Nthanthi 14
14
1Zeru yizenga nyumba yake,
kweni kupusa ndi manja ghake kutiyipasuliya pasi.
2Mweniyo watenda mu kunyoroka watopa Ambuya,
kweni mweniyo ngwakupatuka mu nthowa zake watiŵayeya.
3Kurongoro kwa wakupusa ndindodo yapa msana pake,
kweni milomo ya ŵazeru yikaghasunganga.
4Kweniko kulivi ng'ombe kulivi mbuto;
kweni kurgha kwa kuzara kutuza ndi nthazi ya ng'ombe.
5Kaboni mukongolekwa kuti wanama cha,
kweni kaboni mutesi wapingiya maboza kubwalo.
6Wakunyoza wapenja kwa waka zeru,
kweni chinjeru nchiyuyu ku munthu wakuwamo.
7Mu kureke kuŵapo kwawakupusa,
pakuti penipa kuti mukumanapo ndimazu gha chinjeru cha.
8Zeru ya munthu wakutakataka nkhuteska nthowa yake,
kweni kupusa kwa ŵakupusa kupusika.
9Chiuta wayeya wamphulupulu, kweni wakunyoroka walonde mwaŵi wake,
10Mtima uziŵa kuŵaŵa kwa weneko,
ndipo palivi mlendo wasangana nawo likondwa lake.
11Nyumba ya wamphulupulu yikabwangandulikanga,
kweni hema la wakunyoroka likanozganga.
12Yilipo nthowa yeniyo yiwoneka uli njamampha ku munthu,
kweni umali wake ndi nthowa yaku nyifwa.
13Chingana ngwakuseka mtima ngwa chitima,
ndipo umari walikondwa nchisungu.
14Munthu wakulandizga wakazazikanga ndi chipasi cha nthowa zake,
ndipo munthu wamampha ndi chipazi cha nchitu zake.
15Nchunkhu munthu wavwana ndi vyose,
kweni wajiteska walereska kweniko watiya.
16Munthu wazeru wacheŵa ndipo watuwako ku uheni,
kweni wakupusa wataya kujikanizga,
ndi watuŵa mukata kuphwere.
17Munthu wakukara ruŵi wachita kwakupusa,
kweni munthu wa maghanughanu wazika.
18Nchunkhu munthu wapenja kupusa,
kweni wakuteska wavwalikika ndi chinjeru.
19Uheni ulamba pasi paurongo pa umampha,
wamphulupulu pa malikomo gha murunji.
20Wakusauka watinkhika chingana nkhu muzengezgani wake,
kweni wa chuma wendi mabwezi ghanandi.
21Mweniyo wayuyuwa muzengezgani wake ngwa mphulupulu,
kweni walikondwa ndi mweniyo wachita wezi ku wakusauka.
22Asi ŵalakwa wo ŵapangizga uheni?
Weniwo ŵapangizga umampha ŵakumana ndi kuyithereska ndi kugomekezgeka.
23Mu kutakataka kose mwechanduwu,
kweni kurongoro ŵaka kupaska ŵaka kukhumbira.
24Chisoti cha ŵazeru ndi zeru yawo,
kweni kupusa nkhuvwala kwa ŵakupusa.
25Kaboni muneneska wataska maumoyo,
kweni mweniyo wabwetuwa mautesi ngwakukombo.
26Mu kopa Ambuya munthu wendigomezgu la nthazi,
ndipo ŵana ŵake ŵakaŵanga ndi pakubisama.
27Kopa Ambuya nchisima cha umoyo,
alinga kuti munthu wapambane ndi viŵana vya nyifwa.
28Mu unandi ŵanthu mwe unkhankhuwa karonga,
kweni kwambura ŵanthu mwana wa karonga wanangika.
29Mweniyo wareka kukala ruŵi wendikuwamo kukuru,
kweni mweniyo ngwakukala ruŵiruŵi wakuzga kupusa.
30Muwongo wakuzika upaska umoyo ku nyama, kweni ukari uvundiska viwanga.
31Mweniyo wasauska munthu wakusauka watuka Mulengi wake,
kweni mweniyo ngwawezi ku wakusauka watimutumbika.
32Wamphulupulu wathereskeka ndikuchita kwake kwa uheni,
kweni marunji wasaniya chakubisamamo chifukwa cha ukongorekwa wake.
33Zeru yija mu muwongo wa munthu wa wakuwamo,
kweni kuti yiziŵika cha mu mtima wa wakupusa.
34Urunji ukuzga khamu la ŵanthu,
kweni uheni nchilengesku kuŵanthu ŵe wose.
35Mteŵeti yo wachita kwa zeru wendi mwaŵi wa karonga,
kweni ukari wake utuwa paku yo watakataka kwakulengeska.
Bible Society of Malawi