ŴaRoma 16

Matauzgu ghaku Paulo ku ŵa Kristu

1Ndimupereka kwaku imwe mzichi widu, Foibe, mweniyo ndi mteŵeti wa mpingu wamu Kenkrea, 2kuti mumronde mu Mbuya, kwakwenere ŵakupaturika, ndi kuti mumovye mu chinthu chose chenicho wangapempha imwe; pakuti iyo nayo waŵa movya wa ŵanandi, ndi waku ine ndamweni.

3Tauzgani Priskila ndi Akula, ŵanchitu-ŵanyangu mwaku Kristu Yesu, 4ŵeniwo chifukwa cha moyo wangu ŵanguŵika pasi makhosi ghaku iwo ŵija; wo kuti ndine pe cha ndiŵawonga, kweni mipingu yose nayo ya ŵaMitundu; 5ndipo tauzgani ŵampingu ŵamu nyumba yawo. Tauzgani Epaineto, nkhwanjiwa wangu, mweniyo ndi mruwuku wakudanga waku Asia kwaku Kristu. 6Tauzgani Mariya, mweniyo wangutakatakiya imwe ukongwa. 7Tauzgani Androniko ndi Junia, ŵachikazi ŵanyangu, ndi ŵamikoli ŵanyangu, wo mbakuziŵikwa mu ŵakutumika#16.7 ŵakutumika: uku ndiku kuti ŵapostole. ŵeniwo so mbakudanga kwaku ine mwaku Kristu. 8Tauzgani Ampliato, nkhwanjiwa wangu mu Mbuya. 9Tauzgani Urbano, wanchitu munyidu mwaku Kristu, ndi Stakhu, nkhwanjiwa wangu. 10Tauzgani Apele, wakurumbika mwaku Kristu. Tauzgani ŵamu nyumba yaku Aristobulo. 11Tauzgani Herodio, mchikazi munyangu. Tauzgani ŵamu nyumba yaku Narkiso, wo ŵemu Mbuya. 12Tauzgani Trufaina ndi Trufosa, wo ŵatakatakiya muMbuya. Tauzgani Persida, nkhwanjiwa yo, mweniyo watakatakiya ukongwa mu Mbuya. 13Tauzgani Rufu, wakusankhika mu Mbuya, ndi anyina, wo so mbama. 14Tauzgani Asunkrito, Flegono, Hermese, Patroba, Flermase, ndi ŵabali ŵapamoza nawo. 15Tauzgani Filologo ndi Julia, Nereo ndi mzichi wake, ndi Olumpa, ndi ŵakupaturika wose ŵapamoza nawo. 16Tauzganani ndimfyofyontho, wakupaturika. Mipingu yose yaku Kristu yakutauzgani.

Vipangizgu vyakumariya

17Ndipo ndikuŵeyereni, mwa ŵabali, kuŵathoŵa wo mbakuchita vigaukanu ndi viguŵisku, kwakumikirana ndi chisambizgu chenicho mungusambira: ndipo ŵapambukeni wo. 18Chifukwa ŵaviyo kuti ŵateŵete Ambuyafwe Kristu cha, kweni linweka laku ŵija; ndipo ndimakambidu ghausarazi ndi ghakufyafyalika ŵafuvya mitima ya ŵakujiyuyuwa. 19Chifukwa kuvwiya kwinu kwawanda mwaku wose. Viyo ndikondwere paku imwe; kweni ndikhumba imwe kuŵa ŵazeru kwaku cho nchamampha, kweni ŵambura kalema kwaku cho nchiheni. 20Ndipo Chiuta iyo wa chimangu waphwanyiyenge Satana ruŵi kusi ku marwayo ghinu. Wezi wa Ambuyafwe Yesu Kristu uŵe manwe.

21Wakutauzgani Timote wanchitu munyangu, ndi Lukio ndi Jasone ndi Sosipatro, wachikazi munyangu.

22Ine Tertio ndawakulemba kalata ndikutauzgani mu Mbuya.

23Gayo msowezi#16.23 msowezi: uku ndiku kuti yo wasunga ndikuteŵete ŵalendo pakuŵapaska kurgha. wangu ndiso wa ŵakuvwana wose, wakutauzgani. Erasto, msungimbiku wa msumba wo, wakutauzgani, ndi Kuarto, mbali yo. [24Wezi wa Ambuyafwe Yesu Kristu uŵe namwe mose.]

Rombo la mathamiko

25Sono kwaku mweniyo ngwanthazi kwachikhoze imwe kwakulingana ndi evangeli wangu ndi mumemezu waku Yesu Kristu, uli ndi uvumbuzi wa mangari ghakubisika mu nyengo za migonezi. 26Kweni sono ghakuvumbulika, ndipo mumalembo gha ŵamchimi kwakulingana ndi langulu laku Chiuta wamuyaya, chaziŵiskika, ku mitundu yose kuŵatore ku chivwanu cha mu muvwiyu; 27kwaku Chiuta wazeru yijajija pe, mwaku Yesu Kristu, kuŵiye unkhankhu muyaya. Ameni.

Currently Selected:

ŴaRoma 16: TongaMw

Highlight

Copy