Lawana Nani 80
80
LAWANA 80 (79)
¡Yang nani ra yamni ai kaiks!
Aiwani nani tâ bri ba wina, “Tangni nani tiunka”. Asaf lawana bara witin ai witniska ba.
1Israel sepadka,
Josep ra, sîpkam daknika baku tâ brih was,
man kirubin purara iwaikam brisma ba,#Imp St 25.18-22; 1 Sa 4.4; Ais 37.16; Isi 1.26-28.
¡wan wals!
Man namkra yamni wal Efraín ra kaiks,
2¡Efraín, Benjamín bara Manasés, namkra yamni nani wal kaiks!
¡Bus bara bal wan swaki wan sâks karnikam ba ni!
3Man Gâd,
¡wan dauks yang nani dîa katna ba baku!
¡Namkra ra yamni wan kaiks bara swaki wan sâkma!
4Dawan karnika sut bri Gâdka ba
¿ahkia kat kau lawi kama
uplikam nani pura sunra ba wal?
5Plun wankaia watlika ra,
nakra laya nani ni wankisma,
diara laya diaia watlika ra,
nakra laya ailal wankisma.
6Laimara iwi uplika nani ra
laiwaska kikaia yabisma
bara waihli nani ba kiki banhwisa.
7Gâd karnika sut bri ba
¡wan dauks yang nani dîa katna ba baku!
¡Namkra ra yamni wan kaiks bara swaki wan sâkma!
8Idsip wina wain kiwka kum sakram;
idan nani ra yaram bâra mangkan.
9Baha mangkaia tasbaya ba klin daukram,
bara wain kiwka ba ai wakia nani sakata
bara kuntri aiska ba banhki daukan.
10Bara il nani ba ai distika ni bikan,
witin ai tnawa ni dus kau purara ba sin.
11Witin ai tnawa nani ba kabu pura kat wan,
bara ai wakia urhwi takan ba Éufrates kat wan.
12¿Dîa kan kaupin ba slingbram
bara swiram yabal bâk auya nani ba,
wainka mâ nani ba dakbisa?
13Wari nani unta wina bal sut pîsa;
¡daiwan wail nani mita sin pih âpu daukisa!#Ais 5.1-7.
14Gâd karnika sut bri ba, kli tawi bal, pliskam;
kasbrika purara ba wina wan kaiks,
bara naha wainka kiwka dukiara,
man nani luki kaiks,
15naha wain kiwka man bui mangkatma ba
urhwi takuya, baha sika man pali bui bapram ba.
16Sauhki tikisma kupiam baiwanka wal
man baha ba klakisma bara angkisma sin;
17sakuna hilp muns
man baha uplika wahbi sakram ba
urhwi takaia, baha sika man pali bui bapram ba,
18bara yang nani kli man wina ilihwi takamna apia.
¡Rayaka wanki bas,
bara yang nani lika man ra man puri suni kamni!
19Man Dawan, Gâd karnika sut brisma ba,
¡wan dauks yang nani dîa katna ba baku!
¡Namkra ra yamni wan kaiks bara swaki wan sâkma!
Currently Selected:
Lawana Nani 80: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua
