Nthanthi 3
3
Marangu ghakopa Chiuta, kumugomezga, ndi kumuvwiya
1Wa mwana wangu, ungaruwanga cha kusambizga kwangu,
kweni mtima wako usungenge marangu ghangu;
2pakuti ghakakupaskanga mazuŵa
ghanandi ndi virimika vinandi vya umoyo ndi unandi wa likondwa.
3Kujithereska ndi kugomekezgeka
vingakutayanga cha uvimangiliye mu khosi lako, uvilembe pa gome la mtima wako.
4Po ndipo ukasaniyanga mwaŵi ndi
mbiri yamampha mu maso ghaku Chiuta ndi munthu.
5Gomekezga mu Ambuya ndi mtima wako wose,
ndipo reka kugomezga pa chinjeru chaku wamweni.
6Mu nthowa zako zose zomeranga iwo
ndipo iwo ŵakanyoroskanga nthowa zako.
7Ungajisanduskanga wazeru mu maso ghaku wamweni;
wopanga Ambuya, ndipo utuweko ku uheni.
8Ichi chikaŵanga kuchizga ku nyama yako
ndi kututuvya ku viwanga vyako.
9Tumbikanga Ambuya ndi chuma chako ndi vipasi vyakudanga vya vyakurgha vyako vyose;
10po ndipo nkhokwe zako zikazazikanga ndi vyakuzala,
ndipo misuku yako yikaswekanga ndi vinyo.
11Wa mwana wangu, ungayuyuwanga
kendeskedu ka Ambuya pamwenga kuvuka ndi kuranga kwawo,
12pakuti Ambuya achenya mweniyo ŵatanja,
nge ndi wiske pa mwana mwaku mweniyo wakondwere.
13Wakukondwa ndi munthu mweniyo
wasaniya zeru ndi yo munthu waronde kuwamo,
14pakuti kusakata kwake kuruska kusakata kwakutuwa ku siliva;
ndipo kwanduwa kwake kuruska golide.
15Zeru zakuzirwa ukongwa kuruska mya yakuzirwa,
ndipo palivi ko munganweka kangalinganizgika ndi zo.
16Umoyo utali we ku janja lake la marghe;
ku jenja la maze kwe vyuma ndi ulemu.
17Nthowa zake ndi nthowa za kusangaluska,
ndipo nthowa zake zose nchimangu.
18Ndi muti wa umoyo kwaku ŵaniwo ŵatiwuko;
ŵeniwo ŵatiukoleska ŵadanika kukondwa.
19Ambuya ndi zeru angumika charu;
ndi kuwamo angujulika machanya,
20ndi chinjeru chawo ndimba zinguwoneka,
ndipo mitambo yingunthonezga dungwi pasi.
21Wa mwana wangu, usunge zeru
yeneko ndi kughanaghana kwamampha;
vingatayananga nawe cha kuviwona,
22ndipo vikaŵanga umoyo wa mzimu wako
ndi chakunozge khosi lako.
23Po ndipo ukendanga mu nthowa
yako wakuvikirika ndipo lundi lako kuti likaguŵanga cha.
24Asani ukajanga pasi, kuti ukawopanga cha;
uchigona pasi tulo twako tukanowanga.
25Ungopanga kofya kwa
mabuchibuchi pamwenga phasulu la muheni yo lichiza;
26pakuti Ambuya akaŵanga gomezgu lako
ndipo akasunganga rundi lako ku kukoreka.
27Ungakaniliyanga umampha kwaku
ŵeniwo utuŵayenere asani nkhwako kuwuchita.
28Ungakambanga cha ku muzengezgani wako,
“Rutanga, ndipo ukazi so, mawa ndazampaska,” penipo we nacho.
29Ungamulongosoliyanga chiheni
muzengezgani wako mweniyo waja pamoza nawe kwamagomezgeka.
30Ungalimbananga ndi munthu kwambura kafukwa,
penipo walivi kukuchitiya kaurwani.
31Reka kuchitiya sanji munthu wa ndeu
ndipo ungasankhangapo nanga njimoza ya nthowa zake cha;
32pakuti munthu wakupuruska mbukazuzi ku Ambuya,
kweni ŵakunyoroka ŵemu chigomekezgu chawo.
33Thembu la Ambuya le pa nyumba ya muheni,
kweni atumbika kuja kwa murunji.
34Ku ŵakuyeya, iyo ngwakuyeya,
kweni ku ŵakujiyuyuwa walongo mwaŵi.
35Ŵazeru ŵakaharanga ulemu,
kweni ŵakupusa ŵaronde chilengesku.
Bible Society of Malawi