DOSECHO 16

Paudo, Siida jadäiñe Tiimoteo wei’jödö

1Yaawä Paudo, Siida mmaja cönä’döicho Deedewe ña, Diitada ña mmaja; yäätä quedeiyente cöneejodöicho, Tiimoteo täätö. Ñäädä dhenö cönä’jaacä judhío, quedeiyente cönä’jaacä; yuumö ’quene cönä’jaacä quidiiyeeco. 2Tameedä quedeiyente Diitada ñancomo, Icooniyo ñancomo mmaja aashicha töwa’deuwe cönä’ja’to Tiimoteo jäcä. 3Ñäädä Paudo adä’se cönä’jaacä töjaadä. Yääje yeijäcä siicunsidaadoje cönnöi yaawä ñanno töötoto’como ña judhío cönä’ja’todö jäcäinchädäiñe, tameedä dhowaanäcäiñe yeijäcä quidiiyeecoje yuumö weichö. 4Tameedä jata töötädööcomo waadäi quedeiyentecoomo wwä töneecammajä’e cönä’ja’to yää Jeduusadén ñancomo anonta’como necamma’jocoomo jäcä, ansiyaano necamma’jocoomo jäcä mmaja. 5Mädääje tameedä Quidiito sotoi cönä’jädu’ta’to; anooto waadäi quedeiyentecoomo cöneejanga’to.

Maasedooniya ñano jäcä Paudo wäneetö’jödö

6Yaawä Aasiya ña Epíiditu Santo Wanaadi a’deddu aneecammajoojätö’da cöneiyacä Paudo wwäiñe. Jidiijiya ñano cömja’dätoicho yaawä, Cadaasiya ñano mmaja; 7Miisiya ñano wä’cunnacaadö döiña cönä’döicho yaawä. Yäätonno Witiiniya ña töötä’se cönä’ja’todö’je, Epíiditu Santo anaadojo’daiñe cöneiyacä. 8Yaawä Miisiya ñano ija’dätä’jeje Todoowa ñano wä’täi aca cönä’döicho. 9Iiña coijai Paudo cönwäneetöi. Dhanwa cönääneaacä, Maasedooniya ñano; ñäädä cönä’döaacä Paudo wwä: “Maasedooniya ña ä’cäde; ñaa ’wa’täta;” quee cönä’döaacä ñäädä dhanwa. 10Yääje Paudo wäänetö’jeje Maasedooniya ña ñaa cönääma’täi yaawä. Ñaa owaanäcä cönä’jaacä iiña ñaa anontädö Wanaadi wwä, ñeetadööcomooje aashichaato wätunnä ecammajäätödö wetä.

Jidiipo ña Paudo, Siida wei’jocoomo

11Yaawä jidaawa awä ñaa cönääma’täi Todoowa ñanno; sa’donna ñaa cöntämä Samootadaasiya ña. Jenamma naadöje ñaa cönä’döi yaawä Neaapodi ña. 12Yäätonno ñaa cöntämä Jidiipo ña, domaanocoomo jataadöcoomo, yää jata täneejucaato jaiñoone Maasedooniya ñano. Yäätä ñaa cönä’jaacä äächädä anooto mma. 13Yaawä wäädeetatoojo anooto awä ñaa cöntämä jata tö’cäi, tuna jacäi, Wanaadi wwä wa’deutojo döiña. Yäätä ñaa cönaatajiimai; ñaa cöneecammajä’acä yaawä wödiiñamo we’jumma’como wwä. 14Ñanno antawäiñe cönä’jaacä wodi, Diidiya täätö, Tiiyatiida ñano. Töwö cönä’jaacä camiisha seweichato ejeemajooneije. Wanaadi tumjumma cönä’jaacä. Yaawä Cajiichaana cuntui chäwwä Paudo wwä ecammajäätödö aashicha etaatojo. 15Yää ’jeje töwö wautisaaje cönä’döjoi, yä’jimmä’tädö mmaja. Yaawä töwö cönä’döaacä ñaa wwä:

—Cajiichaana ecaanö’nei chäänöngatooje äwwäiñe tö’ta’jäcä, ömmai chaca odhoomontäcä, iiña määwa’tätäiye; quee cönä’döaacä.

Töwö ñaa amonno’jone yaawä tä’saca.

16Aneedawä anooto awä Wanaadi wwä wa’deutojo döiña ñaa wötäädawä ajei’choto’jaato ñaa ejoodöne. Töwö cönä’jaacä odo’sha töntö’tamme’cato ’jano. Tädhaajä que ñäädä cönä’jaacä; töntö’tamme’que töweichö que jooje tädhaajä jödaatai töncana’ca cönä’jaacä. 17Ñäädä ajei’choto’jaato Paudo ncäcä töwäämannä’e cönä’jaacä, ñaa ncäcä mmaja. Töwö töcä’tömjä’e cönä’jaacä:

—Wanaadi o’jodhaato anoonö canno dhanwaacomo. Tönwanno wääwanaacatoojo necammaato äwwäiñe; quee töwä’döe cönä’jaacä soto wwäiñe.

18Jooje anooto mädääje cönä’jaacä. Yaawä Paudo cönquinchai yää etaadö. Töwö cönä’jedennacai ñäädä ajei’choto’jaato wwadäädä; odo’sha wwä cöna’deuwöi, ñäädä chaaca cönä’ja’dö wwä; cönä’döaacä:

—Jesuuquidiito eetö joi mämja’canö’ja; quee.

Yaawä dea mma ñäädä odo’sha cöneeja’cai.

19Yaawä ñäädä wodi edhaamo dhowaanäcäiñe cönä’jaacä ñäädä ajei’choto’jaato ai töjöödataichomo chaana’cajai’cha töweichöcoomo. Yääje yeijäcä tönwanno Paudo cönaajoicho, Siida mmaja; cönaadoicho yaawä acu’shänä wwadäädäiñe, jata jödoodoi’chädö aca. 20Tönwanno cönä’döa’to ñanno soto ecamma’jonnamo wwä:

—Canno judhíocoomo cöjaatawoncomo newoodoichajaato. 21Tönwanno töneecammajä’e weneeneto cönwanno domaano etaajaichojöönö, tödööjaichojöönö mmaja; quee cönä’döa’to Paudo jäcäiñe.

22Yaawä tameedä jataawoncomo cönäätömaicho Paudo jäcäiñe. Ñanno acu’shänä Paudo cönwoncajoojätöicho dee que aiju’jätöödöcoomo wetä. 23Yaawä jooje aiju’jätö’jocomje jedeeso ewöötö’tädö taca cöneewaacaicho. Aashicha cöneedai’chäja’to jedeeso edai’chäneichomo wwä, yäänejeedöcoomo queiñe. 24Yääje tanontä’jödö weijäcä ñäädä jedeeso edai’chäneichomo Paudo cöneewaacaicho yä’cadö aca jeene. I’juduucomo jäcä cömmöjäätöicho cadheena sejaadadi döaajä que.

25Yaawä yo’tawääne Paudo, Siida mmaja Wanaadi wwä cöna’deuwa’to; cöneecanta’ña’to dea. Anejjacoomo jedeeso cöneeta’to yeecanta’ñädööcomo. 26Yaawä jadheedä nono cönäätu’mei jooje, jedeeso ewöötö’tädö o’wadö tu’mejoone. Yaawä tameedä mönaatata cönaata’ducaajätöi, tameedä jedeesoja’como imööjä’a’como cöneesacaajätöi chea. 27Jedeeso edai’chäneichomo cönä’jäi yaawä. Tameedä mönaatata ta’duqueiñe’da edanta’jäcä töwö tösaudai cunu’cai yaawä töweewädö wetä. Töwö cöntö’tajä’acä jedeeso wäänejeeaatäiñe. 28Yaawä Paudo töcä’de cöna’deuwöi; cönä’döaacä chäwwä:

—Adheewäi, tameedä eetä ñaa na; quee cönä’döaacä.

29Yaawä adhaawa e’catäädö’jo ñäädä jedeeso edai’chäneichomo cönoomomöi Paudo döiñaiñe tötäätä’nöngancädä. Tä’mudhe cönä’döi yaawä Paudo, Siida o’wawäiñe. 30Töwö cunu’caicho yaawä jedeeso ewöötö’tädö tacanno; cöneecamma’joicho:

—¿Ane’cäämö tödööjai wanä wääwanaacatoojoje? quee cönä’döaacä.

31Yaawä Paudo cönä’döa’to chäwwä:

—Cajiichaana Jesuuquidiito ecaanö’cä; töwääwanaaca eijai ma yaawä, äwä’jimmä’tädö mmaja; quee cönä’döa’to.

32Yaawä tönwanno Wanaadi a’deddu cöneecammajäätöicho chäwwä, tameedä chä’sacancomo wwä mmaja. 33Yaawä dea mma, yää coijaichawä dea mma, ñäädä jedeeso edai’chäneichomo cöncoccai Paudo aiju’jätö’jocoomo. Yää ’jeje wautisaaje cönä’döjoi yaawä tameedä töwä’jimmä’tädö jadäiñe. 34Yää ’jeje töwö Paudo cönaadoicho tä’saca ewanshinchädööcomo wetä. Töwö ta’cwaiñe cönä’jaacä, yä’jimmä’tädö mmaja, Wanaadi ecamjödö weijäcä töwwäiñe.

35Yaawä yaawaana’jäcä ñanno äcamma’jonnamo waadiya cönaanontoicho Paudo u’cajoodöcoomo wetä. 36Yaawä jedeeso edai’chäneichomo cönä’döaacä Paudo wwäiñe:

—Ñanno äcamma’jonnamo adhu’cajaato ñaa wwä. Yääje yeijäcä täncanoode’da täjai maato eduuwa; quee cönä’döaacä.

37Yaawä Paudo cönä’döaacä waadiya wwäiñe:

—Ng’jn, eja’cajai’cha ñaa na. Tönwanno ñaa ecamma’jodö’jo’da mmädä ñaa aiju’jä’neto tameedä soto neneedöcoomoje, domaanoje ñaa weichaame; jedeeso taca ñaa döneeto yaawä. Eduuwa tacaade’da ñaa ja’canö’jo’se naato. Tönwannoone neejö’ña’to ñaa u’ca; quee Paudo cönä’döaacä.

38Ñanno waadiya äcamma’jonnamo wwä cöneecammajäätöicho yaawä Paudo wa’deuwö’jocoomo. Äcamma’jonnamo cönääcatoncaicho yaawä domaanoje yeichöcoomo eta’jäcä. 39Tönwanno cöntonto yaawä Paudo, Siida döiñaiñe yää chääjäcäiñe tönnö’jocoomo encwanno’jojoodö wetä. Cunu’caicho yaawä; töjaatädööcomo jonno enno’jadööcomooje mma. 40Yaawä jedeeso ewöötö’tädö tacanno töweeja’ca’comjäcä Paudo cöntonto Diidiya e’saca. Yää ’jeje quedeiyentecoomo eneea’jäcä töwö cönwätuujaicho; cöntonto yaawä aneiñaja.

Currently Selected:

DOSECHO 16: MCH

Highlight

Copy