ŴaRoma 14

Ungeruzganga mbali wako cha

1Yo ngwakutomboroka mu chivwanu mrondiyeni, kweni kwachisuskana pa makayiku ghake cha. 2Uyu wavwana kuti warghe vyose: kweni mtomboroka iyo waturgha tusungwi pe. 3Yo waturgha wangamyeya cha yo wareka kurgha; ndipo yo wareka kurgha wangamsuska cha yo waturgha; chifukwa Chiuta wamronde. 4Ndiwe yani iwe uteruzga mteŵeti waŵeni? Ku mbuyake waku yija watuma pamwenga watuwa pasi. Ndipo wakamiskikanga pakuti Ambuya mbanthazi kumumiska.

5Yumoza warumba zuŵa limoza kuruska ku zuŵa linyake; kweni munyake wateruzga zuŵalo lose kwakulingana-lingana. Munthu yose wakopeke limu mu chinjeru cha pa mtima wake. 6Yo waphwere zuŵa, ku Mbuya waliphwerere: ndipo yo waturgha, ku Mbuya waturghiya, pakuti wamuwonga Chiuta; ndipo wakureka kurgha, ku Ambuya walive kurghiya, ndipo wamwonga Chiuta. 7Chifukwa kuti yumoza waku ifwe wajijariya wamoyo cha, ndipo kuti yumoza wajifwiya cha. 8Chifukwa asani te ŵamoyo, tijariya ŵamoyo ku Mbuya, ndipo so asani titufwa, tifwiya ku Mbuya: viyo kosekose chingana te wamoyo, chingana titufwa, te ŵa Mbuya. 9Chifukwa kwaku chenichi Kristu wangufwiya, ndi wajariya so wamoyo, alinga kuti waŵe Mbuya wa ŵakufwa ndi so wa ŵamoyo.

10Kweni iwe, utumweruzgiyanji mbali wako? Pamwenga nawe so, utumyeyiyanji mbali wako? Chifukwa tose tamkuma paurongo pa chitengo chakweruzgiyapo chaku Chiuta. 11Chifukwa kwalembeka,

“Po ndiriri wamoyo ine, watiti Mbuya,

ligwadiyenge ine gongonu lose,

ndi lilime lose lizomerezgenge Chiuta.”

12Viyo na, munthu ndi munthu waku ifwe wajikambiyenge kwaku Chiuta mazu ghapa mtima waku yija.

Ungakomboriyanga mbali wako ku ulakwi cha

13Viyo tingeruzgananga so cha: ukongwaku yeruzgani chenichi, kumuŵikiyapo mbali chakumguŵiska pamwenga chakumuwiska cha. 14Ndiziŵa, ndipo ndawojeka mu Mbuya Yesu, kuti palive kanthu ko nkhamwikhu mwaku kija; kweni kwaku yo wapima kuti nkhamwikhu, kwaku iyo nkhamwikhu. 15Asani pa chifukwa cha kurgha kwako mbali wako wakwininiskika, kuti utenda so cha mu chanju. Ungamunanganga yo cha ndi kurgha kwake mpha chifukwa chaku mweniyo wangufwiya Kristu. 16Viyo ungatukika cha umampha winu. 17Chifukwa ufumu waku Chiuta kuti mbunkharghi ndi unkhamwi cha, kweni urunji ndi chimangu ndi chimwemwe mu Mzimu Wakupaturika. 18Chifukwa yo wateŵete Kristu mwaku vyenivyo, ngwakukondweska Chiuta, ndi ngwakurumbika ndi ŵanthu. 19Viyo tivirondonge vya chimangu, ndi vyo vyakuzengana: 20ungabwangandu wanchitu yaku Chiuta chifukwa cha kurgha cha. Nadi vinthu vyose vyakuphotoka; kweni kurgha nkhuheni mwaku yo munthu waturgha ndi chiguŵisku. 21Nkhwamampha kurgha nyama cha, chingana nkhuchita kanthu kose kwaku ko mbali wako waguŵa. 22Chivwanu cho we nacho iwe, uŵiye nacho kwaku wamweni pa maso paku Chiuta. Ngwamwaŵi mweniyo walive kujeruzga yija mwaku chenicho wazomerezga. 23Kweni yo wakayika, wasuskika asani waturgha, pakuti wareka kurghiya kwamuchivwanu; ndipo chose cho chirive kutuwa mu chivwanu nkhulakwa.

Currently Selected:

ŴaRoma 14: TongaMw

Highlight

Copy