ŴaRoma 15

Kondweska ŵanyako kwakuruska wamwene

1Kweni ifwe taŵanthazi titenere kupinga maunthomboru gha ŵamburanthazi, ndi kujikondweska taŵeni cha. 2Yose, yumoza ndi yumoza waku ifwe, wakondweske mwanasi wake pakumchitiya umampha, kwachimzenga. 3Chifukwa Kristu nayo kuti wangujikondweska cha; kweni, mo kwalembeke, “Matozu gha ŵakutoza iwe ghanguwiya paku ine.” 4Pakuti vyo vyose vingulembeke limu, vingulembeke kusambizgika kwidu, alinga kuti mu unkhunthiya ndi mu uchiska wa malembo tiŵe ndi chigomekezgu. 5Ndipo Chiuta yo wa unkhunthiya ndi wa chisangarusku wakupaskeni chipimiranu chakulingana, uli ndi chikozgu chaku Kristu Yesu, 6alinga kuti ndi mtima umoza mukankhuskiye ndi mlomo umoza Chiuta ndi Auskeu ŵa Ambuyafwe Yesu Kristu.

Mazu ghamampha ku ŵaMitundu

7Viyo muronderani, uli ndimo Kristu nayo wangurondere imwe, ku unkhankhu waku Chiuta. 8Chifukwa ndititi, Kristu wachitika mteŵeti wa mchinju chifukwa cha uneneska waku Chiuta, kuti wakhozge mapanganu ghakupaskika ku ŵambuyafwe, 9ndi kuti Mitunduyo yikankhuski Chiuta chifukwa cha lisungu lake, uli ndimo kwalembeke,

“Chifukwa chenichi ndimzomerezgeninga mu ŵaMitundu,

ndipo mu zina linu ndimbiyenge.”

10Ndipo so watiti,

“Kondwereni, mwa ŵaMitundu,

pamoza ndi khamu lake.”

11Ndipo so,

“Mrumbeni Mbuya, mose mwa Mitundu imwe;

ndipo makhamu ghose ghamthamikenge.”

12Ndipo so Yesaya watiti,

“Kuŵengepo nkhorozu yaku Jese,

ndiyo wayukiyenge kwachiusa Mitundu;

mwaku iyo yigomekezgiyenge Mitundu.”

13Ndipo Chiuta yo wa chigomekezgu wakuzazeni ndi chimwemwe chose ndi chimangu mu kuvwana, kuti musambasenge mu chigomekezgu, mu nthazi ya Mzimu Wakupaturika.

14Kweni ine ndamweni ndakhorwa mwaku imwe, mwa ŵabali ŵangu, kuti imwe namwe muzara umampha, pakutizika mziŵiru wose; ŵanthazi so kuchiskana. 15Kweni ndakulembiyani kwaulera, kurwandi nge nkhumkumbuskani, chifukwa cha wezi wakupaskikiya ine ndi Chiuta, 16kuti ndiŵe ine mumirizi waku Kristu Yesu ku ŵaMitundu, wakuteŵete evangeli waku Chiuta, viyo kuti ŵaMitundu nawo ŵaŵenge mpasku wamarondeka, pakupaturiskikiya ndi Mzimu ŵakupaturika. 17Viyo ndendi chitumbwa mwaku Kristu Yesu pa vyakuchiri kwaku Chiuta. 18Chifukwa kuti ndamgangiya kurongoro kanthu cha, kweni kaku vyo Kristu wangutataliya mwaku ine, kuti ŵamuvwiye ŵaMitundu mu mazu ndi milimu, 19mu nthazi ya visimikizgu ndi minthondwi, mu nthazi ya Mzimu Wakupaturika; viyo kuti, kutuwa ku Yerusalemu, ndi kwakuzunguliya mpaka ku Iluriko, ndafiska kumemeza evangeli waku Kristu, 20kweni pakukweŵeke kutaula evangeli ko Kristu wengavi kutamulika kali, alinga kuti ndingazenga pa chiŵanja cha munyake cha; 21kweni, uli ndimo kwalembeke,

“Ŵamwona iwo, kwaku ŵeniwo ghengavi kutaulikiya

makani gha paku iyo,

ndipo wo ŵalive kuvwapo, ŵawengemo.”

Paulo wakhumba kwachifika ku Roma

22Chifukwa chenichi nacho ndamikika panandi kuza kwinu. 23Kweni sono, pakuŵavi so malo mu mitundu yeniyi, ndipo pakuŵa ndi linweka virimika vinandi lakuziya kwinu, 24penipo ndirutenge ku Spanya, ndigomekezga kumwonani ndichidumuwako, ndi kuperekezgeka kweniko ndi imwe, asani ndadanga ndasangaruka kuseŵe namwe kanyengo. 25Kweni sono ndiruta ku Yerusalemu kuŵateŵete wakupaturika. 26Chifukwa Makedonia ndi Akhaia ŵakondwere kwachichitiya mpasku wamasanga ku ŵakavu ŵamu ŵakupaturika wo ŵamu Yerusalemu. 27Viyo ŵangukondwa kuchita ichi; ndipo mbamateu kwaku wo; chifukwa asani ŵaMitundu ŵasanganapo vyamzimu vyawo mbamateu kuŵateŵete mu vyaliŵavu navyo. 28Viyo ndati ndafiska chenichi, ndi kuŵakhozge chipasi chenichi, ndidumuwengemu mwinu, ndichiya ku Spanya. 29Ndipo ndiziŵa kuti ndichiza kwinu ndisenge mu uzari wa chitumbiku chaku Kristu.

30Kweni ndikuŵeyereni, mwa ŵabali, pa chifukwa cha Ambuyafwe Yesu Kristu, ndi pa chifukwa cha chanju cha Mzimu iyo, kuti mulimbiye pamoza nane mu marombo kwaku Chiuta ghapa chifukwa changu; 31kuti nditaskike ku ŵakutafula ŵamu Yuda, ndi kuti uteŵeti wangu waku Yerusalemu uŵenge wamarondeka ku wakupaturika; 32alinga kuti ndiziye kwinu ndi chimwemwe mu khumbu laku Chiuta, ndi kuti ndisisipulikiye pamoza namwe. 33Ndipo Chiuta wa chimangu waŵe ndi imwe mose. Ameni.

Currently Selected:

ŴaRoma 15: TongaMw

Highlight

Copy