Nthanthi 17
17
1Chamamphaku nkhurgha kumanavi pamoza ndi chisisi,
kwakuruska nyumba yakuzala vyakurgha pamoza ndi ndeu.
2Muŵanda mweniyo wachita kwa zeru wakausanga
pa mwana mweniyo wachita kwachilengesku,
ndipo wakasanganangapo chihara uli njumoza wa ŵana ndi ŵana.
3Mumphika wakusungapo ngwa siliva ndipo ng'anjo nja golide,
ndipo Ambuya ŵatesa mitima.
4Wakuchita uheni wategherezga kumilomo ya mphulupulu;
ndipo mutesi wategherezga ku lilime lakusovya.
5Mweniyo wanyoza wakusauka watuka Mulengi wake;
mweniyo ngwakukondwa pa soka kuti walekekenge kulangika cha.
6Ŵazuku nchisoti cha ŵakukota,
ndi unkhankhu wa ŵana ŵanthurumi mbauskeu.
7Kurongoro kwamampha kuti kumunozge cha wakupusa;
ndipo so kamanavi ndimu kulili kurongoro kwautesi ku mwana wa fumu.
8Vinda yenge ndi mwa wa mayelamu maso ghaku mweniyo watiyipereka;
kweniko kose watiya wasakata.
9Mweniyo wagowoke kulakwa wapenja chanju,
kweni mweniyo wawerezgapo chifukwa wapatuwa bwezi lake.
10Kuchenya kusere pasi ukongwa mumunthu wakuwamo
kwakuruska mbunu machumi pe chumi pa wakupusa.
11Munthu muheni wapenja chigaluka pe,
ndipo muthenga mukari ŵakamutumiyanga wakumikana nayo.
12Mphanyi munthu wangawona chinyama cha biyere chenicho chapokeka ŵana ŵake,
kwakuruska wakupusa mu kupusa kwake.
13Asani munthu wawezge uheni pa umampha,
uheni kuti ukatuwangako cha ku nyumba yake.
14Kwamba kwa ndeu kwe uli nkhutuzga maji,
viyo tuwapo ndeu yenga yindayambe.
15Yo wazomerezga wa mphurupuru ndi yo wasuska wakurunjika wose
ŵaŵi mbakukozgana mu ukazuzi ku Ambuya.
16Chifukwa nchine chakuti wakupusa
waŵi ndi malonda mu janja lake kugula zeru,
penipo walivi maghanughanu?
17Bwezi litanja nyengo zose,
ndipo mwana munyako wakupapikiya suzgu.
18Munthu wambura maghanoghano wapaska chikoli,
ndipo watuŵa chikoli mu maso gha muzengezgani wake.
19Mweniyo watanja kusovya watanja ndeu;
mweniyo wachita khomo lake kuŵa litali wapenja phasulo.
20Munthu wa maghanughanu gha kubende kuti wasakata cha,
ndipo mweniyo wendi lilime lakulandizga watuŵa mu suzgu.
21Mwana wakupusa wapaska chitima awiske;
ndipo wiske wa wakupusa walivi likondwa.
22Mtima wakusangaruka ndimunkhwara wamampha,
kweni mzimu wa chitima umizga viwanga.
23Munthu wa mphulupulu waronda vinda ndi mtima wose
kutimbanizga nthowa za cheruzgu chirunji.
24Munthu wakuwamo warazga chisku chake pa zeru,
kweni maso gha wakupusa ghe pa umari wa charu chapasi.
25Mwana wakupusa wapaska chitima awiske
ndi kuŵaŵa ku nyina yo wangumupapa.
26Kulipiska munthu murunji kuti nkhwamampha cha;
kupuma vikoti ŵanangwa nkhulakwa.
27Mweniyo wakanizga mazu ghake we ndi chinjeru;
ndipo mweniyo wendi mzimu wakuzizira ndi munthu wakuwamo.
28Chingana ngwakupusa yo wajachisisi waneneka kuti ngwa zeru,
penipo wajara milomo yake ŵatiti ngwa chinjeru.
Bible Society of Malawi