Nthanthi 24
24
1Ungaŵachitiyanga sanje cha ŵanthu ŵaheni,
chingana nkhunweka kuŵa nawo pamoza;
2pakuti miwongo yawo yipanga ukari
ndipo milomo yirongoro za urwani.
3Nyumba yizengeka ndi zeru,
ndipo ndi kuwamo yisungika;
4ndi chinjeru vipinda vizazika
ndi uromba wose wakuzirwa ndiwakukondweska.
5Munthu wa zeru ngwakulimba kwakuruska munthu wanthazi,
ndipo munthu wa chinjeru waruska mweniyo wendi nthazi,
6pakuti ndi urongozgi wa zeru ungaziŵa kupota nkhondo yako,
ndipo mu unandi wa ŵakupangizga mwe upundi.
7Zeru yitumuŵiya yizitu mubereŵeza;
mu likomo kuti wajura mlomo wake cha.
8Yo waghanaghana kuchita chiheni,
wakadanikanga muyuska-urwani.
9Kupangika kubereŵeza ndi mphulupulu
ndipo wakunyoza mbukazuzi ku ŵanthu.
10Asani ulakatuka mu zuŵa lasuzgu
nthazi yako njimana.
11Pozomoska ŵeniwo ŵatoleke ku nyifwa;
siya ku vuli ŵeniwo ŵaguŵa wachiya kukubayika.
12Asani utiti, “Ehe tengavi kuchiziŵa ichi,”
kumbi mweniyo wapima mtima,
kuti watichiziŵa cha chenichi?
Kumbi mweniyo wasunga mzimu wako kuti watichiziŵa cha chenichi,
ndipo kumbi iyo kuti wakalipilanga munthu kwakuyana ndi nchitu yake cha?
13Wa mwana wangu, urghenge uchipa kuti ngwamampha,
ndipo vyakunthona vya chisa cha njuchi vya kusamuka mu mlomo wako.
14Uziŵe kuti ndimu yilili zeru kumzimu wako;
asani wayibowozga, kukaŵanga umukucha weneko,
ndipo gomezgu lako kuti likadumulikangako cha.
15Ungabisamanga kuŵeramiya cha uli ndi munthu wamphulupulu yo waŵeramiya wakurunjika;
ungachitanga nkhaza ku nyumba yake cha,
16pakuti munthu murunji watuwankhonde ndi kaŵi ndipo wayuka so;
kweni ŵamphulupulu ŵathereskeka ndi suzgu.
17Ungakondwerenga asani wakupindikana wako watuwa,
ndipo mtima wako ungasekeriyanga wachiguŵa;
18Vinu Ambuya angawonako ndiangakalipa,
ndi kutuzgako kwaku iyo ukari wawo.
19Ungatenthemanga cha chifukwa chaŵakuchita uheni,
ndipo ungachitiyanga sanje wamphulupulu;
20pakuti munthu muheni walivi umukucha;
nyali pa wamphulupulu yikazimwikanga.
21Wa mwana wangu, opanga Ambuya ndi karonga,
ndipo ungarekanga kuvwiya wose ŵaŵi;
22pakuti suzgu yakutuwa kwaku wo yikazanga kwa mabuchibuchi,
ndipo njani watiliziŵa phasulu lenilo likatuwanga kwaku wo ŵaŵi viyo?
23Yagha nagho ndi mazu ghakukamba ŵazeru.
Kweruzga kwambura kufikapo kuti nkhwamampha cha.
24Mweniyo watiti ku wamphulupulu,
“Ulivi mlando,” wakatembekanga ndi ŵanthu, kutinkhika ndi mitundu;
25kweni ŵeniwo ŵachenya ŵamphulupulu ŵakaŵanga ndi kukondwa,
ndipo thumbiku la mampha likaŵanga paku wo.
26Mweniyo watamuka kwakurunjika wafyofyontha milomo.
27Rongosole kubwalo nchitu yako ujirongosole vyose vyaku muunda,
ndipo pavuli pake uzenge nyumba yako.
28Ungachitiyanga ukaboni wakususkamuzengezgani wako kwambura kafukwa,
ndipo ungapusikanga cha ndi milomo yako.
29Ungakambanga cha kuti, “Ndikamuchitiyanga uli ndimo iyo wachitiya kwaku ine;
ndikamuwezgiyanga yo munthu paku cho wachita.”
30Ndingudumuwa pa munda wa mukata,
pa munda wa mphereska wa munthu wambura maghanoghanu;
31ndipo ehe, wose unguŵinda ndi minga;
charu chinguŵinda ndi kabata,
ndipo lisitu lake la mya lingubwangandukiya pasi.
32Ndipo ndinguwona ndipo ndinguchighanaghana;
ndingulereska ndinguronda sambiru.
33“Tulo tumanavi, kusiwa kumanavi,
kupeta manja kamanavi kupumuwa,”
34ndipo ukavu ukazanga pako uli ngwakupoka,
ndipo kusoŵa uli ndi munthu wakuŵa ndi vidya vyakurwiya.
Bible Society of Malawi