Sins Lâka 3
3
Kupia kraukanka nani sins lâka briaia dukiara
1Luhpi waitna,
smalkanki nani ba âmya tiwbiara;
bara kupiam ra yarka lâika bîla nani ba alki yamni bribia,
2bara rayaka kum yari brima
bara kupia kumi lâka manis kira ni.
3Latwan lâka ba lulki swipara
bara kasakka diara rait ba sin;
lilura awa baku man brih tauks,
sinskam ra ulbi bris,
4baku bamna, Dawan bara upla nakra ra
kupia yamni lâka, aitani kulkan lâka sâkma.#Lk 2.52.
5Dawan ra kupiam aiska ni kasak luki bas,
bara man sinskam lâka ba kat tniwi kapara.#Ro 12.16.
6Diara daukisma nani sut ra,
Dawan ba tâmra bri bas,
bara witin mai brih wabia
yabal wapni bâk.
7Man ba sinskira pali sma lukpara;
Dawan ra kulkanka yas,
bara saura ba wina mahka tawi was,
8baha sika wînam tara saika kau pain ba,
wînam tara ra sin karna mai sakaia sip ba.
9Dawan ra kulkanka yas
man yuyakam nani ba wal,
dusam mâ tawahkia nani sut ba wal sin.
10Baku lika aibanhbia pura lui kira,
patam watla bara wainkam auhbaia watla nani ba sin.
11Luhpi, Dawan bui klala maiki ba,
man bahki baku kulkpara,
man sin lawi mai dauki ba ra bahki kulkpara.#Job 5.17; Hib 12.5-6.
12Kan ani uplika ra
Dawan mita latwan kaiki ba,
witin smalki lawi daukisa,#Par M 3.19.
sim aisa kum ai luhpia ra yamni kaiki
naku wapni daukaia muni ba baku.#Kli S 8.5; 2 Sa 7.14; Hib 12.5-6.
13Lilia sa sins lâka pliki saki uplika ba,
diara tânka alki latan kaiki uplika ba sin,
14kan baha sinska lâka pliki kukaia ba,
kanra yamni sa
silbar kukaia ba wal;
baha sinska lâka pura praki briaia ba,
gul pain wal kau manakira sika.
15Baha sinska ba lika,
walpa klauhira nani wal kau manakira sa;
bara dîa dîa sut brin mai dauki ba,
baha wal prakaia sip apia sa.
16Mihta aihkika ba yua nani yari wankisa;
bara smihka ba lika,
yuya bara kulkanka lâka wankisa.
17Man minam taibanka nina blikaia ba painkira pali sa;
man yabalkam nani ra taukaia ba sika kupia kumi ra iwaia kaia.
18Sins lâka ba, rayaka lâka sa ya baha bri ba;
¡dutki bri alki uplika nani ba, lilia pali sa!
19Dawan sins lâka bara diara daukaia smatka ni,
kasbrika bara tasba ba sin paskan;
20ai sinska lâka ni daukan
kabu ba baiwi takan kaia,
bara kasbrika nani ba wina sin
diwas laya tahwi ba.
21Luhpi, piu bani wapni lâka ba alki bas,
âuya mâira lâka ba namkra wina lap tiwbiara.
22Baha nani man mampara lî kârma rayaka baku kabia
namna ra mai sakahkaia lilura awa kum baku.
23Bâra mika yabalkam ra âuyapah kainam kat tauki kama,
bara minam sin pruki kama apia ban kaia ra.
24Man ris brima taim sibrin mai daukbia apia;
man aitnikma ba ra, âmyapah pali yapma.#Law 3.5; 4.8.
25Sirang tara, wan dara walras
pât aula ba sibrinka ra lukpara,
upla watawi nani purara
sauhki tikaia lâka aula ba dukiara sin apia.
26Kan Dawan mita âmyapah maikbia,
witin kat lukaia
bara minam alkaika wina
dakbi mai sâkbia kauhma ra kra sîa.
27Man ra makabi ba
yaia apia wipara,#Mt 5.42.
baha daukaia man mihtam ra diara brisma ba ra
ani piua ra man mihtam ra brisma yamni daukaia ba.
28Yauhka dukiara swipara
hilpka lâka naiwa yabaia sip sma ba ra.
29Saura daukaia lukisma ba daukpara,
man ra kasak luki iwi ba mapara.
30Upla wal unsabaia plikpara,
upla kumi sin saura mai munras sa kaka.
31Upla kupias nani ra tumpara,
witin dauki ba tnata luki sin daukaia lukpara.
32Dawan watawikira nani ra waihla kaikisa,
kuna pain nani ra ai kupia aiska kulkisa.
33Dawan upla watawikira watla ba saura lakisa,
sakuna kasakkira nani watla ba yamni munisa,
34Upla lawaska kakikra ra
Dawan mita lawaska kikisa,
sakuna bawikira nani ra kupia yamni lâka yabisa.#Je 4.6; 1 Pi 5.5.
35Sinskira nani lika kulkanka lâka ba ai dukia bribia,
sakuna taniskira nani ba ai swira tara lâka baman
ai pura lui tawbia.
Currently Selected:
Sins Lâka 3: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua