Nthanthi 2
2
Wamampha mtima, ndi chanduwu chake cha zeru
1Wa mwana wangu, asani urondiyenge mazu ghangu
ndi kusunga ukongwa marangu ghangu,
2kujariya gutu lako kuvwiska zeru ndi kuŵika mtima wako ku vinjeru;
3inya, asani uliliyenge chinjeru
ndipo usoskenge mazu ghako kuti uŵe ndi zeru;
4asani uzipenjenge nge ndi siliva ndikuzipenja uli upenja mbiku yakubisika;
5po ndipo ukaziŵanga kopa Ambuya ndi ukasaniyanga zeru yaku Chiuta.
6Pakuti Ambuya apaska zeru;
ku mlomo wawo kutuwa zeru ndi kuwamo;
7aŵikiya mbiku ya chinjeru chakufikapo ŵakunyoroka;
iwo ndi nguru kwaku ŵeniwo ŵatenda mu urunji;
8ŵakuvikiriya nthowa za cheruzgu ndi kusungirizga nthowa ya ŵatuŵa ŵawo.
9Po ndipo mukawangamo urunji ndi cheruzgu chirunji ndi kunyoroka,
kwa nthowa yose yamampha;
10pakuti zeru yikazanga mu mtima wako,
ndipo chinjeru chikaŵanga chakukondweska ku mzimu wako;
11kughanaghana kurunji kukakuphwerenga;
kuwamo kukakurongozganga,
12kukutaska ku nthowa ya uheni, ku ŵanthu ŵakukamba kwakulandizga,
13ŵeniwo ŵajowo nthowa za
kunyoroka kwachenda mu nthowa za mdima,
14ŵeniwo ŵakondwere mu kuchita uheni
ndi kusekere mu kulandizga kwa uheni;
15ŵanthu ŵeniwo nthowa zawo zakunyongoloka,
ndipo mbakupatika mu nthowa zawo.
16Ukataskikanga ku munthukazi
muyaghayagha ku mchenjezi ndi mazu ghake ghakoloŵa,
17mweniyo wareka bwezi la
usungwana wake ndipo waluwa phanganu laku Chiuta wake;
18pakuti nyumba yake yisere pasi ku nyifwa,
ndi nthowa zake ku miduzi;
19palivi yumoza wakuya kwaku iyo
mweniyo waweko chingana nkhuti wasaniya so nthowa za umoyo.
20Viyo iwe ukayendanga mu nthowa
ya ŵanthu ŵamampha ndi kujaliliya mu ŵagurwi ŵa ŵarunji.
21Pakuti ŵakunyoroka ŵakajanga mu charu,
ndipo ŵanthu ŵakujisunga
umampha ŵakajaliriyanga mwaku cho;
22kweni ŵaheni ŵakadumulikangako ku charu cho,
ndipo ŵakunyenga ŵakazuwikangamo.
Bible Society of Malawi