2 Macabeo 4
4
Onías king wal aisisa
1Saiman dukiara kainara pat aisi kaikan kan ai tasbaya mapara buan, kunin bahki nani tempel bilara ritska nani ba tânka dukiara aisan, Onías ninara saura pali aisan, bara Heliodoro rayaka ra diara sut takan ba naha bui daukan baku aisi kan. 2Onías ra tawan ritska nani wailhka baku kulkan kata, naha waitnika upla sut wal pain baman iwi kan ba, ai nisanka nani kan sasunra ba, lâ nani ba aitani kat dauki uplika ba. 3Saurka lâka nani ailal pâwi kan tâka mita, Saiman pânika kau witin wal asla ba bui upla manis ra ikan kata. 4Onías bui kaikan naha daukanka nani ba saura pali kan, baku sin Apolonio, Menesteo luhpia waitna, Fenicia bara Celesiria ra aiklaklabra nani sut lalka ba, Saiman lukanka saura nani ba alki brih, diara manis saura dauki auya kan kaiki, 5Onías ba king ra wan ai tawanka luhpia nani dusa kuhbaia lika apia, sakuna tawan aiska trabil bri ba hilpka aisaia dukiara wan kata, 6kan kaikan taim, king baha nani hilpka dukiara ai mihta dingkras sa kaka, baha pliska ra kupia kumi lâka âpu kabia, baku sin Saiman ba ai daukanka saura nani bri ba swibia apia sa.
Israel tasbaya ra aidul lâka brih balan ba
(1 Mac 1.10-15)
7Seleuco pruan ningkara, Antíoco ba witin ai watlika ra aimakan kata Epífanes nina wal. Baha piua ra sika Jasón, Onías muihnika ba, lalah yus muni, kunin dauki smasmalkra tara warkka nani dauki tauki kan ba. 8King wal sans kum brih aisan bara pramis munan, witinka ra yabaia 11,880 kilo nani silbar prisantka nani, baku sin 2,640 kilo wala nani tani wâl wina. 9Baha sut purkara, king ra pramis munan silbar kau 5,000 kilo nani yabaia, sakuna witin ra sans yabia, Grik uplika nani natka kat, pulanka pliska nani paski yabaia adarka yabia sa kaka, baku sin Jerusalem uplika nani ba Antioquía uplika nani baku ai daukanka nani ba lakbia sa kaka. 10King bui witin dîa makabi ba adarka yaban, bara Jasón ai karnika brin taim ai uplika nani tilara Grik uplika natka ba kau karna dauki kata. 11King wala nani bui yamnika lâka nani Jan, Eupólemo aisika ba bui tâ brih muni aisi yaban kan ba sut swin. Naha sin Eupolemoka sika, aima kum pat blikan kata Roman nani kira aisi, lâ kum wapnika mangkaia dukiara.#4.11 1 Mac 8.17. Jasón diara wala nani sin daukan kata bara upla nani ai iwanka natka lâ kat brih iwi kan ba tikan, bara baha mapara lâ wala nani sakan kata.#4.11 1 Mac 1.15,44-50; 8.17. 12Istikira pulaia pliska tara kum paskan kan kahbaika pliska munhtara,#4.12 Kan kahbaika pliska: Kaiks 1 Mac 1.33 n. ningkara wahma kau pain nani ba wahbi sakan, baha pliska ra ai wîna nani trin muni kabia dukiara. 13Upla saura nani uba ailal ai saurka dauki kan ba ra, baku sin Jasón ba smasmalkra bahki kuninkira puli kan ba tâka tawan aiska ra, Grik uplika natka nani ba bapi kan, baku ba ra upla tringsar nani iwanka natka ba alki brih dauki kaia lâka ba bapan kata. 14Naku prîs nani tibil sunukira warkka dauki kan ba mahka swin, bara witin nani pali tempel bilara kainara sakripais holikira nani daukaia lâka ba mahka swisa, bara sainka ba yabuya wal baku wahma nani ai wîna trin muni nani ba ra tâ baikisa, baha nani lâ kat baha ba daukras kan ba. 15Ai kuntrika lâka nani, baku sin kulkanka tara bri ba, witin nani bui misbara kaikan, bara Grik uplika nani kulkanka ba kau mayunra dauki kata. 16Naku daukanka nani bri kan ba tâka sika, witin nani pât saura nani wal prawan ba: Grik uplika nani natka nina bliki kulkanka yabi kan ba bui tawi, witin nani ra ai waihla kau saura baku kaikan ba. 17Ya nani Gâd lâka mapara ba, apia kaka naha ba kulkras lulki swi nani ba, klala briras lika takaskras sa, naha sturka aula na bui mariki ba baku.
18Tiro tawanka ra mani walhwal bani king mawanra pulanka nani puli ba pulaia piua ba balan taim, 19Jasón upla saura ba bui baha pliska ra, Jerusalem tawanka nina ra Antioquía upla dakni kum blikan wan, pulanka nani ba kaikbia dukiara, witin nani ra silbar mâ 300 kumi bani ra yaban, Hércules ra sakripais dauki mayunbia dukiara; sakuna uplika nani ba lukan, aitani apia sa baha lalahka ba baku sât sakripais nani ra yus munaia, bara kau pain sa win diara wala nani ra yus munaia. 20Bara Jasón bui Hércules ra sakripais dauki mayunra yabaia dukiara lalah yaban ba wal duri tara sailka nani atkan bara wark wala nani sin ai dwarka nani ra daukan kata.
21Apolonio, Menesteo luhpia ba, Idsip tawanka ra wan paiwan uplika baku, Filométor king lâka ra aimakaia ba liliaka tara ra;#4.21 Baha lika Tolomeo VI Filométor, Tolomeo V bara Cleopatra I luhpia, witinka na Antíoco Epífanes lakrika. Kraunka mangkan ba lika mani 175 lama Kraist balaia kainara. Antíoco ba ai tânka brin Filométor ba witin ai lâka nani mapara sa, bara ai kaina pain sunaia dukiara, Jope tawanka ra wan bara baha wina Jerusalem ra impakan kata. 22Jasón bara tawan uplika sut kira asla taki naha waitnika ra yamni brin, awas ingnika nani wal bara lilia tara nani sin daukan kata. Bara Antíoco ba Fenicia tasbaya ra wih, ai war daknika nani sut kira takaskan.
Menelao ba prîs tara mangkan sa
23Mani yumhpa luan ningkara, Jasón bui Menelao, Saiman muihnika ra wahbi sakan king mawanra waia,#4.23 2 Mac 3.4; 4.1. lalah kum yabaia win kan ba bri si yabaia dukiara,#4.23 Lalah yabaia pramis munan ba: 2 Mac 4.8. baku sin diara wala nani kum kum tânka plikaia. 24Sakuna Menelao king mawanra wan taim upla tara baku witin kupia alkan, bara witin bui king ra silbar 9,900 kilo nani Jasón blikan ba wal kau pura praki king ra yaban, baku bamna witin kau kulkanka brin, bara king bui Menelao ra prîs tara warkka yaban kata. 25Menelao ba king mihta wina karnika tara nani brih mahka balan,#4.25 Menelao prîs tara warkka brin mani 162 kat (cf. 2 Mac 13.3-8). sakuna witin smasmalkra tara kum kulkanka briras kan, kau ni upla tataibra nani daukanka brin, daiwan kras wail nani baku daukanka brin kata. 26Naku sika Jasón ai muihni pali ra kunin munan kan ba, sim baku upla wala bui kli tawi witin ra kunin munan, bara diara wala daukaia âpu kan, Amón tasbaya ra plapan.
27Sakuna Menelao naha pliska tara ba alkan ningkara, king ra lalah aibapaia pramis takan ba, ba kat swin, aibapras kata, 28Sóstrates, kan kahbaika pliska bilara lalka kum, baha lalahka nani wahbaia adarka bri kan ba bui Menelao ra makabi kan sakuna baha ba aibapbia dukiara. Sakuna king baha wali wâlsut ra paiwan balan. 29Bara Menelao, witin ai sirka ra ai muihni Lisímaco ba prîs tara baku swin, baku sin Sóstrates bui Crates ra swin, witinka lika Chipre uplika nani lalka mangkan kata.
Prîs tara Onías ra ikan ba
30Naha dukia nani sut taki kan piua ra, Tarso bara Malos uplika nani ba, asla taki unsabanka tara ra diman kan ai tawanka nani ba Antióquida king lilika mairin ra prisantka baku yaban ba tâka. 31King ba baha walan taim istikira pliska ba ra wan lâ nani kum kum mangkaia dukiara, bara Antíoco ba karnika sut mihta ra mangkan kata, witinka lika ai uplika pali kulki kan ba.
32Naha trabilka nani sut taki kan sanska ra, Menelao ba tempel bilara dimi gul dukia nani bâra kan ba ailal implikan; dukia kum kum nani ba Andrónico ra prisantka baku yaban, tâka wala nani ba tawan lamara Tiro bara plis wala nani ra atkan wan. 33Onías naha sturka walan upla pain nani bîla wina, bara Dafne tawanka ra wan, Antioquía lamara, baha pliska ra sika witin mapara sip aiklabras kan bara baha wina Menelao ra dîa wiaia kan ba aisi win kata. 34Menelao naha walan taim, Andrónico ra pliki wal aisan, Onías ba alki ikbia dukiara. Andrónico lika Onías bâra ba pliska ra wan, bara ai lakula dauki win witin diara saura daukaia balras, Onías ra ikaia sin balras win kata. Baha aisanka ba Onías bui kasak kulkras kan, sakuna lâs kat kupia alkan, bara ai pliska ba wina latara bal takan bara minitka ra Andrónico bui alki ikan, lâ âpu kira ni.
35Naha trabilka nani bal takan ba tâka, Ju nani baman apia, sakuna kuntri wala nani sin ailal ai kupia sauhki mapara buanka nani daukan, Onías pâtkas pali ikan ba tânka ra.#4.35 cf. Dn 9.26. 36King ba Cilicia tawanka wina tawi balan taim, Ju wih king ra dahra sakan Onías rayaka tikan ba dukiara; baku sin Grik uplika nani ba naha mapara aisi kata. 37Antíoco sari manis takan, ai kupia wirha brin bara inan, Onías ai warkka yamni nani dauki kan ba ra luki. 38King ai kupia baiwanka tara wal, Andrónico ra ai prâka tara nani dimi kan ba upla sut mawanra yan daikan bara kalki tikan ningkara tawan bîla bâk brih wapi taukan, bara ani pliska kat witin Onías ra ikan ba, bahara bri si pana sin ikan kata tasba aiska mawanra. Naku sika, Dawan bui dîa sât klalka yabaia kan ba witin ra yaban sa.
Menelao lalah ni upla lukanka atkaia trai munan ba
39Menelao trabil nani tilara kan sanska ra, Lisímaco ba Jerusalem tawanka ra tempel bilara gul dukia nani blis munan bâra kan ba, ailal pali implikan kata. Tawan uplika nani ba baha tânka nu takan taim, Lisímaco mapara karna pali buan kata, sakuna baha piua ra lika pat gul dukia nani manis ba tiwan kan. 40Lisímaco kaikan tawan aiska ba ai mapara bûi kan, bara isti pali waitna 3,000 kum asla dauki ridi takan, bara lâ tânka âpu kira upla nani ba ra taibi rau munan, naha warka ba waitna almuk kum Auranos mâki kan ba tâ bri kan. 41Upla nani ba kaikan Lisímaco ai uplika sut kira witin nani ai mapara aiklabi kan, bara walpa alkan, dus pîs nani, yamhpus bara aiblakwanka tara tilara, Lisímaco uplika mapara lulki kan. 42Naku natka ra sika, Lisímaco uplika nani ailal ba klakwan kan, tila kum kum nani ba alkan bara ikan, wala nani lika munan plapi banhwan; bara sunu apia dadaukra Lisímaco ra lika alkan bara tempel lalahka bri kan ba kat rayaka tikan kata.
43Naha trabilka nani sut takan ba tâka, Menelao purara lâ tara nani balan kata. 44King ba Tiro tawanka ra wan taim, Ju almukka nani bui waitna yumhpa blikan balan, Lisímaco dahra saki dusa kuhbaia king mawanra. 45Menelao kaikan witin ba pat ai raitka nani lus tiwan kan, bara Dorimeno luhpia Tolomeo ra lalah ailal yabaia takan, king ra wih witin ai hilpka dukiara aisi kupia alkbia wisi.#4.45 1 Mac 3.38; 2 Mac 10.12. 46Baku bamna, Tolomeo bui king ra paiwi minit kum pâsa briaia wisi lata tani ra brih wan, bara baha sanska ra aisi king lukanka ba sins munan. 47Naku daukan bamna, king bui dîa sut Menelao mapara kahban kan ba pâtka kulkras kata, bara ya nani bui Menelao dusa kuhban nani ba, sut iki tikan, naha uplika nani ba daiwan kau wail nani bui sin pâtkas kulkaia kan ba. 48Naha uplika nani ai tawanka nani bara upla sut kan kahbaia trai muni kan ba, baku sin tempel bilara dîa nani sut bâra kan ba, pâtkas pali klala saura brih banhwan kata. 49Naku takan ba tâka mita, Tiro tawanka uplika nani ailal ba saurka tara ba kaiki ai kupia sauhki, uplika yumhpa pruan ba bikaia dukiara ai kupia aiska wal dîa prais tikuya mana ba aibapi banhwata. 50Menelao ba upla karnakira nani hilpka bui ai tâ baiki, baha pliska mangkan ba ra ban takaskan, sakuna saura pali taki wan, bara tawan uplika sut kira ai waihla takan kata.
Currently Selected:
2 Macabeo 4: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua