Lawana Nani 105
105
LAWANA 105 (104)
Dawan bui Israel luhpia nani ra daukan ba
(1 Kr 16.8-22)
1¡Man nani bui Dawan ra tingki wis,
nina mâki wins!
Upla nani ra wis kaikbia
witin ai warkka nani daukan ba.
2Lawana nani aiwani, witin ra mayuns.
¡Diara tara nani daukan ba dukia aisas!
3Witin ai nina holikira ba dukiara,
man ba tara sma luks.
¡Kupiam ra lilia damra wals,
Dawan pliki uplika nani sma ba!
4Dawan ba pliks, ai karnika ba sin;
piu bani Dawan ba pliks.
5Ai warkka tara bara aihkakira nani
daukan ba dukiara kupiam krauki bas,
witin bui lâ mangkan ba sin.
6Man nani ai napakanka Ebraham kiamka nani sma ba,
man nani Jekob bâk saki brin luhpia nani sma.
7¡Witin sika Dawan, wan Gâdka ba;
witin sika tasba aiska na, tâ impaki ba!
8Kiamka tausin lui wabia kra,
dîa pramis daukan lâka ba, ai âuya tikbia apia;
9Ebraham wal lâ daukan ba,#Bla St 12.7; 17.8.
Aisak wal swer daukan ba sin.#Bla St 26.3.
10Bara Jekob ra lâ mangki yan ba,
baha ba Israel ra ban kaia lâka mangki yan sa,
11witin wisata ba ra:
“Kenan tasbaya ba man ra maikamni,
man prapatikam baku.”#Bla St 28.13.
12Witin nani ba maura baman sa kuna,
ailal apia tringsar nani,
upla wala tasbaya ra,
13witin nani ban impaki kan,
nisan kumi wina nisan wala ra,
king tasbaya kumi wina king tasbaya wala ra.
14Gâd bui swiras kan,
upla kumi bui saura munaia,
kau ni king nani ra smalkan:
15“Yang bui bâk sakri uplika nani ra kangpara.
Yang prapitki nani ra sin saura munpara.”#Bla St 20.3-7.
16Baha tasbaya ra plun wahwan ba blikan,
bara plun nani sut âpu takan.#Bla St 41.53-57.
17Sakuna witin nani ai tâura Josep blikan,
alba kabia wisi atkata ba.#Bla St 37.28; 45.5.
18Ai mina nani sîn ni priski saura munan;
¡ai wîna ba ayan sînka nani wal priskan kan!
19Dawan bîla ba kat Josep ra traika kaikan
bara witin dîa wisata kat aimakan.#Bla St 39.20—40.23.
20King ba, upla ailal wihtka aimaki tâ bri kata ba,
adar yaban silak wina pri sâkbia;#Bla St 41.14.
21witin ba ai watla dawanka wihtka mangkan,
bara dîa witin bri kata sut pura kakaira mangkan;#Bla St 41.39-41.
22wihta nani bara almuk nani ra sin
smalki, sinskira nani daukbia win kata.
23Baha ningkara Israel, Jekob wi ba
witin ba Idsip ra iwan,
tringsar baku Cam tasbaya ra.#Bla St 46.6; 47.11.
24Bara Gâd uplika nani ba yan ailal sahwan
baha nani kau karna takan Idsip uplika nani ba wal.
25Sakuna Idsip uplika nani ba,
ai uplika nani mapara yan buan,
bara Gâd warkka dadaukra nani ra sin
yan kunin munan.#Imp St 1.7-14.
26Bara ai napakanka Moses ba blikan,
Eran, witin ba bâk saki brin uplika ba sin;#Imp St 3.1—4.17.
27bara witin nani bui
upla iwras tasbaya ra sain nani daukan:
¡diara tara aihkakira Cam tasbaya ra!
28Gâd bui tihmia tara kum blikan baha ni bikan kan,
sakuna Idsip uplika nani ba lika
ai bîla wali daukras kata.#Imp St 10.21-23.
29Ai awalka nani laya kata ba yan tala takan,
bara inska nani ba sut ikan,#Imp St 7.17-21.
30witin nani kuntrika ba pikpik nani ni banhwan
king watla bîla kat sin bâra kata.#Imp St 8.1-6.
31Gâd aisin, bara kasbrika wina trimru bara tairi blikan,
Idsip tasbaya aiska ra banhki takan.#Imp St 8.16-24.
32Lî auhaia watlika ra ais ni blikan,
bara pauta aswan kuntri ba purara balan.
33Ai wainka nasla nani,
bara kwah damni dusa nani ba sauhki âpu daukan,
Idsip dusa nani kan ba sin sut batakan.#Imp St 9.22-25.
34Gâd aisin, bara tristrisia balan,
¡ailal, sip kulki sakras kan!
35Insla ra inta wahia nani ba sut pin,
bara tasbaya dîa mâ sakan kan ba sin sut pin kata.#Imp St 10.12-15.
36¡Idsip ra sin prura blikan,
Idsip taika tilara luhpia tawahkia nani sut pruan!#Imp St 12.29.
37Ningkara Gâd ai uplika nani ba sakan,
gul bara silbar wal;
baha kiamka nani tilara,
upla kumi sin ai mina prukras kan.
38Idsip uplika nani ba lilia takan,
witin nani ba mahka taki auya kan ba ra,
kan sibrin tara bri banhwi kata.#Imp St 12.33-36.
39Gâd bui kasbrika kum blikan witin nani pura bikaia,
pauta klauhan kum blikan tihmia ra ingwi kaia.#Imp St 13.21-22.
40Plun makaban ba ra, witin nani ra pusal blikan
kasbrika purara pata ba ni dakaki âuyapah daukan.#Imp St 16.2-15.
41Walpa ba baikan, bara baha wina lî nani aubi kan
upla iwras tasbaya bâk, awala baku.#Imp St 17.1-7; Kul K 20.2-13.
42Baku bamna, ai uplika Ebraham ra pramis holikira daukata ba
ai kupia krawan.
43Baku Gâd ai uplika wahbi sakan nani ba brih taki wan,
lilia bara wini bin dauki kira.
44Nisan wala tasbaya ba witin nani ra yaban,#Jas 11.16-23.
upla wala nani wark takan mâ nani ba sin.
45Baha mita, Dawan lâka nani bara smalkanka nani
ba kulki, alki brih daukbia dukiara.
¡Dawan nina ba mayunan kabia!
Currently Selected:
Lawana Nani 105: MSKTU
Highlight
Share
Compare
Copy
Want to have your highlights saved across all your devices? Sign up or sign in
© 2010 Bible Society in Nicaragua
