Nthanthi 4
4
Chenjezgu lakuti ŵapenji zeru, ndi ŵese nthowa za ŵaheni
1Avwani, mwa ŵana, sambizgu la auskemwe,
ndipo mutegherezge, alinga musakate zeru;
2pakuti nditukupaskani masambiru gha ujazi wamampha:
mungatayanga sambizgu langu cha.
3Penipo ndenga mwana pamoza ndi ada,
wakoloŵa, ndichiŵa ine pe ndija mu maso gha ama,
4ada ŵangundisambizga, ndipo ŵanguti kwaku ine,
“Uchite kuti mtima wako ukoreske mazu ghangu;
sunga marangu ghangu, ndi uje wamoyo;
5ungaluwanga, ndipo
ungang'anamukangako ku mazu gha mlomo wangu.
Uronde zeru, uronde kuwamo.
6Ungayirekanga cha, ndipo
yikakusunganga; uyanjenge, ndipo yikakulongozganga.
7Kwamba kwazeru ndi uku: Ronda zeru,
ndipo che chose cho ungaronde, ronde kuwamo.
8Uyizirwiske kuŵa pachanya, ndipo yikakukuzganga;
yikakutumbikanga asani utiyivumbatiya.
9Yikavwalikanga pa mutu wako nkhata ya maluwa yakwenere;
yikaŵikangapo pako mphumphu yamampha.”
10Yivwa, wa mwana wangu, ndipo
ronde mazu ghangu alinga kuti virimika vya umoyo wako viŵenge vinandi.
11Ndakurunguchizga nthowa ya zeru;
ndakurongozga mu nthowa za kunyoroka.
12Uchenda, muchapu wako kuti ukalandanga cha;
ndipo asani uchimbiya, kuti ukaguŵanga cha.
13Koreska chisambizgu, kutaya cha;
uchivikiriye, pakuti ndicho umoyo wako.
14Ungaserenga mu nthowa ya ŵaheni cha,
ndipo ungendanga mu nthowa ya ŵanthu ŵaheni cha.
15Uyithaŵe, kuya mwaku yo cha;
tuwako kwaku yo dumuwanga lutanga.
16Pakuti ŵangagona cha kwambura kuti ŵachita chiheni;
ŵapokeka tulo kwambura kuti ŵaguŵiska munthu.
17Pakuti ŵaturgha chiŵande cha uheni ndi ŵatuma vinyo wa ndeu.
18Kweni nthowa ya ŵarunji ye uli mbukweru wa matandakucha
weniwo utuwiya-tuwiya mpaka kwachiya limu.
19Nthowa ya muheni ye uli ndi mdima wamunkhorwi;
kuti ŵaziŵa cha chenicho ŵaguŵamo.
20Wa mwana wangu, tegherezga ku mazu ghangu;
ŵika gutu lako ku makambidu ghangu.
21Ungaghazomerezganga kuthaŵako ku maso ghako cha;
ughasungengi mukati mu mtima wako.
22Pakuti yigho mbumoyo kwaku mweniyo watighasaniya,
ndipo nkhuchizga ku nyama yake yose.
23Sunga mtima wako ndi kulereska kose,
pakuti kwaku gho kupopoma tumisinje twa umoyo.
24Tuzgako kwako mlomo wakubende,
kakambidu kose kaheni kaŵi kutali kwaku iwe.
25Maso ghako ghalereske kwakudunjika kunthazi,
ndipo kuwona kwako kunyolokenge paurongo pako.
26Uphwere nthowa ya marundi ghako,
po ndipo nthowa zako zose zikaziŵikanga nadi.
27Ungapatukiyanga ku marghe pamwenga ku maze;
tuzgako rundi lako ku uheni.
Bible Society of Malawi