä we’jummatoojo taca. Yäätä cöna’deujä’acä judhío we’jumma’como jadäiñe. 20Ñanno judhío numa’cä jeene töjaadäiñe Paudo yei’she cönä’ja’to. Paudo mmaane töwei’she’da cönä’jaacä. 21Töwö cönääcammai chäwwäiñe; cönä’döaacä:

—Jeduusadén ña wä’dö’se wa, yäätä comjedensiya ne’aadö tödöödö wetä. Yää ’jejeede we’a’dede sadä, Wanaadi woije yeiya’jäcä; quee cönä’döaacä.

Eujeeso ñanno Paudo cöntämä yaawä jidaawa awä. 22Yaawä Seesadeea ña cönä’döi; yäätonno cöntämä Jeduusadén ña. Yää ’jeje iiñancomo quedeiyente wwäiñe töwa’deuwa’jäcä cöntämä Antiyooquía ña. 23Numa’cäiche Antiyooquía ña töwä’döa’jäcä töwö cönääma’täi chea Cadaasiya ña mmaja töwennacaadö wetä. Iiña cönäämannä’acä tameedä jata weichö wa’cä, tameedä Jidiijiya ña mmaja, quedeiyentecoomo jädu’tancädäiñe.

Eujeeso ña Apoodo necammajäätö’jödö

24Yääje mma yaawä judhío cönä’döi Eujeeso ña, Apoodoje chäätö, Aadejantidía ñano. Töwö towaanojo’ne cönä’jaacä Wanaadi a’deddu imennaajä jäcä; aashicha töneecammajä’e cönä’jaacä. 25Cajiichaana Jesuuquidiito jadä weiñä jäcä yoowanoomaajä cönä’jaacä töwö. Jäduuje dha’deddu cönä’jaacä; sa’donna töneecammajä’e cönä’jaacä Jesuuquidiito jäcä. Töwö töneecammajä’e cönä’jaacä wautisaaje wä’döjoonä jäcä Juan Wautiita töneecammajä’e cönä’ja’döje mmaja. 26Ñäädä Apoodo jäduuje cöneecammajä’acä we’jummatoojo taca. Yaawä ñeecammajäätödö eta’jäcä, ñanno Pidiisiida, Aquiida mmaja töudäje cönaadoicho. Tönwanno cönsa’duminchaicho chäwwä Wanaadi a’deddu dhowaanojöönö. 27Yää ’jeje Apoodo töötä’se cönä’jaacä Acaaya ña. Ñanno quedeiyentecoomo Eujeeso ñancomo aashicha cönenno’jaicho yaawä. Tönwanno jajeeda cömmennoicho Acaaya ñancomo wwadäädäiñe, Apoodo wwä tadoojoomö, aashicha yeichöcoomo wetä chääjäcä. Yaawä Acaaya ña Apoodo wä’döa’jäcä töwö jooje cöni’wa’toicho ñanno Wanaadi ni’wa’tädö woije ecaanö’nnamo. 28Tameedä soto netaadöcoomoje töwö töneecammajä’e cönä’jaacä judhío wätunnäichomo chäänönge’da yeichö jäcä. Wanaadi a’deddu imennaajä a’de’tancädä töwö töneecammajä’e cönä’jaacä Jesuuquidiito Äwaanacaaneije yeichö, näädä tönwomo’que cönä’ja’todö.

Currently Selected:

DOSECHO 18: MCH

Highlight

Copy