2 Macabeo 2
2
1“Wauhtaya ulban nani ba ra param marikisa, prapit Jirimaya bui adar yaban tasbaya wina kangbi sakan uplika nani ra, baha pauta klauhan ba bribia, pat win ba baku, 2bara lâ nani ba mihta ra mangkan, ningkara win Dawan lâka nani ba ai âuya tikbiara, baku sin gâd bahki nani gul bara silbar wal paskan nani prana na kaiki ai wîna kat kunin munbiara sin. 3Sturi wala nani ailal sin kupia kraukan, lâ ulbanka nani ba lulki swibia apia dukiara.
4“Baha wauhtaya ra sin ulban kan, prapit ba, Gâd adarka wal sip kan yula kahbaia, Dawan wal aisaia tintka watla ba brih bara lâ ulbi mangkan bakska ba sin bara aikuki impaki waia, Moses piua kum ra il tara purara uli, baha wina Gâd bui tasba pranakira yabaia pramis munan kan ba kaikan pliska ra. 5Ilka tara ba purara uli wan taim, Jirimaya ba walpa untika tara kum kaikan bara bahara lâ ulban bakska ba dingki swin, baku sin Gâd takaski Watlika ba bara tibil holikira ba sin, baha ningkara witin untika tara ba prakan. 6Upla nani kum kum witin aikuki wan kan ba, kli tawi balan bara yabal nani ra sain sâtka nani mangkan kan ba, kli sip sakras munan kata. 7Jirimaya naha ba nu takan bara naku aisi lawi munan: ‘Baha yabalka ba upla sut nakra wina maprira kaia sa, Gâd bui ai uplika nani ra latwan kaiki asla daukbia ba kat param sakan kabia. 8Baha piua ra lika, Dawan bui diara nani sut yukukan ba kli param ra sâkbia; baku lika Dawan prana ba kli balbia, bara mukus nani ba sin Moses piua ra takan baku, bara Salaman bui Gâd ra tempel ba holikira daukbia makaban piua ra sin.’#2.8 Cf. Imp St 16.10; 40.34; 1 Ki 8.10.
9“Wauhkataya ba ra sin ulban sa, nahki Salaman sinska lâka tara bri kan ba, tempel paskan ba Gâd watla baku daukaia sakripaiska nani tâ brih daukan ba, 10baku bamna, Moses bui Dawan ra ai pura sunan, ningkara pura wina pauta klauhan kum bal iwan bara prisantka nani sut sakripais daukaia sakan kan ba angkan kata.#2.10 Lib 9.24. Sim baku Salaman ai pura sunan bara pauta klauhan bal iwan bara daiwan sut sakripais daukaia ridi daukan kan nani ba angkan kata.#2.10 Cf. 1 Ki 8.62-64; 2 Kr 7.1-5. 11Moses naku aisi, win: ‘Sakripais nani ridi daukan ba, wan saurka tâka mita piras kan ba mita, pauta klauhan ba bui angkan sa.’#2.11 cf. Lib 10.16-20. 12Baku bamna Salaman lika yu 8 nani lilia tara dauki kata.
13“Naha tânka nani sin Nihimaya ulbanka sâtka nani ra bâra sa, baha wauhkataya ulbanka nani ra wan marikisa, nahki wina Nihimaya ba king nani sturka dahra ulban ba asla daukan sa, baku sin prapit nani ulbanka nani, Debit Salmo ulban nani ba, king nani bui prisantka yabi kaia dukiara wisi ulban wauhkataya nani ba. 14Sim baku, Judas ba war tara nani aiklabi kan piua ra, buk nani ailal sait ra tawan kan ba, wahbi asla daukan, nanara baha nani ba wan mihta ra brisa. 15Man nani baha bukka nani ba nitka brisma kaka, upla nani blîks bal brih wabia.
16“Kan yang nani ba tempel sunu klin daukaia yua kulkanka ba dukiara ridi taki banhwisna, baku ba mita mai ulbi banhwisna, kupiam kraukaia man nani sin baha liliaka ba daukma dukiara. 17Gâd bui ai tawanka uplika aiska ra pri sakan, bara upla sut ra yuyaka nani yaban, Gâd king aimaki lâka nani, baku sin smasmalkra kaia lâka nani, bara sin witin ai dukia wan dauki brin sa, 18lâ tânka kat pramis takan kan ba baku; baha mita, yawan kasak kulkisa witin latwan wan bribia bara ai tasbaya holikira ra bri si sut asla wan daukbia, tasba tani sut wina asla wan daukbia, kan witin bui sika pât saura ailal nani tila wina pri wan sakan ba, bara tempel ba sunu klin daukan sa.’’
Âiulbra tâura bîla nani ulban ba
19Jasón, Cirene tawanka wina ba bui sika Judas Macabeo bara ai muihni nani wal dahra ulban sa, tempel watla tara ba sunu klin daukan dahra nani, altar holikira sunu daukan ba dahra, 20king Antíoco Epífanes bara ai luhpia Eupátor wal mapara war tara nani aiklaban ba dahra,#2.20 2 Mac 10.9—13.26. 21baku sin Dawan bui ai karnika nani param saki marikan ba, ya nani Ju hilpka dukiara aiklabi kan nani ra, tâ baiki baku kan witin nani dakni sirpi kan, sakuna war sut ra aiklabi pura lui kan bara ai waihla nani war daknika nani ra yan plapi kan, baha dahra nani sin ulban sa. 22Tempel sunukira tasba aiska ra kau kulkanka tara bri kan ba, kli mihta dakbi brin; Jerusalem tasbaya pri sakan, lâ nani danh tikaia ridi daukan kan ba, kli karnika yaban kata, kan Dawan ba witin nani wal latwankira pali kata. 23Sakuna yawan trai munbia, Jasón bui naha dahra nani buk matsip ra ulban ba, asla dauki buk kumi ra ulbi sakaia.
24Kan wahia uba ailal sa, sturi nani ailal tânka bahara ulban sa, upla nani ba trabil brisa aisi tânka briaia. 25Baku ba mita, yang nani trai munamna, upla bani nahki aisi kaikaia want ba tânka kat ulbaia, kau pali ba upla sut dukiara luki ulbi banhwamna. 26Yang nani naha asla dauki ulbi sakaia warkka nani tâ krikri ba, isi apia kata, taimki nani manis mangkri, yapan sin sauhki banhwatna, 27sim upla kum plun tara nani ridi dauki ba baku, paiwan uplika nani ra dakakaia dukiara, bara wilinkira baha pata ba piakisa. Yang nani sin baku lukanka wal naha warkka tara nani dauki banhri, upla sut ba ai kupia kumi naha wauhkataya na aisi kaikbia dukiara, wan swapanka nani bri kan ba pura luan. 28Sturka dahra aiska ba, yang nani tânka aisi mai wimna apia, baha ba âiulbra ba mihta ra swibia. Kau pali asla dauki ulbaia warkka ba, ai tâura brih wamna. 29Utla raya papaskra kum ai warkka dauki piua ra, kasak lukisa baha ba nahki takbia sapa dukiara, utla prana dauki nani ba sin lukisa nahki daukka kau pain kaikbia sapa, sim baku sika yang nani warkki ba takbia want banhwisna ba: 30sturi dahra âiulbra kum ba, witin ai warkka sa tânka tihuka nani ba ulbaia, sturi lalka bani ba yari ulbaia, sinska tânka nani ba sin pliki saki ulbaia. 31Sakuna pat ulbanka nani bâra taim, aitani apia sa kli tânka tihuka nani ba kli ulbaia. 32Nanara mahka baha sturka dahra nani ba aisi kabia, kau sin pura prakbia apia, wan aisanka nani ba tânka tikaia apia dukiara; kan tâ krikanka bîla nani ba kau yari dauki baku takbia, bara ningkara lika sturka pali ba kau prahni daukaia.
Currently Selected:
2 Macabeo 2: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua