DOSECHO 17

Teesadoonica ñancomo wewoodoicha’jocoomo

1Yääje mma yaawä töötädaawäiñe Amjiipodi ñano cömja’dätoicho, Aapodooniya ñano mmaja; cönä’döicho yaawä Teesadoonica ña. Yäätä cönä’jaacä judhío we’jummato’como. 2Yaawä töweichö nöngeedä Paudo cöntämä we’jummatoojo taca. Aaduwaawä semaana töwö cöneecammajäätöi chäwwäiñe, wäädeetatoojo anooto waadäi. 3Wanaadi a’deddu imennaajä jäcä ecammajä’ancädä töwö cöneecammajä’acä chäwwäiñe jenaado’jä jonnoto’jödöödä Quidiito wäntunaanö’tojo dea yei’jödö, töwäämaajo jonno yaadoncatoojo mmaja. Töwö töwä’döe cönä’jaacä chäwwäiñe:

—Ñäädä dea Jesuuquidiito, äwwäiñe töneecammajä’e wääneneedö, Äwaanacaaneije na; quee Paudo töwä’döe cönä’jaacä.

4Yaawä anejjacoomo judhío cöneecamjöicho; Paudo, Siida jadäiñe cönä’ja’to yaawä. Jooje quidiiyeecocoomo Wanaadi nontännamo cöneecamjöicho dea, wanna wodiiñamo täneejuca’como mmaja. 5Yääje yeijäcä ñanno judhío quedeiyentejöncomo tö’neiñe cönä’ja’to. Töjaadäiñe dhanwaacomo conemjöncomo cönaadoicho; i’she’jocoomo ñanno cönä’ja’to. Tönwanno cöneewodoicha’to yaawä jataawä, soto aquimmadööcomooje; cöntonto yaawä Jasón mmai yöiña Paudo, Siida u’cadööcomo wetä jödo’na, soto wwäiñe utuuducoomo wetä yaawä. 6Paudo aneedantä’da töweijäcäiñe Jasón mma cöni’ji’chöicho yaawä, anejjacoomo quedeiyente mmaja. Yää jata acu’shänäi’chädö döiña cönaadoicho; cönä’döa’to:

—Canno dhanwaacomo tameedä nono weichö wa’cä ansu’dännamo sadä daja cöneejoto dea. 7Mä’dä Jasón tömmai chaca cömjata’ta’to. Tönwanno tönnöe weneeneto domaanocomo cajiichaanaichomo waanontä’jödö nönge’da; anejja cajiichaanaje töneecamma weneeneto, ñäädä Jesuuquidiitoje ñe’tädööcomo; quee cönä’döa’to.

8Yää etaadö’jo tameedä soto cöneewodoicha’to, chäädhajootoncomo mmaja. 9Yää ’jeje Jasón wwä yeeja’cato’como ejeemajoodö’jo cönenno’jaicho yaawä.

Wedeea ña Paudo, Siida wei’jocoomo

10Yaawä coijai yä’döa’jäcä Wedeea ña quedeiyentecoomo Paudo cönenno’jaicho, Siida mmaja. Iiña Paudo wä’döa’comjäcä judhío we’jummato’como taca cönoomomöicho yaawä. 11Ñanno judhío cönä’ja’to Teesadoonica ñancomo e’jodhe aashicha yeichöcoomo. Tönwanno aashicha cöneeta’to Wanaadi a’deddu ecammajäätödö. Anooto waadäi tönemmenca cönä’ja’to Wanaadi a’deddu imennaajä, chäänönge Paudo necammajäätödööcomo yeichö eneedö wetä. 12Wanna cöneecamjöicho tönwanno; wanna mmaja quidiiyeecocoomo, wodiiñamo täneejuca’como mmaja, dhanwaacomo mmaja. 13Yaawä judhío Teesadoonica ñancomo cöneeta’to Wedeea ña Paudo wwä Wanaadi a’deddu ecammajäätödö. Tönwanno cöntonto yaawä iiña; soto cöni’jedoicho yaawä Paudo jäcäiñe. 14Yaawä dea mma quedeiyentecoomo Paudo cönaanontoicho dama jacäi. Siida mmaane cöno’somjoi Wedeea ña, Tiimoteo acä. 15Ñanno Paudo adännamo Ateena ña cönaadoicho; yäätä Paudo ñänga’jäcä tönwanno cönennacaicho yaawä ya’deuwö’jödö dha’me. Edääje Paudo cönä’döaacä chäwwäiñe:

—Eduuwaiche mma döiña neejö’ña’to Siida, Tiimoteo mmaja; quee.

Ateena ña Paudo wei’jödö

16Yaawä Ateena ña Siida womoocödaawäiñe Paudo cone’da cönä’jaacä jooje chu’taajä döjä’ajä yeijäcä yää jataawä. 17Yääje yeijäcä we’jummatoojo taca töwa’deuwe töwö cönä’jaacä judhío wwäiñe, anejjacoomo Wanaadi ya’deme’nnamo wwäiñe mmaja. Anooto waadäi töwa’deuwe cönä’ja’dea jödoodo aca, yäätä ye’jumma’como wwäiñe. 18Yäätä cönä’ja’to anejjacoomo eepicuudeo wätunnäichomo jäconcomo woowanoomadö, etoico wätunnäichomo jäconcomo woowanoomadö mmaja. Ñanno cöna’deuwa’to Paudo jadä. Dhantai cönä’döa’to:

—¿Aaquene nä’döaanä määdhä töwentaame’cato? quee.

Anejjacoomo ’quene cönä’döa’to:

—Töwö necammajä’a anejjeja’como wanaadi jäcä; quee cönä’döa’to.

Tönwanno yääje cönä’döa’to Jesuuquidiito jäcä Paudo wwä ecammajäätödö e’nei, töwäämaajo jonno waadoncanä jäcä ecammajäätödö e’nei mmaja. 19Yaawä tönwanno Paudo cönaadoicho Aadeoopaco döiña, yää töwe’jummato’como döiña. Tönwanno cönä’döa’to yaawä chäwwä:

—Eta’se ñaa na mädä aneecammajäätödö, aneeta’da ñaa naadö. 20Ñaa owaanojöönö mädä; yääje yeijäcä towaanäcä tödö’se ñaa na; quee cönä’döa’to Paudo wwä.

21Ñanno Ateena ñancomo, iiñancomo wejaata’ta’como mmaja, yeichöcoomo cönä’jaacä anejja wätunnä töneecammajä’e weiñäje, töneetadööcomoojönö etaajätö’se mmaja. Yää jäcä mma töwoowoincha cönä’ja’to, anejja ännö’da.

22Yaawä Paudo cönammöi dhantawäiñe, Aadeoopaco taca. Töwö cönä’döaacä chäwwäiñe:

—Änwanno Ateena ñancomo, öwö adheene’matäiñe wäänene jooje töwäätunnäiche aweichöcoomo. 23Awe’jummato’como do’tai wäämannäjöödawä saaquidiijiisiyo dötoojo weneeaqueene; imennaajä chääjäcä cönä’jaacä: “Wanaadi owaanojöönö wwono edä;” quee. Ñäädä odhoowanoocomoojönööje yeichaame chäwwä tönnöe määnetäänedö wecammajä’a äwwäiñe.

24“Ñäädä Wanaadi tameedä edä nono tödöönei’jödö, tameedä yeichö wa’cä dhaca naadö mmaja. Caju edhaajä ñäädä, nono edhaajä mmaja. Töwö ei’cha na soto namäädö taca. 25Töwwä a’que yeiyancädä’da töwö tumjumma weneene töwwä soto nödöödöcoomo, töwö deaane nudä cöweicho’como u’neije yeiyajä, cöwäädenwato’como mmaja. Tameedä yeichö wa’cä tödöönei’jödö töwö.

26“Töwö Wanaadi cönnöi tameedä soto yää dea dhaquiiyöje, tameedä nono weichö wa’cä yeichöcoomo wetä. Töwö cuncu’nä’täi yeicho’como, ijaatadööcomo weichojo mmaja. 27Töwö mädääje cönnöicho Wanaadi ujiiyö wetä chäwwäiñe, töwwadäädä yä’jedennacaadöcoomo wetä mmaja, tädantädö wetä yaawä chäwwäiñe, amoinche’da cöjääcäiñe yeichaame mma’ne. 28Töwö yoije cöweichöcoomo töweiye na, mädä nudä caatoodö; töwö yoije mmaja cä’jimi’chato dea. Änwanno äjimmotoncomo dea yääje cömmennäi: “Cönwanno Wanaadi jimmäje caato;” quee. 29Wanaadi jimmäje cöweijäcäiñe oodo döaajäje Wanaadi weichö chö’tamme’jai’cha caato, jödaata döaajäje jeiñe mma, täju jeiña mma, yää töntö’tammecöödöcoomo woije soto tuncu’tä weneenetoodö. 30Jenaadä töshinchääne Wanaadi tönshinchä cönä’jaacä towaanojo’ne’da soto weichöcoomo. Eduuwa mmaane töwö nanonta tameedä soto weichöcoomo wa’cä tötö’tajäätödööcomo sha’duminchadö jäcä. 31Töwö Wanaadi cuncu’nä’täi soto emmencato’como anootoi’chädö. Chäänönge töwö nemmencajaato’de ñäädä dhanwa emmencaneichomooje töne’tädö wwä. Yääje yeichojo tacaade cönnöi yäämaajo jonno ñäädä dhanwa adoncadö que; quee cönä’döaacä Paudo Ateena ñancomo wwä.

32Yaawä ñanno soto wwäiñe yäämaajo jonno waadoncanä jäcä ecammajäätödö eta’jäcä, dhantai tönwanno cönenno’jä’a’to. Anejjacoomo ’quene edääje cönä’döa’to Paudo wwä:

—Aneedawä anooto awä mädä jäcä dea aneecammajäätödö ñaa neta’dede; quee.

33Yaawä Paudo cöntämä choojonnoiñe. 34Dhantai etannamo’jödö chääjadä cöntonto. Tönwanno ñeecammajäätödö cöneecamjöicho. Ñanno antawäiñe cönä’jaacä dhanwa Diiyoniisiyo täätö; Aadeoopaco edhaamo jimmäje cönä’jaacä töwö. Wodi cönä’ja’dea, Dáamadi täätö; anejjacoomo soto cönä’ja’to dea.

Currently Selected:

DOSECHO 17: MCH

Highlight

Copy