Lawana Nani 76
76
LAWANA 76 (75)
Gâd ba pura lalura sa
Aiwani nani tâ bri ba wina, gitar sâtka nani brih aiwanaia. Asaf lawana, aiwananka.
1Dawan ba Juda ra kakaira sa
witin ai nina ba kulkanka tara brisa, Israel luhpia nani ra.
2Witin ai tempelka ba Saion ilka purara sa,
Jerusalem ra;
3bahara war aiklabaia dukia nani ba
kriki âpu daukata: kan kahbaia dukia nani, sord, trisba bara pantamangka nani sin.
4¡Man pramnakira sma, man Gâd!
¡Unta nani ban kaia ra pâwi bâra ba wal, man kau tara sma!
5Kupia karnira nani ba saki lulkram;
kau karna nani ba, diara sip dauki banhras;
¡kan witin nani ba sut mahka yapi banhwan!
6War wagin bara araska
nani sin yan aiawi banhras sa,
man, Jekob Gâdka,
witin ra saura munisma ba ra.
7¡Man ra upla sut si brisa!
¿Ya sip sa man mamwanra bûi kaia
man kupiam sauhkisma bara?
8Kasbrika purara ba wina,
man lâmka nani kaikaia marikisma;
tasba ba sibrin daukisa bara sâp takisa.
9Man, Gâd,
man lâ daukaia buisma ba ra,
naha tasbaya aiska ra taibi bri ba uplika nani tâwan.
10Bara upla kupia baiwanka nani baman mayunra ra lakisma;
witin nani ai waihla pali nani ba sin kraunkam takisa.
11Bamna man nani, Dawan Gâd ra pramis dauks,
sakuna aisisma ba kat dauks.
Man nani, sîa yabaia aitani sma
bara kutbi bri banhwisma ba,
¡prisantka nani bri sal yas!
12Witin bui sika tasba wihtka nani rayaka saki ba,
baku mika tasba aiska kingka nani ra sibrin yabisa.
Currently Selected:
Lawana Nani 76: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua
