Lawana Nani 10
10
LAWANA 10 (9b)
Dawan hilpka makabi pura sunra
1Dawan, ¿dîa kan laihura buisma?#10.1 Grik nani lukisa, Lawana 9,10 ba wal apia, sakuna lawana kumi, baha mita Baibil lukanka nani kum kum ba numba sât sât ni ulbisa.
¿Trabil saura taimka nani ra yukuwisma?
2Upla watawi prautkira nani ba mita,
upla umpira bawikira
ra lawi nina blikisa;
sakuna baha diara saura nani,
witin nani ai kupia ra luki
paski kan ba ni,
yarka kli ai mina ba alkbia.
3Upla watawikira
ai brinka ba dukiara aimayunisa;
upla gridikira ba,
Dawan ra kulkaia apia wisa,
bahki kulkisa.
4Ai kakma snungki lawi bara aisisa:
“Gâd âpu. Dîa daukisna ba ya mita maikabi walaia âpu sa.”#Law 14.1; 53.1; 73.11.
Baha baman witin lukisa.
5Witin diara dauki ba,
piua bani pain man takisa.
Witin ai lukanka ra,
man lâmka nani ba laihura sa,
witin kaiki ba wina kau laihura sa.
Ai waihla nani ba lawaska kikisa.
6Ai kupia ra lukisa, upla kum
witin ra batakaia âpu sa,
witin pât nani wal prawbia apia.
7Ai bîla ba lahtubi aisinka ni banhwan sa,
kuninka nani, ikaia nina blikaia;#Ro 3.14.
upla taibaia lâka ba,
watawi munanka nani yukuki aisisa.
8Witin tawan sirpi nani ra
upla tila nina maya dimisa,
witin yukuwi upla pâtkas ba ikisa;
witin ai nakra nani wina,
hilpkas pali nani ba sip yukuwras:
9layan kum ai watla ra bâra ba baku sa,
ai yukuwaika ba wina umpira nani ra
bîla kaikisa taki prak alkaia.
Witin alkuya ba ra, raski
brih auya ai iliska ra mangkaia.
10Witin bawi ayaswisa,
bara hilpkas nani ba bal
ai asmala nani kat kauhisa.
11Watawikira ba lukisa,
Gâd ba âuya tiwisa,
ai mawan pura prakisa
bara sip diara kaikras sa.
12¡Dawan, bus, klamhkla ba buks!
¡Umpira nani dukiara âmya tiwbiara!
13Gâdki, ¿dîa muni upla saura nani ba,
Gâd lawaska kikisa?
¿Witin nani lukisa diara dauki ba
man makabi walma apia?
14Man bui kaikisma, saura munaia,
watawika lâka bri ba;
man baha kaikisma,
¡witin nani briaia ba, pana man bui witin nani ra yama!
Hilpkas uplika nani ba,
ai lâka man mihtam ra mangki swisa;
man sika rau takan nani ba hilpka aimakisma.
15¡Upla watawi nani ba karnika kriks!
¡Watawika daukan ba mana makas aibapbia,
diara kumi sin ban takaskbiara!
16Dawan lika ban kaia Kingka sa;
¡idan nani ba,
ai tasbaya wina saki lulkan kabia!
17Dawan,
praut âpu nani makabanka ba, man walisma.
Man bui witin nani ba tâ baikisma,
kiamam mangki walisma.
18Bara tuktan rau bara taiban lâka ra uplika nani ba,
wapnika aisi dauks.
¡Baha mita upla tasba wal paskram ba,
kli sirang wan ikbia apia!
Currently Selected:
Lawana Nani 10: MSKTU
Highlight
Share
Compare
Copy
Want to have your highlights saved across all your devices? Sign up or sign in
© 2010 Bible Society in Nicaragua
