Nthanthi 26
26
1Ulindi matalala pa chipwepwe pamwenga vuwa pa chivuna viyo ulemu kuti utumuyana cha mubereŵeza.
2Uli ndi kaŵeruŵeru mu mwenera wake,
uli ndi kaŵeruŵeru mukuphuluruka kwake,
thembo lo ndambula kafukwa kuti likonda cha.
3Liswazu la kavalo, chakukoloŵeke mu mphunu cha mbunda,
ndi ndodo ya pa msana wa ŵabereŵeza.
4Ungamwamukanga mubereŵeza kwakuyana ndi ubereŵeza wake cha,
vinu ungaŵa uli ndiyo iwe wamweni.
5Wamuke mubereŵeza kwakuyana ndi ubereŵeza wake,
vinu wangaŵa wa zeru mu maso gha mweneko.
6Mweniyo watuma uthenga mu janja la mubereŵeza
watijidumuwa marundi gha mweneko, ndipo watumwa nkhaza.
7Uli ndi marundi gha wakapunduka, ghenigho ghaning'ina waka,
ndimu yilili nthanthi mu mlomo wa ŵabereŵeza.
8Uli ndi mweniyo wamangiriya mwa mu luzi lakupong'e
ndimu walili mweniyo wapaska ulemu kumubereŵeza.
9Uli ndi munga weniwo usere mu janja la wakuloŵe,
ndimu yilili nthanthi mu mlomo wa bereŵeza.
10Uli ngwakupong'a uta yo walasa we yose,
ndimu walili yo wakumba mubereŵeza mwenda nthowa pamwenga wakuloŵe.
11Uli ndi garu yo wawere pa maukuzi ghake
ndimu walili mubereŵeza mweniyo wawerezgapo ubereŵeza wake.
12Kumbi utimuwona munthu yo ngwa zeru mu maso gha mweneko?
Gomezgu lilipo likuruku kumubereŵeza kwakuruska kwaku iyo.
13Mukata watiti, “Mwe nkharamu mu museu!
Mwe nkharamu mu miseu!”
14Mwenimo chisasa chinderere pavisulo vyakumangiya vyake,
mukata nayo so pa chita chake.
15Mukata wabizga janja lake mumbale, litumutonda kuliwezge ku mlomo.
16Mukata ngwazeru ku mu maso gha mweneko kwakuruska so
ndi ŵanthu nkhonde ndi ŵaŵi, wo ŵangamuka kwakuyamo.
17Mweniyo waseremu mu ndeu yeniyo kuti njake cha we uli ndiyo wako makutu gha garu wakudumuwapo waka.
18Uli ndi munthu wakufuntha mweniyo wapong'a visulo vya moto, mivwi, ndi nyifwa,
19ndi munthu mweniyo wapusika muzengezgani wake ndi watiti,
“Ndipekura waka!”
20Chifukwa cha kusoŵa nkhuni moto uzimwa;
ndipo penipo palivi wakusuza chiwawa chimara.
21Mo ghaliri maka ku fukunyira lamoto ndi nkhuni ku moto viyo
ndimu walili munthu wa chiwawa pakuyuska ndeu.
22Mazu gha wakusuza ghe uli nkhurgha kwakusamuka;
ghasere mu viŵalu vya mukati limu vya liŵavu.
23Uli nkhung'anima kwa kubwalo kwachiyaŵi cha dongo
ndimu yilili milomo yakungozga yo yendi mtima uheni.
24Mweniyo watinkha wabisa ndi milomo yake
ndipo wabisirizga kupusika mu mtima wake;
25Wachikamba kwa wezi, ungavwananga nayo cha,
pakuti mwe vyaukazuzi nkhonde ndi viŵi mu mtima wake;
26chingana kutinkha kwake kwabisika ndi uchenjezi,
mphulupulu yake yikavumbulikanga pa unganu.
27Mweniyo wakumba zenje wakawangamo,
ndipo mwa ukamuweriyanga mweniyo wayamba kuwukunkhuzga.
28Lilime litesi litinkha ŵakulimbana nalo,
ndipo mlomo wakunyengere uchita phasulu.
Bible Society of Malawi