Aiseya 7

Aiseya bui Ahaz ra pas ai bîla blikan ba

1Siria kingka Resín, bara Israel kingka Pécah Remalías luhpia ba wal, Jerusalem mapara aiklabaia wan, sakuna sip pura luras kan. Ahaz, Jotam luhpia, Ozías mulika ba, Juda kingka aimaki kan ba yua nani ra baha takan.#2 Ki 16.5; 2 Kr 28.5-6. 2Baha piua ra naha bîla na blikan, king Ahaz ra bara ai taya nani ra sin wih win: “Siria uplika nani ba, Efraín aikuki asla takan.” King ba ai uplika nani sin baha walan, tatatwi banhwan pâsa krawan unta ra dus nani wauhi ba baku.

3Bara Dawan Aiseya ra win: “Man, luhpiam Sear-iasub#7.3 Hibru ra ulban sa Sear-iasub, baha tânka ba dakni lupia kum kli tawi balbia. wal taki was, lî plapaika laiwi madakura ba wina kau purara, bahara Ahaz wal prawaia, kwala tuskaika yabalka ba ra, 4witin ra wis:

‘Aman kaiks, dring prupara;

si bripara, sringkam sin bripara

baha pauta klauhan lupia wâl kiasma

taki ba dukiara,

Resín, Siria ai uplika aikuki

kupia baiwanka laptika ba,

wala Remalías luhpia ba dukiara sin.

5Siria uplika nani, Efraín uplika aikuki

bara Remalías luhpia ba sin,

aikuki lukanka saura brih man mampara daukisa,

witin nani aisin:

6Kaisa yawan Juda mapara waia sirang ikaia;

yawan tasbaya ba, aiska dakbi briaia,

bara Tabeel luhpia ba, king mangkaia.

7Ban sakuna, Dawan naku wisa:

¡Baha baku ban takbia apia!

8Damaskus sika Siria kiapitalka,

bara Resín sika Damaskus kingka;

Sameria ba Efraín kiapitalka,

bara Remalías luhpia Sameria kingka;

9sakuna mani 65 bilara

Efraín ba kuntri apia kabia;

man nani kasak lukan lâka ra

bapi buras sma, man nani minam ba sin

bapi bûi kama apia.’ ”

Imaniuel aisubi takbia dahra aisin

10Dawan Ahaz ra kli aisin: 11“Dawan Gâdkam ra makas sain kum dauki mamrikaia, baha ba man ra tukin kum kaia, tihuka kau tihu ba wina, apia kaka kasbrika purara ba wih kau purara ba wina.”

12Bara Ahaz pana win: “Sain kum kaikaia makabamna apia, Dawan ra traika kaikamna apia.”

13Bara Aiseya bui win:

“Nanara man nani wals,

Debit king watla bilara sma uplika nani.

Man nani mampara diara saura sa,

upla ra trabil muni swapni sakaia ba,

¿ban sakuna man nani,

yang Gâdki ra sin baku munaia lukisma ki?

14Bahamna Dawan witin bui,

man nani ra sain kum mamrikbia:

Kaiks tiara ba kwihra sa,

bara ai luhpia waitna kum sâkbia,

bara ai nina ba Imaniuel#7.14 Hibru ra ulban sa Imaniuel, baha tânka ba Gâd yawan aikuki sa. mâkan kabia.#Mt 1.23.

15Witin kau tuktan kabia ba piua ra,

bîp tialka laya, kwahadu, nasma laya pi kabia.

16Sakuna kau tukta ba ai tânka pain briras ba ra,

baha kuntrika king wâl bri ba,

sirang mai iki ba

lulki swin kabia.

17“Dawan mita daukbia man puramra balaia,

uplikam nani purara, bara aisikam watla purara sin,

Efraín, Juda wina dakwi takan

yua sâtka nani takan ba baku ba.”

(Naha sika Asiria kingka dukiara aisisa.)

18Baha piua ra Dawan ba mita

kukas nani baku yaka balbia,

baha nani Idsip awalka ra laihura iwi nani ba ra.

Asiria tasbaya ra iwi nani ra lika

nasma yula nani baku yaka balbia.

19Bara baha nani balbia,

witin nani sut, twi saura tasbaya,

il bîla nani ra takaskbia,

walpa untika nani ra dimbia,

kiaya dusa nani tilara

daiwan lî diaika pliska nani ra sin.

20Baha yua ra, Dawan Asiria kingka ba alki bribia,

Éufrates awala baila wala ra

risar ayar munan baku,

bara Israel luhpia nani tâwa,

krusam tamaya nani,

bara tamaya bâra pîska

wala nani sut ba, kusbi sâkbia.

21Naha piua ra, ya bîp mairin kum bara sîp mairin wâl pakbia kaka, 22tialka laya manis bri kabia, baha mita kwahadu pibia, nasma laya sin dibia baha uplika pruras ban bahara takaskuya ba.

23Baha piua ra sin wain nasla kum wain dusa 1,000 mangkan ba, ai mana ba silbar mâ 1,000 kulki kan ba, nanara kiaya bara rahra wal pâwi kabia. 24Trisba bara pantamangka brih upla ba bahara waia sip sa daiwan wail ikaia, tawan aiska, kiaya man takbia. 25Asang ra insla nani, hu ni tukbi mangki kan ba, upla bahara wabia apia kiaya, rahra nani pâwan ba mita; bîp bara sîp nani piaika pliska takan sa.

Currently Selected:

Aiseya 7: MSKTU

Highlight

Compare

Copy