Nthanthi 13
13
1Mwana wazeru watuvwa kurunguchizga kwa awiske,
kweni wakuyeya kuti wategherezga ku kuchenya cha.
2Ku chipasi cha mlomo wake munthu wamampha waturgha umampha,
kweni khumbo la wakunyenga ndaku ndeu.
3Yo wavikiriya mlomo wake wasungirizga umoyo;
yo wajura kwakuyasama milomo yake watuza ku pharghaniku.
4Mzimu wa mukata upemphapempha ndipo kuti uronde kanthu cha,
penipo mzimu wa wakutakataka upaskika usambasi.
5Munthu murunji watinkha utese, kweni munthu wa mphulupulu
wachita kwasoni ndi kwakulengeska.
6Urunji utumuvikiriya mweniyo nthowa yake njakunyoroka,
kweni uheni ugoda wamphulupulu.
7Munthu yumoza watiji yikamo kuti ndi msambasi, kweni walivi kanthu;
munthu munyake watijiyikamo kuti ndi mukavu,
kweni we ndi usambasi unandi.
8Thumba lakuwombole umoyo wa munthu mburomba wake,
kweni munthu wakusauka walivi nthowa yakuwombokwe.
9Ukweru wa murunji ukondwere,
kweni nyali ya wamphulupulu yikazimwikanga.
10Ndi mutafu wambura kuphwere wachita ndeu,
kweni ŵeniwo wazomera kuŵapanga fundu ndi zeru.
11Uromba wakuwutole pa befu ukamaranga,
kweni mweniyo waunjika kamanakamana wawandaniskenge.
12Gomezgu lambura kufiskika litamiska mtima,
kweni khumbu lakufiskika ndi muti waumoyo.
13Mweniyo wayuyuwa mazu watijitole phasulu lamweneko,
kweni mweniyo wavwiya dangu wakarondenga mphoto.
14Kusambizga kwa wazeru nchisima cha umoyo,
alinga kuti munthu wapambani ndi viŵana vya nyifwa.
15Ghanaghano lamampha lisaniya mwaŵi,
kweni nthowa ya ŵambura kuvwana ndi phasulo lawo.
16Mu vinthu vyose munthu wakutakataka wachita ndi chinjeru,
kweni wakupusa wamemeza kupusa kwake.
17Muthenga muheni wachichizgiya ŵanthu musuzgu,
kweni muthenga wamagomezgeka watuza ndi kuchizga.
18Ukavu ndi chilengesku vituza kwaku mweniyo wakana kusambizgika,
kweni mweniyo waphwere kuchenyeka watumbikika.
19Khumbu lakufiskika ndakunowa ku mzimu,
kweni kutuwako ku uheni mbukazuzi ku wakupusa.
20Mweniyo watenda pamoza ndi ŵanthu ŵazeru, wasanduka kuŵa wa zeru,
kweni wakukwatikana ndi wakupusa wakapotekekanga.
21Soka lidikiskana ndi ŵaheni,
kweni kusakata kupaska mphoto kuwakurunjika.
22Munthu wamampha wasiya chihara ku ŵazuku ŵake,
kweni uromba wa muheni uwunjikikiya murunji.
23Charu chakutipuwa cha musauchi chimezga kurgha kunandi,
kweni chikukurwa chifukwa cha cheruzgu chiheni.
24Mweniyo wareka kuto ndodo watinkha mwana wake,
kweni mweniyo watumwanja watanja kumulanga.
25Murunji wendi vinandi kukhorweskanja yake,
kweni rufu la wamphulupulu lisoŵa kurgha.
Bible Society of Malawi