1 Macabeo 16
16
Saiman luhpia nani buiCendebeo mapara aiklabi pura luan ba
1Jan ba Guézer tawanka wina ai aisika Saiman ra wan maisa pakaia, Cendebeo dîa dauki kan ba dahra nani. 2Saiman bui ai luhpia almuk wâl ba paiwan balan, baha nani lika Judas bara Jan wal kata, bara witin nani ra win: “Muihki nani, yang bara aisiki pamalika aiska sut, wahma piua wina naiwa kat Israel wailhka nani mapara aiklabi banhri, bara aima manis ra Israel ra pri lâka ba pliki yabi banhri sa. 3Nanara, yang pat almuk sna, sakuna Gâd kupia pihnika lâka ba mita man nani lika rayakam ra karnika aiska brisma. Yang bara muihki wal pliski ra aimaki, wan kuntrika ba tâwan aiklabaia taki banhs. ¡Gâd bui man nani ra hilp mai munbia!”
4Saiman bui kuntri ba wina war daknika nani wahbi sakan, ai mina ra wapi aiklabi suldiarka nani bara aras pura wina aiklabi nani ba, alsut ba ra 20,000 waitna nani kata, bara baha nani ba Cendebeo mapara aiklabaia taki wi banhwan. Tihmia ba Modín ra lalawi, 5titan pali bûi muni twi langni ba tani ra impaki banhwan. Bahara, witin nani mapara ai mina ra wapi bara aras pura wina aiklabi war daknika tara kum bal takan. War daknika wâl ba awala kum bui baiki saki, tani wala wala bri kata. 6Jan ai war daknika wal, ai waihla nani mawan kat aiklabaia pliska bri banhwan; sakuna ai suldiarka nani ba awalka ba yawi luaia sibrin kan kaiki, Jan witin pas lui wan. Witin ra kaiki muni, ai waitnika nani ba ai nina bliki lui banhwan. 7Waihla nani aras pura wina aiklabi daknika ba uba ailal kan ba mita, Jan bui ai suldiarka nani ai mina ra wapi aiklabi ba dakni wâl ra baiki saki, aras pura wina aiklabi uplika nani ba lika lilapas ra mangkata. 8Trumpit nani ba puhbi banhwan, bara Cendebeo war daknika ra pura lui banhwan. Upla nani ailal pruan, bara wala nani kau raya takaskan ba lika kan kahbaika pliska ba ra plapi banhwan. 9Naha aiklabanka ra Jan muihnika Judas ba insauhkanka brin. Jan bui plapi banhwan nani ba nina bliki, Cedrón kat wan, baha pliska lika Cendebeo bui kli raya paskan ba. 10Waihla nani ba sin, Azoto tasbaya nani ra aihwaki kaikaia pliska tara nani bâra kan ba ra dimi yukuwi banhwan, sakuna Jan bui tawanka ba angkan luan. Waihla nani 2,000 prais prui banhwan, bara Jan lika trabil âpu ai wîna pain Judia ra kli tawi wan.
Saiman ra kunin muni ikan ba
11Tolomeo, Abub luhpia ba, aiklaklabra nani wihtka tara mangkan kata, Jeriko ra twi langni bâra kan ba pliska ra. Witin lika gul bara silbar ailal bri kata, 12kan witin ba prîs tara ba dapnika kata; 13sakuna diara uya briaia lukanka brin bara kuntri ba dawanka takaia want kan. Bamna Saiman bara luhpia nani ra sin ninak saura munaia lukan, ban sin witin nani ra ikaia kat lukanka brin kata. 14Saiman lika kuntri bilara tawan nani bâra bâk tauki kan, baha nani nitka nani ba laki kaikaia dukiara, bara ai luhpia nani Matatías bara Judas wal ai yula kahbi Jeriko kat wan, kati 11 ra, Sebat katka, Kraist balaia kainara mani 134 ra. 15Abub luhpia ba bui kunin natka wal, witin nani ba brin kan kahbaika pliska sirpi kum Doc mâki kan pliska ra, bamna bahara witin nani dukiara liliaka tara kum daukata. Sakuna pliska ba ra upla nani ailal yukuki bri kan, 16bara Saiman ai luhpia nani aikuki pat wain laya manis din taim, Tolomeo ai pânika nani aikuki aiklabaia dukia nani ba alki brih, lilia dauki kan ba watla bilara dimi banhwan. Saiman mapara aiklabi witin ra ikan, ai luhpia nani wâl ra bara albika nani tila wina kum kum ra sin ikan kata. 17Saura daukanka tara pali kum kata, bamna baku wal Tolomeo bui yamni lâka ba mana pana saura lâka ba wal mana aibapan.
18Tolomeo bui diara nani takan ba dahra king ra ulbi blikan, bara witin ra makaban aiklaklabra nani blîkbia witin ra ai tâ baikaia dukiara, bamna baku sin tawan nani bara kuntri ba aiska purara karnika lâka yabia. 19Baku sin waitna wala nani blikan Guézer ra, Jan ba ikbia dukiara. Sim baku wauhtaya nani blikan war daknika wihtka nani ra, bara baha nani ra makabi kan witin wal asla taki banhbia, bara gul, silbar, baku sin prisantka wala nani sin yabaia pramis muni kata. 20Wala nani ra lika blikan, Jerusalem bara tempel ilka sirpi ba dakbi bri banhbia dukiara. 21Ban sakuna, upla kum tâura plapi wan Guézer ra, bara Jan ra maisa pakan ai aisika bara ai muihnika nani ba pruan sa, bara Tolomeo bui upla nani blikan aula witin ra sin ikaia dukiara. 22Naha walan taim, Jan ba sinska tiwan, bara waitna nani witin ra ikaia balan ba alki muni, ikata; kan witin ra ikaia dukiara bali banhwan kan ba nu taki banhwan bamna.
23Jan sturka tâka ba, baha ra ai aiklabanka nani bara diara tara nani daukan dukiara aisi ba, bara nahki tawan tnaya kutbanka nani kli raya paskan ba bara diara wala nani daukan ba sin, 24witin prîs lâka brin ba dahra ulban wauhkataya nani ra ulban sa, ai aisika watlika ra prîs tara warkka ra diman yua ba wina.#16.23-24 Jan, nina Hircano mâki ba, mani 30 king aimakan, 134 wina 104 kat. Witin king aimakan sturka ulbanka nani ba tiwan sa, ban sakuna pîska nani kum kum lika Flavio Josefo ulbanka nani ra ban brisa.
Currently Selected:
1 Macabeo 16: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua