Job 36
36
Elihú aima walhwal ra aisisa
1Elihú naha diara na aisi, naku win:
2Wiria kupiam alki takaski bris,
bara mai smalkamni,
bamna Gâd tâwan kau diara aisaia brisni,
3diara tânka kaikaia sip sna ba,
laihura mangki kaikamna,
baku lika mairikbia nahki papaskra ba kasak sa.
4Yang kasak mai wisni kunin kumi sin âpu,
kainamra sinskira kumi brisma sut ba daukan ba.
5Gâd ba lika karnakira pali sa,
bara sinskira tara pali sa,
bamna witin pâtkas uplika ba baha kulkras sa.
6Saurakira rayaka pâtka ba ban swih tikras sa,
sakuna umpira nani lâka lika wapni daukisa.
7Piua bani upla wapni nani ba kan kahbisa,
king nani ai iwaika ra iwi nani ra tâ baikisa,
baha nani ba purara bukisa.
8Sakuna sîn nani ni wilki brisa,
bara latwan ba bui saura pali munisa.
9Dîa saura witin nani daukan ba Gâd mita yan kaikisa,
nahki witin nani ai kupia prautka lâka mita klauna alki brih wan ba.
10Wapni mangkaia dukiara aisisa,
bara makabisa ai saurka ba mahka swibia.
11Bîla wali baha kat sin dauki banhbia kaka,
lilia bara ai âuyapah kabia,
ai yua nani kau tâka ba piua ra.
12Sakuna bîla kat wali daukras sa kaka,
prui raiti bilara kat iwi wih banhbia,
kau yamni ai dara walras sa piua ra.
13Upla watawikira nani ai kupia ra lawi pali banhwisa,
priskan banhwisa sakuna hilp makabia apia.
14Kau wahma witin nani pruisa,
ai rayaka ba danh takisa swira lâka ra.
15Pât wahwanka tilara,
Gâd mita swaki sakisa pât wahwi uplika ba,
latwan wahwi ba tila bâk yan tânka brisa.
16Man sin pât nani wina swaki mai sakan,
bara pri lâka uya pali maikan sa,
tibilkam ba lika plun auhni ni banhkan sa.
17Upla saura nani pât briaia kan ba,
man ra tnata alkan kabia,
bara lâmka aisi dauki pât ra mai lakan ba wina,
sip swak takma apia sa.
18Kaiki bas diara mana mai atkbiara,
lalah ailal mita yabrika kupiam alkbiara.
19Pât mai taiban kabia piua ra,
man ra hilp âpu kabia;
man winankam bara karnikam sut ba lika bahki kabia.
20Wingkam puhpara, kan tihmia ba aula,
baha piua ra upla nani ba âpu takisa.
21Aman kaiks kli saura ra tawi wama,
man ba pât wahwan wal tânkam pliki kaikan ba.
22Gâd karnika tara ba ra aman kaiks,
smasmalkra kumi sin sip witin ba wal prakras.
23Witin dîa daukaia ba mapara
upla kumi mita sin diara wiaia ba âpu sa,
dîa saura daukbia sin mapara aisaia ba sin âpu sa.
24Tasba aiska mita ai warkka ba dukiara mayunisa,
kupiam krauks man mita sin mayunaia sma ba.
25Upla sut mita kaikaia sip sa,
laih wina kabia sin.
26Gâd tara ba tânka yawan sip aiska kaikbia apia,
witin manka nani sin sip kulkbia apia.
27Lî tahwi nani ba sut witin watla kum ra mangki brisa,
ningkara baha ba wina lî yan auhisa.
28Lî auhi ba lika kasbrika nani wina yan auhisa,
bara lî ailal pali upla nani purara auhisa.
29¿Kasbrika nani plapi ba, ya tânka brisa ki,
apia kaka dîa muni alwani bin takisa kasbrika purara?
30Imyula ba Gâd mita yan lipisa kabu purara,
kabu tihuka ba pura praki brisa.#Law 18.13-15.
31Baku witin bui upla nani plun dakakisa,
bara plun sin ailal pali yabisa.
32Imyula ba witin ai mihta nani ra brisa
bara naha na mark ba kat yabisa,
witin bui dîa lâ mangki yan ba kat.
33Alwani ba Gâd bâra ba dahra aisisa,
pâsa saura ba aisisa ai kupia baiwanka ba tânka.
Currently Selected:
Job 36: MSKTU
Highlight
Copy
Compare
Share
Want to have your highlights saved across all your devices? Sign up or sign in
© 2010 Bible Society in Nicaragua
