Nthanthi 1
1
Vyakuchitiya nthanthi
1Nthanthi zaku Solomoni, mwana waku Davidi, karonga waku Yisraele:
2Alinga ŵanthu ŵaziŵe zeru ndi chisambizgu,
kuwamo mazu gha vinjeru,
3kulonde chisambizgu mu machitidu gha zeru urunji,
cheruzgu, kusunga dangu.
4Alinga kuti ŵakuzimbwa ŵapaskike zeru
zeru ndi maghanoghano ku ŵampupuka,
5munthu wa zeru nayo wavwe ndi wakuskiyeko masambiro,
ndi munthu wakuwamo wapenje umisili,
6kuwamo nthanthi ndi kang'anamulidu kake,
mazu gha ŵazefu ndi vyakuzizika vyawo.
Munthu kuti wazomerezga wakwananga kuti wamurongozgi cha
7Kopa Ambuya ndiku kwamba kwa zeru;
ŵakupusa ŵayeya chinjeru ndi visambizgu.
8Yivwa wa mwana wangu chisambizgu cha ausu;
ndipo ungakananga kusambizga kwa anyoko;
9pakuti ivi ndi mwenera wa mutu wako
ndi mukanda wa khosi lako.
10Wa mwana wangu, asani ŵaheni
ŵatukunyenga ungazomelanga cha.
11Asani watiti, “Zanga pamoza nafwe,
tikakhazge kudiska ndopa, tikakhazgi ŵambura kafukwa,
12tiŵameze ŵamoyo uli ndi muunda,
ŵamphumphu, uli ndi wo ŵasikiya mu zenje;
13tikasaniyanga chuma chose cha
mutengo ukuru, tikazazanga nyumba zidu ndi vyakuskoŵa;
14ubatikana nafwe pamoza
ifwe tose tikaŵanga ndi chikwama chimoza.”
15Wa mwana wangu, reka kwenda pamoza nawo mu nthowa
tuzgako rundi lako ku nthowa zawo;
16pakuti marundi ghawo ghachimbiriya ku uheni,
ndipo ŵatinthimikiya kwachidira ndopa.
17Pakuti chrepa chithyika kwa waka mu maso gha kayuni ke kose,
18kweni ŵanthu yaŵa ŵakhazga ndopa zaŵeneko,
ŵabisamiya ma umoyo gha ŵeneko,
19umu ndimu zilili nthowa zaku wose ŵeniwo ŵasakatiya mu mbanda
zituzgapo umoyo wa ŵeneko ŵa vinthu.
Chenjezgu la zeru
20Chinjeru chilongo mu museu,
mu misika chisoska mazu ghake;
21pa vimati pachanya chiliya pakweru;
pa kuserere pa malikomo gha msumba chirongoro,
22“Mpaka zuŵanji, mwaŵana, mwanjenge vya chiwanamana?
Mpaka zuŵanji ŵakutafura ŵakakondwerenga mu kutafura kwawo
ndi ŵakupusa kutinkha zeru?
23Phwereni kuchenjezga kwangu, ehe,
ndikapunguliyanga maghanughanu, ghangu kwaku imwe;
ndikaziŵiskanga mazu ghangu kwaku imwe.
24Chifukwa ndingudana ndipo mungukana kundivwa,
ndatambaluwa janja langu ndipo palivi yumoza yo waphweleko,
25ndipo mwakana fundu zangu zose,
ndipo mulivi kuronde nanga
ndimoza chenjezgu langu,
26nani so ndikasekanga pa suzgu yinu
ndikahoyanga penipo mukawopanga,
27penipo mantha ghatumupwetekani,
uli ndi lirondo, ndipo suzgu yinu yichiza uli ndi kavuluvulu,
penipo suzgu yikuru ndi chitima vyaza paku imwe.
28Pa nyengo yo ŵakadananga kwaku ine; kweni kuti ndamukenge cha:
ŵakandipenjanga kwarwana kweni kuti ŵakandibowozganga cha.
29Chifukwa ŵangutinkha zeru ndipo kuti ŵangusankha kopa Ambuya cha,
30ŵangukana kuronda nanga njimoza ya fundu zangu,
ndipo ŵanguyuyuwa chenjezgu langu,
31chifukwa cho ŵakarghanga chipasi
cha nthowa yawo ndi kuŵa ŵakuguta ndi fundu za ŵeneko.
32Pakuti ŵanamana ŵabayika ndi nthowa yawo yachiwerevuli,
ndipo kujikhorwa kwaŵakupusa kutuŵananga ŵeneko;
33kweni mweniyo wategherezga
kwangu wakajanga pakukho ndipo wakaŵanga pa uyuyu, wambura kutenthema chiheni.”
Bible Society of Malawi