1 Macabeo 15
15
Antíoco VII bui Saiman ra aiwarkka nani ra kli ban swin ba
1Antíoco, king Demetrio luhpia ba,#15.1 Antíoco VII Sidetes, Demetrio I luhpia bara Demetrio II muihnika. kabu un pliska kum wina Saiman ra wauhtaya kum ulbi blikan, witinka lika prîs tara bara Ju nani lalka kan ba, bara baku sin kuntri aiska ra ulban kata. 2Wauhkataya ra naha bîla nani ulban kata:
“King Antíoco bui prîs tara bara kuntri lalka Saiman ra lakula daukisa, bara Ju nisanka nani ra sin. 3Upla watawikira nani bui yang damiki nani kingka lâka ba dakbi brin kan, sakuna yang lika wilin sna baha ba kli dakbi briaia, blasi piua ra dîa kata ba baku kli bapi swiaia dukiara. Naha daukaia dukiara, aiklaklabra nani ailal asla daukri sa, bara war slaupka nani sin ailal ridi brisna. 4Lukanka brisna kuntriki ra kabu bâk wih dimaia, wan kuntrika sauhkan uplika nani ra klala yabaia dukiara, bara kingki lâka brisna tawanka nani ailal ra sin sauhki banhwan ba. 5Bamna nanara, yang bui padin munanka nani bara hilpka lâka wala nani sut kainira king nani aimakan ba bui maiki banhwan ba sin, baku ban swisna. 6Adar maikisna silp lalah mâ paski brima, kuntri ra lâ tânka ba kat yus munbia dukiara. 7Jerusalem bara tempel ba pri kabia. Aiklabaia dukia nani briram ba, bara kaina kahbanka pliska nani paskram ba, ban man dukiam atia kabia. 8Nanara wina ban kaia ra, king lalahka kukanka wal tras nani brisma ba bara naika tras wala nani dimma ba sut sin, ban swih tiki banhwan sa. 9Kingki lâka ba kli alki brimna taim, man ra kulkanka lâka tara nani maikamna, uplikam nani ra bara tempel ra sin, baku lika man nani ba tasba aiska ra ninam tara kulkan kabia.’’
10Kraist balaia kainara mani 138 ra, Antíoco ba ai kuntrika ra wan, bara war daknika sut ba witin wal asla taki banhwan, bamna baku mika upla nani wiria baman Trifón wal takaski banhwan. 11Antíoco bui witin ra nina blikan, bara Trifón ba Dor harbarka ra yukuwan. 12Aiklaklabra nani ba mita witin ra lulki swin ba kaiki, Trifón ai dara walan trabil saura ra diman kan ba. 13Antíoco ba Dor mawan kat ai kiampka bapan, ai mina ra wapi aiklaklabrika nani 120,000, bara aras pura wina aiklabi nani ba lika 8,000 nani aikuki. 14Ai suldiarka nani aikuki tawan ba kutbi brin, bara slaup nani ba lika kabu tani bâk mapara aiklabi banhwi kata. Bamna tawanka ba mapara tasbak bara kabuk aiklaban, bara upla kumi sin dimi waras bara sin yaban takras kata.
Rom wal pâna lâka pramiska daukan ba
15Ban dauki kan taim, Numenio ai pânika nani aikuki Rom wina kli tawi balan, king nani bara kuntri nani sât sât ra wauhtaya nani blikan ba brih, bara baha nani ra naku ulban kata:
16“Lucio, Rom lalka tara ba, king Tolomeo ra lakula daukisa.#15.16 Tolomeo VIII Evergetes II (145-116 mani Kraist balaia kainara). 17Prîs tara Saiman bara Ju nani, wan pânika nani bara wan prenka nani ba, kamisan kum wan blikan sa, wan pâna lâka bara asla kaia lâka pramiska blasi piua ra yawan bri kata ba, kli raya daukaia dukiara. 18Kan kahbaika dukia kum gul ni paskan tatwa yari ba bri ba sâtka bri bali banhwan, bara baha wirhka ba 959 kilo bri kata. 19Baku bamna, wilin taki banhri sa, king nani bara kuntri nani sât sât ra wauhtaya ulbi makabaia, Ju nani ra saura kumi sin munbia apia, bara ai tawanka nani mapara, ai kuntrika mapara sin aiklabaia apia, bara ai waihla nani bâra ba wal sin pâna taki banhbia apia. 20Kan kahbaika dukia nani ba briaia wilin taki banhri. 21Upla watawikira nani kum kum Ju nani kuntrika wina plapi man nani ra balan sa kaka, baha nani ba prîs tara Saiman mihta ra mangks, witin bui Ju nani lâka ba kat klala yabia dukiara.’’
22Sim sât wauhkataya kum, king Demetrio ra ulban, Atalo ra, Ariarte ra, Arsaces ra 23bara kuntri wala nani ra sin: Sampsame ra, Esparta, Delos, Mindos, Sición, Caria, Samos, Panfilia, Licia, Halicarnaso, Rodas, Faselis, Cos, Side, Arvad, Gortina, Cnido, Chipre bara Cirene kuntrika nani ra. 24Prîs tara Saiman ra sin, wauhkataya ulbanka sim sât kum bliki banhwan kata.
Antíoco VII Saiman wal ai waihla takan ba
25King Antíoco ba Dor tawanka lamara ai kiampka bapan, bara takaskras pali mapara aiklaban kata; war misinka nani ailal brih Trifón ra kutbi brin, upla kumi sin baha wina takbia apia bara bal dimbia sin apia dukiara.
26Saiman bui Antíoco ra aiklaklabra nani 2,000 wahbi saki blikan wan, hilp muni banhbia dukiara, bara baku sin silbar, gul bara aiklabaia dukia nani manis blikan wan kata. 27Sakuna Antíoco bui baha dukia nani ba briaia apia win, witin Saiman wal pramis lâka nani kaina piua ra daukan kan ba sut kulkras lâka ra lakan, bara witin wal ai waihla pali takan. 28Atenobio ba blikan king pânika nani daknika tila wina kumka ba, Saiman wal aisi kaikbia dukiara. Witinka wal naha bîla nani blikata: “Man nani bui Jope ba dakbi briram sa, baku sin Guézer bara Jerusalem kan kahbaika pliska ba, baha nani lika yang kingki lâka ra iwi tawanka nani sa. 29Baha tasbaya nani ba sauhki tiki banhram sa, kuntri ra saurka tara nani daukram bara yang kingki lâka ra iwi pliska nani ailal dawanka taki banhram sa. 30Baku bamna, tawan nani dakbi bri banhram ba, nanara kli laki aik, bara Judia tasbaya wina sait ra pliska nani ra, lal mana nani kulkram ba lalahka kli laki yabi banhs. 31Baku apia kaka, baha nani mana silbar 36,300 kilo aibapi banhs, sauhki tikanka nani daukram ba bara baha tawanka nani ra lal mana kulki banhram ba mana aibapanka baku. Dîa adarka mai lakisna ba dauki banhras sma kaka, man nani mampara war bukamna.’’
32Antenobio, king pânika ba, Jerusalem ra wan bara Saiman prana tara nani bri kan ba kaiki tah iwan, ningkara Saiman ra win, gul kapka nani bara ritska wala nani sut bri ba, tah iwan ningkara, witin king bîla nani ba Saiman ra win. 33Saiman bui pana tawi win: “Yang nani upla wala tasbaya ra dimi briras, upla dukia nani sin dakbi briras, kuna damiki nani bui prapati nani aiki banhwan kan ba piua kum ra lâ âpu wina yang nani waihli nani bui mihti dakbi brih banhwan kata. 34Yang nani lika naha sanska na wal damiki nani prapatika ba kli bri banhri sa. 35Jope bara Guézer dukiara man bui makabisma ba, naku sa: baha tawanka nani bui yang nani upliki bara kuntriki mapara sim saurka nani ailal daukan. Baha nani mana lika, silbar 7,260 kilo maiki banhwisna.’’
36Atenobio bui lika bîla kumi sin pana aisaras kata. King bâra kan pliska ra ai kupia sauhki kli tawi balan, bara Saiman aisanka nani ba laki win, ai prana tara ba dahra, bara diara nani kaikan ba sut dahra sin. King ba baha walan taim, uya pali ai kupia sauhkata.
37Baku taki kan kaiki, Trifón lika slaup kum ra aimaki, Ortosia tawanka ra plapan. 38Bamna king bui Cendebeo ra aiklaklabra nani kabu un pîska aiska ra kan ba lalka tara mangkan, bara ai mina ra wapi, aras pura wina aiklabi suldiarka nani ailal yaban, 39bara adar yaban Judia mawan kat aiklabaia pliska nani briaia adarka yaban, Cedrón ba kli paskaia, durka nani ba kau karna daukaia, bara Ju nani mapara war aiklabaia; sim piua ra, king bui Trifón nina bliki kabia, alkbia ba kat. 40Cendebeo ba Jabnia ra wih, Ju nani ra mahka kupia tuskan, Judia ra dimi upla nani ra alki iki kan. 41Cedrón ba kli paski muni, bahara aras pura wina aiklabi suldiarka nani bara aiklaklabra wala nani sin ailal mangki swin, Judia yabalka nani bâk wapi kaiki kaia dukiara, king bui witin ra dîa adar yaban kata ba baku.
Currently Selected:
1 Macabeo 15: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua