Nthanthi 18
18
1Mweniyo wakana ŵanasi wapenja kafukwa kakusosomolana,
kurwana ndi cheruzgu chose chakurunjika.
2Wakupusa waghanaghanako ndikuwamo cha,
kweni kuŵereŵeta makhumbu ghake pe.
3Asani mphulupulu yituza kunyoza nako kubulika;
ndipo pamoza ndi kuyeya patuza chilengesku.
4Mazu ghamu mlomo wa munthu ndi maji gha ndimba,
chisima cha zeru nkhamsinje kakupopoma.
5Kuti nchamampha cha kuŵa wakususka kumanavi wamphulupulu,
pamwenga kumuzgerera cheruzgu chamampha wakurunjika.
6Milomo ya wakupusa yituza ndi ndeu,
ndipo mlomo wake udana vikoti.
7Mlomo wa wakupusa ndi phasulo lake,
ndipo milomo yake viŵana ku mweneko yija.
8Mazu gha wakutokotezga ghachitauli nkhurgha kwakusamuka;
ghasere mu viŵaru vya mukati vya liŵavu.
9Mweniyo ngwakudembeleka munchitu yake
ndi mwana munyake waku yo waparghang'a.
10Zina la Ambuya ndi sonjo wakurama;
munthu murunji wachimbiriya mwenimo wabisama.
11Uromba wa musambasi ndi msumba wake wakukho,
ndipo we uli nchimati chitali chakumuvikiriya.
12Paurongo pa phasulu mtima wamunthu utijikuzga,
kweni kujiyuyuwa kutiya paurongo pa ulemu.
13Asani munthu watamuka wenga wandavwe,
nkhupusa kwake ndi soni.
14Mzimu wamunthu ukunthiyengepo matenda;
kweni mzimu wakusweka njani wanganyamuwa?
15Muwongo wa chinjeru upenja zeru,
ndipo gutu la wazeru lipenja chinjeru.
16Mpasku wamunthu utumulongosole iyo malo
ndipo utumutole paurongo pa ŵanthu ŵakuzirwa.
17Mweniyo wadanga kukonkhoska makani ghake waoneka uli warunjika
mpaka penipo munyake watuza ndi wafumbana nayo.
18Mphenduzga yimara suskanu ndipo yiteruzga
pakati pa ŵakupindana ŵanthazi.
19Mwana munyako yo waovyeka weuli ndi msumba wakukho,
kweni kubayana kwe uli ndi mphandu za linga.
20Munthu wakhorwa ndi chipasi chakutuwa mu mlomo wake,
wakhorwa ndi vyo milomo yasaniya.
21Nyifwa ndi umoyo vye munthazi ya lilime,
ndipo ŵeniwo ŵatilanja ŵakarghanga vipasi vyake.
22Mweniyo wasaniya muwoli wasaniya chinthu chamampha,
ndipo waronde mwaŵi ku Ambuya.
23Wakusauka warombaromba,
kweni muromba watumukiya phuzu.
24Ghalipo mabwezi ŵeniwo ŵachitauli ndi mabwezi
kweni pe bwezi lo libatikana pafupi kwakuruska mwana munyake.
Bible Society of Malawi