Job 37
37
1Pâsa saura ba kaikisna ba ra kupi tatatwisa,
laima dusa wina ban taki kauhaisa baku daira walatna.
2Gâd bîla baikra binka tara ba wali banhs,
ai bîla wina alwani bal taki ba sin.
3Witin imyula lulkisa kasbrika aiska ra,
tasba tâ kumi wina tâ wala ba kat.
4Baha ningkara bin kum walan, bîla baikra kum
yan bal takuya king bîla baikra baku,
bara ban baha wali piua ra alwani ba
imyula lipi ba lika takaskras kata.
5Gâd ai bîla baikra ba
alwani binka baku dauki piua ra,
diara aihka pali yan takisa,
diara tara nani daukisa bara upla nani ba tânka briras sa.
6Sno nani ra win tasba purara kauhbia,
bara lî ba yan karna pali auhisa.
7Upla nani ra munisa ai watla nani ra takaski banhwi kabia,
bara sut mita tânka bribia, witin sika baha warkka sut ba daukisa.
8Daiwan nani ba ai untika ra dimi banhwisa,
bara bahara yukuwi banhwi kabia.
9Waupasa tani wina prari aula,
bara yahbra wina kauhla aula.
10Gâd pâsa puhbi ba mita,
lî klaswan daukisa, bara lî ailalka
laya ba karna takisa.#Law 147.17.
11Kasbrika ba lî kiasmika nani buskisa,
bara baha wina imyula takaia daukisa.
12Imyula ba lipi auya,
kasbrika pura bâk kriwi bara bulwi
baku dauki auya, Gâd bui dîa daukbia win ba kat
tasba aiska purara.
13Baha nani sut ba wal sip sa
Gâd mita tasba ra klala yabaia,
apia kaka ai latwanka lâka tânka ba marikaia.
14Job, kupiam alki bri, wirâ ai wals,
Gâd wark aihka nani dauki ba dukiara wirâ luki kaiks.
15¿Man nu sma ki, nahki Gâd naha diara nani sut ba baku kabia dauki ba,
bara nahki kasbrika ra imyula lipisa?
16¿Nu sma ki,
nahki pâsa purara kasbrika awi ba,
baha ba lika ai sinska tara ba tânka wan marikisa?
17Man lika kwalkam nani dimisma ba mita,
bitni pruisma, waupasa payaska mita
tasba ba yan yapi ba ra.
18¿Sip sma ki Gâd ra hilp munaia,
kasbrika pura ba kau tara daukaia,
bara baha ba aibapi ban swima,
bras ni dus wahia daukan aibapi baku?#Bla St 1.6.
19Wan smalks yang nani Gâd ra dîa aisaia,
kan yang nani maipara tihmu sa,
diara wiaia ba âpu banhwisna.
20Yang lika wimna sin apia
dîa aisaia brin ai dauki ba,
baha wiaia tânka ba âpu ai daukbia wisna baku sa.
21Wan yu ingnika ba kaikaia karna sa,
klaut nani mita yukuki bri ba ra,
sakuna pâsa krawisa ba ra kasbrika ba param takisa.
22Gul lipanka ba lika yahbra tani wina takisa,
Gâd mita king tara sibrinka ni kutban piua ra.
23Sip tânka briras wan munisa,
Gâd karnika sut bri ba dukiara,
kan witin ba karnikira,
kasakkira tara pali sa,
witin ba wapni sa, upla kumi ra sin taibras sa.
24Baha mita upla nani mita witin ra sibrin brisa,
sinskira nani ba witin ai mapa ra diara apia sa.
Currently Selected:
Job 37: MSKTU
Highlight
Copy
Compare
Share
Want to have your highlights saved across all your devices? Sign up or sign in
© 2010 Bible Society in Nicaragua
