Nthanthi 25
25
Nthanthi zaku Solomoni zo zinguwunjikika pa nyengo ya karonga Hezekiya
1Izi nazo so ndi nthanthi zaku Solomoni zenizo ŵanthu ŵaku Hezekiya karonga waku Yuda ŵangutoko.
2Mbunkhankhu waku Chiuta kubisa vinthu,
kweni unkhankhu wa ŵakaronga nkhupenja kubowozga vinthu.
3Mo kuchanya kukulengeke utali, charu chapasi ncha ndimba,
viyo muwongo wa ŵakaronga ngwambura mapenjeka.
4Tuzgako chifuvya ku siliva, ndipo wakusula wakaŵanga ndivisulu vya ngaraŵa;
5tuzganipo wamphulupulu paurongo pa karonga,
ndipo chitengo chake chikakuzgikanga mu urunji.
6Reka kujiŵika kurongo pa maso pa karonga
pamwenga kuma mu malo gha wapachanya;
7pakuti nkhwamampha kunenereka kuti, “Kwerekuno,”
kwakuruska kukupauskiya pasi mu maso gha mwana wa karonga.
8Chenicho jiso lako lawona ungachitolenga mwafulumira mu bwalo,
pakuti uchitengenje pa umali,
penipo muzengezgani wako wachikulengeska?
9Kamba mlando wako ndi muzengezgani wako mweneko ndipo reka kusumuwa chakuubende chamunyako,
10vinu yo wakuvwenge wangakulengeska,
ndipo ukari wako kuti ukamaranga cha.
11Mazu ghakukambika kwakwenere ghe uli ndi vipasi vya golide mu kuzganga kwa siliva.
12Uli ndi mphete ya golide pamwenga kakuzganga ka golide
ndimu walili wakuchenya wazeru ku gutu lakutegherezga.
13Uli nkhuzizira kwa matalala mu nyengo ya yakuvuna ndimu
yilili nthumi yamagomekezgeka kwaku ŵeniwo ŵatiyituma,
yiziziriska mzimu wa ambuyake.
14Uli ndi mitambo ndi mphepo yambura vuwa,
ndimu walili munthu yo watijikuzga chifukwa cha chaulera
chenicho iyo kuti watichipaska cha.
15Ndi kuzika mweruzgi wangaziŵa kuchichizgika,
ndipo lilime lakolowa likaswanga mwa.
16Asani wasaniya uchi yimwa waka wakukwana vinu
ungavimbirwa nawo ndi ungaukuwa.
17Lundi lako lipumuwenge mu nyumba ya muzengezgani wako,
vinu wangavuka nawe ndi wangakutinkha.
18Munthu mweniyo watole chisimisimi cha utese pa muzengezgani wake,
we uli ndi nthonga ya nkhondo, pamwenga lipanga pamwenga muvwi wakuthwa.
19Kugomekezga mu munthu wambura chivwanu
mu nyengo ya suzgu kwe uli ndi jinu liheni pamwenga rundi lenilo literemuka.
20Mweniyo wambiya zisumu ku mtima uzituwe uli ndi mweniyo wazuwa chivwalu mu zuŵa lakuzizila ndipo uli ndi vinyo wakusasa pa chironda.
21Asani wakupindikana wako wendi nja, amupaske kurgha warghe;
ndipo asani wendi nyota, umupaske maji wamwe;
22pakuti iwe ukalundanga maka ghamoto pa mutu wake,
ndipo Ambuya ŵakakupaskanga mphoto.
23Mphepo yaku nkhonde yituza ndi vuwa,
ndipo lilime lakusuza, lirereska kwa ukari.
24Nkhwamamphaku kuja pa chingodya cha nyumba pachanya
kwakuruska mu nyumba yakujamo ndi munthukazi wakuŵereŵeta-ŵereŵeta.
25Uli ndi maji ghakuzizira ku mtima wa nyota
ndimu ghalili makani ghamampha ghakutuliya kutali chakubwibwituka.
26Uli nchisima chakubwibwituka chakumata pamwenga chisima chakukazuzgika,
ndimu walili munthu murunji mweniyo wandere nthowa paurongo pa ŵamphulupulu.
27Kuti nkhwamampha cha kurgha uchi unandi,
viyo ulekenge kukamba mazu ghakurumba.
28Munthu wambura kujitinthawe uli ndi msumba wo ŵaswa ndi wajowoleka wambura malinga.
Bible Society of Malawi