Sins Lâka 4
4
Yabal yamnikira bâk watauki kaia smalkanka nani
1Luhpi waitna nani,
aisikam mai smalki ba wals,
diara tânka alki latan kaikaia mata,
aman wali bas.
2Yang bui man ra smalkanka pain kum maikri sa,
baku bamna smalkanki ba kupiam lukras kapara.
3Kan yang na sin luhpa waitna kum katna,
yaptiki bui aihka painkira latwan ai kaiki kata,
4bara papiki ba naku ai smalki kata:
“Kupiam ra yarka bîli aisanki nani ba ulbi pain bris,
yang dîa daukaia mai wimna ba
dauki bas bara raya kama.
5Sins lâka pliki bris,
bara lâ wapni aisi daukanka ba sin;
âmya tiwbiara, yang bîli aisinka nani ba.
6Sins lâka ra latwan kaiks,
baha ba lulki swipara;
bara witin main mai kaikbia.
7Diara sut purkara,
sins lâka ba alki bri bas,
bara lâ wapni aisi dauki ba sin.
8Witin ra latwan kaiks,
bara sin laih purara mai bukbia;
kiaubi alks bara kulkanka lâka maikbia.
9¡Man ra kraun painkira kum prisant maikbia
bara witin wal lamla ra sakahkaia!”
10Luhpi, yang bîli aisanka ba bri
man dukiam dauks,
bara kau rayakam manka ba
praki maikan kabia.
11Yang sins lâka yabalka bâk mai bri wamna;
maikrika yabal pain bâk tauki kama.
12Man tauki kama ba ra,
wapankam nani bilara trabil kumi sin âpu kabia;
kan ba plapma bara minam ra
lalahbra mita mai munka kauhma apia.
13Diara mai smalkan yaba dutki alks,
bara aihwakras lika kapara;
aihwaki kaiki bris,
baha ba man rayakam bamna.
14Upla watawikira nani yabalka bilara aimakpara;
ai daukanka saura nina blîkpara.
15Ai yabalka bâk lui waia ba wina plaps;
tnaya ra taws witin nani wina
bara tâm kat impaki bas.
16Witin nani saura daukras kaka,
sip kupia kumi lâka ba briras sa;
upla kum pan batakras kaka,
witin nani sip yapan daukras sa.
17¡Witin ai pata bara ai diaika ba,
saurka lâka bara tanis lâka ba!
18Upla kasakkira nani yabalka bîla ba,
yu wala ingnika baku sa:
baha kau ban kanra ingwisa,
yu aihwa ulan ba wal.
19Sakuna upla watawikira nani yabalka ba lika
tihmia tara ra sa;
witin nani ai dahra walras,
dîa mita ai mina prukisa sapa.#Law 1.6.
20Luhpi, bîli aisika nani na aman wals;
diara nani aisisna sna ba kat kiamam tniki wals.
21Ban pali yarka namkra nani wina tiwi wabiara;
lukankam ra ulbi bris.
22Witin yabisa rayaka bara wan wîna aihwa bri kaia lâka
ya sut mita pliki sâkbia ba.
23Lukankam main kaiks diara sut purkara,
kan witin sika rayaka kârma.
24Kunin aisaia lâka wina plaps;
kunin lâka wina tnaya ra taws.
25Piu bani ra namkra ba kainam kat kaiki bas;
piu bani ra tâm kat kaiki bas.
26Pain kaiks anira minam
mangkisma ba,
bara piu bani ra tasba karna ra baman taibi kama.
27Yabalkam ba wina aimawahkpara;
minam ba saura wina laihura sâks.
Currently Selected:
Sins Lâka 4: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua