Aiseya 8
8
Aiseya luhpia nina ba wal upla ra smalkan
1Dawan bui ai win: “Ulbaia tatka tara kum bris, bara bahara uls ulbanka ba aisi kaikaia param kaia: ‘Maher-salal-hasbaz.’#8.1 Hibru ra ulban sa Maher-salal-hasbaz, baha tânka ba pat pali bal impliki sauhkan kabia. 2Bara baha wina was prîs Urías,#2 Ki 16.10-16. bara Sakaraya Jerebequías luhpia waitna sin.”
3Ba ningkara prapit mairin, yang mayi ba wal prawri, witin kwihra tiwan, luhpa waitna kum baikan. Bamna Dawan bui ai win: “Nina ba Maher-salal-hasbaz mâks. 4Tukta ba kau ‘papiki’, ‘mamiki’ aisaras ba ra, Damaskus, Sameria wal dukia kukanka nani sut ba, Asiria kingka mita dakbi brih wan kabia.” 5Aima wala ra Dawan kli yang ra aisi ai win:
6“Naha uplika nani ra Resín sîa,
Remalías luhpia waitna ba sîa,#Ais 7.1.
Siloé ra lî lamni aubi ba
lulki swin bamna,
7Bara Dawan mita witin nani ba
Éufrates awala lisamra tara dingkan karna aubi ba ra dingkbia
(baha wibia kaka Asiria kingka
ai karnika sut bri ba mihta ra).
Witin nani tnaya bani ra lisamra ba mita pura lubia,
ai lamara nani ba sut,
8lisamra ba Juda
purak aubi kabia nana kat.
Tnawira ai tnawa nani ilingki ba
baku kabia, tasbayam ba,
Imaniuel mita, kutbi bribia.”
9Nisan nani, aidrubi asla taks,
man nani tamyahkan sa;
wals, man nani tasba wala wina nani sma ba sut:
âu, man nani kau ridi taki balma sakuna,
sirang mai ikan kabia.
10Daukaia luki ba lilka dauks,
kan baha ba sauhki tikan kabia;
dîa lâka upla wala ra kabia want ba
kat daukbia apia,
kan Gâd ba yawan nani wal sa bamna.
Dawan ra sika sibri kaia ba
11Dawan ai karnika ra dutki ai alki bara ai win, naha uplika nani yabalka bâk wapamna apia. Sakuna ai win: 12“Mapara buanka lâka naha uplika nani aisi ba, man nani aisapara daukanka sut ba, mapara buanka lâka nani sa. Witin nani dîa sîa bri ba, baha sîa bripara, man nani sibrin sin mai daukbiara. 13Karnika sut bri Dawanka ra man nani holikira kulks;#1 Pi 3.14-15. man nani sibrinkam ba witin ra kabia; man nani bui witin ai mawan sîa bri bas. 14Bara witin ba man nani minam alkaika baku kabia; baha walpaya ra sika man nani minam prukma, baha mita Israel kingka tasbaya wâl ba batakbia; wan mina alkaika baku kabia, Jerusalem uplika nani baha kiwka ra mina alki kauhbia. 15Upla ailal ai mina prukbia, ailal sin kauhbia,#1 Pi 2.8. ban sin prubia; upla mina bahara alkbia ban krikan kabia; aiblakwi priskan kabia.”
Aiseya ai uplika nani ra win ba
16Naha bîla blikan na man nani pain wals;
naha bîla nani mai wisna na,
upla wala ra aisapara,
yang mai smalkisna bîla nani ba.
17Dawan ba Jekob uplika nani wina yukuwi kabia sin,#Hib 2.13.
yang lika witin ra kasak lukisna.
Witin kat kaiki bîla kaikisna.
18Yang, yang luhpi nani sin Dawan wina aikan ba,#Hib 2.13.
Israel luhpia nani ra sain aihkakira kaia ba dukiara sa,
Dawan, karnika sut bri ba mita
ai mangkan sa
witin Saion ilka ra iwi ba.
19Âu, upla nani bui man nani ra mai wibia sika:
“Sukia nani ra wals,
yapi kakaira nani ra sin makabi wals,
pusbi aisi nani ra bâra aisi ba.
¿Upla nani ba ai gâdka nani ra
makabi walaia apia sa ki,
pruan nani bara walaia raya nani ba dukiara dîa aisabia ba,
20dîa daukaia bara dîa aisaia bîla kum wan wibia ba walaia?”
Âu, witin nani baku aisabia sika,
sakuna tanis lâka kabia.
21Witin nani tasba kum wina tasba wala ra
taiban lâka ra taki wabia,
plun dauki kabia;
plun dauki ba mita, ai kupia baiki kabia.
Ai kingka ra, ai gâdka ra sin lahtubia.
Witin ai mawan na purara tawi kaikbia
22bara witin nani tasba ra kaikbia;
bara kaiks pât tara,
tihmia tara baman kaikbia,
tihmia tara, pât wahwaia baman.
Upla sut tihmia ra kabia.
#Naha borska nani 9.1-21 na bors. wala 8.23-9.20 ra kli baku ulban sa, baku Hibru nani ulbanka baku sa. Pât wahwi taibi bri nani ba,
swak takaia âpu kabia.
Currently Selected:
Aiseya 8: MSKTU
Highlight
Share
Compare
Copy
Want to have your highlights saved across all your devices? Sign up or sign in
© 2010 Bible Society in Nicaragua
