Nthanthi 19
19
1Wamamphaku ndi munthu mukavu mweniyo watenda mu ukongorekwa,
kwakuruska munthu mweniyo ngwakurandizga mu kurongoro ndipo ngwakupusa.
2Kuti kuyamu cha kuti munthu wajenge wambura chinjeru,
ndipo mweniyo wachita fulumila ndi marundi ghake wataya nthowa yake.
3Penipo ubeleŵeza wa munthu utole nthowa yake ku phasulu,
mtima wake ukalipiya Ambuya.
4Uromba utuza ndi mabwezi ghafya ghanandi,
kweni munthu mukavughatu muthaŵa mabwezi ghake.
5Kaboni mutesi kuti walekenge kulangika cha,
ndipo mweniyo wakamba mautesi kuti wathaŵenge cha.
6Ŵanandi ŵapenja mwaŵi wamunthu wakupaska kwawezi,
ndipo we yose ndibwezi la munthu mweniyo wapaska vyaulera.
7Ŵana ŵanyake wose ŵa mukavu ŵatimutinkha;
katazi mabwezi ghake ndigho gharuska kumunthaŵa,
wati ŵandondoloska ndi mazu kweni kuti watuŵa nagho cha.
8Mweniyo wasaniya zeru watijanja;
mweniyo wasunga kuwamo wakasakatanga.
9Kaboni mutesi kuti warekenge kulangika cha,
ndipo mweniyo wakamba mautesi wakafwanga.
10Kuti kutumwenere cha wakupusa kuja mu vyakunozga,
mphanyiku kamanavi kuti muŵanda wausi ŵana ŵakaronga.
11Ghanaghanu lamampha likanizga munthu kukara ruŵi,
ndipo mbunkhankhu wake, kugowoke kunanga.
12Ukari wa karonga we uli nkhukoroma kwakamanakamana kwa nkharamu,
kweni lisungu lake le uli ndi dungwi pa uteka.
13Mwana mubereŵeza ndi phasulu ku wiske,
ndipo munthukazi wapa mlomo nkhunthona kwakukiyakiya kwa vuwa.
14Nyumba ndi uromba nchihara chakutuwa kwa uskeu,
kweni muwoli mukongorekwa waturiya ku Ambuya.
15Ukata utaya mutulo tuzitu, ndipo munthu mulesi wakakomwanga ndi nja.
16Mweniyo wasunga dangu wasunga umoyo wake,
mweniyo wayeya mazu wakafwanga.
17Mweniyo ngwa chifundu ku mukavu wakongoleska Ambuya,
ndipo akamulipanga pa nchitu yake.
18Langanga mwana wako penipo lichalipo gomezgu;
reka kuŵika mtima wako pa kwanangika kwake.
19Munthu wakukalipa ukongwa wakalipanga thumba;
pakuti asani mutimuleka, mukawerezganga kuchichita.
20Tegherezga cho atukupanga ndi ronde sambizgu,
alinga kuti usaniye zeru za mukucha.
21Maghanoghano nganandi mu muwongo wa munthu,
kweni nchenicho chakukhumba Ambuya cho chikachitikanga.
22Cho chikhumbikwa mu munthu nkhujithereska,
ndipo munthu musauchi ngwamamphaku waruska mutesi.
23Kopa Ambuya kurongozge ku umoyo,
ndipo mweniyo we nako waja ndi kukhorwa,
kuti urwani ukamuziyanga cha.
24Mukata wabizga janja lake mu mbali
ndipo kuti wakaliwezgiyanga ku mlomo nako cha.
25Puma wakunyoza, ndipo wauliuli wasambirenge kujitintha;
chenya munthu wakuwamo, ndipo wakanduwanga chinjeru.
26Mweniyo wachitiya nkhaza wiske ndi wadikiska nyina,
ndi mwana mweniyo walengeska ndipo watole kuchenya.
27Reka, wa mwana wangu, kuvwa kusambizga
kweniko kutukupatuwako ku mazu gha zeru.
28Kaboni wambura kwene wanyoza cheruzgu chirunji,
ndipo mlomo wa wamphulupulu uparuwa kwananga.
29Kususkika kulindizga wakunyoza,
ndi kukhwechuwa nkhwa ku musana kwa ŵabereŵeza.
Bible Society of Malawi