2 Macabeo 3
3
Gâd bui tempel ritska nani ba kan kahbisa
1Smasmalkra tara Onías piua ra,#3.1 Baha lika Onías III dukiara aisisa, Saiman II luhpia, bara prîs tara aimakata mani 196 wina 175 ra Kraist balaia kainara. Jerusalem tasbaya holikira ba kupia kumi lâka ra iwi kan, lâ nani sut ba aitani kat alki brih dauki kan, Onías ba waitna kum kasakkira kan bamna, witin saurka lâka nani sut ba mapara waitnika kata. 2Baha piua nani ra, king tara nani sut ba tempel ra wih mayunra tara nani yabi kan, bara prisantka tara nani yabi, baku tempel ba kulkanka tara dauki kata. 3Asia kingka Seleuco pali ba sin,#3.3 Baha lika Seleuco IV dukiara aisisa, witin ba Antíoco Epífanes muihnika almuk. witin ai ritska nani bri ba wina tempel ra sakripais nani dauki liliaka yua ra, tâ baiki hilp muni kan.
4Sakuna Saiman, Bilgá smasmalkrika kan ba,#3.4 Bilgá prîs kan ba piua ra: blasi ulbanka nani ra wi ba baku (cf. Nih 12.5,18). Gr.: Benjamín kiamka tila wina. baku sin tempel aiska pura kakaira kan ba, witin Onías wal unsabanka kum brin, tawan markitka ba pura kaikaia tânka dukiara. 5Saiman ba kaikan, witin sip Onías wal aisi ai tânka briras muni kan, bara Apolonio Tarso tawanka wina ba wal aisaia wan, naha sika baha piua ra Celesiria bara Fenicia wal purara war daknika nani sut lalka kan ba. 6Saiman bui Apolonio ra aisi win, Jerusalem tempelka bilara ritska nani ailal pali bâra sa, lalah ba sip kulki sakras munisa, sakripais nani sut daukaia pura lui ritska ba bâra sa, bara baku bamna sip sa king ba baha ritska nani dakbi briaia. 7Apolonio baha sturka walan taim, king ra kaikaia balan, bara tempel ra ritska nani bâra ba tânka dukiara witin ra aisan kata. Bara king ba bui Heliodoro, ai uplika lalka tara ba ra karnika yaban, baha ritska nani ba ai mihta ra bribia dukiara.
8Bara Heliodoro naha adarka wal mahka yabal ra taki impakan, Celesiria bara Fenicia tawanka nani kaikaia auya baku, sakuna witin ba king dîa adarka yaban pali ba daukaia auya kata. 9Heliodoro ba Jerusalem ra diman taim, prîs tara ba bui tawan aiska nina ra yamni pali brin kata, baha nani ra aisi win dîa witin nani walan ba tempel ritska dukiara, baku sin dîa pali dukiara witin baha pliska ra balan ba sin win. Bara makabi walan witin ra sturi nani win kan ba rait sapa. 10Smasmalkra tara ba bui win, tempel bilara yuyaka nani bâra ba mairin piarka nani bara tuktan rau nani dukia sa, 11bara lalahka tâka ba, Hircano, Tobías luhpia waitna ba dukia sa, kan witin sika wark tara lalka kum sa. Baku bamna Saiman bui dîa sut aisan ba kunin pali sa, kan tempel bilara lalah sut ba ra 1213,200 kilo nani bâra sa silbar ra, baku sin 6,600 kilo nani ba gul ra sa. 13Baku bamna, tempel holikira ra dîa pat dingkan bâra ba, alki sakaia adarka âpu sa, kan baha ba tasba aiska ra kulkanka bri ba mita.
14Sakuna Heliodoro, king adarka wal balan ba, aitani lukras kli kli aisi kan baha lalahka sut ba king ra yabaia dukiara. 15Witin bui piua kum mangki yaban kan, baha ba alkan taim, Heliodoro ba tempel bilara dimi wan lalahka nani ba kulki kaikaia dukiara, bara tawan aiska bilara upla nani ba sari pali kata. 16Prîs tara ba ai daukanka nani bri kan ai mawan sarka bui latan kaiki kata bara ai mawan sarka nani ba param kaikaia sip kan, ai kupia bilara sari bri ba tânka nani. 17Sibrin tara nani witin ra diman kan ba upla sut bui kaikaia sip kan, ai kupia kriwanka nani bri kan ba. 18Upla nani ba yabal bîla bâk isti plapi wapi banhwi kan, bakahnu asla taki ai pura sunaia dukiara, kan tempel ba sunu apia daukaia trabilka ra kata. 19Mairin nani ba sari kwalka dimi bara ai lama dusa nani param brih yabal bilara taki wapi kan. Kau tiara nani ba lika adar yabras kan utla wina takaia, sakuna baha nani ba dur kat bal taki kaiki kan, tila kum kum nani ba pins tara kutbanka ba purak uli kaiki kan, wala nani ba windar untika nani bâk biki kaiki kata, 20bara alsut asla ai mihta nani purara buki ai pura suni banhwi kan. 21Upla nani ailal ai lula kriki bara tanis baman kan ba kaikaia sari wan dauki kata, bara prîs tara ba sari mita pura luan kan ba sin.
22Witin nani Dawan karnakira ra makabi banhwi kan, tempel bilara upla nani bui lalah bri si swin ba, ai mihta nani kangbras ban swibia dukiara, 23sakuna Heliodoro lika witin dîa daukaia adarka brih balan ba, mahka alki daukaia ridi pali takan kata. 24Sakuna Heliodoro bara ai pânika nani sut kira, tempel bilara lalah bakska tara ba lamara wan taim, Spirit nani Gâdka ba bara baku sin karnika tara bri ba bui ai karnika marikan, ya nani sut baha lamara wan ba Gâd karnika bui sibrin tara dingkan bara karnikas dauki swin kata. 25Kan ai nakra ra aras tara kum takan pranakira pali daukan kan, bara waitna kum uli kan, ai lal ra ayan kiaputka kum bapi kan, bara ai langsika tara nani ba buki Heliodoro mapara dimi wan. Araska purara waitnika ba gul kwalka nani dimi kata. 26Baku sin wahma karnakira nani wâl takan, prana ni aibanhwan pali kan, kwala sin uba pain dimi kata. Heliodoro lama kir kutbi bri banhwan, bara takaskras kira latwan saura nani yaban kata Heliodoro taya ra. 27Heliodoro ba tasba kat kauhan, nakra sut blain takan, bara istikira alki buki muni krikri kum ra tnikan kata. 28Naku sika, Dawan karnika tara bri ba Heliodoro bara ai uplika nani sut ra marikan, witin ai karnika tara wal tempel bilara dimi wan ningkara krikri ra tniki brih taki balan.
29Baku bamna, Gâd bui ai karnika tara Heliodoro ra marikan ba wal, naha ba sturi aisaras takaskan, karnika sut tikan, bara raya kabia sin apia, witin pruan kabia. 30Ju nani ba Dawan ra tingki win, ai karnika tara bri ba plis holikira ba kat param marikan ba dukiara; bara tempel bîla ba sibrin lâka bara tanis baman kan ba, nanara kli lilia lâka balan, bara kupia kumi takan Dawan karnikira param takan ba wal.
31Heliodoro pânika nani bui Onías ra plikan pura sunra kum daukbia dukiara bara baku lika naha waitnika pat pruaia ba, rayaka swaki sakaia dukiara. 32Onías, smasmalkra tara ba, ai sringka tara nani brin bara ban sin lukan king ba nu takbia nahki Ju nani bui Heliodoro rayaka ra munan ba, bara istikira sakripais kum daukan Heliodoro ba prubia apia dukiara. 33Bara Onías ba saurka dukiara sakripais ba yaban taim, sim wahmika nani sim kwalka nani dimi kli param bal takan, Heliodoro ra witinka mawanra bal buan bara naku win: ‘‘Man prîs tara Onías ra tingki wis; ai pura sunra daukan bamna, Dawan bui man rayakam ba pri sakisa. 34Bara nanara Dawan klalka briram ba wal, upla sut mawanra man aisi mayuns, Dawan karnika tara bri ba tânka nani.’’ Naku aisan ningkara, pliska ba wina lap tiwi banhwan.
35Heliodoro sakripais tara kum daukan kata, Dawan wal pramis nani sin manis daukan ai rayaka kli yaban ba dukiara, bara Onías ra wih lakula daukan, ningkara ai war daknika aiska kira mahka tawi balan king bui witin ra blikan kata lamara. 36Witin bui upla sut ra aisi kan, nahki Dawan Laih Purara iwi ba bui witin ra dîa munan ba, baku sin ai nakra pali wal kaikan ba.
37King bui Heliodoro ra makabi walan, ya kli Jerusalem ra blikaia sip sapa, bara naku ansika yabata: 38“Wan kingka sma ba, ani uplika man mampara buan sa kaka, ban kra yu kum man ra saura lukan sa kaka, baha uplika ba blîks wabia, bara baha pliska ra klala bribia ningkara kli raya balbia sa kaka, witin yamni kabia, kan rait ba lika baha tempelka bilara Gâd karnika ba bâra sa. 39Heben purara iwi ba bui baha tempelka bilara diara sut bâra ba kan suni brisa; ya nani saura luki bahara dimi auya ba, latwan saura yabi rayaka tikisa.’’
40Naha sika Heliodoro dahra ba, baku sin tempel bilara ritska nani bâra ba nahki kan suni ba tânka nani.
Currently Selected:
2 Macabeo 3: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua