Nthanthi 16
16
1Vyakulongoso vya muwongu vya munthu,
kweni kwamuka kwa lilime kutuwa ku Ambuya.
2Nthowa zose za munthu zakutowa mu maso gha mweneko;
kweni Ambuya wapima mzimu.
3Pereka nchitu yako ku Ambuya,
ndipo vyakulongoso vyako vikachitikanga.
4Ambuya ŵakuchita vinthu vyose ndikafukwa kake,
chingana ngwa mphulupulu chifukwa cha zuŵa la suzgu.
5We yose mweniyo ngwakujikuzgangwa ukazuzi ku Ambuya;
ziŵiska kuti warekenge kulangika cha.
6Pakujithereska ndi kugomekezgeka mphulupulu yilipika,
ndi so ndi kopa Ambuya munthu wareka uheni.
7Asani nthowa za munthu zikondwereska Ambuya,
iwo ŵachitiska ŵakupindikana ŵake nawo kuŵa nayo ndi chimangu.
8Nkhwamamphako kamanavi pamoza ndi urunji
kwakuruska kuronde vyuma vinandi pamoza ndi kupusika.
9Muwongo wa munthu urongoso nthowa yake,
kweni Ambuya arongozga muchapu wake.
10Kudumuwa makani kwakufiskika kwe pa milomo ya karonga,
mlomo wake kuti ulakwa cha mu cheruzgu.
11Mweso wambura kupusika ndi masikelo vya Ambuya;
mauzitu ghose ghamu thumba ndi nchitu yawo.
12Mbukazuzi ku ŵakaronga kuchita uheni,
pakuti chitengo chikhozgeka ndi urunji.
13Milomo yirunji ndi likondwa lakaronga,
ndipo watanja mweniyo wakamba chenicho nchamampha.
14Ukari wakaronga ndi thenga la nyifwa ndipo munthu wazeru waupozgenge.
15Mu ukweru wachisku cha karonga mwe umoyo,
ndipo mwaŵi wake we uli ndi mitambo yo tituza ndi vuwa yakudanga.
16Kusaniya zeru nkhwamampha kwakuruska golide
kusaniya kuwamo nkhwamampha kwakuruska siliva.
17Nthowa yikuru ya ŵakurunji kayinganamukiya kunyake kutuwako ku uheni;
mweniyo wavikiriya nthowa yake wasunga umoyo wake.
18Kujikuzga kudanjiya paurongo papharghaniku,
ndi mtima wakujikuzga paurongo pa kuwa.
19Nkhwamamphaku kuŵa ndi mzimu wakujiyuyuwa pamoza ndi ŵasauchi,
kwakuruska kugaŵana vyachiskoŵa ndi wakukondwa.
20Mweniyo waphwere mazu wakasakatanga ndipo wakukondwa,
ndi mweniyo wagomekezga mu Ambuya.
21Wa zeru mu mtima wadanika munthu wakusanda,
ndipo kurongoro kwakukondweska kukuzga kuchichizga.
22Zeru nchisima cha umoyo kwaku mweniyo we nayo,
kweni kupusa ndi likhwechu la ŵakupusa.
23Muwongo wa wazeru uchita kurongoro kwake kuŵa cheruzgu,
ndipo kusazgiyako kuchichizga ku milomo yake.
24Mazu ghakukondwereska ghachita uli nchisa cha njuchi,
kunowa ku mzimu ndi umoyo wamampha ku liŵavu.
25Yilipo nthowa yeniyo yiwoneka uli njamampha ku munthu,
kweni umari wake ndi nthowa yaku nyifwa.
26Nja ya wanchitu yitumutataliya,
mlomo wake utumchichizga. 27Munthu wa uliuli wafinga uheni,
ndipo kurongoro kwake kwe uli ndi moto wakocha.
28Munthu wakupuruska watandaniska ndeu,
ndipo wakutokotezga wapatuwa mabwezi ghakuziŵirizgana nagho.
29Munthu wa ndeu wapusika mzengezgani wake,
ndipo watimurongozga mu nthowa yeniyo kuti njamampha cha.
30Mweniyo wakupiya maso ghake warongoso vinthu vyakupuruska,
mweniyo wasunama milomo yake wachitiska uheni.
31Mutu wa nyivu nchisoti chaunkhankhu;
chandukiya mu umoyo wa urunji.
32Mweniyo ngwakuura kukwiya ruŵi ngwamamphaku ku wanthazi,
ndipo mweniyo wateruzga mzimu wake waruska mweniyo wakwamphuwa msumba.
33Mphenduzga yichitika pa chigha,
kweni cheruzgu chose chituwa ku Ambuya.
Bible Society of Malawi